Msana kova Adhamu ni Evha va di humile jaradhi ka Edheni, va ve ni vanana vo tala. Mwanana wawe wo khata i ve Kayini, wa wumbidi i ve Abhele. Kayini a txi thuma kota mdimi, se Abhele i ti m’dyisi wa tinvuta.

Ditshiku dimwani, Kayini ni Abhele va ningete maprezenti ka Jehovha. Wa tiziva ti to vathu va txi ma dhanisa kutxani maprezenti aya va nga txi ma ningela ka Jehovha? Va txi kha vona miphaxo mwendo miningelo. Jehovha a tsakete prezenti ya Abhele, kambe kha tsaka ngu prezenti ya Kayini. Eto ti mahile ti to Kayini e henya ngutu. Jehovha a ti tumbute ti to Kayini a ti henyile, se a m’gete ti to ngako a txo simama a di henyile a ndi na gwitisa ngu kumaha to biha. Kambe, Kayini kha engisa ati Jehovha a nga m’gela.

Se msana keto, Kayini a to gela tiya Abhele: ‘Tsimbila thembweni.’ Se Kayini ni Abhele va tsute thembweni. Aku va nga ti vokha, Kayini a to daya Abhele. Jehovha a henyete ngutu Kayini. Ngu toneto, Jehovha a to hinga Kayini e tsula kule ni maxaka akwe ni ku a sa fanela kambe kutshumela e wuya mtini.

Hi gonda txani ka mhaka yiya? Mbimo yimwani timhaka kha ti tsimbili nga ti hi ti lavisako tona. Se eto ti nga hi maha hi henya ngutu. Ngaku hi txi tumbula ti to hi henyile mwendo ngaku m’thu mmwani a txi hi gela ti to hi ni txikarato txo henya ngutu, hi fanete ku ti wonela. Ti lava hi leka kuhenya ngutu. Ngaku hi si mahi toneto, hi nga gwitisa kumaha timhaka to biha ngutu.

Se aku Abhele a nga fa, ina a divatwe ngu Jehovha? Ahim-him. Phela Abhele i ti dijaha dadinene adi di nga ti dhunda Jehovha. Ngu toneto, Jehovha kha m’divala, ni ku mbimo yi mafu ma nova paradhise, Jehovha a na maha ti to Abhele e tshumela e hanya.

Ngu kutsimbila ka mbimo, vathu va yite ve velekelana ve tata mafu. Kambe, kutala ka vathu vonevo va txi maha to biha. Hambi tingilozi to kari ti ve vabihi. Tona ti khukhile nzumani ti ta hamafuni ti ta ti txitxa ti maha vathu. Wa tiziva ti to ngu kutxani ti di mahile toneto? Nguku ti txi lava kutxhadha ni vavasikati, i ku lungelo ayi Jehovha a nga ninga vathu dwe.

Tingilozi toneto to biha, ti velekile vanana ni vavasikati vale. Vanana va kona, va kute ngutu ni ku va ti ni mtamo. Vona va txi dhunda kudhukisela vathu ni kuva xanisa. Kambe, Jehovha a txi lava ku ti gumisa toneto. Ngu toneto, ene a lovisile votshe vathu vale vo biha ngu kuthumisa ndambi. Wa ti ziva ti to i ti txani ndambi? I ti mati a hombe aya ma nga wa me tata mafu otshe.

Hambiku ku nga ti tate ngu wubihi hamafuni, ku ti hanya dijaha dimwedo da dinene adi di nga ti dhunda Jehovha. Ditina da dona i ti Nowa. Nowa a ti txhadhile ni ku a ti ni vanana vararu, matina awe i ti Semi, Kame ni Jafete. Ni ku mmweyo ni mmweyo wawe a ti ni msikati wakwe. Jehovha atxi lava kuhulukisa Nowa ni mwaya wakwe ka ndambi. Ngu toneto, Jehovha a gete Nowa ti to e aka ngalava. Ngalava yoneyo i ti tximaha txa hombe txo nga nyumba, atxi txi nga ti mahilwe ngu mapulangu. Jehovha a gete Nowa ti to e betela sihari sasingi amu ka ngalava kasiku si si fi ngu ndambi.

Nowa ni mwaya wakwe va to tekela kukhata kuaka ngalava. Vona va yi akisile tona ti Jehovha a nga ti va gelisile tona. Ti tekile konamu ka 50 wa malembe kasiku ve heta kuaka ngalava. Kambe, Nowa a si ngo aka ngalava dwe. Ene atxi tshumela e gela vathu ti to ve ti wonela ka ndambi ayi yi nga txi ta. Kambe kha ngaho ni wamweyo nga m’engisa.

Se ku ti hokile mbimo ya ti to ve bela ngalavani. Ku gwitile kumaheka txani msana ka toneto?