Hafuhi ni Bhabheli ku ti maneka didhoropa adi di nga txi dhanwa ku i Uri. Vathu ava va nga txi zumba ka didhoropa dile va si khozeli Jehovha. Vona txi khozela sizimu sasingi sa makuhu. Kambe ku ti ni dijaha adi di nga txi zumba Uri, adi di nga ti dhanwa ku i Abrahamu, dona di txi khozela Jehovha dwe.

Jehovha a gete tiya Abrahamu: ‘Khukha mtini kwako u siya maxaka ako, u tsula ka wukhalo awu ni no kukomba wona.’ Txizimu txi gwitile txi thembisa tiya Abrahamu: ‘Mwaya wako wu nava wa hombe ngutu ni ku ani ni na thumisa awe ni mwaya wako kasiku ni mahela timhaka tatinene vathu va mafu otshe.’

Abrahamu a si ku zivi amu Jehovha a nga txi lava ti to eya kona. Hambiketo, ene a thembile Jehovha ni ku a engisile. Se Abrahamu ni msikati wakwe Sara va longelete silo sawe ve khukha ve tsula. Va ti ni Tera tate wa Abrahamu, ni Loti sobrinyo wa Abrahamu.

Mbimo yi Abrahamu a nga ti ni 75 wa malembe, ene ni mwaya wakwe va hokile Kanana, i ku wukhalo awu Jehovha a nga txi lava ti to veya ka wona. Va ti kona khe, Jehovha a tshumete e thembisa tiya Abrahamu: ‘Ni na ninga vanana vako ni vatukulu vako wotshe wukhalo wuwa.’ Kambe Abrahamu ni Sara se va ti kumbile ni ku va singa ni mwanana. Se Jehovha a ndi na ti mahisa kutxani ati a nga di ti thembisile?

Abrahamu ni Sara se va ti ni malembe a mangi va di txhadhile. Vona va ti lekile mti wawe wo tshura ve ya zumba ka matenda. Hambiketo, Sara a si zumbeli kungungurukela, nguku a txi tiziva ti to kuengisa Jehovha ngu tona i nga di ta tinene.

Sara atxi ti lava ngutu kuva ni mwanana. Ngu toneto, ene a gete tiya Abrahamu: ‘Ngaku txithumi txangu Hagari txi txo veleka mwanana ni nawe, ni na mwonisa ku nga mwanana wangu.’ Ngu kutsimbila ka mbimo, Hagari a velekile mwanana awu a nga raywa ti to i Ismayeli.

Ku di pindile malembe, mbimo yi Abrahamu a nga ti ni 99 wa malembe ni ku Sara adi ni 89, vona va endetwe ngu majaha mararu. Abrahamu a gete majaha yale ti to me khalatsha mtshudini kasiku me dya. Wa ti ziva ti to i ti va mani majaha yale a mararu? I ti tingilozi. Yimweyo ya tingilozi tile yi gete tiya Abrahamu: ‘Dilembe di di tako ka yona mbimo yiya, awe ni msikati wako mi nava ni mwanana.’ Sara ati mndani ka ditenda atxi va engisela va txi bhula. Mbimo yi ngilozi yi nga womba tile, ene a to khata kuseka e pimisa tiya: ‘Ani se ni kumbile, ni nga ti kotisa kutxani kuveleka mwanana?

Kambe ku dipindile dilembe, Sara a velekile mwanana, nga ha ngilozi ya Jehovha yi nga ti wombile ngu kona. Abrahamu a m’rayile ditina do i Izaki, di wombako ti to “maseko.”

Mbimo yi Izaki a nga ti ni 5 wa malembe, Sara a woni Ismayeli a txi xanisa Izaki. Sara atxi lava kuvhikela mwanana wakwe, ngu toneto, ene a tsute eya womba-womba ni Abrahamu e mkombela ti to e hinga Hagari ni Isamayeli. Makhatoni Abrahamu a si ti lavi kumaha toneto. Kambe, kasi kuvhikela Izaki, Jehovha a gete tiya Abrahamu: ‘Maha ati Sara a nga kombela. U nga karateki, ani ni na m’xayisa Ismayeli. Kambe, ati ni nga kuthembisa ni na timaha ngu kuthumisa Izaki.’