Loti a txi zumba ni tiyo wakwe Abrahamu, ka ditiko da Kanana. Se ngu kutsimbila ka mbimo, Loti ni Abrahamu va ve ni sihari sasingi. Phela i ti sasingi ngutu aha ko va si eneli kuzumba wukhalo wumwewo. Ngu toneto, Abrahamu a gete tiya Loti: ‘I tshuko hi hambana, nguku kha ti ngadi ti koteka ku hi zumba wukhalo wumwewo. Ngu dihi didhawa adi u sawulako kuya ka dona? Sawula didhawa adi u lavako kuya ka dona, ani ni naya ka di dimwani.’ Abrahamu asi lavi kukhata ene e sawula wukhalo awu i nga ti wawunene. A lekile Loti e khata ene e sawula. Ngu kumaha tiya, Abrahamu a kombisile ti to ati ni lirando.

Loti a sawute wukhalo wo tshura ngutu awu wu nga txi maneka hafuhi ni didhoropa da Sodhoma. I ti wukhalo awu wu nga ti ni mati amangi ni mwasi. Ngu toneto, Loti a tsute e ya zumba kona khe ene ni mwaya wakwe.

Kambe, vathu va Sodhoma va txi maha timhaka to biha. Hafuhi ni Sodhoma ku ti ni didhoropa dimwani adi di nga txi dhanwa ku i Gomora. Ka didhoropa da Gomora ni kona ku ti tate ngu vathu ava va nga txi maha timhaka to biha. Kuwomba ditshuri, vathu vale va txi maha timhaka to biha aha koza Jehovha e lava kulovisa madhoropa yale a mambidi. Kambe Jehovha a txi lava kuhulukisa Loti ni mwaya wakwe. Ngu toneto, ene a rumile tingilozi timbidi tiya m’gela tiya: ‘Kuluveta u huma ka wukhalo wuwa! Nguku Jehovha a lava kulovisa didhoropa diya.’

Loti kha tekela kuhuma mbimo yi tingilozi ti nga m’gela ti to e huma, ene a swete. Se tingilozi ti to ñola diwoko da Loti, da msikati wakwe ni ya vanana vakwe ti va humisa ngu txikuluveta didhoropani. Tingilozi ti to kwangula ti txi kha tona: ‘Tutumani kasiku mi hulukisa wutomi wanu! Mi nga woneteleni msana, ngaku mi txo wonetela msana, mi na fa.’

Mbimo yi Loti ni mwaya wakwe va nga hoka ka didhoropa adi di dhanwako ku i Zowari, Jehovha a to wisa mndilo ngu nzumani awu wu nga hisa madhoropa a Sodhoma ni Gomora ma txi bhii. Kambe msikati wa Loti kha engisa Jehovha, ene a wonetete msana. Wa tiziva ati ti nga maheka mbimo yi ene a nga wonetela msana? Ene a to txitxa e maha txitatwa txa sawuti. Loti ni vanana vakwe ti nga maha va di pandisekile ngutu aku dixaka dawe di nga mbi engisa Jehovha. Wa ti wona ti to nda lisima ngutu kuengisa Jehovha?

Abrahamu mbimo yotshe a kombisile ti to atxi mdhunda Jehovha ni ku mthemba. Ni ku a gondisile Izaki kumaha ati ti fanako. Kambe mbimo yi Izaki a nga ti ni 25 wa malembe, Jehovha a kombete Abrahamu ti to e maha timhaka ati ti nga txi karata ngutu. Ngu tihi ta kona?

Txizimu txi gete tiya Abrahamu: ‘Tsula ka wukhalo awu wu dhanwako ku i Moriya, mbimo yi u no hoka khe, ni lava ti to awe u ni ninga prezenti. Kambe ka dikhambi diya kha ni lavi txihari. Ni lava ti to u ni ninga mwanana wako wamweyo, Izaki. Abrahamu kha ti pfisisa to ngu kutxani Jehovha a di mkombete ti to e maha tile. Hambiketo, ene a engisile Jehovha.

Mangwanani ka kona, Abrahamu a tsute ni Izaki ni sithumi sakwe sa simbidi amu Jehovha a nga ti m’gete ti to e ya kona. Msana ko heta masiku mararu va txi tsimbila, vona va khatile kuwona mmango wa Moriya. Se Abrahamu a gete tiya sithumi sakwe: ‘Zumbani hawa, ani ni Izaki hi nga txi ya ningela prezenti ka Jehovha. Abrahamu a kombete ti to Izaki e rwala tikhuni, se ene e ñola mmesa. Izaki a wotisile tiya Abrahamu: ‘Papa, txi hayi txihari atxi hi noya txi ningela ka Jehovha?’ Abrahamu a to xamula a txi khene: ‘U nga karateka mwanangu, Jehovha a na hi ninga.’

Mbimo yi va nga hoka mmangoni, vona va lulamisete wukhalo ve veka tikhuni. Msana keto, Abrahamu a otelisile Izaki txitimwi ka tikhuni e msunga mawoko ni minenge.

Se Abrahamu a to ñola mmesa. Ka yona mbimo yile, ene a to pfa ngilozi ya Jehovha yi txi khene: ‘Abrahamu, u nga mdayise Izaki. Konku ani na tiziva ti to awe u ni likholo la hombe ka Txizimu. Hambiku ti nga txi karata awe u di tiemisete kuningela mwanana wako wamweyo ka Txizimu.’ Se Abrahamu a to wona txinvutana atxi txi ngadi khwekete titxheho aha ka mndonga. Ene a to ya txi teka e ningela ngu txona prezenti ka Jehovha.

Kukhukhela ditshuku dile, Jehovha a to khata kudhana Abrahamu kota mngana wakwe. Wa tiziva ti to ngu kutxani? Nguku, hambiku a nga si ti pfisisi totshe ati Jehovha a nga txi ti lava, Abrahamu a txi maha totshe ati Jehovha a nga txi mkombela.

Jehovha a tshumete e womba kambe txithembiso atxi a nga ti gete Abrahamu, atxi khene: ‘Ani ni na kukatekisa, se u nava ni mwaya wa hombe ngutu, ni na thumisa mwaya wako kasiku ni mahela timhaka tatinene ka votshe vathu va hamafuni.’