Mbimo yi Izaki a nga ti ni 40 wa malembe a zivile Rabheka ni ku va txhadhile. Ene a ti m’dhunda ngutu msikati wakwe. Ngu kutsimbila ka mbimo, Rabheka a mani txirumbo txa mahasa mambidi.

Mbimo yi a nga veleka, mwanana wo khata a dhanwi ku i Esawu, wa wumbidi a dhanwi ku i Jakobe. Esawu a txi heta mbimo yo tala adi txitingani a txi xota. Kambe Jakobe a txi dhunda kuzumba mtini a txi vhuneta va tate vakwe.

Se aku Esawu i nga ti mwanana wo khata ngene a nga ti ni fanelo yo mana thomba ya hombe kupinda Jakobe. Wa tiziva ti to nji txani thomba? Kuwombwa sotshe asi tate a siyelako vanana vakwe mbimo yi a fako, so fana ni tithembwe mwendo male. Ni ku ka mwaya wa Izaki thomba yoneyo yi txi pata ni ti Jehovha a nga ti thembisile Abrahamu. Esawu a si nga ni mhaka ni txithembiso txonetxo hambi ni fanelo yakwe kota matiwula, kambe Jakobe atxi si wona i di sa lisima ngutu.

Ditshiku dimwani, Esawu a tsute kuxotani ni ku a wile a di katarate ngutu. Se a to pfa kubhumula ka mndiwo wu Jakobe a nga txi bhika. Esawu a to gela Jakobe atxi khene: Hemo, ni pfa nzala ya hombe! Hi nga ni ninga sindiwana eso sako u nga bhika.’ Se Jakobe a to khene: ‘Ani ni na kuninga Esawu, kambe khata ngu ku ni thembisa ti to u na ni ninga thomba yako.’ Esawu a to khene: Hemo, kha ninga ni mhaka ni thomba! Podhi u teka sotshe, ani no lava kudya dwe!’ Ina ati Esawu a nga maha nda tinene? Ahim-him. Ene a luzile tximaha txa lisima ngutu ngu mhaka ya diparato da mndiwo dwe.

Ku di pindile malembe, mbimo yi Izaki a nga wona ti to a kumbile, ene a txi lava a kukatekisa mwanana wakwe wa matiwula. Kambe aku Jakobe a nga di xavile fanelo yo va matiwula, Rabheka a mahile totshe ati a nga ti kota kasiku Jakobe e amukela makatekwa. Mbimo yi Esawu a nga tiziva a henyile ngutu aha koza e lava kudaya Jakobe. Izaki ni Rabheka va txi lava kuvhikela Jakobe, ngu toneto, va m’gete ti to e tsula eya zumba ni Labhani, ndiya ya Rabheka, kala kuza txi boxa txiviti txa Esawu. Jakobe a engisile ati vaveleki vakwe va nga m’gela, se a tsute eya zumba ni tiyo wakwe Labhani.

Jakobe atiya zumba wukhalo awu wu nga txi dhanwa ku i Harani. Mbimo yi Jakobe a nga ti Harani, Jehovha a m’thembisile ku mkhatalela nga ha a nga khatalela ngu kona Abrahamu ni Izaki. Se ngu toneto ti nga maheka. Mbimo yi a nga di Harani, Jakobe a txhadhile eva ni vanana vavangi ni ku a di ganyile ngutu.

Ku di pindile mbimo, Jehovha a gete tiya Jakobe: ‘Tshumela u tsula ditikoni ka vatate vako.’ Jakobe ni mwaya wakwe va to teka diendo do tshumela m’tini. Se Jakobe a zivile ti to Esawu a txi m’hingeta adi ni 400 wa majaha. Jakobe a thavile ngutu e pimisa tiya: ‘Ina kha njo lava ku ni mahela to biha ani ni mwaya wangu?’ Jakobe a to maha mkombelo ka Jehovha a txi khene: ‘Jehovha ni kombela u ni hulukisa ka mkoma wangu kasiku a si ni daye.’ Kasi kuboxisa txiviti txa Esawu, mangwanani ka kona Jakobe a rumete tinvuta tatingi, tiphongo, tihomu, ni timbongola kasi kuya ninga Esawu.

Ka wusiku wuleya, mbimo yi Jakobe a nga ti ekha a woni m’thu a txi m’tela, m’thu eneyo i ti ngilozi. Se ngilozi yile yi to khata kulwa nayo. Va lwite wotshe wusiku ni ku Jakobe a gwitisile kudawiswa. Hambiketo, ene kha leka kulwa. Jakobe a txi lava ti to ngilozi yi m’katekisa ni ku m’gela ti to Jehovha kha na kuleka Esawu e mmahela to biha. Se ngilozi yi to khene ka Jakobe: ‘Ni kombela ku ni leka ni tsula.’ Jakobe a to khene: ‘Na lamba, kha ni kuleki kala kuza u ni katekisa.’

Ngu magwito, ngilozi yi to katekisa Jakobe se ene a to tsaniseka ti to a sa fanela kuthava Esawu.

Mangwanani ka kona ni mixo, Jakobe a to wona Esawu a txi m’hingeta a ti ni 400 wa majaha. Mbimo yi Jakobe a nga hoka hafuhi ni Esawu a to khizama 7 wa makhambi. Esawu a to tutuma e yela Jakobe eya m’bharasara, votshe vavambidi va to dila ngutu ve gwita ve divalelana. Jehovha a tsakile ngutu mbimo yi a nga wona ti to Jakobe ni Esawu va ti divalelanile.

Msana ka totshe tile, Esawu a to tsula m’tini kwakwe. Se Jakobe nene a to simama e enda eya ditikoni ka vaveleki vakwe. Jakobe ati ni 12 wa vanana va majaha, i nga ti: Rubheni, Simiyoni, Levhi, Judha, Dhani, Naftali, Ghadhe, Aseri, Isakari, Zebhuloni, Josefa ni Bhenjamini. Mmweyo wa vanana vonevo a thumisilwe ngu Jehovha kasi kuhulukisa mwaya wuwa wo sawuleka. I ngava i di mani mwanana eneyo? A ti kotisile kutxani kuhulukisa mwaya wa tate wakwe? Hi na ti wona ka gondo ayi yi londiselako.