Kambe wa ti khumbula ti to Jakobe ati ni 12 wa vanana? Konku hi na kontarela matimu txa mwanana wakwe wa wu 11, i ku Josefa. Ene i ti mwanana awu Jakobe a nga ti mdhunda ngutu. Ngu toneto, vakomwakwe va txi m’bavela Josefa. Ditshiku dimwani, Josefa a vite ni miloro yo mbi tovoleka ayi a nga si yi pfisisi. Ngu toneto, ene a kontarete vakomwakwe ati a nga ti lora, kambe vona kha va yi tsakela miloro yoneyo. Wa tiziva ati vona va nga ti pimisa? Vona va pimisile ti to Josefa a txo lava ku va fuma. Se vona va m’vekete txiviti.

Ditshiku dimwani, na vakoma va Josefa va di kule va txi khatalela tinvuta ta mwaya wawe, Jakobe a kombete Josefa ti to e tsula eya wona to i ti vatomi kani. Se vakomwakwe va to m’wona a txita, va njo khene: ‘Wa ta nyamilorwani! Ahi m’dayeni.’ Mbimo yi Josefa a nga hoka aha va nga ti kona, vakomwakwe va to mñola ve mrinza ka diphala da hombe. Kambe ka yona mbimo yile, ku txi pinda vavamna ava va nga txiya Egipta. Se Judha, mmweyo wa vakoma va Josefa a to khene: ‘Hi nga mdayeni! Ngu kutxani hi si mxavisi ti to eya va txibotxhwa? Se va to xavisa Josefa ka vavamna vale ngu 20 wa ma moedha.

Ngu msana, va to nakanisa simaha sakwe ngu mnoha wa phongo kasi ku ti woneka nga a to ko dawa ngu txihari txa txitinga. Se va to tsulisa simaha sa Josefa ka Jakobe veya m’wotisa tiya: ‘Hi nga simaha sa mwanana wako Josefa siya? Jakobe a karatekile ngutu nguku a txi pimisa ti to mwanana wakwe ati fite. Ku singa ni wu a nga txi sikota kuthavelela Jakobe.

Mbimo yi Josefa a nga hoka Egipta, a xavisilwe ka dijaha da lisima awu a nga txi dhanwa ku i Potifari ni ku a mmahile txibotxhwa txakwe. Hambiku i nga ti txibotxhwa, Jehovha a simamile e vhuna Josefa. Potifari a woni ti to Josefa atxi thuma bhem, ni ku a ndi na mthemba. Ngu toneto, kha ta teka mbimo ti to Potifari e m’leka e khatalela sotshe si a nga ti naso.

Msikati wa Potifari a khatile kuwona ti to Josefa ati ni mtamo ni ku ati tshurile. Ditshiku ni ditshiku ene a txi kombela Josefa ti to e otela nayo. Ngu tihi ati Josefa a nga txi ti maha? Mbimo yotshe ene a txi m’gela tiya: ‘Nadha! Kha ni nambi maha eto, nguku eto ti bihile. Awe u txhadhile ni Potifari ni ku ene wa ni themba. Ngaku ni txo otela ni nawe Jehovha a na ni henyela ngutu, se ani kha ni ti lavi kuhenyisa Jehovha!’

Ditshiku dimwani, msikati wa Potifari a zamile kusinzisa Josefa ti to e otela nayo. Ene a ñote simaha sa Josefa, kambe Josefa a to txhukula e huma ngu kututuma. Mbimo yi Potifari a nga wuya mtini, msikati wakwe a hembile a txi khene: ‘Josefa a txi lava ku ni pfinya.’ Potifari a henyile ngutu. Se ene a rumisile ti to Josefa e betwa jele. Ina Jehovha a m’divate Josefa? Ahi ti wone ka gondo ayi yi londiselako.

Mbimo yi Josefa a nga ti jele, Faro mkoma wa Egipta, a vite ni miloro ayi ni wamweyo a nga si yi pfisisi. Kambe, dijaha dimwedo di gete Faro ti to Josefa a ndi na sikota kutxhamusela miloro yile. Ngu toneto, Faro a rumisile ti to veya dhana Josefa jele.

Mbimo yi Josefa a nga hoka ka Faro, Faro a to khene: ‘Hi nga ni txhamusela miloro yangu.’ Se Josefa a to mtxhamusela a txi khene: ‘Mndani ka 7 wa malembe, Egipta ku nava ni sakudya sasingi. Kambe ngu msana, ku nava ni 7 wa malembe a nzala ya hombe. Ngu toneto, sawula dijaha do txhariha kasiku di veketela sakudya kudingana 7 wa malembe aya ku nova ni sakudya, kasiku vathu va si fi ngu nzala.’ Josefa a tikotisile kutxani kutxhamusela miloro ya Faro? Ene a tikoti ngu kuvhunwa ngu Jehovha. Phela Faro a tsakile ngutu ngu kupfisisa mloro wakwe, se a sawute Josefa kasiku e veketela sakudya. Faro a vekile Josefa kota mthangeli wa wumbidi wa ditiko da Egipta.

Josefa a veketete sakudya sasingi kudingana 7 wa malembe. Msana keto, ma hokile malembe a nzala, ni ku nzala i ti ya hombe ngutu aha ko vathu va matiko mamwani va txi tsula Egipta kasiku veya xava sakudya. Hambi Jakobe awu a nga txi zumba ka ditiko da Kanana a ti zivile ti to Egipta ku ti ni sakudya, se a rumile vanana vakwe ti to veya xava sakudya.

Mbimo yi vakoma va Josefa va nga hoka Egipta va tiya womba-womba ni dijaha adi di nga txi xavisa sakudya. Vona va to khizama masoni ka dona, kha va ti tumbula ti to dijaha dile i ti Josefa. Kambe, Josefa ati tumbute ti to avale i ti vakomwakwe ni ku a khumbute mloro awu a nga va nawo mbimo yi i nga ti ngadi txifanyana. Se, kasiku e wona ti to vakomwakwe va ti ngadi ni tshofu mwendo va ti txitxile, Josefa a va gete tiya: ‘Anu mi sipiyawu. Anu mo lava ku ta wona ti to ditiko dathu di zumbisile kutxani.’ Se vona va to khene: ‘Ahim-him, kha hi nga sipiyawu! Athu hi ta ngu Kanana. Hi ti 12 wa vona, kambe mmweyo wa vananda vathu a fite ni ku awu wa txigwitisandani a sate mtini ni papa.’ Se Josefa a to khene: ‘Ngaku mi txo tisa mnanda wanu hawa, ngu kona ni no kholwa ati mi ti wombako.’ Se va di xavile sakudya, vakoma va Josefa va to tshumela Kanana.

Ku di pindile mbimo, vona va tshumete ve tsula Egipta kasiku veya xava sakudya. Kambe ka dikhambi diya, vona va tsute ni Bhenjamini mnanda wawe. Se mbimo yi va nga txi lava kutshumela, Josefa a dukile vakomwakwe ngu kusisa kopo ya prata ka disaka da Bhenjamini, e gwita e womba tiya: ‘Avava va bite kopo yangu! Yi xoleni amu ka masaka awe.’ Sithumi sa Josefa si to xoletela kopo ka masaka awe, se si tiya yi mana ka disaka da Bhenjamini. Vakoma va Josefa va to dhuka, se va to kha vona: ‘Mkoma ho kombela u nga tsayise Bhenjamini, tsayisa athu vakomwakwe.’

Atiya ti mahile Josefa e tsaniseka ti to vakomwakwe va ti txitxile. Se ene kha ti ñola, a to khata kudila a txi khene: ‘Ani ngani Josefa mnanda wanu. Ina tate wangu a ngadi a txi hanya?’ Vakoma va Josefa va to xamala ngutu, nguku va si kholwi ti to Josefa a ti ngadi a txi hanya. Ina Josefa a ti ngadi ni txiviti navo? Ahim-him. Kasi kukombisa ti to a ti va divalete, ene a wombile tiya: ‘Mi nga thaveni ngu mhaka ya ti mi nga ni mahela. Txizimu txi ni rumete hawa kasiku ni ta hulukisa wutomi wanu. Kambe, no kombela mi ni tisela tate wangu.’

Vakoma va Josefa va tsute Kanana veya txhamusela Jakobe totshe ati ti nga maheka. Se wotshe mwaya wa Jakobe wu to rura wuya zumba Egipta. Msana kova ku di pindile malembe amangi, Josefa ni tate wakwe va tshumete veva kumweko.