Dikhambi dimwani, Vaisrayeli va ti emile kukhozela Jehovha ni ku va ti ya khozela sizimu sa makuhu. Kambe, sizimu soneso sa makuhu kha sa va vhuna txilo Vaisrayeli mbimo yi Vaamoni va nga ta lwa navo. Vaisrayeli va xanisekile kudingana malembe amangi. Kambe ditshiku dimwedo vona va to khona: ‘Jehovha, athu hi mahile timhaka to biha, ngu toneto ho kombela u hi vhuna.’ Vaisrayeli va to fayetela sotshe sizimu sa makuhu ve tshumela ve khozela Jehovha. Ngu toneto, Jehovha a tumete kuva vhuna.

Kasiku ve xula yimbi ayi va nga txi lwa ni Vaamoni, vona va sawute mthangeli awu ditina dakwe i nga ti Jefta. Kambe va si se tsula yimbini, Jefta a mahile txithembiso txiya ka Jehovha: Ngaku athu hi txo ya xula Vaamoni, m’thu wo khata awu a no huma ngu mtini kwangu a txi ni hingeta, ni naya m’ningela kasiku e ku thumela ditendani ka msengeletano wutomi wakwe wotshe.’ Se ngu kuvhunwa ngu Jehovha, Vaisrayeli va xute yimbi.

Mbimo yi Jefta a nga wuya mtini, m’thu wo khata awu a nga huma atxi m’hingeta, i ve mwanana wakwe wa dihorana. Ene a to sinya ni kuveta txingomana. Jefta a to khumbula txithembiso a txi a nga ti txi mahile, e karateka ngutu nguku a si nga ni mmwani mwanana. Se aku a nga si nga ni mmwani mwanana, a ndi na maha txani? Ene a to gela mwanana wakwe a txi: ‘Mwanangu, ani ni mahile txithembiso ka Jehovha, se ngu mhaka ya toneto, awe ti na lava u tsula u ya thuma ditendani ka msengeletano khe Silo.’ Mwanana wa Jefta a to khene: ‘Papa, awe maha ati u nga thembisa. Kambe ni si se tsula, no kombela timhaka timweto dwe. Ni leke ni ya zumba mimangoni mitxima yimbidi ni vangana vangu.’ Mwanana wa Jefta a thumile ditendani ka msengeletano wutomi wakwe wotshe. Vangana vakwe va txi tsula kumweko ngu dilembe ve ya m’pfuxela.

Kale kule, ku ti ni Mprista wa hombe awu a nga txi dhanwa ku i Eli, a nga ti ni vanana va vambidi va vafana, va nga txi dhanwa ku i Hofini ni Finiyasi. Vona va si engisi Jehovha ni ku va txi xupha vathu. Mbimo yi Vaisrayeli va nga txi tsula ni sihari ka ditenda da msengeletano kasi kuya ninga Jehovha, Hofini ni Finiyasi va txi teka nyama yayinene ve dya. Eli a ti zivile toneto, kambe kha maha txilo. Ina Jehovha nene kha maha txilo kufana ni Eli?

Samuwele i ti ngadi m’dotho, kambe ngu ha u ti zivako ngu kona, vanana va ti dhunda kuetetela vathu va hombe. Hambiketo, Samuwele kha maha ati Hofini ni Finiyasi va nga txi ti maha. Jehovha a ti woni toneto ni ku a tsakile ngutu. Dikhambi dimwani, Samuwele a di otete a pfite dipswi di txi m’dhana. Ene a wukile e tutuma e tsula aha Eli a nga di otete kona, kambe Eli a di ya m’gela ti to i singa ene a nga txi m’dhana ni ku a di fanete kutshumela eya otela. Eto ti mahekile makhambi mararu. Ka dikhambi da wuraru, Eli a pimisile ti to ti nga maha i ti Jehovha awu a nga txi zama kuwombawomba ni Samuwele. Ngu toneto, Eli a gete Samuwele ti to ngaku a txi tshumela e pfa dipswi dile di txi m’dhana, ene a ti fanete kuxamulisa tiya: ‘Jehovha, na kupfa podhi u womba-womba.’

Mbimo yi Samuwele a nga tshumela e ya otela, a di pfite kambe dipswi dile di txi m’dhana. Se ene a xamute nga ti Eli a nga m’gelisa tona. Jehovha a m’gete tiya: ‘Gela Eli ti to ni na m’tsayisa ene ni mwaya wakwe, nguku wa ti ziva ti to Hofini ni Finiyasi va maha to biha, kambe ene kha va kawuki.’ Ka ditshiku adi di nga londisela, Samuwele a wukile ni mixo e ya tula matimba a ditenda da msengeletano, nga ha a nga txi maha ngu kona otshe masiku. Ene a txi thava kugela Eli ati Jehovha a nga di m’gete, kambe Eli a m’kombete ti to e m’gela. Se Samuwele a wombetete totshe ati Jehovha a nga ti m’gete.

Samuwele a yite masoni e kula ni ku a simamile e va mngana wa Jehovha. Votshe Vaisrayeli va txi ti ziva ti to Jehovha a ti sawute Samuwele kasiku e va mprofeti ni mlamuli.