Ku di pindile mbimo, Jehovha a gete Samuwele ti to e tsula mtini ka dijaha a di va nga txi khona i Jese, nguku mmweyo wa vanana va dijaha diya a ndi nava mkoma wa Israyeli. Mbimo yi Samuwele a nga hoka kheya, a woni mwanana wa matiwula wa Jese se a tekela kupimisa ti to i ti ene wule a ndi no va mkoma wa Israyeli. Kambe Jehovha a m’gete tiya: ‘Hi ngene wu ni nga m’sawula. Ani kha ninga ni mhaka ni mazumbelo a m’thu, txa lisima ngutu kwangu ngu va a di ni mbilu ya yinene.’

Se Jese a tshumete e dhana vamwani vanana vakwe va 6. Kambe, Jehovha a sa sawula nem wamweyo kwawe. Samuwele a wotisile Jese ti to a si nga ngadi ni vamwani vanana kani. Jese a ti khene: ‘Ku ni mmwani wa txigwitisa ndani, i ku Dhavhidha. A pfala txitingani, o dyisa tinvuta.’ Jese a rumisile ti to veya dhana Dhavhidha txitingani. Mbimo yi Dhavhidha a nga hoka, Jehovha a gete Samuwele ti to ngene awu a nga ti m’sawute! Samuwele a tekile mafura a madotho e ma thela hamsungo ka Dhavhidha, kasi kukombisa ti to ngene wu a ndi no va mkoma wa Israyeli.

Ku di pindile mbimo, Vafilista va tsute ve ya lwa ni Vaisrayeli. Dimwedo da masotxhwa a Vafilista i ti txipila txo lapha ngutu, ditina da dona i ti Goliya. Ditshiku ni ditshiku a txi thumela kupoyilela Vaisrayeli a txi khene: ‘Kha nga ho ni wamweyo kwanu a no si kota kulwa ni nani e ni xula. Ngaku mi txo mmana e tshumela e ni xula, athu hi nava sibotxhwa sanu. Kambe, ngaku ani ni txo m’xula, anu mi nava sibotxhwa sathu.’

Ditshiku dimwani, Dhavhidha a heleketile sakudya ka vakomwakwe, ava va nga ti hafuhi ni ha Vaisrayeli va nga txi lwa kona ni Vafilista. Se Dhavhidha a woni Goliya a txi vhuketela Vaisrayeli, se a njo khene a lava kulwa ni Goliya. Kambe, mkoma Sawule a wombile ti to Dhavhidha asi na kusikota kulwa ni Goliya nguku ene i ti txifanyana. Se Dhavhidha a to khene: ‘Mi nga karatekeni. Jehovha a na ni vhuna.’

Sawule a to teka siyambalo sakwe sa wusotxhwa e ninga Dhavhidha, kambe Dhavhidha a to si ambula nguku si si m’eneli. Se Dhavhidha a to teka 5 wa marigwi e beta amu ka txikwamana. E gwita e teka txibhalakaza e tutuma e yela Goliya. Se Goliya a to khene: ‘Ngono kheno txipwiliwe. Ni ta kudaya ni kuningela ka sinyana si kujokotela.’ Kambe Dhavhidha kha nga thava. Ene a to khene: ‘Awe u themba ditxhari kasi kulwa ni nani kuve ani ni themba Jehovha. Awe u pimisa ti to u lwa ni nathu, phela awe u lwa ni Jehovha. Votshe ava va ku hawa va na ti ziva ti to Jehovha ani mtamo kupinda otshe matxhari. Ene a na hi vhuna ti to hi mi xula motshenu hawa.’

Dhavhidha a to veka dirigwi ka txibhalakaza txakwe e gwita e txi gwimba ngutu. Jehovha a to maha ti to dirigwi dile di pota ka mbanza ya Goliya, diya m’peka e wa hahatshi e fela kona hale. Mbimo yi Vafilista va nga wona tile va to tutuma ve hangalaka. Dhavhidha a txi m’themba Jehovha. Awe ko? Ina wa m’themba Jehovha?

Msana ka kuva Dhavhidha adi date Goliya, ene a ve mthangeli wa masotxhwa a Sawule. Dhavhidha a xute tiyimbi tatingi ni ku a khatile kuva ni nduma. Vavasikati va txi veka ni kuembelela tindando va txi womba ti to Dhavhidha i ti disotxhwa da dinene kupinda Sawule. Eto ti mahile ti to Sawule e bavela ngutu Dhavhidha aha koza e lava ni ku m’daya.

Ditshiku dimwani, Dhavhidha a txi vetela txitende Sawule, Sawule a to teka ditxhari e rinzeta Dhavhidha, a txi lava ku m’thola ngu dona. Kambe Dhavhidha a sikoti kuvhika. Msana keto, ngu makhambi amangi, Sawule a zamile kudaya Dhavhidha. Ngu toneto, Dhavhidha a woni i di tshuku kututuma e ya barama txitingani.

Sawule a sengeletile 3.000 wa majaha, e londisa Dhavhidha. Se Sawule a gwitisile ku ya bela ka phako ya dirigwi aha Dhavhidha ni majaha akwe va nga ni baramile kona. Majaha aya ma nga ti ni Dhavhidha ma to kha ona: ‘Hemo Dhavhidha, u nga mleke e huluka wuwa, a na dawe.’ Se Dhavhidha a to nzwingamela e tsula aha Sawule a nga ti kona, e ya wila dibhaji dakwe. Sawule kha ti tumbula, kambe Dhavhidha a gwitile e tipfa mnando ngu ku a nga wila dibhaji da Sawule. Nguku a tile ti txi kombisa kwa mbi na txixonipho ka mkoma awu a nga ti sawutwe ngu Jehovha. Dhavhidha kha leka majaha akwe me daya Sawule. Mbimo yi Sawule a nga huma ka phako yile ya diphala, Dhavhidha a to mlondisa ngu msana a txi khene: ‘Ni to ko ti lava ni di ku date, kambe kha na nga maha eto.’ Ina eto ti mahile Sawule e leka kulava kudaya Dhavhidha?

Ahim-him. Sawule a simamile e lavetela Dhavhidha kasi ku m’daya. Ka wusiku wo kari, Dhavhidha ni sobrinyu wakwe Abhixayi, va to bela ngu kunzwingamela a ha Sawule ni majaha akwe va nga ti baramile kona, ve ya mana ti to va ti otete. Hambi Abhineri, awu a nga ti fanete kuvhikela mkoma a di otete. Mbimo yi Abhixayi a nga wona tile, a to lava kudaya Sawule, kambe Dhavhidha a to m’gela tiya; ‘U nga mahi eto Abhixayi, Sawule mlekele Jehovha. A hi teki ditxhari dakwe ni mati akwe o sela hi hangalaka.’

Dhavhidha ni Abhixayi va khukhile ahale Sawule ni majaha akwe va nga ti baramile kona, ve kwela ka mmango awu wu nga ti hafuhi ni kona hale. Va di txitimwi kheya, Dhavhidha a to kwangula atxi khene: ‘Abhineri, ngu kutxani u nga mbi vhikela mkoma wako kani? Athu hi di ta teka ditxhari ni mati akwe o sela, kambe awe u txo tshwela ngu kuotela.’ Sawule a tekete ku ti tumbula ti to i ti Dhavhidha awu a nga txi womba-womba, a njo khene: ‘Awe u di ni date, kambe khwa maha eto, ngu ditshuri, awe u nava mkoma wa Israyeli.’ Msana keto, Sawule a tshumelete ka nyumba yakwe ya wukoma. Ina votshe va mwaya wa Sawule va txi mnyenya Dhavhidha? Hi na ti wona ka matimu aya ma londiselako.