Mwanana wa matiwula wa mkoma Sawule awu va nga txi khona i Jonatani, i ti disotxhwa da mtamo adi di nga si thavi txilo. Dhavhidha a wombile ti to Jonatani a txi tutuma ngutu kupinda ni digama ni ku a ti ni mtamo wa hombe ngutu kupinda ngonyamu. Ditshiku dimwani, Jonatani ni txithumi txakwe atxi txi nga txi mrwalela matxhari va woni Vafilista vo kari va di txitimwi ka mmango. Jonatani a gete txithumi txakwe a txi khene: ‘Ngaku Vafilisita va txo hi dhana kasiku hi kwela mmango hi ya lwa navo, eto ti kombisisa ti to Jehovha a na hi vhuna ku hi va xula. Phela ngu toneto ti nga maheka. Vafilista vale va to dhana Jonatani ni txithumi txakwe ti to ve kwela mmangoni. Se Jonatani ni txithumi txakwe va ti ya lwa navo ni ku va sikoti kudaya 20 wa Vafilista.

Aku Jonatani i nga ti mwanana wa matiwula wa Sawule, ngene a nga ti ni fanelo yo va mkoma. Kambe ene a txi ti ziva ti to Jehovha a ti sawute Dhavhidha kasiku eva mkoma wo vhaleta Sawule. Hambiketo, Jonatani kha bavela Dhavhidha. Phela vona va vile vangana va hombe. Dhavhidha ni Jonatani va thembisanile kuvhikelana. Se kasi kutsanisa wungana wawe, Jonatani a ningile Dhavhidha dijasi dakwe, ditxhari, wulahu ni libhandi lakwe.

Mbimo yi Dhavhidha a nga txi pfhuka kasiku a si dawi ngu mkoma Sawule, Jonatani a tsute e ya manana nayo, e m’gela tiya: ‘Dhavhidha tsana u nga thavi txilo. Jehovha a sawute awe kasiku u va mkoma. Hambi tate wangu wa ti ziva eto, o ti hunda.’ Phela ti ndi na tsakisa ngutu kuva ni mngana wo fana ni Jonatani. Hi nga tona?

Makhambi amangi, Jonatani a di ti emisete hambi ni kudawa kasi kuvhuna mngana wakwe. Mbimo yi Jonatani a nga ziva ti to Sawule a txi lava kudaya Dhavhidha, ene a mahile totshe ati a nga tikota kasiku maha ti to Sawule e txitxa idheya.’ Ku di pindile mbimonyana, Jonatani ni Sawule va di ya fa yimbini.

Msana keto, Dhavhidha a lavetete mwanana wa Jonatani i nga ti Mefibhosete e m’gela tiya: ‘Tate wako i ti mngana wangu wa hombe, ngu toneto ani ni na kuxayisa wutomi wako wotshe. Awe u na zumba nyumbani kwangu ka wukoma, u na dya atxi u no txi lava.’ Dhavhidha kha m’divala mngana wakwe wa hombe Jonatani.

Mbimo yi Sawule a nga fa, Dhavhidha a mahile mkoma. Ene a ti ni 30 wa malembe. Ka wusiku wo kari, Dhavhidha a ti nyumbani kwakwe ka wukoma, a woni wamsikati wo tshura ngutu. Dhavhidha a ti tumbute ti to wamsikati wule a txi dhanwa ku i Bhatesebha, ni ku a ti txhadhile ni disotxhwa adi di nga txi dhanwa ku i Uriya. Hambiketo, Dhavhidha a rumisile ti to ve ya dhana Bhatesebha, e ta nyumbani kwakwe ka wukoma e ta maha nayo timhaka ta mataho. Se Bhatesebha a mani txirumbo. Dhavhidha a txi lava kusisa ti to a ti mahile wugango ni Bhatesebha. Ngu toneto, a mahile ti to Uriya e ya dawa yimbini. Msana ka kuva Uriya a di fite, Dhavhidha a txhadhile ni Bhatesebha.

Jehovha a ti woni totshe timhaka to biha ati Dhavhidha a nga di ti mahile. Se a rumete mprofeti Natani ti to e ya womba-womba ni Dhavhidha. Natani a ti ya khene: ‘Ku ti ni dijaha dimwani do ganya adi di nga ti ni tinvuta tatingi, ni dimwani da txisiwana adi di nga ti ni nvuta yimweyo ayi di nga txi yi dhunda ngutu. Wa ti ziva ati dijaha dile do ganya di nga ti maha? Di to yapa nvuta yona yile ya yimweyo ya dijaha dile da txisiwana.’ Mbimo yi Dhavhidha a nga pfa eto, a to henya ngutu a txi khene dijaha dile do ganya di ti fanete kudawa. Se Natani a to mxamula atxi khene: ‘Phela ngu tona ti awe u nga mahela Uriya.’ Dhavhidha a pandisekile ngutu e gwita e womba txionho txakwe. Ngu mhaka ya txionho txile, Jehovha a mahile ti to Dhavhidha ni mwaya wakwe ve humelelwa ngu timhaka to biha. Kambe Dhavhidha a ti sote e txhamusela totshe ati a nga di ti mahile, se Jehovha a m’divalete.

Ku di pindile malembe, Dhavhidha a txi lava kuaka dithempele, i nga ti nyumba yo khozela ka yona Jehovha. Kambe Jehovha a sawute Solomoni mwanana wa Dhavhidha ti to e aka dithempele. Dhavhidha a khatile kululamisela silo si Solomoni a ndi no si thumisa kasi kuaka ngu sona dithempele e gwita e womba tiya: ‘Aku Solomoni i ku ngadi mfana, ni na m’vhuna nguku dithempele da Jehovha di fanete kuva wukhalo wo tshura.’ Dhavhidha a humisile mali yayingi kasiku yi vhunetela ko aka. Ene a lavile vathumi vavangi, e sengeletela prata, ouro ni mapulango kasiku si vhunetela ko aka. Mbimo yi a nga di hafuhi ni kufa, Dhavhidha a gete tiya Solomoni: ‘Jehovha a ni kombete kasiku ni kuninga mdhezenyo wa ti dithempele di no zumbisa tona. U nga thavi mfana wa mina, Jehovha a na kuvhuna, tsana u khata kuaka.’