Mbimo yi Solomoni a nga va mkoma wa Israyeli, Jehovha a m’wotisile tiya: ‘Solomoni u lava ni kuninga txani?’ Solomoni a to khene: ‘Jehovha ani ni ngadi mfana, ni ku kha ni ti zivi ti to ni fanete kumaha txani? No kombela u ni ninga wuzivi kasiku ni kota kukhatalela kwati vathu vako.’ Mbimo yi Jehovha a nga pfa tile, a to khene: ‘Aku awe u nga ni kombela wuzivi, ani ni na kumaha u va dijaha do ziva ngutu hamafuni kotshe. Ni na tshumela ni maha ti to u ganya ngutu. Se ngaku u txo ni engisa u na hanya malembe amangi.’

Solomoni a khatile kuaka dithempele. Majaha amangi ni vavasikati va thumile ko aka va txi thumisa materiyali a manene. Ku di pindile 7 wa malembe, va hetile kuaka dithempele. Se Solomoni a txi lava kuningetetela dithempele dile ka Jehovha. Ene a to veka maprezenti txitimwi ka altari e khizama e maha mkombelo a txi khene: ‘Jehovha, awe u fanelwa ngu wukhalo wo tshura ngutu kupinda dithempele diya, kambe ho kombela, tumela wukhalo wuwa u engisa mikombelo ayi hi no yi maha ka wukhalo wuwa.’ Wa ti ziva ati Jehovha a nga maha kasi kukombisa ti to a di tsakete dithempele dile? Mbimo yi Solomoni a nga gwita kumaha mkombelo, Jehovha a to tisa mndilo ngu nzumani wu ta hisa sotshe asi si ngadi txitimwi ka altari. Mbimo yi Vaisrayeli va nga wona tile, va to tsaka ngutu.

Solomoni a khatile kuva ni nduma ngu mhaka ya wizivi wakwe. Vathu va otshe makhalo va txi tsula ka Solomoni ve ya mkombela ti to eva vhuna kululamisa mahungu. Hambi mkoma wa txisikati awu a nga txi zumba ka wukhalo wa kule ngutu, awu wu nga txi dhanwa ku i Sabha, a tsute eya womba-womba ni Solomoni. Ene a txi lava kukholwa ti to Solomoni ngu ditshuri a txi ziva. Msana kova a di bhute ni Solomoni, ene a wombile tiya: ‘Mbimo yi va nga ni gela ti to awe wa ziva ngutu kha na kholwa, kambe konku na kholwa ti to awe u txipila txo ziva. Jehovha Txizimu txako wa kuvhuna ngu ditshuri.’ Vathu khe Israyeli va ti ni wutomi wa wunene ni ku va ti tsakile. Kambe ti sa swela timhaka ti txitxile.

Mbimo yi Solomoni a nga txi engisa Jehovha, akhe Israyeli ku ti ni kurula. Kambe, Solomoni a txhadhile ni vavasikati vavangi ava i nga singa Vaisrayeli nem va si khozeli Jehovha. Kudotho-kudotho, Solomoni a khatile kutxitxa e khozela sizimu sa makuhu asi vasikati vakwe va nga txi si khozela. Jehovha a henyile ngutu. Se a gete tiya Solomoni: ‘Ni na thavisa mfumo wa Israyeli manzani ka mwaya wako. Wona wu na abaniswa wu maha mifumo yimbidi. Txienge txa hombe txa mfumo txi na fumwa ngu txithumi txako, se txienge txi txa txidotho txi na fumwa ngu mwaya wako.’

Ditshiku dimwani, txithumi txa Solomoni a txi txi nga txi dhanwa ku i Jerobhowamu txi txo tsimbila hanzila, se txi manana ni mprofeti Ayasi. Mprofeti Ayasi a to teka dibhaji dakwe e di bhandelela se kuhuma 12 wa sitarapu, e gwita e gela tiya Jerobhowamu: ‘Jehovha a na thavisa mfumo wa Israyeli ka mwaya wa Solomoni e wu abanisa ngu mifumo yimbidi. Teka 10 wa sitarapu siya nguku awe u nava mkoma wa 10 wa tihunzu.’ Solomoni a ti zivile tile, se a txi lava kudaya Jerobhowamu! Ngu toneto, Jerobhowamu a to pfhuka e tsula Egipta. Ku di pindile malembe, Solomoni a fite se mwanana wakwe awu a nga txi dhanwa ku i Robhowamu a ve mkoma. Se Jerobhowamu a to wona ti to ayile i ti mbimo ya yinene ya ti to e tshumela e tsula Israyeli.

Madhota a Israyeli ma to gela tiya Robhowamu: ‘Ngaku awe u txo va ñola kwati Vaisrayeli u si va xanisi, vona va na kuengisa.’ Kambe, vangana va Robhowamu va to m’gela tiya: ‘Hemo, va xanisi vava! Va ningi mithumo yo nemela ngutu!’ Robhowamu a mahile ati vangana vakwe va nga m’gela. Se eto ti mahile ti to Vaisrayeli ve m’wukela. Ngu toneto, 10 wa tihunzu ta Israyeli ti sawute Jerobhowamu kasiku e va mkoma wa tona, se tihunzu tile ta timbidi ti simamile ti fumwa ngu Robhowamu. Eto ti mahile ti to 12 wa tihunzu ta Israyeli ti abaneka ti va mifumo yimbidi. Mfumo wule wa 10 wa tihunzu wu txi dhanwa ku i mfumo wa Israyeli, se awule wa tihunzu timbidi wu txi dhanwa ti to i mfumo wa Judha.

Jerobhowamu a si ti lavi ti to vathu ava a nga txi va fuma ve tsula veya khozela Jehovha a khe Jerusalema, i ku mu a nga txi fuma kona Robhowamu. Wa ti ziva ti to ngu kutxani? Ene a txi thava ti to vathu va ndi na m’wukela ve sawula kufumwa ngu Robhowamu. Se a to maha sifananiso simbidi sa sihomwana ngu ouro, e gwita e va gela tiya: ‘Jerusalema i kule ngutu. Khozela Jehovha kona hawa.’ Se vathu va to khata kukhozela sifananiso sile sa simbidi sa ouro. Vona va tshumete ve divala Jehovha kambe.