Mfumo wa 10 wa tihunzu wu vile ni vakoma vavangi ava va nga txi maha timhaka to biha, kambe awu a nga maha to biha ngutu kupala votshe i Akabhe. Ene a ti txhadhile ni wamsikati awu a nga txi maha timhaka to biha, ditina dakwe i ti Jezabheli. Akabhe ni Jezabheli va mahile ti to Vaisrayeli ve khozela txizimu txa makuhu atxi va nga txi khona i Bhahali. Vona va tshumete ve maha ti to kudawa vaprofeti vavangi va Jehovha. Se, ina ku ni ti Jehovha a nga ti maha? Ina!

Jehovha a rumile mprofeti Elija ti to e tsula eya womba-womba ni Akabhe. Elija a tiya womba ti to ngu mhaka ya wubihi wu Akabhe a nga txi wu maha, Israyeli ku si na kuwa mati. Se ngu toneto ti nga maheka, mati kha ma wa kudingana malembe mararu. Ngu mhaka ya toneto, kukhatile kupwateka sakudya se vathu va txo fa ngu nzala. Ku di pindile mbimo, Jehovha a tshumete e rumela Elija ti to eya womba-womba ni Akabhe. Mbimo yi Akabhe a nga wona Elija, a to khene: ‘Phela totshe ati ti mahekelako mnando wako Elija!’ Se Elija a to khene: ‘U nga ni lumbete ani. Ngawe u nga maha ti to votshe vathu vava ve khozela Bhahali. Ahi mahi to kari konku kasiku hi wona ti to i mani i ku Txizimu txa ditshuri. Sengeleta votshe vathu ni vaprofeti va Bhahali ka Mmangoni wa Karmeli.’

Vathu va tsute Mmangoni ka Karmeli. Se mbimo yi va nga ti kheya, Elija a ti khene: ‘Anu sawulani awu mi lavako ku m’khozela, Jehovha mwendo Bhahali. Ahawa ti lava hi khukha hi txi ti ziva ti to i mani i ku Txizimu txa ditshuri. 450 wa vaprofeti va Bhahali va na lulamisele mningelo para txizimu txawe, ani ni na lulamisela mningelo para Jehovha. Se Txizimu atxi txi no wisa mndilo ngu nzumani wu ta hisa mningelo, ngu txona i ku Txizimu txa ditshuri.’

Vaprofeti va Bhahali va lulamisete mningelo. Vona va txo thumela kudhanetela Bhahali ditshiku dotshe, kambe ene kha nga va xamula. Se Elija a to va seka, e gwita atxi khene: ‘Hemanoo, kwangulani ngutu. Ti nga maha Bhahali a di ko otela.’ Vaprofeti va Bhahali va to simama ve kwangula kala di ya swa, kambe kha ka maheka txilo.

Se Elija a to veka mningelo wakwe txitimwi ka altari e gwita e thela mati ngu madhawani. Se a to maha mkombelo a txi khene: ‘Jehovha, no kombela, kombisa ka vathu votshe vava ti to awe u Txizimu txa ditshuri.’ Ngu txikuluveta, Jehovha a to wisa mndilo ngu nzumani wu ta hisa asi si nga di txitimwi ka altari. Se Vaisrayeli va to tsaniseka ti to Jehovha ngene i ku Txizimu txa ditshuri. Ka dona ditshiku dile, 450 wa vaprofeti va Bhahali va datwe.

Msana keto, Elija a to wona txirefuwana txi txi tshuketela se ene a to gela tiya Akabhe: ‘Ma lava kuwa mati a hombe. Lulamisela txikarinyana txako txa yimbi u tsula mtini, u si se ta nakana.’ Se nzumani ku to tala ngu marefu, kupeka moya me khata kuwa mati a hombe. Akabhe a to kwela ka txikarinyana txakwe txa yimbi e txi tutumisa ngu ha a nga kota ngu kona. Kambe ngu kuvhunwa ngu Jehovha, Elija a tikoti kututuma e siya hambi txikarinyana txa Akabhe! Kambe, sikarato sa Elija si sa nga guma. Ka matimu aya ma londiselako hi na wona simwani asi si nga londisela.

Mbimo yi Jezabheli a nga pfa ati ti nga di mahekete vaprofeti va Bhahali, a to henya ngutu. Se a to rumela m’thu e ya gela tiya Elija: ‘Mangwana di ku txee, ni la ku ku daya kufana ni ti u nga maha vaprofeti va Bhahali.’ Elija a to thava, se e pfhuka e ya barama txitingani. Ene a to maha mkombelo a txi khene: ‘Jehovha, ani se ni karate, i tshuku nifa.’ Elija a ti karate ngutu, se a to otela hahatshi ka mndonga.

Se Jehovha a to rumela ngilozi. Ngilozi yi ti ya wusa Elija yi txi kha yona: ‘Elija, wuka, ni ku tisete sakudya.’ Elija a to wuka e wona dipawu ni dijaru adi di nga ti ni mati. A to dya e sela mati e gwita e khateta e otela. Ngilozi yi to tshumela yi wuya kambe yi ta wusa Elija yi txi kha yona: ‘Dyananyana ka kudotho, nguku ti lava u va ni mtamo kasiku u simama u tsimbila.’ Msana ka kuva Elija a di dyite, a to tsimbila 40 wa masiku kala e hoka mmangoni ka Horebhe. Mbimo yi a nga hoka kheya a to ya bela ka phako ya dirigwi e otela. Kambe Jehovha a txi karateka ngutu ngu Elija, se a m’wotisile ti to ngu kutxani a nga txi pfhuka. Se Elija a to xamula atxi khene: ‘Jehovha, Vaisrayeli va ti thembisile ku kukhozela, kambe hi nga tona ati va mahako.’ Vona va date vaprofeti vako, se konku va lava kuhetisa ni nani.’

Jehovha a to kombela Elija ku e huma amu ka phako ya dirigwi e ema mmangoni. Se Jehovha a to maha ti to kupeka moya ya hombe hafuhi ni ha ka phako ayi Elija a nga ti ka yona. Msana keto, ku to va ni kuzinginikela ka mafu, kutura mndilo. Se ngu magwito, Elija a to pfa dipswi adi di nga txi wombawombela hahatshi. Ene a to fenengeta khohe yakwe, e huma mule ka phako ya dirigwi. Jehovha a to m’wotisa tiya: ‘Elija, ngu kutxani u txi pfhuka?’ Se Elija a to xamula a txi khene: ‘Ani ni pfhuka nguku kha ngaho mmwani awu a ku khozelako, o va ani dwe.’ Se Jehovha a to khene: ‘Nadha, hi nga awe wekha, ku nga di ni 7.000 wa vathu Israyeli ava va ku ngadi va txi ni khozela. Tsula u ya teka Elixa kasiku e ta kuvhaleta kota mprofeti.’ Elija a to tekela kumaha ati Jehovha a nga ti m’gete. Hi gonda txani ka ti ti nga mahekela Elija? Ngaku mbimo yotshe hi txi maha ati Jehovha a hi rumako, ene a na hi khatalela. Konku a hi wone ati Elija a nga ti maha mbimo yi ku nga siwi mati Israyeli.