Ka malembe yale ku nga va ni nzala Israyeli, Jehovha a gete Elija ti to e tsula ka ditiko adi va nga txi khona i Sarepita. Nguku a khe ku ti ni noni ayi yi ndi no ya mninga sakudya. Mbimo yi Elija a nga hoka, a woni wamsikati wa txisiwana a txi rolela tikhuni. Phela i ti yona noni yi Jehovha a nga ti yi wombile. Elija a kombete dipawa ni mati o sela ka wule wamsikati. Noni yile yi to kha yona: ‘Ani kha ninga ni dipawa. No va ni mpupu wa wudotho ni sifurana dwe, para ani ni mwanana wangu.’ Elija a to khene: ‘Jehovha a thembisile ti to ngaku awe u txo ni mahela dipawa, mpupu ni mafura ako kha si nambi guma kala kuza me wa mati.’

Se noni yile yi to tsula mtini yiya mahela dipawa Elija. Nga ha Jehovha a ngadi thembisile ngu kona, noni yile ni mwanana wa yona va ve ni sakudya kala kuza yi hoka mbimo yi ma nga ta wa mati. Mpupu ni mafura kha sa guma.

Kambe, ku gwitile kumaheka to mbi tsakisa. Mwanana wa noni yile a lwate ngutu e gwita e fa. Noni yile yi kombete Elija ti to e maha txo kari. Se Elija a to teka mwanana wule e kwela nayo ka dikwartu adi di nga txi maneka txitimwi da nyumba ya wule wamsikati. Ene a tiya m’otelisa m’bhedhuni, e gwita e maha mkombelo atxi khene: ‘Jehovha no kombela wusa mwanana wuwa e tshumela e hanya.’ Ati Elija a nga kombela ti txi woneka nga kha ti koteki. Nguku ti si khali kumaheka ti to m’thu wu a nga fa e tshumela e hanya. Tximwani ngu ti to, awule wamsikati ni mwanana wakwe i singa Vaisrayeli.

Kambe txifanyana txile txi wusilwe txi tshumela txi hanya. Se Elija a to huma ni mwanana wule eta gela noni yile atxi khene: ‘Hi nga wona! Mwanana wako ndiyo wa hanya.’ Noni yile yi tsakile ngutu aha koza yi gela tiya Elija: ‘Konku ani na tiziva ti to awe m’thu wa Txizimu. Ni ti to totshe ati u ti wombako ti ta ngu ka Jehovha ni ku ditshuri.’

Mkoma Akabhe a txi zumbela kuwonetela thembwe ya dijaha adi di nga txi dhanwa ku i Nabhote, ngu ha ka dijanela da nyumba yakwe ya wukoma. Akabhe a txi yi lava thembwe yile, se a zamile ku yi xava. Kambe Nabhote a si ti lavi kuxavisa thembwe yile, nguku eto ti txi lwisana ni Mlayo wa Jehovha. Ati Nabhote a nga maha i di tatinene, kambe Akabhe a ti wonisile kutxani toneto? Ene a henyile ngutu, e nyenyezeka aha koza a si lavi ni kuhuma nyumbani kwakwe e tshumela e tsukula ni kudya.

Jezabheli, msikati wakwe awu a nga txi maha timhaka to biha, a m’gete tiya: ‘Akabhe, awe u mkoma wa Israyeli, u ni fanelo yo mana sotshe asi u si lavako. U nga karateki, ani na yi mana thembwe yile.’ Se Jezabheli a to luka maplanu o lava kudaya Nabhote kasiku e mana thembwe yile. Ene a gete madhota a didhoropa dile ti to me lumbeta Nabhote ti to a di ruketete Txizimu. Ngu mhaka ya toneto, Nabhote a datwe. Se Jezabheli a tsute e ya gela tiya Akabhe: ‘Nabhote a fite, konku thembwe yile njako.’

Nabhote hi nga ene ekha m’thu wamnene awu a nga dawa ngu Jezabheli. Jezabheli a rumisile ti to kudawa vathu vavangi ava va nga txi khozela Jehovha. Ene a txi khozela sizimu sa makuhu ni ku a mahile timhaka tatingi to biha. Kambe Jehovha a txi ti wona totshe tile. Se a ndi na maha txani?

Ku di pindile mbimo, Akabhe a fite. Joramu, mwanana wakwe a ve mkoma. Ka mbimo yoneyo, Jehovha a rumete dijaha adi di nga txi dhanwa ku i Jehu kasiku di ya daya Jezabheli ni wotshe mwaya wakwe.

Jehu a to teka txikarinyana txakwe txa yimbi e tsula Jeziriyele. Joramu nene a tekile txikarinyana txakwe txa yimbi e tsula e ya manana ni Jehu. Mbimo yi va nga manana, Joramu a to wotisa tiya: ‘Jehu, u ta ngu kurula mwendo u tela kutalwa? Jehu a to khene: ‘Ahim-him mo Joramu, kha hi na kuva ni kurula ku ve mame wako Jezabheli a mahetela timhaka to biha.’ Mbimo yi a nga pfa tile, Joramu a zamile kujikisa txikarinyana txakwe txa yimbi kasiku e tutuma. Kambe Jehu a to teketa wulaho wakwe e fula Joramu e fa.

Jehu a to tsula nyumbani ka wukoma amu Jezabheli a nga ti kona. Mbimo yi Jezabheli a nga ti ziva ti to Jehu wa ta, a do ti tshurisela, e ti penda-penda, e lulamisela misisi e gwita e m’emela ngu ha ka dijanela. Mbimo yi Jehu a nga hoka, Jezabheli a do womba-womba nayo ngu nzila yo mbi na txixonipho. Se Jehu a to kwangula, e gela sithumi sa Jezabheli a si si nga ti nawo kona txitimwi kheya a txi khene: ‘Mrinzeni mamiyoo ngu ha ka dijanela.’ Sithumi sa Jezabheli si to m’gula si m’rinza ngu ha ka dijanela, e ya wa hahatshi e tekela kufa.

Msana keto, Jehu a date 70 wa vanana va Akabhe. Ene a tshumete e gumisa wotshe wukhozeli wa Bhahali Israyeli. Ngu tihi ati hi ti gondako ka mhaka yiya? Hi gonda ti to Jehovha wa ti wona totshe ati ti mahekako, ni ku wa yi ziva mbimo yayinene yo tsayisa avale va mahako timhaka to biha.