Bheni-Hadhadhe, mkoma wa Siriya makhambi amangi a zamile kuxasela Vaisrayeli. Kambe, mprofeti Elixa mbimo yotshe atxi gela mkoma wa Israyeli ati Bheni-Hadhadhe a nga txi lava ku ti maha. Ngu toneto, ati Bheni-Hadhadhe a nga txi ti lava ti si maheki. Se Bheni-Hadhadhe, a woni i di tshuku kurumela masotxhwa a siriya ti to me tsula ka didhoropa da Dhotani kasiku me ya ñola Elixa.

Masotxhwa a Siriya ma hokile ka didhoropa da Dhotani ni wusiku. Mangwanani ka kona, txithumi txa Elixa txi woni ti to didhoropa di ti ranganyetilwe ngu masotxhwa amangi. Txona txi to thava ngutu txi kwangula txi txi kha txona: ‘Elixa hi nga wona! Hi na maha txani kuwa?’ Elixa ato xamula a txi khene: ‘U nga thavi. Nguku ava va ku ni nathu vangi ngutu kupinda vona.’ Ka yona mbimo yile, Jehovha a to maha ti to txithumi txa Elixa txi wona timhaka to xamalisa ngutu. Txona txi to wona ti to yotshe mimangu ayi yi nga ti madhawani ka didhoropa yi ti tate ngu makhavhalu ni sikarinyana sa yimbi asi si nga txi tura mndilo.

Mbimo yi masotxhwa a Siriya ma nga zama kuñola Elixa, ene a mahile mkombelo atxi khene: ‘Jehovha, no kombela, vhala maso majaha yawa ti to ma si woni.’ Kambe, Jehovha kha vhala maso a majaha yale, ene a to maha ti to ona ma si kuzivi amu ma nga ti kona. Se Elixa a to ma gela tiya: ‘Anu mi timete, hi nga dona didhoropa adi mi di lavako. Tsimbilani ni na mi heleketa ka m’thu awu mi m’xolako.’ Masotxhwa yale ma to londisa Elixa kala me ya hoka Samariya, i nga ti didhoropa adi a nga txi zumba ka dona mkoma wa Israyeli.

Mbimo yi masotxhwa a Siriya ma nga hoka kheya, ma to khata ku kuziva amu ma nga ti kona. Mkoma wa Israyeli a to wotisa Elixa atxi khene: ‘I para ni daya masotxhwa yawa?’ Phela Elixa a di va ningete ve dawa. Kambe ene kha maha eto. Ene a to khene: ‘U nga ma dayi majaha yawa. Ma ningi sakudya u gwita u ma leka me tsula.’ Se mkoma wa Israyeli a rumisile ti to kululamiselwa sakudya kasi kuninga masotxhwa yale a Vasiriya, msana kova ma di dyite a to ma tshumeta me tsula mtini.

Ina u ngadi u txi m’khumbula Jezabheli? Ene a velekile mwanana wa txihoranana awu a nga txi dhanwa ku i Ataliya. Ataliya a txi maha timhaka to biha kufana ni mwamwakwe ni ku a ti txhadhile ni mkoma wo kari wa Judha. Mbimo yi mkoma wule a nga fa, mwanana wa Ataliya a mahile mkoma. Kambe, mwanana wule nene a gwitisile kufa. Se Ataliya a ti mahile mkoma wa Judha. Ngu toneto, ene a date votshe ava va nga ti ni fanelo yo va vakoma, hambi ni vatukulu vakwe. Se votshe vathu va ti m’thava.

Mprista wa hombe Joyadha ni msikati wakwe Jehosebha, va txi tiziva ti to totshe tile Ataliya a nga txi ti maha ti di bihile ngutu. Se vona va kombisile txibindi, ngu kusisa dithempeleni mmweyo wa vatukulu va Ataliya, i ku txibhebhetana atxi txi nga txi dhanwa ku i Jowasi ve gwita ve txi khatalela.

Mbimo yi Jowasi a nga ti ni 7 wa malembe, Joyadha a sengeletile otshe majaha a lisima a khe Judha, e ma gela tiya: ‘Emani matimbani ka dithempele mi nga lekeni m’thu e bela muwa.’ Se Joyadha a to humisa Jowasi e ta m’sanzeka txigoko txa wukoma hamsungo e gwita e m’thela mafura. Se vathu va Judha va to kwangula va txi khona: ‘A na hanyi mfumeli!’

Ataliya a to pfa vathu va txi vanga diguwa, se e tutuma e tsula dithempeleni. Mbimo yi a nga wona ti to ku ti ni mkoma wamphya, a to kwangula a txi khene: “Mo ni jikela! Mo ni jikela!” Se majaha a kari ma to teka Ataliya me m’humisa dithempeleni me ya m’daya. Hambiku Ataliya se a nga ti fite, ku ti ngadi ni timhaka to biha ati a nga di ti mahile khe Judha. Se Joyadha a ndi maha txani?

Joyadha ni votshe vathu va Judha va thembisile ti to va ndi na khozela Jehovha basi. Se Joyadha a khundumusete dithempele da Bhahali ni sotshe sifananiso asi si nga diho khe Judha. Msana keto, Joyadha a sawute vaprista, Valevhi ni vawoneleli va matimba kasiku ve thuma ka dithempele da Jehovha. Ngu mhaka ya toneto, vathu va ndi na tshumela ve khozela Jehovha ngu nzila ya yinene. Se Joyadha ni mamwani majaha, ma tekile Jowasi me m’yisa nyumbani ka wukoma, me ya m’veka ka txitulu txa wukoma. Votshe vathu va Judha va ti tsakile ngutu. Nguku konku, va ndi na sikota kukhozela Jehovha va si khulumetelwi ngu Ataliya ni wukhozeli wa Bhahali. Wa ti wona? Txibindi txa Joyadha txi vhuni vathu vavangi.