Ninivha i ti dimwedo da madhoropa aya ma nga txi maneka ka ditiko da Asiriya. Vathu ava va nga txi zumba ka didhoropa dile va txi maha timhaka to biha ngutu. Ngu toneto, Jehovha a rumete mprofeti Jona ti to eya gela vathu vale to ve leka kumaha timhaka to biha. Kambe, hahanze ko tsula amu Jehovha a nga ti m’rumile kona, Jona a to bela ngalavani e pfhuka eya ka didhoropa da Tarxixi adi di nga txi maneka kule ni Ninivha.

Mbimo yi a nga txi enda ngu ngalava, kukhatile moya wa hombe ngutu lineneni mule. Vatsimbitisi va ngalava va to thava ngutu. Se va to khata kumaha mikombelo ka sizimu sawe kasiku ve ziva ti to ngu kutxani ku nga ti ni moya wule wa hombe ngutu. Jona a gete tiya vatsimbitisi vale va ngalava: ‘Ngani ni ku ni mnandu. Jehovha a ni rumile kumaha to kari, kambe ani ni to pfhuka. Ni guleni mi ni rinza lineneni, se linene li na zenga.’ Vatsimbitisi vale va ngalava, va si ti lavi kumaha ati Jona a nga va gela, kambe ene a va sinzisile. Mbimo yi vatsimbitisi va ngalava va nga rinza Jona lineneni, moya wule wa hombe wu to ema.

Jona a khatile kubhwabhwamela matini. Ene a txi pimisa ti to a ndi na fa, se a mahile mkombelo ka Jehovha. Ka yona mbimo yile, Jehovha a rumete txihaka txa hombe atxi txi nga ya mita Jona. Kambe, Jona kha nga ya fa mndani ka txihaka. A di mndani mule ka txihaka, Jona a mahile mkombelo atxi khene: ‘Jehovha, na kuthembisa ti to kukhukhela konku ni na kuengisa yotshe mbimo.’ Jona a zumbile mndani ka txihaka kudingana masiku mararu. Se ngu msana, Jehovha a mahile ti to txihaka txile txiya kamba Jona hahanze ka linene.

Ina eto ti txi lava kuwomba ti to Jona a sa fanela kutsula kambe Ninivha? Nadha. Jehovha a tshumete e ruma kambe Jona ti to e tsula Ninivha. Kambe, ka dikhambi diya, Jona a engisile. Mbimo yi a nga hoka Ninivha, Jona a va gete tiya vathu vale va nga txi maha timhaka to biha: ‘Mndani ka 40 wa masiku dwe, Ninivha a na loviswa.’ Se kumahekile timhaka ti ni wamweyo a nga sa ti emela, Vaninivha va lekile kumaha timhaka to biha, ve tisola. Mkoma wa Ninivha a gete tiya vathu va didhoropa dile: ‘A hi kombeleni Txizimu ti to txi hi divalela. Ti nga maha txi si hi dayi.’ Mbimo yi Jehovha a nga wona ti to Vaninivha va di lekile kumaha timhaka to biha, ve ti sola, kha lovisa didhoropa dile.

Jona a henyile ngutu nguku Jehovha a nga mbi lovisa Vaninivha. Hi nga pimisa ngu tiya: Phela Jehovha adi timiselete Jona e tshumela e m’pfela wusiwana. Kambe, Jona asi va pfeli wusiwana Vaninivha. Ene a humile didhoropani mule a di sungile khohe, e tsula eya khalahatsha ka mtsudi wa mndonga wo kari. Kambe mndonga wule wu fite, se eto ti mahile ti to Jona e henya ngutu. Jehovha a gondisile timhaka ta lisima ngutu Jona, ngu ku m’gela tiya: ‘Awe u pfete wusiwana mndonga ni ku u henyile ngutu mbimo yi wu nga fa. Ina khu pimisi ti to vathu va Ninivha mba lisima ngutu kupinda mndonga wuwa?’

Mfumo wa Asiriya se wu ti xute mfumo wa 10 wa tihunzu ta Israyeli. Kambe konku, se wu txi lava kuxula mfumo wa tihunzu timbidi ta Judha. Senakeribhe mkoma wa Asiriya, atxi xasela madhoropa a Judha dimwedo ngu dimwedo. Kambe, didhoropa adi a nga txi di lava ngutu ku di xasela, i ti Jerusalema. Phela Senakeribhe a si ti pimisi ti to Jehovha atxi vhikela didhoropa da Jerusalema.

Ezekhiya mkoma wa Judha, a ningile male yayingi Senakeribhe kasiku a si xaseli Jerusalema. Senakeribhe a tekile male yile, hambiketo, a rumete masotxhwa akwe amangi kasiku me ya xasela didhoropa dile. Vathu va Judha va thavile ngutu nguku Vasiriya va ti hafuhi ni kubela didhoropani mule. Se Ezekhiya a va gete tiya vathu vale: ‘Mi nga thaveni. Vasiriya va ni mtamo, kambe Jehovha a na hi vhuna ti to hi va ni mtamo wa hombe kuva pinda.’

Senakeribhe a rumete Rabhisake ti to e tsula Jerusalema. Mbimo yi a nga hoka kheya, Rabhisake a tiya ema hahanze ka didhoropa e khata kuseka vathu vale va Jerusalema. A to gwita e kwangula atxi khene: ‘Jehovha kha nambi mi vhuna anu. Mi nga lekeni Ezekhiya e mi xenga. Kha ku na txizimu atxi txi ku ni mtamo wo vhikela didhoropa danu kasiku hi si di xaseli.’

Ezekhiya a wotisile Jehovha ati a nga di fanete ku ti maha. Se Jehovha a m’xamute atxi khene: ‘U nga thavi ngu mhaka ya ti Rabhisake a nga womba. Senakeribhe kha nambi xasela Jerusalema.’ Ku di pindile mbimonyana, Ezekhiya a amukete mapasi a Senakeribhe. Mapasi yale ma txi womba tiya: ‘Hi nga leka kanu mo Ezekhiya. Jehovha kha nambi mi hulukisa.’ Se Ezekhiya a to maha mkombela atxi khene: ‘Jehovha! Ho kombela, hi hulukisi, kasiku votshe va na tiziva ti to awe u mkoma ni ti to u Txizimu txa ditshuri.’ Jehovha a xamute Ezekhiya atxi khene: ‘Mkoma wa Asiriya kha nambi bela Jerusalema. Ani ni na vhikela didhoropa dangu.’

Masotxhwa a Asiriya ma tile me ta ranganyeta didhoropa da Jerusalema. Phela Senakeribhe a txi pimisa ti to a ndi na sikota kubela didhoropani mule. Ina wa tiziva ati ti nga maheka? Ka wona wusiku wule, Jehovha a rumete ngilozi yakwe yi tsula aha masotxhwa a Vasiriya ma nga ti kona. Ngilozi yile yi tiya daya 185.000 wa masotxhwa. Mkoma Senakeribhe a luzile otshe masotxhwa akwe a mtamo e sala a di ko goo! Ku singa ni timwani ati a ndi no timaha, se a to tshumela e tsula mtini. Jehovha a mahile a ti a nga di thembisile, a vhikete Ezekhiya kumweko ni didhoropa dakwe da Jerusalema. Se ngaku awe u ti kova khe Jerusalema, ina u di thembile Jehovha?