Makhambi amangi, Vaisrayeli va lekile kukhozela Jehovha veya khozela sifananiso. Ngu malembe amangi, Jehovha a rumete vaprofeti kasiku veya va vhuna. Kambe, vathu vale va singa ni mhaka ni ti vaprofeti vale va nga txi ti womba, va txi veka ni kuva poyilela ni kuva seka. Se, Jehovha a ndi na maha txani kasiku e gumisa wukhozeli wa sifananiso?

Ka mbimo yile, Nebhukodhonosori mkoma wa Bhabhilona, a txi xasela ni kuxula madhoropa amangi dimwedo ngu dimwedo. Ka dikhambi do khata adi a nga xasela Jerusalema, a ti ya teka mkoma Joyakimi, vathangeli, masotxhwa ni majaha amangi a Judha e tsula nawo Bhabhilona. Nebhukodhonosori a tshumete e teka silo sa lisima ngutu dithempeleni ka Jehovha. Ene a gwitile e veka Zedhekiya kasiku e vhaleta Joyakimi kota mkoma wa Judha.

Makhatoni, Zedhekiya atxi engisa mkoma wa Bhabhilona. Kambe, vaprofeti vo kari va makuhu ni vathu vamwani va gete Zedhekiya ti to e wukela mkoma wa Bhabhilona. Se Jeremiya a txharihisile Zedhekiya atxi khene: ‘Ngaku u txo leka kuengisa mkoma wa Bhabhilona, ku na humelela timhaka tatingi to biha ditikoni muwa. Vathu vavangi va na dawa, ku nava ni nzala ni malwati.’

Ku di pindile 8 wa malembe, Zedhekiya a lekile kuengisa mkoma wa Bhabhilona. Ni ku a ti ya kombela txivhuno ka masotxhwa a Vaegipta. Se, Nebhukodhonosori a rumete masotxhwa akwe ti to meya ranganyeta Jerusalema ni ku m’xasela. Jeremiya a gete tiya Zedhekiya: ‘Ti ningele ka Vabhabhilona. Jehovha a wombile ti to ngaku u txo ti ningela, u na huluka awe ni didhoropa diya. Kambe u txo lamba ku tiningela, Vabhabhilona va na hisa Jerusalema ve gwita ve kunõla ve tsula ni nawe.’ Zedhekiya a to khene: ‘Ni ti ningela? Divala.’

Ku di pindile dilembe ni hafu, Vabhabhilona va sikoti kubela Jerusalema ve ta hisa didhoropa. Vona va hisile dithempele, ve daya vathu vavangi ni kutshumela ve teka vamwani vathu ve tsula navo Bhabhilona kasiku veya va maha sibotxhwa.

Zedhekiya ato huma Jerusalema e tutuma. Kambe Vabhabhilona va to m’hinga ve mmana, va so m’teka ve tsula nayo ka mkoma Nebhukodhonosori. Se mkoma a to rumisa ti to kudawa vanana va Zedhekiya masoni kwakwe. Msana keto, Nebhukodhonosori a to xokolela maso a Zedhekiya e gwita e m’beta jele. Zedhekiya a zumbile jele mule kala kuza e fa. Kambe Jehovha a thembisile tiya vathu va Judha: ‘Ku txi pinda 70 wa malembe, ani ni na mi tshumeta mi tsula Jerusalema.’

Ina wa tiziva ti to majovhem mamwani aya ma nga txi dhunda Jehovha ni ona ma tekilwe me tsula Bhabhilona? Ina ma ndi na ya simama ma di thembekile ka Jehovha?

Msana kova mkoma Nebhukodhonosori a di tekile vathu va Judha ve tsula Bhabhilona, ene a txi lava ti to vathangeli va Judha ve mthumela. Se ene a rumile dijaha adi di nga txi dhanwa ku i Aspenazi ti to diya sawula vafana vo txhariha ngutu ni va va ngadi ni dihanyo da dinene. Vafana vonevo va ndi na mana trenamentu kudingana malembe mararu. Vona va ti fanete kugondela kulera, kubhala ni kuwomba-womba lidimi la Bhabhilona. Va ndi na tshumela ve dya sakudya asi si nga txi dyiwa ngu mkoma ni votshe ava va nga txi thuma ka nyumba ya wukoma. Ka vafana ava va nga ti sawutwe, ku ti ni 4 wa vona ava matina awe i nga ti Dhaniyeli, Hananiya, Misayeli ni Azariya. Aspenazi ava rayile matina mamwani a Vabhabhilona, i ku awa: Bheltexazari, Xadrake, Mixake, Abhedhi-Nego. Se, ina trenamentu ayi va nga txi yi mana Bhabhilona yi ndi na maha ti to vafana vale ve leka kuengisa Jehovha?

Vafana vale va 4 va di tiemisete kuengisa Jehovha. Vona va txi tiziva ti to milayo ya Jehovha yi txi tsimba kudya sakudya sile si nga ti dyiwa ngu Vabhabhilona. Ngu toneto, vona va wombawombile ni Aspenazi va txi khona: ‘Hi kombela kwambi dya sakudya sa mkoma.’ Se Aspenazi ava xamute atxi khene: ‘Ngaku anu mi si ngo dya sakudya sa mkoma se e mi wona mi di gomile, ene a na ni daya!’

Dhaniyeli a tsute eya womba-womba ni dijaha adi di nga txi va wonelela, e di gela tiya: ‘Athu hi ningi matawa ni mati kudingana 10 wa masiku. Se ku di pindile 10 wa masiku, u na gwita u hi fananisa ni vafana avale va dyako sakudya sa mkoma.’ Dijaha dile di tumete.

Msana kova ku di pindile 10 wa masiku, Dhaniyeli ni vangana vakwe va ti ni mtamo ngutu kupinda vafana vale vamwani. Jehovha a tsakile ngutu aku Dhaniyeli ni vangana vakwe va nga m’engisa. Jehovha a tshumete e ninga Dhaniyeli wuzivi wo kota kupfisisa ni kutxhamusela miloro.

Mbimo yi trenamentu yi nga guma, Aspenazi a tekile voshe vafana e tsula navo ka mkoma Nebhukodhonosori. Mkoma a tiya va maha siwotiso, se a tumbute ti to Dhaniyeli, Hananiya, Misayeli ni Azariya va txi ziva ngutu kupinda vafana vamwani. Ngu toneto, mkoma a sawute vafana vale va 4 ti to ve thuma nyumbani ka wukoma. Mbimo yotshe mkoma atxi kombela idheya kwawe mbimo yi a nga txi lava kululamisa timhaka ta lisima ngutu. Jehovha a vhuni Dhaniyeli ni vangana vakwe, ti to ve va ni wuzivi kupinda titxhari ni vahuti va mkoma Nebhukodhonosori.

Dhaniyeli, Hananiya, Misayeli ni Azariya va ti kule ni maxaka awe, hambiketo vona kha va leka kuengisa Jehovha. Awe ko? Ina mbimo yotshe u na engisa Jehovha hambi u di kule ni vaveleki vako?