Ka wusiku wo kari, mkoma Nebhukodhonosori a lorile timhaka ati ti nga mbi toloveleka. Mloro wule wu m’karatile ngutu aha koza a si wu mani wukohe. Se Nebhukodhonosori a to dhana titxhari takwe e ti gela tiya: ‘Ni txhamuseleni ati ni nga lora.’ Titxhari tile ti to kha tona: ‘Mkoma hi gele ati u nga lora.’ Kambe Nebhukodhonosori a to khene: ‘Nadha! Ni geleni ati ni nga lora ni txhamuselo ya kona, ni nga mi daya.’ Titxhari tile ti to kha tona: ‘Ho kombela mkoma, hi gele ati u nga lora hi na kota ku kutxhamusela.’ Se mkoma a to khene: ‘Anu mi lava ku ni kanganyisa. Ni geleni ati ni nga lora!’ Titxhari ti to kha tona: ‘Ati mkoma ati kombelako ta karata ngutu. Kha ngaho a nga sikotako ku timaha.’

Nebhukodhonosori a henyile ngutu, se a rumisile ti to totshe titxhari ta Bhabhilona ti dawa. Titxhari toneto ti txi pata Dhaniyeli, Xadreke, Mixake ni Abhedhi-Nego. Se Dhaniyeli a tsute eya womba-womba ni Nebhukodhonosori, e m’kombela ti to e m’ninga mbimonyana. Dhaniyeli ni vangana vakwe va mahile mkombelo ka Jehovha va txi kombela txivhuno. Se, ngu tihi ati Jehovha a nga ti maha?

Jehovha a gete Dhaniyeli mloro wa Nebhukodhonosori ni txhamuselo ya wona. Se mangwanani ka kona, Dhaniyeli a gete tiya tximwetxo txa sithumi sa mkoma: ‘U nga dayi titxhari. Ani ni na txhamusela mloro wa mkoma.’ Txithumi txile txi tekile Dhaniyeli txi tsula nayo ka Nebhukodhonosori. Dhaniyeli a tiya gela tiya mkoma: ‘Mloro wako ngu wu wa: Mkoma, awe u woni txithombe txa hombe txi ku ni msungo wa ouro. Khana ni mawoko a txona i ti sa prata, mrumbu kala ka mazolo i ti sa kobre, minenge ya kona i ti ya simbi, se mikondo ya txona i ti ya simbi yo patelana ni dibumba. U woni dirigwi adi di nga txita ngu ka mmango di ta faya mikongo ya txithombe txile, se txithombe txile txi to maha mpupu. Ku to gwita kuta moya awu wu nga ta hangalasa mpupu wule. Msana keto, dirigwi dile di to maha mmango wa hombe ngutu, awu wu nga fenengeta otshe mafu.’

Dhaniyeli a tshumete e gela Nebhukodhonosori txhamuselo ya mloro wakwe, atxi khene: ‘Msungo wule wa ouro wu emela mfumo wako. Prata yi emela mfumo wumwani awu wu no ta msana ka mfumo wako. Se, ku nata mfumo wumwani awu wu no fana ni kobre wu no fuma otshe mafu. Ku na gwita kulondisela mfumo wumwani wo tsana kufana ni simbi. Ngu magwito, ku nava ni mfumo awu wu no va wu di abanekile. Didhawa dimwani da mfumo wonewo, di nava di di tsani ngutu kufana ni simbi, kambe didhawa dimwani di nava di sa tsana kufana ni dibumba. Dirigwi dile u nga di wona di txi maha mmango wa hombe, di emela Mfumo wa Txizimu. Mfumo wonewo wu na fayetela yotshe mifumo, se wona wu na fuma otshe mafu ngu ha ku si gumiko.’

Mbimo yi a nga pfa tile, Nebhukodhonosori a to khizama, e gwita e gela tiya Dhaniyeli: ‘Txizimu txako txi nga kugela mloro wangu. Kha ku nga ni tximwani Txizimu txo fana ni txona.’ Nebhukodhonosori kha daya Dhaniyeli, kambe a m’vekile kota mthangeli wa totshe titxhari ta khe Bhabhilona. Wa ti wona? Jehovha a xamute mkombelo wa Dhaniyeli ni vangana vakwe.

Msana ka kuva ku di pindile mbimo, mkoma Nebhukodhonosori a mahile txifananiso txa hombe txa ouro. Se, a to dhana votshe vathu va lisima va khe Bhabhilona kasiku ve ta wona txifananiso txile. Ka vathu vale ku ti ni Xadreke, Mixake ni Abhedhi-Nego. Se mkoma a to womba tiya: ‘Mbimo yi mi no pfa ku txi txhaywa wutxenje, khizamani mi txi khozela txifaniso txiya. Awu a no mbi khizama, a na ya vinzwa ka diphala da mndilo. Se, ina Xadreke Mixake ni Abhedhi-Nego va di na khozela txifananiso txile mwendo va di na simama va di thembekile ka Jehovha?

Mbimo yi va nga khata kutxhaya wutxenje votshe vathu va to khizama ve khozela txifananiso txile. Kambe Xadreke Mixake ni Abhedhi-Nego kha va khizama. Majaha o kari ma va woni, se va tsute ve ya gela Nebhukodhonosori. Se mkoma a to rumisa ti to ve ya dhana majaha yale a mararu e ta ma gela tiya: ‘Ku na txhaywa kambe wutxenje, se ngaku anu mi si ngo khizama mi khozela txifananiso txile, ni na mi rinza, ka diphala da mndilo. Kha ku nga ni Txizimu a txi txi no mi hulukisa.’ Se vona va to xamula va txi khene: ‘Nadha mkoma, kha ti sungi ti to ku txhaywa kambe wutxenje. Txizimu txathu txi na hi hulukisa ka diphala da mndilo. Kambe hambi txona txi si hi hulukisi, athu kha hi na mbi txi khozela txifananiso txile.’

Nebhukodhonosori a henyile ngutu, se e womba tiya: ‘Dhivelelani mndilo, wu hisa 7 wa makhambi kupinda ti wu hisisako tona. Tekani majaha yawa mi ma rinza mndiloni.’ Masotxhwa ma mahile ati mkoma a nga ma gela. Kambe diphala di txi hisa ngutu aha ko masotxhwa ma fite ngu kutshuketa dwe. Mbimo yi mkoma a nga wona mndani mule ka diphala, a woni 4 wa majaha ma txi tsimbila. Se a thavile ngutu e wotisa tiya: ‘Kasi kha ha rinza majaha mararu mule? Phela ni wona 4 wa majaha, kambe dimwedo da kona do nga ngilozi.’

Nebhukodhonosori a tshuketile ngu hafuhi ka diphala dile, e gela Xadreke Mixake ni Abhedhi-Nego ti to ve huma. Votshe va xamate ngutu nguku majaha yale a mararu ma sa nga hya, didhowo dawe, misisi yawe ni simaha sawe si sa nga hya. Nem va si pfali wutshi.

Nebhukodhonosori a to khene: ‘Txizimu txa Xadreke Mixake ni Abhedhi-Nego ngu txona txi ku ni mtamo ngutu kupinda sotshe. Txona txi rumete ngilozi yi ta hulukisa majaha yawa a mararu. Kha ku nga ni Txizimu txo fana ni Txizimu txawe.’

Hi gonda txani ka Xadreke Mixake ni Abhedhi-Nego? Hi gonda ti to hi fanete kutiemisela kuzumba hi di thembekile ka Jehovha ti si nga ni mhaka ni ti ti humelelako.