Ka wusiku wo kari, mkoma Nebhukodhonosori, a tshumete e va ni mloro wumwani. Ene a thavile ngutu. Ene a kombete titxhari takwe kasiku ti txhamusela ati mloro wule wu nga txi womba tona. Kambe kha ngaho awu a nga sikota ku mtxhamusela. Se mkoma a ti ya womba-womba ni Dhaniyeli.

Nebhukodhonosori a ti khene: ‘Ani ni lorile mndonga, wu ti laphile ngutu aha ko wu txi hoka ni nzumani. Wona wu txi woneka kotshe hamafuni. Wu ti ni mazokoro o tshura, ni mihando yayingi. Sihari si txi dhunda ku ya humula ka m’tsudi wa wona, se sinyana si txi maha sisaka ka madhavi a wona. Se ku to humelela ngilozi yi txi ta ngu nzumani yi txi kha yona: “Gangani mndonga ewo, wilani madhavi a wona. Siyani txigodho ni mikuluti ya wona hamafuni, mi txi sunga ngu txhini ya simbi ni ya kobre. Mbilu ya txona yi na txitxa yi si fani ni mbilu ya m’thu, se txi na ningwa mbilu ya wuhari kala kuza kupinda 7 wa timbimo. Votshe vathu va na ti ziva ti to Txizimu txa fuma ni ku txi nga ningela wukoma ka wule txi m’lavako.”’

Se Jehovha a to gela Dhaniyeli txhamuselo ya mloro wule wa Nebhukodhonosori. Mbimo yi Dhaniyeli a nga pfisisa txhamuselo ya mloro, a to thava e gwita e gela tiya mkoma: ‘Mkoma, ti ndi nava tshuku i ti ku mloro wuwa wo womba-womba ngu valala vako, kambe wu womba-womba ngu ngawe. Mndonga wule wa hombe u nga wu wona wu txi gangwa wuwa, ngawe mkoma. Awe u na luza wukoma wako, ni ku u na dya mwasi kufana ni sihari sa txitinga. Kambe aku ngilozi yi nga womba ti to kulekwa txigodho ni mikuluti ya txona hamafuni, awe u na tshumela u va mkoma.’

Ku di pindile dilembe, Nebhukodhonosori a di txitimwi ka nyumba yakwe ya wukoma a txi wonetela didhoropa dile da Bhabhilona, ene a to khene: ‘Hi nga wona kutshura ni kuxamalisa ka didhoropa adi ni nga di aka. Phela ani ni wa hombe ngu ditshuri.’ Mbimo yi a nga gwita kuwombawomba, ku to pfala dipswi ngu nzumani di txi kha dona: ‘Nebhukodhonosori, awe u luzile wukoma.’

Ka yona mbimo yileya, Nebhukodhonosori a to khata kuxanga a txi nga txihari txa txitinga. Ngu toneto va to m’humisa nyumbani kwakwe ka wukoma e ya hanya txitingani ni sihari. Misisi yakwe yi to kula ngutu yi txi nga mitenga ya digama, se siyala sakwe si txi fana ni sa digama.

Ku di pindile 7 wa malembe, Nebhukodhonosori a lekile kuxanga. Se Jehovha a to maha ti to e tshumela e va mkoma wa Bhabhilona. Nebhukodhonosori a ti khene: ‘Jehovha Mkoma wa nzuma, ene wa fanelwa ngu kukhozelwa. Konku na ti ziva ti to Jehovha ngene a fumako, ene wa gondisa vathu ku va si ti guleti ni ku wa ninga wukoma awu a m’lavako.’

Ku di pindile mbimo, Bhelxazari a ve mkoma wa Bhabhilona. Ka wusiku wo kari, a mahile fexta ya hombe e ramba vathu va lisima va khe Bhabhilona. Se Bhelxazari a rumile sithumi sakwe ti to si ya teka tikopo ta ouro ati Nebhukodhonosori a nga di ya ti teka dithempeleni ka Jehovha. Bhelxazari ni votshe vale va nga di ka fexta yile, va txi sela vhinya ka tikopo tile va txi dhumisa sizimu sawe. Se ku to humelela diwoko da dijaha di bhala mapswi o mbi toloveleka ka diseta da nyumba ayi va nga di ka yona.

Bhelxazari a to thava. Se a to dhana titxhari takwe e ta ti gela tiya: ‘Awu a no si kota ku ni txhamusela mapswi yale, a na va m’thu wa wuraru wa lisima ngutu kotshe Bhabhilona.’ Titxhari tile ti zamile ku m’txhamusela, kambe kha ngaho a nga si kota. Se mame wa Bhelxazari a to m’gela tiya: ‘Ku ni dijaha adi va ku khona i Dhaniyeli, ngu dona di nga txi txhamusela miloro Nebhukodhonosori. Dona di nga sikota kutxhamusela mapswi yale ni ti ma lavako kuwomba tona.’

Va to ya dhana Dhaniyeli, mbimo yi a nga hoka, Bhelxazari a ti khene: ‘Dhaniyeli, ngaku awe u txo sikota kulera ni ku ni txhamusela mapswi yale, ni na kuninga likordhawu la ouro ni gwita ni kumaha dijaha da wuraru da lisima ngutu kotshe Bhabhilona.’ Dhaniyeli a to khene: ‘Nadha mkoma, kha ni lavi txilo. Kambe ani ni na kugela txhamuselo ya mapswi yale. Tate wako Nebhukodhonosori i ti dijaha do ti guleta, kambe Jehovha a m’gondisile txo kari. Awe wa tiziva totshe ati ti nga humelela ngu tate wako, hambiketo u sete vhinya ngu tikopo ta dithempeleni ka Jehovha. Jehovha a henyile ngutu. Ngu toneto, ti nga mmaha e bhala mapswi yale ka diseta, aya ma ku khene: Mene, Mene, Tekele ni Parisini. Ona ma lava kuwomba ti to mkoma wa Vamedhi ni wa Vapersiya a na xasela Bhabhilona ni ku awe khu na mbi swa kambe u va mkoma.’

Didhoropa da Bhabhilona di ti bhiyilwe ngu mmuru ni ku di ti ranganyetilwe ngu mnambu. Ngu toneto, votshe vathu va Bhabhilona va txi pimisa ti to kha ngaho a ndi no sikota ku va xasela. Kambe ka wona wusiku wule va nga txi maha fexta, masotxhwa a Vamedhi ni Vapersiya va xasete Bhabhilona. Mkoma wa Persiya awu a nga txi dhanwa ku i Siro a jikisile mati a mnambu kasiku masotxhwa me sikota kukwela me za me ya hoka ka matimba a Bhabhilona. Mbimo yi ma nga hoka hale ka matimba, ma di ya tumbula ti to ma sa vhalwa. Masotxhwa yale ma to bela me xasela didhoropa, me daya ni Bhelxazari. Se Siro a to va mkoma wa Bhabhilona.

Ku di pindile dilembe, Siro a gete tiya votshe vathu ava va nga di Bhabhilona: ‘Jehovha a ni rumile ti to ni ya wuseta dithempele dakwe khe Jerusalema. Votshe Vajudha ava va no lava ku ya vhuneta, va nga tsula.’ Nga ha Jehovha a nga di thembisile ngu kona, Vajudha vavangi va tshumelete mitini kwawe msana ka kuva ku di pindile 70 wa malembe Jerusalema a di lovisilwe. Siro a tshumetile tikopo ta ouro, ta prata ni sotshe asi Nebhukodhonosori a nga di si tekile dithempeleni. Wa ti wona? Jehovha a thumisile Siro kasiku e vhuna Vajudha.