Dhariyo i ve mmwani mkoma awu a nga fuma Bhabhilona. Ene a txi ti ziva ti to Dhaniyeli i ti dijaha do txhariha ngutu. Ngu toneto, a mmahile mthangeli wa otshe majaha a lisima ngutu a khe Bhabhilona. Kambe, majaha ale ma txi bavela Dhaniyeli ni ku ma si lavi ni ku m’wona. Ona ma txi ti ziva ti to Dhaniyeli a txi maha mkombelo ka Jehovha kuraru ngu ditshiku. Se ona ma tsute me ya womba-womba ni mkoma, ma txi kha ona: ‘Mkoma Dhariyo, u fanete kuveka mlayo awu wu rumako ti to votshe vathu ve maha mkombelo kwako dwe. Awu a no maha mkombelo ka Txizimu tximwani, a fanete kurinzwa ka diphala da tingonyamu.’ Dhariyo a yi tsakete idheya yileya, se a mahile mlayo wonewo.

Mbimo yi Dhaniyeli a nga ti ziva, a to tsula mtini kwakwe, e ya khizama masoni ka dijanela e maha mkombelo ka Jehovha. Se valala vakwe va to bela nyumbani ka Dhaniyeli, ka yona mbimo yile a nga txi maha mkombelo. Mbimo yi va nga wona ti to o maha mkombelo, va to tutuma ve tsula ka Dhariyo ve ya m’gela tiya: ‘Dhaniyeli kha kuengisa, ene wa maha mkombelo ka Txizimu txakwe makhambi mararu ngu ditshiku. Kambe Dhariyo a txi m’dhunda ngutu Dhaniyeli ni ku a si ti lavi ti to e fa. Ngu toneto, Dhariyo a hetile ditshiku dotshe a txi zama tinzila to hulukisa Dhaniyeli. Kambe ku si na ti a nga ndi no ti maha nguku ene se a ti sinarile mlayo ni ku a si na ku wu txitxa. Se a rumile majaha akwe ti to me ya rinza Dhaniyeli ka diphala da tingonyamu.

Ka wona wusiku wule, Dhariyo a karatekile ngutu ngu Dhaniyeli ni ku a si wu mani ni wukohe. Mangwanani ka kona ni mixo, ene a tsute ka diphala dile e ya kwangula a txi khene: ‘Dhaniyeli, ina Txizimu txako txi kuhulukisile?’

Dhaniyeli a xamatisile Dhariyo mbimo yi a nga xamula a txi khene: ‘Niho mkoma, ngilozi ya Jehovha yi tile yi ta vhala sisofu sa tingonyamu.’ Dhariyo a tsakile ngutu ni ku a gete vavamna vakwe ti to ve humisa Dhaniyeli a mule ka diphala dile. Ene nem a sa nga nyarwa. Se mkoma a rumisile ti to kurinzwa vavamna avale va nga di rinzile Dhaniyeli ka diphala da tingonyamu. Mbimo yi majaha yale ma nga rinzwa ma do tekela kudyiwa ngu tingonyamu.

Msana ka totshe tiya, Dhariyo a rumisile ti to vathu votshe ve gelwa tiya: ‘Vathu votshe va fanete kukhozela Txizimu txa Dhaniyeli, txona txi hulukisile Dhaniyeli a mu ka diphala da tingonyamu.’

Ina awe u na etetela Dhaniyeli u maha mkombelo ditshiku ni ditshiku?

Esteri i ti dihorana da M’judha adi di nga txi zumba Susani, i ku dimwedo da madhoropa a Persiya. Ene a txi zumba kheya nguku malembe amangi msana, Nebhukodhonosori a di tekile mwaya wa Esteri khe Jerusalema e tsula nawo Bhabhilona. Esteri a kulisilwe ngu primu wakwe Mordhekayi. Mordhekayi a txi thumela mkoma wa Persiya awu nga txi dhanwa ku ni Asuwero.

Mkoma Asuwero a txi lava wamsikati. Se sithumi sakwe si ti ya teka votshe vavasikati vo tshura va Susani kupata ni Esteri. Wa ti ziva ti to i mani awu a nga langwa ngu mkoma? I Esteri. Kambe Mordhekayi a gete Esteri ti to a sa fanela kugela m’thu ti to ene i ti M’judha.

Akhe Susani ku ti ni dijaha adi di nga txi ti gela ngutu va nga txi kheni i Hamani. Dona i ti mthangeli wa hombe wa votshe vathangeli ni ku di txi lava ti to votshe vathu ve khizama masoni ka dona. Kambe Mordhekayi kha gwitisa kumaha eto. Eto ti henyisile ngutu Hamani aha koza e lava kudaya Mordhekayi. Se mbimo yi a nga tumbula ti to Mordhekayi i ti M’judha, Hamani a mahile planu yo lava kudaya votshe Vajudha. Ene a ti ya gela tiya mkoma: ‘Phela Vajudha hi nga vathu va vanene, i tshuku ve dawa.’ Mbimo yi mkoma Asuwero a nga pfa eto, a gete Hamani ti to e maha mlayo. Mlayo wu txi womba ti to votshe Vajudha va di fanete kudawa ngu ditshiku da wu 13 ka mtxima wa Adhari. Kambe Jehovha a txi ti wona totshe tile ti nga txi maheka.

Esteri a si ti zivi ti to ku ti mahilwe mlayo. Se Mordhekayi a tsutisile diphepha da mlayo wonewo ka Esteri e gwita e m’gela ti to a ti fanete kumaha txo kari kasiku e ya womba-womba ni mkoma. Esteri a wombile tiya: ‘Awe wa tiziva ti to awu a tsulako ka mkoma a sa dhanwa, o dawa. Phela kupinda 30 wa masiku mkoma a si khali ku ni dhana. Kambe ni na tsula. Ngaku mkoma a txi ya ni guletela ndonga yakwe ya wukoma, ni na mbi dawa, kambe ngaku a si ni guleteli ndonga yakwe, ni na dawa.’

Esteri a to tsula nyumbani ka wukoma. Mbimo yi mkoma a nga wona Esteri a to guleta ndonga yakwe ya wukoma. Esteri a to tshuketa a ha mkoma Asuwero a nga ti kona, se mkoma a to m’wotisa tiya: ‘U lava ti to ni ku mahela txani Esteri? Ene a to xamula a txi khene: ‘Ani ni lava ti to awe ni Hamani mi ta mtini mi ta jantara kona nyamsi.’ Mbimo yi va nga txi jantara, a to tshumela e va dhana kambe ti to ve ta jantara nayo mangwana. Se mangwanani ka kona, mbimo yi va nga txi jantara, mkoma a to tshumela e wotisa kambe Esteri ti to a ndi na m’vhuna ngu txani? Se ene a to khene: ‘Ku ni m’thu wu a lavako ku hi daya, ani ni Vajudha vamwani. Ho kombela u hi hulukisa.’ Se Mkoma a to khene: ‘I mani eneyo a lavako ku mi daya Esteri?’ Se Esteri a to khene: ‘I Hamani, dijaha diya da mbilu yo biha.’ Se Asuwero a henyile ngutu, e rumisa ti to kudawa Hamani ka yona mbimo yile.

Phela a si ngaho wu a ndi no txitxa mlayo awu wu nga di vekilwe ngu Hamani. Hambi mkoma, a si nga ni fanelo yo maha toneto. Se Asuwero, a vekile Mordhekayi kota mthangeli wa hombe wa votshe vathangeli ni ku a m’gete ti to a ti fanete kumaha mlayo wumwani. Mlayo wonewo wu txi womba ti to Vajudha va di fanete ku ti lwela mbimo yi va ndi no xaselwa. Se ka ditshiku da wu 13 ka mtxima wa Adhari, Vajudha va xute valala vawe. Msana keto, Vajudha va to khata kumaha fexta ngu ditshiku dile dilembe ni dilembe.