Txizimu Txi Lava Txani Ka Vathu?

MBIMO yi u xalelako mwendo kuengisela madungula, u ziva to tala ti ti mahekako ha mafuni, ngu txikombiso, tiyimbi ni wutherorisi. Kutilava u xaniswa ngu malwati o kari mwendo kufelwa ngu wu u mdhundako.

Mwaya wu wu engiselako mahungo ka rahdio

U nga ti wotisa tiya:

Ina ngu wona wuwa wutomi awu Txizimu txi ni navelelako wona ani ni mwaya wangu?
Nji txani txi txi nga ni vhunako ti to ni lwisana ni sikarato?
Ina hi ni themba ya ti to hi na hanya ngu kudikha ha mafuni?

Bhiblia ya xamula siwotiso soneso.

BHIBLIA YI WOMBA TI TO TXIZIMU TXI THEMBISILE WUMANGWANA WU WU TSAKISAKO.

Vathu kha va na mbi lwala, kukumba ni kufa.—Mtuletelo 21:4
“Sidiya si na ndaka.”—Isaya 35:6
“Maso a dibhofu ma na wona.”—Isaya 35:5
Vafi va na tshumela ve hanya.—Johane 5:28, 29
A walo wu a no khene na lwala.—Isaya 33:24
Ku na va ni sakudya so tala.—Masalmu 72:16

AWE U NGA PFISISA ATI BHIBLIA YI TI WOMBAKO

Fakazi ya Jehovha yi txi gonda Bhiblia ni mmweyo wa dijaha

Ti nga wonekisa ku nga bha ati Txizimu txi ti thembisako mayelano ni wumangwana i mloro. Kambe Txizimu txi khene i singa kale, totshe ti txi ti thembisako ku ti maha ti na maheka. Bhiblia ya txhamusela ti to txi na ti mahisa ku txani toneto.

Makhaloni ko wombawomba ngu wumangwana wonewo wo tsakisa, Bhiblia ya hi vhuna ti to hi va ni litsako konku. Alakanya ngu sikarato sa wena. Kutilava txikarata txa timale, txa mwaya, txa malwati mwendo kufa ka mngana mwendo dixaka dako. Bhiblia yi nga kuvhuna ti to u xula sikarato soneso. Ni ku u na tsaka ngu kuziva ti to Bhiblia yi si xamulisa ku txani siwotiso si si londiselako:

Ngu ku txani hi txi xaniseka?
Hi nga wonisana ngu nzila yihi ni sikarato sathu?
Mwaya wako wu nga li manisa ku txani litsako?
Ku maheka txani ngaku hi txi fa?
Ina hi na tshumela hi ma wona kambe maxaka ni vangana vathu ava va ngafa?
Hi nga tsaniseka ngu nzila yihi ti to Txizimu txi na maha totshe ati txi nga ti thembisa?

I di ti to wa lera dibhuku diya, ti komba ti to u lava kupfisisa ati Bhiblia yi ti wombako. Dibhuku diya di na kuvhuna. Tindimana ti ni siwotiso si si no kuvhuna ti to u pfisisa Bhiblia. Timiliyoni ta vathu ti tsakisilwe ngu txivhuno txa Tifakazi ta Jehovha ti to ti kupfisisa Bhiblia. Anawe u na txi dhunda txivhuno txonetxo. Hi navela ti to Txizimu txi ku katekisa ti to u pfisisa ati Bhiblia yi ti wombako.