Madhimoni ma kuzetela vathu ti to ve tshuralela Txizimu

Kambe ngu ku txani Sathane ni madhimoni akwe va txi hisekela kuxengetela vathu? Va lava ti to nathu hi tshuralela Txizimu. Va lava ti to hi va khozela. Va lava ni ti to hi engisa makuhu awe ni ku hi maha ati ti si tsakisiko Jehovha. Wungi wa mikhuwo yoneyo yi pata ti ti wombwako mayelana ni vakufa.

Kufa ka m’thu wu hi mdhundako i mhaka yi yi pandako, ngutoneto ta pfisiseka ku kombisa ku pandiseka kwathu. “Jesu a dite” msana ka lifo la mngana wakwe Lazaro.—Johane 11:35.

Ku ni sihena so tala si si tsimbitisanako ni timhaka ta lifo, ni ku sona sa hambana ngu kuya ngu makhalo ya ha mafuni. Wungi wa sona kha si lwisani ni matshina a milayo ya diBhibhele. Sihena simwane, si seketelwa ka mawonelo a ti to vafi va hanya ni ku va nga wona va va hanyako. Mikombelo yo rinzela kutshotsha mufi, kupeka ngutu tihuwa, ni sihena sa matshotshelo sotshe si seketelwa ka ku thava kuhenyisa vakufa. Kambe, vakufa “kha va zivi txilo”, ngutoneto, ava va mahako sihena soneso va seketela makuhu a Sathane.—Eklesiasta 9:5.

Sihena simwane ni mikhuwo si seketelwa ka likholo la ti to vakufa va lava txivhuno ka va va hanyako ni ku va nga xanisa va va hanyako ku nga ti va sa amukeleka ka wukhalo wa moya. Ka matiko mamwane ku mahwa mibuso ni miphaxo msana ko va mufi adi ni 40 wa masiko mwendo dilembe adi fite. Ku mahwa toneto ngu txikongomelo txo vhuna mufi ti to e ‘kota kuhoka’ ka wukhalo wa moya. Sihena simwane ngu phaxa vafi ngu mndiwo ni wusuke.

Sihena soneso si bihile nguko si seketela makuhu a Sathane mayelana ni vafi. Ina Jehovha wa tumelela silo si si tsimbitisanako ni sihena sa tigondo ta Sathane? Kha si tumeli!—2 Vakorinto 6:14-18.

Vakhozeli va ditshuri va Txizimu kha va mahi ti ti seketelako makuhu a Sathane. Kambe vona, ngu lirando va ti karatela kuvhuna va va hanyako ni ku va thavelela. Va ti ziva to m’thu wu a nga fa i Jehovha basi wu a nga mvhunako.—Yobo 14:14, 15.

Wuñanga wa yiliswa ngu Txizimu

Vathu vamwane va thumisana ni madhimoni ngu ku kongoma mwendo ngu kuya ka ñanga. Eto ngu tona ti wombwako ti to wuñanga. Wuloyi, kuxaxuva tixolo, kukhenja, kuwotisa tiñanga, totsheleto mixaka xaka ya wuñanga.

DiBhibhele di yilisa sihena soneso ngu nzila yiya: “Ku nga thuki ku manwa kwako m’thu ni mmweyo awu a . . . xaxuvako, awu a mahako masalamusi mwendo mmwane ni mmwane awu a mahako mixolo mwendo mloyi mwendo awu a loyako vamwane mwendo mmwane ni mmwane awu a wotisako ñanga mwendo muhuti wa hombe wa simahakalo mwendo mmwane ni mmwane awu a wotisako ava va nga fa. Nguko, votshe vathu ava va mahako timhaka toneto i mhaka yo nyenyeza ka Jehovha.”—Deteronoma 18:10-12.

Ngu ku txani Jehovha a txi hi bhasopisa ngutu ka sihena siya?

Jehovha a hi bhasopisa ka mixaka yotshe ya wuñanga ti to ku vhuneka athu. Ene wa va dhunda vathu ni ku wa khatala ngu vona, wa ti ziva ti to ava va ti tshanganisako ni madhimoni ngu ditshuri va na xaniseka.

Mmwane wu a nga xaniseka i Nilda, i nga ti ñanga ya sikwembu ya Brazil. Madhimoni ma ti sakata wutomi wakwe. Ene a txhamusela tiya: “Mimoya . . . yi ti ni fuma ni ku ni khozisa. Ku ti ni mbimo yi ni nga txi tsivala ni ku wuka, ni zumbela sibhejela ngu kota ya malwati o xanga. Madhimoni ma ti ni xanisa ha ko za ni fayeka ni mapimo. Ni khatile kuselela mirende ya yingi, kusela ni kudhaha ngutu. Toneto ti tekile malembe o tala.”

Ngu kuvhunwa ngu Jehovha ni Tifakazi takwe ta mafuni hawa, ngu kutsimbila ka mbimo Nilda a ti khulute ka mkuzetelo wa madhimoni se konkuwa a ni dihanyo da dinene. A womba tiya: “Ni mi kuzeta motsheno ti to mi nga thuki ni yihi mbimo mi ti pata ka mimoya [yo biha].”