Awe u ziva Tifakazi tingahi ta Jehovha? Kutilava muakelani wo kari, mthumi kuloni mwendo mgondi kuloni. Kutilava awe se u ta nga bhulisana ni mmweyo wathu mayelano ni Bhiblia. Kasi ngu ditshuri ngathu va mani ni ku ngu ku txani hi txi txhumayela vamwani ati hi ti tumelako?

Hi vathu vo fana ni nawe. Hi vathu va siemo ni mindawuko yo hambana hambana. Vamwani kwathu hi ta ngava va wukhongeli wumwane mwendo ku hi si tumeli ka Txizimu. Kambe, hi si nze ku ngava Tifakazi ta Jehovha, hotshethu hi ti hite mbimo yo xolisisa kwati tigondo ta Bhiblia. (Mithumo 17:11) Hi tumelelanile ni ti hi nga tigonda ati ti nga maha ti to hi maha txisungo txo khozela Jehovha Txizimu.

Ha wuyelwa ngu ku gonda Bhiblia. Ku fana ni vathu votshe, ha tshangana ni sikarato ni ku guma mtamo. Kambe hi tumbute ti to loko hi txi thumisa matshina a milayo ya Bhiblia ditshiku ni ditshiku, wuyelo nja hombe ngutu yo mana wutomi wa wunene. (Masalmo 128:1, 2) Etxo tximwetxo txa sivangelo si si hi mahako ti to hi gela vamwani ngu ta silo sa sinene si hi nga si gonda ka Bhiblia.

Hi hanya ngu milayo ya Txizimu. Hi ni tifanelo to fana ni kutiveka hahatshi ni wunene, i si ngeto basi milayo yoneyo yi yi gondiswako mu ka Bhiblia, yi yisa masoni mazumbelo a manene ni ku xonipha vamwani. Yona yi lulamisela mtxawa wa vathu va va ku ni wutomi wa wunene ava va vekako mihando, va va kuzetelako wumwewo wa mwaya ni mahanyelo a manene. Ha tsaniseka ti to “Txizimu kha txi khedhi m’thu” ni ku eto ngu tona ti mahako ti to kusungana kwathu ku t xi va ka matiko otshe, ku si nga ni mhaka ni sikhulumeta sa politika ni sa tixaka, hi sunganile ka likholo limwelo. Hambi ku hi ku vathu vo fana ni nawe, hi mtxawa wu wu nga hambana ni vamwani.​—Mithumo 4:13; 10:34, 35.

• Nji txani atxi txi mahako Tifakazi ta Jehovha ti va vathu vo fana ni nawe?

• Milayo muni yi Tifakazi ta Jehovha ti nga yi gonda mbimo yi ti nga gonda Bhiblia?

Wungi wa vathu va pimisa ti to ditina di di ku khene Tifakazi ta Jehovha nda wukhongeli wa wuphya. Kambe se ku pinda malembe ya ma pindako 2.700 malanda a Txizimu txa tximwetxo txa ditshuri ma txi dhanwa kota “tifakazi” ta txona. (Isaya 43:10-12) Kala 1931 hi ti ngadi hi txi dhanwa ku hi Vagondi va Bhiblia. Kambe ngu ku txani hi di amukete ditina da Tifakazi ta Jehovha?

Dona mfungo wa Txizimu txathu. Ngu kuya ngu mibhalo ya kale, ditina da Txizimu, Jehovha, di maneka makhati a magidhi ka Bhiblia. Ka wuhunduluxeli wo tala wa Bhiblia, ditina donedo di tsivetilwe ngu sithopo so fana ni Mkoma mwendo Txizimu. Kambe Txizimu txa ditshuri txi xawutete Mosi ditina da txona di di ku Jehovha, txi txi khene: “A diya ditina dangu ngu ha ku si gumiko”. (Eksodha 3:15) Toneto, ti mahile ti to Jehovha e hambana ni sizimu simwani sa makuhu. Ha ti guleta ngu kurwala ditina da Txizimu txo sawuleka.

Dona di xawutela mthumo wathu. Ka mbimo ya kale, vathu vo tala va ningete wufakazi wa likholo lawe ka Jehovha, wo khata wa vona i Abhele wamwamna wo lulama. Ngu ku tsimbila ka malembe, Nowa, Abrahamu, Sara, Mosi, Dhavhidha ni vamwani va mahile txienge txa “mtalo wa hombe wa tifakazi ta likholo”. (Vahebheru 11:4–12:1, NM) Nga ha m’thu a nga vako fakazi ya m’thu wa mnene habanza, nanathu hi tiemisete kugela vamwani ditshuri mayelano ni Txizimu.

Hi eteta Jesu. Bhiblia yi mdhana ku i “fakazi yo thembeka ya ditshuri”. (Mtuletelo 3:14) Jesu a pune a wombile to ‘a va ningile kuziva ditina da Txizimu’ ni ku ‘ta maha fakazi ya ditshuri’ ya Txizimu. (Johani 17:26; 18:37) Ngu koneho, vapizani va ditshuri va Kristu va fanete kurwala ditina da Jehovha ni ku di zivisa. Eto ngu ti Tifakazi ta Jehovha ti ti karatelako ku ti maha.

• Ngu ku txani Vagondi va Bhiblia va di amukete ditina di di ku Tifakazi ta Jehovha?

• Jehovha a ni tifakazi ha mafuni ku khukhela mbimo yihi?

• I mani wu i ku Fakazi ya hombe ya Jehovha?

Bhiblia yi profetile ti to msana ka lifu la Kristu, va ti na humelela vagondisi va makuhu hagari ka Makristu o khata, ava va nga ti na vhinganyisela ditshuri da Bhiblia. (Mithumo 20:29, 30) Ngu ku tsimbila ka mbimo, eto ti mahekile ngu ditshuri. Vona va dhivanyisete tigondo ta Jesu ni mawonelo a wukhongeli wa wuhedheni, koneho ku humelete Wukristu wa makuhu. (2 Timoti 4:3, 4) Hi nga tsaniseka ngu nzila yihi ti to nyamsi hi ni mapfisiselo a manene ya ti ngu ditshuri Bhiblia yi ti gondisako?

Mbimo ya ti to Jehovha e xawutela ditshuri. Jehovha a profetile ti to ka ‘mbimo ya magwito wuzivi wa ditshuri wu ti na anda’. (Dhaniyeli 12:4) Ngu 1870, mtxawa wa wudotho wa vathu ava va nga txi lava ditshuri, wu ti pfisisile ti to tigondo ta titxhetxhe to tala ti sa seketelwa ka Bhiblia. Koneho va khatile ku maha wuxolisisi kasi ku na tumbula tigondo ta ditshuri ta Bhiblia, se Jehovha a va katekisile ngu didhawa da moya.

Vavamna vo thembeka va gondile kha kwati Bhiblia. Vagondi vo khata va Bhiblia ava va nga tiningetela, va ti londisela mamahelo o kari a gondo aya ni nyamsi hi ma thumisako. Vona va ti gonda Bhiblia, ve xolisisa mhaka ngu mhaka. Ku nga ti va txi mana txienge txo kari txa Bhiblia txi txi karatako ku txi pfisisisa, vona va ti lavetela titxhamuselo ka tindimana timwani. Mbimo yi va hokelelako magwito o kari aya ma nga txi tsimbitisana ni mibhalo yi yi mmwani yotshe, vona va txo yi funga. Ngu kuleka Bhiblia yi titxhamusela yipune, vona va tshumete ve tumbula ditshuri mayelano ni ditina da Txizimu ni Mfumo wa txona, txikongomelo txa txona ngu vathu ni Mafu, txiemo txa vafi ni themba ya ku wuswa ka vakufa. Wuxolisisi wawe wu va khulute ka simaho so tala sa wukholwa wa makuhu.​—Johani 8:31, 32.

Ngu 1879, Vagondi va Bhiblia se va di tiwonile ti to se i ti mbimo yo pfalisa ditshuri ngu ha va nga kotako ngu kona. Ngu toneto, ka dilembe dileya va khatile ku humesa direvhista da Muwoneleli A Zivisa Mfumo wa Jehovha. Ka masiku a ngweno, ha sengela ka ku pfalisa ditshuri da Bhiblia ka vathu va matiko a 240 ni ngu konamu ka 750 wa tidimi. Wuzivi wa ditshuri kha wa nga va ni ku anda ngu nzila yiya!

• Msana ka kufa ka Kristu, nji txani atxi txi nga maheka ngu ditshuri da Bhiblia?

• Nji txani atxi txi nga hi vhuna ku tshumela hi tumbula ditshuri da Dipswi da Txizimu?

Ku dingana magume a malembe, Tifakazi ta Jehovha ti thumisile, ti ganjile ni ku ningelela maBhiblia o hambana hambana. Kambe hi wonile ti to ku ti laveka wuhunduluxeli wa wuphya awu wu nga ti no vhuna vathu kugonda “wuzivi wo thembeka wa ditshuri”, i ku ti Txizimu txi ti navelako ka vathu votshe. (1 Timoti 2:3, 4) Se ngu toneto, ngu 1950 hi khatile ku humesa sienge sa Bhiblia yathu ya mawombawombelo a ngweno ayi ngu txitxhangana yi dhanwako ku Vuhundzuluxeri bya Misava Leyintshwa. Bhiblia yiya yi hunduluxetwe ngu ku thembeka ngu tidimi ti ti pindako 130.

Ku ti laveka Bhiblia ayi ti hehukako ku yi pfisisa. Tidimi ta txitxa ngu ku tsimbila ka mbimo, kambe wuhunduluxeli wo tala wu ngadi ni mapswi o karata aya ti si hehukiko ku mapfisisa nyamsi. Hambi keto, ku tumbutwe mabhuku o thembeka a kale ni ya ma tsimbitisanako ni mibhalo ya kale ya Bhiblia ngu Txihebheru, Txiarama ni Txigriki.

Ku ti laveka wuhunduluxeli awu wu thembekako ka dipswi da Txizimu. Hahanze ko txitxa mapimo a Txizimu aya ma nga bhalwa, vahunduluxeli va Bhiblia va fanete ve thembeka ka mibhalo yo khata. Hambi keto, ka wuhunduluxeli wo tala wa Mibhalo yo Basa, ku thavisilwe ditina da Txizimu, Jehovha, di si ngadi di thuma.

Ku ti laveka Bhiblia yi yi dhumisako nyamne wa yona. (2 Samuele 23:2) Ka Vuhundzuluxeri bya Misava Leyintshwa, ku wuyisetwe ditina da Jehovha makhambi a kona mu ka 7.000 a mu di lumbako kona ka mibhalo ya kale ya Bhiblia ngu ha ti nga kombiswa ngu kona hahatshi. (Masalmo 83:18, NM) Bhiblia yiya ya hehuka ku yi gonda ni ku, yi ni mialakanyo yo thembeka ya Txizimu, i ku wuyelo ya malembe o tala ya wuxolisisi wa wukheta. Hambi u si nga nayo ngu lidimi lako, hi ku kuzeta ti to u khata kulera Dipswi da Jehovha ditshiku ni ditshiku.​—Joxuwa 1:8; Masalmo 1:2, 3.

• Ngu ku txani hi di wonile ti to ka laveka wuhunduluxeli wa wuphya wa Bhiblia?

• Ngu txihi txitoloveto txa lisima atxi mmwani ni mmwani wu a lavako kugonda kudhunda ka Txizimu a fanelako ku va natxo?