Sengeletano yathu kha yi ngani mfundisi wu a holelwako. Ngu ku londisela txikombiso txa Makristu o khata, vathangeli va va fanelekako va sawulwa kasi “kudyisa dibanza da Txizimu”. (Mithumo 20:28) Madhota oneyo mbavamna va va nga vitwa ngu didhawa da moya va thangelako dibanza ni kudyisa mtxhambi, “i singa ngu kukurumetwa, aniko, ma ti maha ngu kuranda ka mbilu, i singa ngu moya wa nzambwa ya kulava dibhindu, ma ti maha ngu ku tiningetela ka mbilu”. (1 Pedro 5:1-3) Nji txani atxi ma txi mahako kasi ku hi vhuna?

Ona ma hi khatalela ni ku ma hi vhikela. Madhota ma thangela ni ku ma vhuneta ka ku vhikela dibanza ngu didhawa da moya. Kotaku ma ti zivako ti to Txizimu txi ma ningile wutixamuleli wa lisima, ona kha ma dyiseti dibanza, kambe ma maha ti to hi zumbiseka kwati ni ku ma ni litsako. (2 Vakorinto 1:24) Ku fana ni m’dyisi wu a khatalako ngu nvhuta yimwani ni yimwani, madhota ma lava tinzila to ziva txiro tximwani ni tximwani txa dibanza.​—Mavingo 27:23.

Ona ma hi gondisa ti to hi nga ku mahisa ku txani kudhunda ka Txizimu. Divhiki ni divhiki madhota ngu ona ma ku ni wutixamuleli ka mitshangano ya dibanzani ti to me tsanisa likholo lathu. (Mithumo 15:32) Vavamna vonevo vo tiningetela ni vona va ningela txikombiso txa txinene ngu ku maneka ka mthumo wo txhumayela ni kuthuma ni nathu ka mthumo wonewo ni ku va hi gondisa ka sigava sotshe sa wona.

Ona ma kuzeta mmwani ni mmwani wathu. Kasiku na khatalela silaveko sathu sa moya, madhota a wukhalo wonewo ma hi endela mitini kwathu mwendo Nyumbani ya Mfumo ti to me hi vhuna ni ku hi thavelela ngu ku thumisa Bhiblia.​—Jakobe 5:14, 15.

Makhaloni ya mthumo wawe dibanzani, madhota o tala ma ni mithumo ya ona yo tihanyisa ni wutixamuleli wa mwaya eto ni tona ti lava mbimo ni ku khatalelwa. Vanathu vonevo va va thumako ngu mtamo va fanelwa nguku hi va xonipha.​—1 Vatesalonika 5:12, 13.

• Ngu wuhi wutixamuleli wa madhota a dibanza?

• I ngu nzila yihi madhota ma kombisako ku khatala ngu mmwani ni mmwani wathu?

Bhiblia yi wombawomba ngu mitxawa yimbidi ya vavamna va va ku ni wutixamuleli dibanzani​—“vawoneleli ni malanda a wuthumeli.” (Vafilipiya 1:1, NM) Ngu txitalo, ka dibanza dimwani ni dimwani ku ni vanathu vo nga vonevo va va thumelako dibanza. Ngu wuhi mthumo wa malanda a wuthumeli?

Ona ma vhunetela mmidi wa madhota. Ka malanda a wuthumeli, vamwani vaphya, vamwani vathu va va nga kula ava va nga vitwa ngu didhawa da moya, vo thembeka ni ku tiningetela. Vona va khatala ngu mithumo ya lisima dibanzani. Toneto ti vhuna madhota ti to me kota ku hetisisa mthumo wa ona wo gondisa ni ku maha maendo a wudyisi.

Ona ma maha mithumo ya lisima. Malanda a wuthumeli mamwani ma sawulwa kuva vaxungameti, kuamukela va va tako mitshanganoni. Mamwani ma khatalela mitxhini ya wutxenje, mabhuku, timale ta dibanza ni kuavela makhalo o huma thembwe ka siro sa dibanza. Ona ma khatalela kambe wuxayiseki wa Nyumba ya Mfumo. Madhota ma nga ma kombela ti to me khatalela va vo kumba. Mthumo wumwani ni wumwani wu malanda a wuthumeli ma wu mahako ngu ku ti tsakela wu maha ti to hi ma xonipha.​—1 Timoti 3:13, NM.

Kota vavamna va i ku Makristu ma veka txikombiso txa txinene. Malanda a wuthumeli ma sawulwa ngu kuya ngu tifanelo ta tinene ta ona ta moya. Ma di ni sienge dibanzani, ma tsanisa likholo lathu. Ngako i ku sikombiso sa sinene kutxhumayelani, ma hi kuzeta ti to hi engetela ku hiseka kwathu. Aku ma nga ti emisela ku va nyanda yimweyo, ti maha ti to kuva ni litsako ni mpatano. (Vaefesu 4:16) Ngu ku tsimbila ka mbimo ona ma nga fanelekela kuthuma kota madhota.

• Malanda a wuthumeli vathu vo zumbisa ku txani?

• Malanda a wuthumeli ma di vhunisa ku txani dibanza ti to diva nyanda yimweyo?

Mibhalo ya Wukristu ya txiGriki yi wombawomba ngutu ngu Bharnabhasi ni mpostoli Pawulo. Vavamna vonevo va thumile kota vawoneleli va va tsimbilatsimbilako, ve endela mabanza a dilembe dizana do khata. Ngu txikongomelo txihi? Vona va ti karateka ngu txilaveko txa moya txa vanawe. Pawulo a wombile ti to ene a lavile ‘kutshumela ni ku ya xola vanathu’ ku na wona ti to va ti njani. Ene a tsakete kudhawula makenekene a mazana ti to e ya va tsanisa. (Mithumo 15:36) Ngu yoneyo mixuvo ya vawoneleli va va tsimbilatsimbilako nyamsi.

Va tela ku ta hi tsanisa. Muwoneleli mmwani ni mmwani wa txigava a endela kona mu ka 20 wa mabanza, e heta divhiki ka dibanza dimwani ni dimwani kumbidi ngu dilembe. Hi nga vhuneka ngu wusikoti wawe ni wa vasikati vawe i di ti to va tekile. Vona va tsakela kuziva vahombe ni vavadotho, va tsakela kutsula ni nathu ka mthumo wa thembwe ni ka va hi va gondelako Bhiblia. Vona va tshumela ve maha maendo a wudyisi kumweko ni madhota, ve tshumela ve veka miwombawombo hi di mitshanganoni ni ka tisengeletano kasi ku hi tsanisa.​—Mithumo 15:35.

Vona va kombisa kukhatala ngu votshe. Vawoneleli va sigava va khatala ngu txiemo txa moya txa dibanza. Vona va tshangana ni madhota ni malanda a wuthumeli ti to ve wona makulelo a dibanza ni ku va ninga silayelo sa nzila yo hetisisa wutixamuleli wawe. Va vhuna vanyaphandule ti to ve humelela ka wuthumeli wawe ni kuziva vamwani ava va ku ngadi ku khata kusengemela ni kupfa ngu ta kukula kwawe ngu didhawa da moya. Mmawani ni mmwani wawe ati ningela a pune ngu ku tidhunda kota “txithumi kulothu”. (2 Vakorinto 8:23) Hi fanete hi tekelela likholo ni ku tiningetela kwawe ka Txizimu.​—Vahebheru 13:7.

• Ngu ku txani vawoneleli va sigava ve endela mabanza?

• Liendo lawe li nga ku vhunisa ku txani?

Msana ka phango yo kari, Tifakazi ta Jehovha ngu txikuluveta ti lulamisela txivhuno txi txi tangalisako vanawe va va nga hokelwa ngu yona. Mizamo yoneyo njikombiso txa lirando li hi ku nalo ngu vamwani. (Johani 13:34, 35; 1 Johani 3:17, 18) Txi ningeliswa ku txani txivhuno txonetxo?

Hi maha miningelo. Mbimo yi Judheya ku nga ti ni nzala ya hombe ngu dilembe dizana do khata, Makristu a Antiyoka ma rumete sivhuno ka vanawe. (Mithumo 11:27-30) Ngu ha ku fanako, mbimo yi hi zivako ti to ka ditiko do kari ku ni vanathu va va tshanganako ni txikarato txo kari, hi rhumela miningelo ngu ku thumisa mabanza athu ti to me kota ku ningela sivhuno ngu sa manzani ka vale va ku ka sikarato sa hombe.​—2 Vakorinto 8:13-15.

Hi ningela txivhuno txi txi fanelako. Madhota ya ma ku ka wukhalo wule ku nga humelela phango, ma lavetela txiro tximwani ni tximwani txa dibanza kasi ku na tsaniseka ti to sotshe si xayisekile. Komisawu yo ningela txivhuno yi wonelela ku ningelelwa ka sakudya, mati a manene, siambalo, ko sisa msungo ni mirende. Wungi wa Tifakazi ta Jehovha ti ti ku ni wusikoti ta tiningela ti to ti tsula ngu mali ya tona kala ka wukhalo wule ku nga humelela phango ni ku maneka ka mithumo ya kulamulela phango mwendo yo lulamisa tinyumba ta vanathu ni Tinyumba ta Mfumo ti ti nga onhetelwa. Wumwewo wu hi ku nawu kota sengeletano ni wuzivi wu hi wu manako ngu kuthuma kumweko wu hi maha ti to hi maha txo kari ngu txikuluveta. Hambi ku hi vhunako va ngutu ngutu “i ku makholwa kulothu”, ti txi koteka ha ningela kambe txivhuno ka vathu vamwani ti si nga ni mhaka ni ti to mba wukhongeli wuhi.​—Vagalatiya 6:10.

Hi ningela txivhuno ngu didhawa da moya ni da matipfelo. Ava va nga welwa ngu phago atxi va txi lavako ngutu ngu thavelelwa. Ka simahakalo so nga siya, vona va nga tsaniswa ngu Jehovha, “Txizimu txa kotshe kuthavelela”. (2 Vakorinto 1:3, 4) Ngu ku tidhunda athu hi wombawomba ni vathu ava va karatekako mayelano ni sikongomelo si si nga seketelwa ka Bhiblia ngu ku va tsanisekisa ti to i si nga kale Mfumo wa Txizimu wu na gumisa totshe tiphango ti ti tisako kupandiseka ni sikarato.​—Mtuletelo 21:4.

• Tifakazi ta Jehovha ti si kotisa ku txani ku ningela txivhuno ngu txikuluveta ngu mbimo ya tiphango?

• Hi nga va tsanisa ngu nzila yihi ngu didhawa da moya ava va nga huluka?

A di hafuhi ni kufa, Jesu a bhute ni vagondiswa vakwe va mune va di vokha​—Pedro, Jakobe, Johane ni Andrewu. A txi profeta ngu ta kuta kwakwe ka masiku o gwita, Jesu a mahile txiwotiso txa lisima: “I mani i ku txithumi txo thembeka na a di ni wutxhari, awu a nga vekwa ngu nyamne masoni ka sithumi sakwe, kasiku e si phamela sakudya ngu txikhati txi txi fanelako kani?” (Matewu 24:3, 45; Marku 13:3, 4) Jesu, kota “nyamne” wa vagondiswa vakwe, a ti va thembisa ti to a ndina sawula “txithumi” txi txi nga ndina ningela sakudya sa moya mbimo yotshe ka vapizani vakwe ka mbimo ya magwito. I mani txithumi txonetxo?

Txona mtxawa wa wudotho wa vapizani va Jesu va va nga sawulwa. “Txithumi” txonetxo txi ti kombile i di Mmidi wu wu Fumako wa Tifakazi ta Jehovha. Txi ningela sakudya sa moya ngu mbimo ka vakhozeli va Jehovha. Athu hi themba txithumi txo thembeka ti to txi hi ninga sakudya sathu ‘kasiku avela sakudya ngu mbimo yi yi lavekako’.​—Luka 12:42.

Txona txi khatalela mwaya wa Txizimu. (1 Timoti 3:15) Jesu a ningile txithumi wutixamuleli wa hombe, wo wonelela mthumo wu wu mahwako ngu sengeletano ya Jehovha ya ha mafuni—txi khatalela silo sakwe asi si wonekako, txi wonelela mthumo wo txhumayela ni ku hi gondisa ngu ku thumisa mitshangano yathu. Ti to txi hi phamela sakudya si hi si lavako ngu mbimo yi hi si lavako ngu yona, ‘txithumi txo thembeka na txi di ni wutxhari’ txi ningela sakudya sa moya ngu ka mabhuko ya hi ma thumisako ka wuthumeli wathu, ku engetela ka mlongoloko wu hi ku nawo wa mitshangano ni ka tisengeletano tathu.

Txithumi txa thembeka ka ditshuri da Bhiblia ni ka mthumo wu txi nga ningwa wo txhumayela mahungu a manene, ni ku nja wutxhari ngu nzila yi txi khatalelako ngu yona kuranda ka Kristu ha mafuni. (Mithumo 10:42) Jehovha wa wu katekisa mthumo wonewo ngu ku engeteleka ka vathu ni makatekwa o tala a moya.​—Isaya 60:22; 65:13.

• Jesu a ningile mani wutixamuleli wo phamela vagondiswa vakwe sakudya sa moya?

• “Txithumi” txi thembekile ni ku txhariha ngu nzila yihi?

Ka dilembe dizana do khata, mtxawanyana wa wudotho wu wu wumbwako ngu “vapostoli ni madhota a Jerusalema” wu thumile kota mmidi wu wu fumako ti to wu maha sisungo sa lisima ngu ditina da dibanza dotshe da vanathu va i ku vasawuleki. (Mithumo 15:2) Vona ngu wumwewo va ti maha txisungo ngu ku thumisa Mibhalo ni ngu kuthumiswa ngu moya wa Txizimu. (Mithumo 15:25) Mamahelo oneyo ma thumiswa ni nyamsi.

Txizimu txa wu thumisa kasiku maha kuranda ka txona. Vanathu va i ku vasawuleki va va thumako ka Mmidi wu wu Fumako va ni mhaka ngutu ngu dipswi da Txizimu ni ku va ni wuzivi ngutu ka timhaka ti ti thumako ni ta moya. Vona divhiki ni divhiki va tshangana ti to ve xolisisa silaveko sa wumwewo wa vanathu wa mafu otshe. Nga ha ti nga ti ngu kona ka dilembe dizana do khata, sileletelo si si seketelwako mu ka Bhiblia sa ningelwa ngu ku thumisa mapasi, vawoneleli va sigava ni ngu vathu vamwani. Eto ti maha ti to vathu va Txizimu ve va nyanda yimweyo ka mapimiselo ni ka simaho. (Mithumo 16:4, 5) Mmidi wu wu Fumako wu khatalela lulamiselo ya sakudya sa moya, wu ninga mtamo mthumo wo txhumayela Mfumo ni ku wu wonelela kuavela vanathu wutixamuleli.

Wu londisela wuthangeli wa moya wa Txizimu. Mmidi wu wu Fumako wu lava wuthangeli wa wu a nga guleka ka mafu otshe, Jehovha ni msungo wa dibanza, Jesu. (1 Vakorinto 11:3; Vaefesu 5:23) Siro sa mmidi wonewo kha si ti teki kota vathangeli va vathu va Txizimu. Vona, kumweko ni vanathu vamwani va va nga sawulwa, “va londetela txinvutana, hani ni hani txi yako kona”. (Mtuletelo 14:4) Mmidi wu wu Fumako wa yi ninga lisima mikombelo yi hi yi mahako ngu ndava ya wona.

• Mba mani ava va nga ti maha didhawa da mmidi wu wu fumako ka dilembe dizana do khata?

• Mmidi wu wu Fumako wu wu lava ngu nzila yihi wuthangeli wa Txizimu?

Dipswi da Txihebheru di di ku Bhetele di txhamusela “M’ti wa Txizimu.” (Genesisi 28:17, 19) Ditina donedo di fanela kwati ku va i di txikombiso txa miako ya hombe ya Tifakazi ta Jehovha ta ha mafuni kotshe yi yi thumiselwako ku lungiselela, ni kuvhuneta mthumo wo txhumayela. Mmidi wu wu Fumako wu maneka mzinza wa mafu otshe wu wu ku Nova York, E.U.A., wu wonelela mithumo ya madhavi a matiko o hambana hambana. Kota mtxawa ava va thumako ka makhalo oneyo va dhanwa ku nziro sa mwaya wa Bhetele. Kota mwaya vona va zumba ni ku thuma kumweko, vadya ni kugonda votshe Bhiblia.​—Masalmo 133:1.

Wukhalo wo mbi fana ni wumwani wu ku thumako vathu vo tiningetela. Vavamna ni vavasikati va i ku Makristu va va thumako ka maBhetele otshe va ti emisete kumaha kuranda ka Txizimu ni ku vhuneta ku yisa masoni timhaka ta Mfumo mbimo yotshe. (Matewu 6:33) Awalo wu a holelwako kambe votshe va ningwa ka ku otela, sakudya ni simaliyana so khatalela silaveko sawe. Txiro tximwani ni tximwani txi avelwa ha txithumako kona, ku nga va hofisini, kozinyani mwendo ko dyela kona. Vamwani va thumela ko ganja, ko kuwula, ko lungisa ni makhalo mamwani.

Wukhalo wu ku ku ni mithumo yo vhuneta kutxhumayela Mfumo. Txikongomelo txa maBhetele otshe ngu maha ti to ditshuri da Bhiblia yi hokela vathu vavangi ngutu. Dibroxura diya njikombiso txa toneto. Di bhatwe ngu lulamiselo ya Mmidi wu wu Fumako, di rumelwa ngu komputadhori ka mazana a mitxawa ya vahunduluxeli ha mafuni kotshe, di ganjwa ngu mitxini ya livilo la hombe yi yi ku maBhetele, ngu magwito di rumelelwa ka mabanza ya ma pindako 110.000. Ka mbimo yoneyo ku mahwako dibhuku dimwani ni dimwani, mwaya wa Bhetele wu ningela txivhuno txi txi thumako ka mithumo ya lisima​—ku txhumayelwa ka mahungu a manene.​—Marku 13:10.

• Mbamani va va thumako Bhetele ni ku ngu yahi malulamiselo va mahelwako?

• Ngu wuhi mthumo wa txikuluveta wu wu seketelwako ngu mithumo ya maBhetele otshe?

Siro sa mwaya wa Bhetele si thuma ka tihofisi to hambana hambana, si txi khatalela mthumo wo txhumayela ka ditiko dimwedo mwendo kupinda. Si nga avelwa ku va ka mitxawa ya wuhunduluxeli, ko ganja marevhista, ko maha mabhuku, ka wuxayiselo wa mabhuku, ka ku humiswa ka so maha ngu ku engisela ni tivhidhiyo mwendo ka ku wonelela timhaka timwani ka m’ganga.

Komisawu ya Didhavi yi wonelela mthumo. Mmidi wu wu Fumako wu ninga wutixamuleli wa didhavi dimwane ni dimwane ka komisawu ya didhavi donedo yi yi wumbwako ngu vanathu vararu mwendo ku pinda ava va fanelekako kwati. Komisawu yoneyo yi zivisa Mmidi wu wu Fumako mayelano ni ku kula ka mthumo ka ditiko dimwani ni dimwani adi di wonelelwako ngu wona, yi tshumela yi zivisa sikarato si si nga humelelako. Mibiko yoneyo yi vhuna Mmidi wu wu Fumako ti to wu maha txisungo txa ti to ngu yihi mhaka yi va nga yi patako ka mabhuku, ka mitshangano ni ka tisengeletano ka mbimo yi yi tako. Mbimo yotshe vaemeli va Mmidi wu wu Fumako va rumelwa ti to ve endela madhavi ni ku komba komisawu ya didhavi nzila yo khatalela siavelo sa yona. (Mavingo 11:14) Mlongoloko wo sawuleka, wu pata ni m’wombawombo wu wu ningelwako ngu muemeli wa mzinza wa mafu otshe, wu nga lulamiselwa kuvhuna va va zumbako hafuhi ni didhavi.

Ku ningelwa txivhuno ka mabanza a koneho. Vanathu va va ku ni wutixamuleli wa didhavi va tumelela ku emiswa ka mabanza a maphya. Kambe ku ni vanathu va va khatalelako mithumo ya vanyaphandule, varumiwa ni vawoneleli va sigava ava va thumako ka thembwe ya didhavi. Vona va lulamisela tisengeletano ta hombe ni ta tidotho, va thangela mthumo wo aka Tinyumba ta Mfumo ni ku wonelela ku rumelwa ka mabhuku mabanzani. Totshe ti ti mahwako ka hofisi ya didhavi ti maha ti to mthumo wo txhumayela wu mawha ngu nzila ya yinene.​—1 Vakorinto 14:33, 40.

• Makomisawu ya madhavi ma wu vhunisa ku txani Mmidi wu wu Fumako?

• Nji txani atxi txi mahwako ka hofisi ya didhavi?

Ngu txikongomelo txo huwelela “mahungu a manene” ngu ha hi nga kotako ngu kona ka “vaaki va ha mafuni, ni yotshe mifumo, ni tixaka totshe ni tidimi ni votshe vathu” hi humisa mabhuku ngu tidimi ta kona mu ka 750. (Mtuletelo 14:6) Hi si kotisa ku txani ku maha mthumo wonewo? Hi maha toneto ngu kuvhunwa ngu mtxawa wa vabhali va matiko otshe ni vahunduluxeli va kutiningetela​—ava votshe i ku Tifakazi ta Jehovha.

Didungula di khatwa ku bhalwa ngu Txingiza. Mmidi wu wu Fumako wu wonelela mthumo wa Hofisi ya Wubhali ya mzinza wathu wa mafu otshe. Hofisi yiya yi thangela ni ku ninga siavelo sa vabhali ava va thumako ka mzinza wa mafu otshe ni ka madhavi o kari. Ku va ni mtxawa wa vabhali va matiko otshe ti vhuna ku hi lungisela timhaka ngu ku ya ngu ti ti nga toloveleka ni ku ti maha ti to mabhuku athu me gwesa vathu va matiko otshe.

Didungula di rumelwa ka vahunduluxeli. Msana ko va madungula ma di bhatwe ni ku pasiswa, ona ma rumelwa ka mitxawa ya vahunduluxeli ava va ku ka madhawa otshe a mafu ngu ku thumisa komputadhori, se vona ve hunduluxela, ve ma xolisisa ni ku ma lera kwati. Vona va ti karatela kusawula “mapswi a manene a ditshuri” aya ma no womba totshe ati ti wombwako ka Txingiza me ti yisa ka lidimi lawe na ku si keleli txilo.​—Ekleziyaste 12:10.

Komputadhori yi kuluvetisa mthumo. Komputadhori kha yi na ku sikota kubhala ni kuhunduluxela yokha. Hambi keto, yona yi nga kuluvetisa mthumo ngu ku va yi di ni mabhuku o txhamusela mapswi ni simwani so maha wuxolisisi ngu sona. Tifakazi ta Jehovha ti humesile programa ya komputadhori yi yi dhanwako ku i Sistema de Editoração Eletrônica Multilíngue (MEPS) ayi yi kotako ku thumisana ni mazana a tidimi, yi tshanganisa madungula ya ma nga hunduluxelwa ni mifota se si rumelwa ti to si ya ganjwa.

Ngu ku txani hi txi tikarata ngutu ti to ku hunduluxelwa hambi ngu tidimi ati ku ko wombawomba magidhinyana a vathu? Ngu ti to ngu dhunda ka Jehovha ti to “votshe vathu ve mana kuhanyiswa ni kuziva ditshuri.”​—1 Timoti 2:3, 4.

• Mabhuku athu ma bhalwa ngu nzila yihi?

• Mabhuku athu ma hunduluxeliswa ku txani ngu tidimi ta tingi?

Sengeletano yathu dilembe ni dilembe yi humisa ni ku ningelela mazana a timiliyoni ta maBhibhele ni mabhuku mamwane na yi si hakelisi txilo. Hi aka ni ku khatalela Tinyumba ta Mfumo ni mahofisi ya madhavi. Hi khatalela magidhi a vathumi va Bhetele ni varumiwa ni ku ha ningela sivhuno ngu sa manzani ngu mbimo ya tiphango. U nga ti wotisa tiya: ‘Yi manwa hayi male yo seketela totshe eto?’

Kha hi hakelisi ngu mithumo yathu, kha hi lavi sa wugume nem kha hi sengisi txilo. Hambi ku mthumo wathu wo txhumayela wu lavako male yo tala, kha hi hakelisi male. Ngu kuya ngu direvhista da wumbidi da Muwoneleli di nga humiswa kona mu ka dizana da malembe ya ma nga pinda, athu ha tsaniseka ti to Jehovha i mseketeli wathu ni ku “kha hi na mbi lava mwendo ku kombela ka vathu ti to ve hakelela mthumo wathu”​—ni ku kha ha ngaza hi di ti mahile toneto!​—Matewu 10:8.

Mithumo yathu yi seketelwa ngu miningelo yo tidhundela. Vathu vo tala va wu ninga lisima mthumo wathu wo gondisa Bhiblia ni ku va wu seketela ngu miningelo. Ngu litsako Tifakazi ta Jehovha ti ningela ngu mbimo, ngu mtamo, ngu male ni ngu silo simwani ti to ti seketela ku mahwa ka kuranda ka Txizimu mafuni kotshe. (1 Makronika 29:9) Va di ka Tinyumba ta Mfumo ni ka tisengeletano, votshe va nga ningela ka makaxa aya ma nga vekwa o maha ka ona miningelo. Miningelo yi nga tshumela yi mahwa ngu kuthumisa site ya jw.org. Ku tala ka miningelo yita ngu ka sisiwana, nga ha noni yile ya txisiwana yi nga khuzelwa ngu Jesu ngu ku va yi di ningete simaliyana sa yona sa simbidi sa simbi ka txiya txa misengo ya dithepele. (Luka 21:1-4) Ngu toneto mmwani ni mmwani a nga “phawusa txo kari e veka ngu phuho” ti to e “ningela kota nga ti a xuvisako tona mbiluni kwakwe”.​—1 Vakorinto 16:2; 2 Vakorinto 9:7.

Kha hi kanakani ti to Jehovha a na ya masoni e kuzeta ava va lavako ‘ku m’dhumisa ngu silo sawe sa lisima’ ngu ku seketela mthumo wa Mfumo ti to kuranda kwakwe ku mahwa.​—Mavingo 3:9.

• Sengeletano yathu yi hambana ngu nzila yihi ni wukhongeli wumwane?

• Miningelo yo tidhundela yi thumisiswa ku txani?

Nga ha ditina adi di ku Nyumba ya Mfumo di txhamuselako ngu kona, mhaka ya Bhiblia ayi ku bhulwako ngu yona ka wukhalo wonewo i Mfumo wa Txizimu i ku msungo wa mhaka wa mthumo wa Jesu.​—Luka 8:1.

Wukhalo wa wukhozeli wa ditshuri. Ka Tinyumba ta Mfumo kulungiselelwa mthumo wo txhumayela mahungu a manene a Mfumo ka wukhalo wonewo. (Matewu 24:14) Tinyumba ta Mfumo ta hambana ngu tanga ni ngu ma akelo, kambe totshe ndinyumba to toloveleka ati wungi wa tona ti thumiswako ngu mabanza ya ma pindako dimwedo. Ka malembe a konkuanyana hi akile magume a magidhi a Tinyumba ta Mfumo (ngu txidinganiso, ku akwa mtxhanu ngu ditshiku) ti to ti tsimbitisana ni ku engeteleka ka mabanza. Ti kotekisa ku txani toneto?​—Matewu 19:26.

Tona ti akwa ngu miningelo yo kari yo tidhundela. Miningelo yoneyo yi rumelelwa ka hofisi ya didhavi ti to mabanza me va ni male yo aka ni ku wuseta nyumba yawe.

Ti akwa ngu vathumi vo ti ningetela va siemo sotshe va va si hakelwiko. Ka matiko o tala, ku ni Mitxawa yo Aka Tinyumba ta Mfumo. Mitxawa ya vaaki vo tiningetela yi khukha ngu ka dibanza dimwani yi ya ka dimwani ka ditiko donedo, hambi ka makhalo ya ku singa ku ni vathu vo tala, ti to yi vhuneta ku aka Tinyumba ta Mfumo. Ka matiko mamwani, Tifakazi timwani ti ti fanelekako ta sawulwa ku wonelela ku akwa ni ku wusetwa ka Tinyumba ta Mfumo ka m’ganga wo kari. Ka makhalo otshe a mthumo, wungi wa vathumi va va ku ni wusikoti va wukhalo wonewo mbathumi vo tiningetela, kambe txienge txa hombe txa mthumo txi mahwa ngu siro sa dibanza donedo. Moya wa Jehovha ni ku ti karata ka vathu vakwe ti maha ti to ti koteka.​—Masalmo 127:1; Vakolosa 3:23.

• Ngu ku txani makhalo athu a wukhozeli ma dhanwako ku Ndinyu mba ta Mfumo?

• Ti kotekisa ku txani ti to ku akwa Tinyumba ta Mfumo ka mafu otshe?

Nyumba yimwani ni yimwani ya Mfumo ya Tifakazi ta Jehovha yi kombisa ditina do sawuleka da Txizimu. Ngu toneto hi ti teka i di lungelo ni txiphemu txa lisima txa wukhozeli wathu wo sawuleka ku yi xayisa yi zumba yi di basile, yi txi woneka kwati ni ku va ka mazumbelo a manene. Hotshethu kwathu hi nga vhuneta.

Vhuneta ka kubasisa msana ka mitshangano. Msana ka mitshangano, vanathu va txiwamna ni va txisikati va tsakela kuvhuneta kubasisa ni ku lungiselela Nyumba ya Mfumo. Kumweko ngu divhiki ku mahwa basiselo ya yotshe nyumba. Didhota mwendo dilanda da wuthumeli di kongomisa mathumelo, ngu txitalo di thumisa diphepha da mithumo yi yi lavekako. Ngu kuya ngu txilaveko, vathumi vo tidhundela va hiyela ni ku kuwula mndani, kubasisa situlu ni kusilungisela, kubasisa majanela ni hahanze ka yona, kubasisa sisambelo, ku khatalela jaradhi ni ku ya tshotsha nzambwa. Kumweko ngu dilembe ku vekwa ditshiku do maha basiselo ya hombe ngutu. Ngu ku va hi txi maneka ka mithumo yoneyo, hi nga gondisa vanana vathu ti to ve va ni txixonipho ngu wukhalo wathu wa wukhozeli.​—Ekleziyaste 5:1.

Sanzeka diwoko mbimo yi yi wusetwako. Dilembe ni dilembe Nyumba ya Mfumo ya kambelwa mndani ni hahanze. Ngu ku kambelwa koneko, ya wusetwa mbimo yotshe ti to yi xayiseka ni ku va ni txiemo txa txinene, eto ti hi vhuna kwambi thumisa male yo tala na ti si laveki. (2 Makronika 24:13; 34:10) Nyumba ya Mfumo yi yi nga basa ni kuxayiseka kwati, i wukhalo wo sawuleka wo khozela Txizimu txathu. Ngu ku maneka ka mithumo yoneyo, hi kombisa lirando ali hi ku nalo ngu Jehovha ni wukhalo awu hi mu khozelako ka wona. (Masalmo 122:1) Totshe eto ti nga maha ti to vathu ve tsakela.​—2 Vakorinto 6:3.

• Ngu ku txani hi sa fanela kuhunisela ku lungisela wukhalo wathu wa wukhozeli?

• Ngu yahi malulamiselo aya ma mahwako ti to hi xayisa Nyumba ya Mfumo yi zumba yi di basile?

Ina khu tsakeli ku maha wuxolisisi ti to u engetela wuzivi wako ngu Bhiblia? Ina khu tsakeli ku gonda to tala mayelano ni tindimana ta Bhiblia mwendo ngu m’thu wo kari, wukhalo mwendo mhaka yo kari yi yi nga bhalwa ka Bhiblia? Ina u ta nga tiwotisa ti to ina Dipswi da Txizimu di nga ku vhuna ka txikarato txo kari txi u nga vako natxo? Ti di ngeto thumisa bhibhiliyoteka ayi yi ku Nyumbani ya Mfumo.

Yi ni silo sa sinene so maha ngu sona wuxolisisi. Ti nga maheka awe u si nga ni mabhuku otshe a Tifakazi ta Jehovha ngu lidimi lako. Kambe bhibhiliyoteka yi yi ku Nyumbani ya Mfumo yi ni mabhuku o tala a maphya. Ti nga maheka ku di ni wuhunduluxeli wo hambana hambana wa Bhiblia, dicionário ni mabhuku mamwani a lisima. Tipfe u di txhusekile kuthumisa bhibhiliyoteka yi si se khata mitshangano ni loko yi di gumile. Ti nga maheka ku di ni komputadhori ayi yi ku ni Watchtower Library (Biblioteca da Torre de Vigia) ayi yi nga vekwa. Ayiya i programa ya komputadhori ayi yi ku ni mabhuku o tala a maphya ni txithumiswa atxi ti hehukako ku txi thumisa ka ku xolisisa mhaka yo kari, dipswi do kari mwendo mbhalo wa mu ka Bhiblia.

Ya vhuna sigondani si si nga tibhalisa ka Mahanyelo a Wukristu ni Mthumo wathu wo Txhumayela. Ku ngati u di tibhalisile, bhibhiliyoteka yi yi ku Nyumbani ya Mfumo yi nga ku vhuna ngutu ti to u lulamisela txienge txako. M’woneleli wa Mtshangano wa Mahanyelo a Wukristu ni Mthumo wathu wo Txhumayela ngene a xamulako ngu bhibhiliyoteka. Ene a khatala ngu ti to mabhuku a maphya ni ona me vekwa ka yona ni ku ma na zumbe ma di xayisekile kwati. Awe u nga m’kombela mwendo ku kombela wu a ku gondelako Bhiblia ti to e ku komba nzila yo mana madungula ya u ma lavako. Kambe kha ti tumelelwi kuhuma hanhanze ni dibhuku ni da dimwedo da Nyumbani ya Mfumo. Ta pfala, ti ndina va tinene kutuletela khakwati dibhuku ni ku u si bhali txilo ka dona.

Bhiblia yi khene, ti to hi mana “wuzivi wa Txizimu” hi fanete ku tiemisela ku wu lava “kufana ni thomba ayi yi nga siswa”. (Mavingo 2:1-5) Bhibhiliyoteka yi yi ku Nyumbani ya Mfumo yi nga ku vhuna ti to u khata wuxolisisi wonewo.

• Nzithumiswa sihi so maha ngu sona wuxolisisi si si kuho Nyumbani ya Mfumo?

• I mani wu a nga ku vhunako kuthumisa kwati Bhibhiliyoteka?

Jesu Kristu a gete vapizani vakwe atiya: “Kuwonekela kwanu ku na woninge masoni ka vathu votshe, kasiku, ngako va txi wona mithumo yanu ya yinene, va na dhumisa Tate wanu a ku nzumani”. (Matewu 5:16) Ti to ti koteka, hi yi thumisa kwati tekinolojiya ya ngweno, yi yi patako ni internet. Site yathu ya, jw.org, njisima txa madungula ya ma ku ka internet mayelano ni ti Tifakazi ta Jehovha ti ti tumelako ni mithumo ya tona. Ngu tihi ti u nga ti manako ka yona?

Tixamulo ta Bhiblia ta siwotiso asi si nga toloveleka. U nga mana tixamulo ta siwotiso simwani sa lisima ngutu. Ngu txikombiso, siphephana si si ku Kuxaniseka ku na Guma Kani? ni txi txi ku Vafi va nga Tshumela ve Hanya Kambe? Sa maneka ngu tidimi ti ti pindako 600. U nga tshumela u lera Vuhundzuluxeri Bya Misava Leyintshwa Bya Matsalwa Yo Kwetsima ngu tidimi ti ti pindako 130 ni mabhuku o hambana hambana ya ma vhunako kupfisisa Bhiblia, o fana ni Bhiblia yi nga hi gondisa txani? ni marevhista a Muwoneleli ni Xalamuka! a konkuwa. Wungi wa mabhuku oneyo u nga lera mwendo ku ma engisela ka internet mwendo kubhaxara so maha ngu ku engisela, ngu PDF mwendo ngu EPUB. U nga ganja maphepha o kari ngu tidimi timwani ti to u ninga va va tsakelako. Ka maneka mabhuku ma ku ngu nzila ya vhidhiyo ngu tidimi ta mawoko. U nga tshumela u bhaxara ku lerwa ka Bhiblia ngu nzila ya drama ni tidrama ta Bhiblia ni ku engisela tindando to tshamba ka mbimo yo humula.

Madungula a ditshuri mayelano ni Tifakazi ta Jehovha. Ka vekwa madungula a maphya, tivhidhiyo mayelano ni mthumo wathu, simahakalo mayelano ni Tifakazi ta Jehovha ni ku tikarata kwathu ko vhuna vamwani. U nga mana madungula mayelano ni tisengeletano ta mbimo ayi yi tako ni madungula mayelano ni hofisi ya didhavi dathu.

Ngu tinzila toneto hi maha kuwonekela ka ditshuri ku woninga ku hokela magwito ka ditiko. Vathu va matiko otshe, ku pata ni ditiko da Antartidha va vhunwa. Hi kombelela ti to “dipswi da Mkoma di txi ya masoni” ha mafuni kotshe ti to wudhumo wuva ka Txizimu.—2 Vatesalonika 3:1.

• Site ya jw.org yi va vhuna ngu nzila yihi vathu vo tala kugonda ditshuri da Bhiblia?

• Nji txani txi u nga tsakelako ku txi mana ka site yathu?