Wungi wa vathu va emile kuya titxhetxheni nguko kha va mani ku thavelelwa ni tixamulo ti ti enelisako ta siwotiso sawe sa lisima. Kasi ngu ku txani u di fanete kuxalela mitshangano ya Wukristu ya Tifakazi ta Jehovha? Ngu tihi ti u no ti mana kheya?

Litsako lo va hi di hagari ka vathu ava va khatalako va di ni lidhundo. Ka dilembe dizana do khata, Makristu ma ti lulamisetwe ngu mabanza ni ku ma ti ñola mitshangano ti to me khozela Txizimu, kugonda Mibhalo ni ku tsaniselana. (Vahebheru 10:24, 25) Ngu ku maneka hagari ka vathu va lirando, va ti pfiti va di hagari ka vangana va ditshuri​—vanawe ngu didhawa da moya. (2 Vatesalonika 1:3; 3 Johani 14) Athu hi londisela txikombiso txonetxo ni ku hi mana litsako li li fanako.

Wuyelo yo gonda kuthumisa matshina a milayo ya Bhiblia. Ku fana ni mbimo ya ku bhalwa ka Bhiblia, vavamna, vavasikati ni vanana va ti sengeletana votshe. Vagondisi va va fanelekako va thumisa Bhiblia ti to ve hi vhuna ku hi pfisisa nzila yi matshina a milayo ma thumako ngu yona ditshiku ni ditshiku. (Dhewuteronome 31:12; Nehemiya 8:8) Votshe va nga kombisa likholo lawe ngu tixamulo ni ku embelela tindando.—Vahebheru 10:23.

Makatekwa o va ni likholo lo tsana ka Txizimu. Mpostoli Paulo a gete tiya dimwane da mabanza ka masiku akwe: “Na xuva ngutu ku mi wona, . . . ti to ngu ku hi di hafuhi, hi thavelelana ngu likholo li hi ku nalo, anu ni nani”. (Varoma 1:11, 12) Kutshangana kwathu ni vanathu kutsanisa likholo lathu ni ku ti emisela kuhanya wutomi wa Wukristu.

Ha kuramba ka mtshangano wu wu londiselako ti to u ta wona ngu a nyama ti ti nga txhamuselwa ka ndima yiya. U na amukelwa ngu manza mambidi. Yotshe mitshangano i mahala​—kha ku hakelwi mwendo ku sengiswa.

• Ngu txihi txikombiso txi hi txi londiselako mayelano ni mitshangano yathu ya Wukristu?

• Kuya ka mitshangano ya Wukristu ku nga hi vhuna ngu nzila yihi?

Hambi hi txo sinziseka kutsimbila hagari ka sitinga so thisa mwendo ka pheho ni lisani, kha hi leki ku sengemela ka mitshangano yathu ya Wukristu. Hambi ku Tifakazi ta Jehovha ti lwisanako ni sikarato sa wutomi ni mikaralo ya mithumo ya ditshiku ni ditshiku, ngu ku txani ti txi ti karatela ku va kumweko ni makholwa kulowe?

Atiya ndinene kwathu. A txi wombawomba ngu ku pfana hagari ka siro sa dibanza, Paulo a ti khene “a hi laveni tinzila to vhunana”. (Vahebheru 10:24) Mawombawombelo eyo, ma kombisa ti to hi fanete kumaha mizamo yo ziva vanathu dibanzani. Ona ma hi kuzeta ti to hi kota ku khatala ngu vamwani. Ngu ku lwela kuziva timwaya timwani ta Makristu, hi tumbula ti to timwani ta kona ti xute sikarato so fana ni si nathu hi tshanganako naso ni ku, ti nga hi vhuna ti to nathu hi kota ku si xula.

Ku aka wungana wa wunene. Ka mitshangano yathu kha hi ngo va ni vathu va hi ko zivana navo basi kambe hi hagari ka vangana vavanene. Ka simwani sikhati, hi heta mbimo hi txi hungata kumweko ngu nzila ya wutxhari. Kutshangana koneko ku hi wuyelisa ngu nzila yihi? Hi gonda ku xoniphana ngutu ni ku eto ti tsanisa lirando lathu ngu vamwani. Toneto ti hi maha ti to hi kota kuvhuna vanathu vatxiwamna ni vatxisikati mbimo yi va tshanganako ni sikarato. (Mavingu 17:17) Ngu ku titshanganisa ni sotshe siro sa dibanza, hi kombisa ku khatala ku hi ku nako ngu vamwani.​—1 Vakorinto 12:25, 26.

A nawe ha ku kuzeta ti to u maha wungana ni vathu ava va mahako kudhunda ka Txizimu. Vangana vonevo u nga va mana hagari ka Tifakazi ta Jehovha. U nga tumeleli txilo ti to txi ku tsivela ku ti tshanganisa ni nathu.

• Ngu ku txani hi txi vhuneka ngutu ngu ku maneka kwathu mitshanganoni?

• Ngu dihi ditshiku di u tsakelako ku ya ziva dibanzani kwathu?

Mbimo yi Makristu o khata ma nga ti sengeletana ma ti embelela, me maha mikombelo, me lera Bhiblia ni ku txhamusela Mibhalo​—ku si mahwi sihena. (1 Vakorinto 14:26) Ka mitshangano yathu u nga wona ti ti fanako.

Madungula a kona ma seketetwe ka Bhiblia ni ku ma vhuna ditshiku ni ditshiku. Ngu magwito ka divhiki Tifakazi ta Jehovha ta sengeletana mabanzani ti to ti engisela M’wombawombo wu wu nga seketelwa ka Bhiblia wa 30 wa timeneti wu wu kombisako ti to Mibhalo nja lisima ni ku yi thuma ngu nzila yihi nyamsi. Hotshethu ha rambwa ti to hi londisela ka maBhibhele athu mbimo yi ku lerwako tindimana. M’wombawombo wu londiselwa ngu Gondo ya “Muwoneleli”, ayi yi tsimbitiswako ngu diwora dimwedo a ha votshe va nga txhuseka ku ningela tixamulo. Ku thumiswa msungo wa mhaka wa ha ka direvhista da gondo da Muwoneleli, awu wu hi vhunako ku thumisa milayo ya Bhiblia. Ka mabanza ya ma pindako 110.000 ku gondwa mhaka ayi yi fanako.

Hi amukela txivhuno txo tshukwatisa wusikoti wathu wo gondisa. Hagari ka divhiki ni kona ha ñola mtshangano wa sienge siraru wu dhanwako ku i Mahanyelo a Wukristu ni Mthumo wathu wo Txhumayela wu seketelwako ka txibhukwana txa Mahanyelo Ni Ntirho Wa Hina Wo Chumayela txi txi humiswako mtxima ni mtxima. Txienge txo khata txi ku khene Ati hi ti Gondako ka Bhiblia txi hi vhuna kutolovelana ni sienge sa Bhiblia ka ti hi nga ti gonda hi di mtini. Kugwita kulondisela txienge txi txi ku khene Kutitoloveta Kutxhumayela txi txi patako ni mikombiso ya nzila yi hi nga bhulisanako ni vamwani ngu Bhiblia. Mtsimbitisi wa mtshangano a ningela titxhamuselo ti to e hi vhuna ku tshukwatisa kulera kwati ni ku tshukwatisa mawombawombelo athu. (1 Timoti 4:13) Txienge txo gwitisa ngu txi txi ku khene Mahanyelo a Wukristu, kuxolisiswa nzila yi matshina a milayo ya Bhiblia ma nga thumiswako ngu yona ditshiku ni ditshiku. Txienge txiya txi pata ni siwotiso ni tixamulo ati ti tsanisako mapfisiselo athu a Bhiblia.

U txi thuka u ya ka yimwane ya mitshangano yathu, kha ti kanakanisi ti to u na xamatiswa ngu magondiselo a Bhiblia.​—Isaya 54:13.

• Nji txani txi u alakanyako ti to u na txi mana ka mitshangano ya Tifakazi ta Jehovha?

• Ka mitshangano yathu ngu wuhi awu u nga tsakelako ku wu xalela?

Ka mifota ayi yi ku ha ka dibroxura diya ina u yi woni nzila yi Tifakazi ta Jehovha ti nga ambala ngu yona ti di ka mitshangano ya tona ya dibanza? Ngu ku txani hi txi khatala ngutu ngu maambalelo ni ku ti lungisa kwathu?

Ti to hi kombisa txithavo ka Txizimu txathu. Ditshuri ti to Txizimu txi wona to pinda ati hi wonekisako tona. (1 Samuele 16:7) Ngu toneto, mbimo yi hi tshanganako ti to hi txi khozela, minavelo ya mbilu yathu ngu kombisa txithavo ka txona ni ka makristu kulothi. Hi txi tshuka hi maneka hi di masoni ka mlamuli wa wukomani ka hombe, hi nga karateka ngu ti hi nga ambalisa tona nga ku i ku wa txiemo txo guleka. Ngu toneto, nzila yi hi ambalako ngu yona ka mitshangano yathu yi fanete yi kombisa txithavo “ka mlamuli wa mafu otshe” Jehovha Txizimu, ni wukhalo awu hi mu khozelako ka wona.​—Genesisi 18:25.

Ti to hi kombisa mahanyelo athu. Bhiblia yi laya Makristu ti to me ambala ngu “txithavo ni ku ti ñola”. (1 Timoti 2:9, 10) Kuambala ngu “ku ti ñola” ti womba kuvayilela siambalo asi si mahako hi wonwa hi di va nombwe, asi si wuselako vamwani minavelo ya timhaka ta mataho mwendo so wonekela. Ku va ni “txithavo” ti hi vhuna ti to hi sawula siambalo sa lisima asi si si dhuliko ngutu mwendo sa nduma. Matshina oneyo kha ma tsiveli ati m’thu a ti tsakelako. Hahanze ko womba to kari ngu txisofu, ma ambalelo athu ni ku ti lungisa ti nga “tshurisa gondo ya Mponisi wathu” ni ku “dhumisa Txizimu”. (Titosi 2:10; 1 Pedro 2:12) Ngu ku ambala ngu nzila ya yinene ka mitshangano yathu, hi nga vhuna vamwani ti to ve va ni mawonelo a manene ngu wokhozeli wa Jehovha.

U nga leke ku ya mitshanganoni ngu ku u ku singa ni siambalo asi si nga toloveleka mitshanganoni. Kha ti sungi ti to siambalo sathu si va so dhula mwendo so xamalisa ngutu, kasi si txa nga va si di basile ni ku si di ka mazumbelo a manene.

• Hi txi ya khozela Txizimu, ngu ku txani ti di ni lisima kuambala kwati?

• Ngu yihi milayo ayi yi hi kongomisako kusawula siambalo ni kutilungisa?

Ku nga ti u txi gonda Bhiblia ni Tifakazi ta Jehovha, kha ti kanakanisi ti to wa duketa kululamisela txienge txi mi lavako ku txi gonda. Ngu ha ku fanako nda tinene kululamisela u si se ya ka mitshangano ya dibanza ti to u kota kumana txivhuno txa hombe. U mana wuyelo ya yinene ngutu ngu ku lulamisela mbimo yotshe.

Sawula mbimo ni wukhalo wo gonda ka wona. Ngu yihi mbimo yi u nga kotako ku pfisisa kwati? I ni mixo, u si nze kukhata mithumo ya wena ya ditshiku, ni mitshikari mwendo ni minova msana ko va vanana va di otete? Hambi u si koti kuheta mbimo yo lapha u txi gonda, ti vekele mbimo ni ku u ti karatela ku u si tsulupetwi ngu txilo. Lava wukhalo wo mbina diguwa u thavisa asi si nga ku tsulupetako ku fana ni ku tima radhiyo, TV ni selulari. Kumaha mkombelo u si nze kukhata kugonda ti na kuvhuna ku u xula mivilelo yako ya ditshiku ti to u kota kupfisisa Dipswi da Txizimu.​—Vafilipiya 4:6, 7.

Funga xamulo, ni ku ti lulamisela ku ya ningela xamulo. Khata ngu kupfisisa mhaka yotshe ayi ku wombawombwako ngu yona. Alakanyisisa ngu msungo wa mhaka wa gondo mwendo ndima, u wona nzila yi sisungwana sa mhaka si tsimbitisanako ni msungo wa mhaka ngu yona, u wona mifota ni siwotiso so wuseta asi si khanyisako timhaka ta hombe ta gondo. Ngu magwito lera ndima yimwane ni yimwane u wona xamulo ya txiwotiso. Xola ni kulera m’bhalo wu wu nga kombiswa u alakanyisisa ngu nzila yi wu seketelako mhaka ngu yona. (Mithumo 17:11) U txi mana xamulo yi ndandi mwendo kufunga mapswi mamwane a lisima aya ma no ku khumbulisa xamulo mitshanganoni. Ka yona, u nga guleta diwoko u txi lava ku ningela xamulo yo koma ngu mapswi ako.

Kuxolisisa timhaka to hambana hambana ti ti gondwako divhiki ni divhiki mitshanganoni ti na engetela mapimo a maphya ka “txuma” txako txa wuzivi wa Bhiblia.​—Matewu 13:51, 52.

• U fanete u maha txani ti to u kota kululamisela ngu nzila ya yinene?

• U nga ti lulamisela ngu nzila yihi awe u pune ti to u ya ningela xamulo mitshanganoni?

Ku khukhela kale, Jehovha a lava ti to mwaya wumwani ni wumwani wu heta mbimo yo tala wu di kumweko, wu txi tsanisa wumoya wa wona ni wuxaka wa wona. (Dhewuteronome 6:6, 7) Ngu toneto ti mahako ti to Tifakazi ta Jehovha ti sawula mbimo divhiki ni divhiki ti to mwaya wu khozela wu di wotshe​—wu bhula wu di ka kuhumula wu txi khatalela timhaka ta moya a ti ti tsimbitisanako ni silaveko sa wona. Hambi u di wekha, ti ngava tatinene ti to u heta mbimo yoneyo ti to u tshuketa ka Txizimu ngu ku ti mahela gondo ya Bhiblia ngu ha u sawulako kona.

I mbimo yo tshuketa hafuhi ni Jehovha. “Tshuketani hafuhi ka Txizimu kasi ni txona txina tshuketela hafuhi kwanu”. (Jakobe 4:8) Athu hi mana kuziva kwati Jehovha mbimo yi hi gondako to tala mayelano ni wuthu ni mithumo yakwe a mu ka maphepha ya Bhiblia. Nzila yo hehuka yo khata wukhozeli wa mwaya ngu heta mbimo mi txi lera Bhiblia ngu dipswi do guleka mi di motshe, mi txi tilava mi nga londisela txiemiso txa Mtshangano wa mahanyelo a Wukristu ni mthumo wathu wo txhumayela. Siro sa mwaya si nga abanelana sienge so kari ti to si lera se si gwita si bhula ngu ti ti nga gondwa mu ka Mibhalo.

Ti maha ti to siro sa mwaya si tshuketelana. Mwamna ni msikati, hambi va i ku vaveleki ni vanana va tsanisa wuxaka wawe ngu kugonda Bhiblia kota mwaya. Eto ti nga tsakisa, ti tisa kudikha ni ku va i di mbimo yo tsakisa ka divhiki. Ngu kuya ngu tanga ya vanana, vaveleki va nga sawula timhaka ti ti thumako ti to ku bhulwa ngu tona, va txi tilava va nga thumisa timhaka ta mu ka marevhista athu mwendo ti ti manekako ka site ya jw.org. Va nga bhula ngu timhaka ati vanana va mananako nato txikolwani ni nzila yo wonisana nato. Ngu kutxani mi si xaleli tivhidhiyo ka JW Broadcasting (tv.jw.org) ni kubhulisana ngu tona? Mi nga tidila ngu kuembelela tindando ti ti no embelelwa mitshanganoni se mi gwita mi dya txo kari msana ka wukhozeli wa mwaya.

Mbimo yoneyo yo sawuleka ayi mi yi hetako divhiki ni divhiki mi txi khozela motshe Jehovha yi nga mi vhuna kumana ku tsaka ngu Dipswi da Txizimu, se txona txi na katekisa mizamo yanu.​—Masalmo 1:1-3.

• Ngu ku txani hi txi tivekela mbimo ya wukhozeli wa mwaya?

• Vaveleki va nga maha txani ti to wukhozeli wa mwaya wu tsakisa mwaya wotshe?

Ngu ku txani vathu vava va wonekako va di tsakile? Va xalela wumwani wa mitshangano yathu. Ku fana ni ku malanda a kale, ma nga ti leletilwe ti to me tshangana kuraru ngu dilembe, nathu hi emete ngu maso o bhilivila kuxalela mitshangano ya hombe. (Dhewuteronome 16:16) Dilembe ni dilembe hi ni simahakalo siraru: mitshangano ya txigava ya yimbidi ya ditshiku dimwedo dimwedo ni mitshangano wa m’ganga wa masiku mararu. Simahakalo siya si hi vhuna ngu nzila yihi?

Yona yi tsanisa wumwewo wathu wa Wukristu. Ku fana ni Vaisrayeli va nga ti tsakela kudhumisa Jehovha “hagari ka mabuthu ya ma nga sengeletana” nathu hi tsakela kusengeletana hi mkhozela ka simahakalo so sawuleka. (Masalmo 26:12; 111:1) Mitshangano yiya yi hi tulela nzila yo zivana ni Tifakazi ta mabanza mamwani hambi ni ta matiko mamwani. Ngu mbimo yo susula hi di ka wukhalo wu hi ñolako mitshangano ka wona, hi mana mbimo yo aka wungana. (Mithumo 2:42) Ka yona hi li pfa hipune lirando li li tsanisako wumwewo wathu ni “sengeletano yotshe ya vanathu” ha mafuni kotshe.​—1 Pedro 2:17, NM.

Yona yi hi vhuna ku kula ngu didhawa da moya. Vaisrayeli va ti mana txivhuno ka simahakalo soneso sa hombe ngu ku ‘pfisisa mapswi’ a Mibhalo. (Nehemiya 8:8, 12) Nathu hi si teka i di sa lisima sileletelo sa mu ka Bhiblia si hi si manako ka mitshangano yathu. Mlongoloko wumwani ni wumwani wu tsimbitisana ni mhaka ya mu ka Bhiblia. Hi gonda nzila yo maha kuranda ka Txizimu ka wutomi wathu ngu ka miwombawombo, miwombawombo ya mxaxamelo, mikombiso ni mi wombawombisano yo tsakisa. Ha tsaniswa hi txi engisela simahakalo sa vathu va va yako masoni va txi timisela ka wukristu hambi va txi tshangana ni siduko so karata. Ka mitshangano ya m’ganga ku ni tidrama ati ti mahako didungula da matimu a Bhiblia di hanya, ti hi ninga tigondo ti ti hokako ngu mbimo. Ka mitshangano yotshe, vathu va va lavako ku kombisa ku tiningetela kwawe ka Txizimu va bhabhatiswa.

• Ngu ku txani mitshangano ya hombe i di simahakalo so tsakisa?

• Ngu txihi txivhuno u nga txi manako ngu ku xalela mitshangano ya hombe?

A di hafuhi ni kufa, Jesu a wombile tiya: “Mahungu awa a manene a Mfumo ma na huwelelwa ka dotshe ditiko, kasi kumawha wufakazi ka yotshe mifumo se msana keto, ngu kona ku no va i di magwito”. (Matewu 24:14) Kambe ina mthumo wuwa wo txhumayela ha mafuni kotshe wu ndina mahiswa ku txani? Ngu ku londisela mamahelo a Jesu mbimo yi a nga ti ha mafuni.​—Luka 8:1.

Hi zama kumana vathu mitini kwawe. Jesu a gondisile vagondiswa vakwe kutxhumayela mahungu a manene ngu m’ti ni m’ti. (Matewu 10:11-13; Mithumo 5:42; 20:20) Vatxhumayeli vonevo va dilembe dizana do khata va rumilwe ku ya txhumayela ka makhalo o kari. (Matewu 10:5, 6; 2 Vakorinto 10:13) Nga toneto, ni nyamsi mthumo wathu wo txhumayela wu lulamisetwe kwati, dibanza dimwani ni dimwani di ningwa wukhalo wo kari ti to di txhumayela ka wona. Eto ti hi vhuna ti to hi hokela vathu vo tala ngu ha hi nga kotako ngu kona hi txi zama ku hetisisa txirumo txa Jesu txo “txhumayela vathu votshe”—Mithumo 10:42.

Hi ti karatela ku hoka hayi ni hayi a ha vathu va manekako kona. Jesu a vekile txikombiso ngu kutxhumayela vathu ka makhalo a vathu votshe, o nga sisimani mwendo mabambe ka linene. (Marku 4:1; Johani 4:5-15) Nanathu hi bhula ni vathu ngu Bhiblia a ha va manekako va di kona—sitaratoni, makhalo a mabhindo, sititxhini ka mimovha hambi i txova ngu telefone. Hi txhumayela kambe ni vaakelani vathu, vathumi kulothi, vagondi kulothi ni maxaka athu hi txi thuka hi txi mana mkhanjo. Mizamo yoneyo yi maha ti to ti koteka ti to vathu va timiliyoni ha mafuni kotshe ve pfa ‘mahungu a manene a ku poniswa.’​—Masalmo 96:2, NM.

I mani awu u alakanyako ti to u nga tsakela ku mu gela mahungu a manene a Mfumo wa Txizimu ni nzila yi mahungu awa ma wombako ngu yona wumangwana wakwe? U nga thuki u sisela vathu mahungu awa. U txi sikota kuluveta u va gela!

• Ngu yahi “mahungu a manene” aya ma fenelwako ku huwelelwa?

• Tifakazi ta Jehovha ti yi etetisa ku txani nzila ya Jesu yo txhumayela?

Dipswi “nyaphandule”, ngu txitalo di txhamusela m’thu wu a thumako makhalo a maphya, e tula nzila yi vamwani va no yi londisela. Ku nga wombwa ti to Jesu nene i ti nyaphandule, ngu ku a rumetwe ha mafuni ti to e ta txhumayela madungula ya ma ponisako wutomi, e tulela vathu nzila ya wutomi. (Matewu 20:28) Ni nyamsi, malanda akwe ma londisela txikombiso txakwe ngu ku heta mbimo yo tala ngu ha ma kotako ngu kona ma txi ‘maha vagondiswa’. (Matewu 28:19, 20) Vamwani va belela mthumo wu hi wu dhanako ti to wunyaphandule.

Nyaphandule i mtxhumayeli wa mbimo yotshe. Totshe Tifakazi ta Jehovha mbahuweleli va mahungu a manene. Ngu toneto, vamwani va lulamisile siemo sa wutomi wawe ti to ve kota ku thuma kota vanyaphandule va mbimo yotshe va heta 70 wa mawora ngu mtxima va di ka mthumo wo txhumayela. Ti to ti koteka, vavangi va sawute ku hungula mbimo yo thuma mthumo wo ti hanyisa. Vamwani va sawulwa kota vanyaphandule vo sawuleka ka makhalo ya ku ku ni txilaveko txa hombe txa vahuweleli va Mfumo, va heta 130 wa mawora ngu mtxima va di ka mthumo wo txhumayela. Vanyaphandule va tsakela kuhehukisa wutomi, na va txi themba ti to Jehovha a na enelisa silaveko sawe. (Matewu 6:31-33; 1 Timoti 6:6-8) Ava va si si kotiko ku va vanyaphandule va mbimo yotshe, va nga thuma kota vanyaphandule vo vhuneta ngako va txi sikota ve engetela mthumo wawe ngu ku heta 30 mwendo 50 wa mawora ngu mtxima va di ka mthumo wo txhumayela.

Nyaphandule a susumetwa ngu ku dhunda Txizimu ni vathu. Ku fana ni Jesu, nathu hi pfisisa siemo si vathu va ku ka sona so pwata themba ngu didhawa da moya nyamsi. (Marku 6:34) Athu hi ni didungula di di nga va vhunako hambi konkuwa, do va ninga themba yo tsana ngu wumangwana. Kudhunda muakelane ti susumetela nyaphandule ti to e ningela ngu mbimo yakwe ni mtamo wakwe ti to e vhuna vamwani ve ziva mahungu a manene. (Matewu 22:39; 1 Vatesalonika 2:8) Toneto ti tsanisa likholo lawe, ve tshuketa hafuhi ni Jehovha ni kumana litsako la hombe.​—Mithumo 20:35.

• Txhamusela ti to nyaphandule i m’thu wo zumbisa ku txani.

• Nji txani atxi txi mahako vamwani ve teka wunyaphandule wa mbimo yotshe?

Se kupinda mbimo ya yingi gondo ya txitimwi i di txifungo txa hombe txa Tifakazi ta Jehovha. Gondo yo sawuleka yi ningwa ava va ningelako mbimo yawe yotshe ka mthumo wo txhumayela Mfumo ti to ve kota ku ‘hetisisa mthumo wawe’.​—2 Timoti 4:5.

Txikolwa txa Mthumo wa Wunyaphandule. Magwito ka dilembe do khata da mthumo wa mbimo yotshe, nyaphandule wa dhanwa ti to eya ka txikolwa txa mtxhanu wa masiku ni dimwedo ka Nyumba ya Mfumo ya hafuhi ni m’tini kwakwe. Txikongomelo ngu vhuna nyaphandule ti to e tshuketa hafuhi ni Jehovha, e kota kutxhumayela kwati, ni ku simama ka mthumo wakwe.

Txikolwa txa Vatxhumayeli va Mfumo. Ka txikolwa txiya txa mitxima yimbidi ku gondiswa vanyaphandule va va nga vitwa, ava va tsakelako kusiya miti yawe ti to ve ya thuma ka wukhalo wu ku ku ni txilaveko. Vona va womba va di tsanisile va txi khona, “Ngani wuwa! Ni rume!” ngu ku eteta nzila ya Mtxhumayeli wa hombe awu a nga ta thuma ha mafuni, Jesu Kristu. (Isaya 6:8; Johani 7:29) Kururela ka wukhalo wa kule ni m’tini ti pata ku tolovela kuhehukisa wutomi. Mndawuko, matxelo ni sakudya, sotshe eso si na va siemo so hambana. Eto ti nga pata kambe ni kugondela lidimi limwani. Txikolwa txiya txi vhuna vanathu va txiwamna ni va txisikati ni vatekani ava va ku hagari ka 23 kuya ka 65 wa malembe ti to ve sakulela tifanelo tawe ta moya ti va no ya ti lava ku tithumisa ka siavelo sawe ni wusikoti awu ti no va hehukela ti to ve thumiswa ngutu ngu Jehovha ni sengeletano yakwe.

Txikolwa txa Bhiblia txa Giliyadhi txa Torre de Vigia. Ngu txiHebheru ku “Giliyadhi” ti womba “Dibuthu da Tifakazi”. Ku khukhela loko txi di simekilwe ngu 1943, se ku humile kupinda 8.000 wa vanathu ve rumelwa kota varumiwa ti to veya ningela wufakazi ‘kala magwito ka mafu’ ngu kuhumelela ka hombe. (Mithumo 13:47) Mbimo yi varumiwa vo khata va nga hoka Perú, ku singa ni dibanza. Konkuwa se ku ni mabanza ya mapindako 1.000. Mbimo yi ku nga hoka varumiwa vo khata Japani ku singa ni hambi digumi da Tifakazi. Konkuwa ku ni ti ti pindako 200.000. Kursu ya Giliyadhi ya mtxhanu wa mitxima yi pata ni kugonda Dipswi da Txizimu ngu kutshima. Vanyaphandule vo sawuleka mwendo varumiwa va va nga mbi ya Giliyadhi va ku Bhetele mwendo vawoneleli va sigava va rambwa ka txikolwa txiya ti to ve gondiswa kusimamisa ni ku tsanisa mthumo wa mafuni kotshe.

• Ngu txihi txikongomelo txa txikolwa txa mthumo wa wunyaphandule?

• Ka txikolwa txa vatxhumayeli va Mfumo, mba mani va va rambwako?