1-3. Ngu txihi txiwotiso atxi vathu va txi wotisako mayelana ni vafi? Wukhongeli wumwane wu txi xamulisa ku txani?

BHIBLIA yi hi thembisa ti to “kha ku nambi swa ku txi maneka kambe lifo”. (Mtuletelo 21:4) Ka ndima 5, hi gondile ngu txivangelo txi txi mahako ti koteka kumana wutomi wo mbi guma. Kambe vathu va ngadi va txi fa. (Eklesiaste 9:5) Kambe txiwotiso txa hombe txi hi ti wotisako nditxe, Ku humelela txani hi txi fa?

² Xamulo ya txiwotiso txonetxo nja lisma nga ti hi txi felwa ngu wu hi mdhundako. Hi nga ti wotisa tiya: ‘Ku maheka txani ngu ngene? Ina va hi wona? Ina va nga hi vhuna? Ina hi nga tshumela hi va wona?’

³ Titxhetxhe ti xamula siwotiso siya ngu tinzila to hambana. Timwane ti gondisa ti to u di m’thu wa mnene, una hanya nzumani kambe u di m’thu wo biha a na hya nzumani. Timwane ti womba ti to hi txi fa hi hunduka moya ive hi ya tshangana ni maxaka yathu ya se ma nga fa. Kambe timwane ti womba ti to a di fite se e lamulwa, wa veleketwa, mwendo ku tshumela e hanya ni mmidi wumwane, mwendo i di m’thu mwendo i di txihari.

4. Ngu yihi gondo ya yimweyo ayi wukhongeli wu ti gondisako mayelana ni vafi?

⁴ Ko nga wukhongeli wu gondisa timhaka to hambana ngutu. Kambe wotshe wu gondisa to fana. Wona wu gondisa ti to ngako m’thu a txi fa, ku ni txo maha txi txi salako txi txi hanya. Ina toneto ta pfala?

KU HUMELELA TXANI NGAKU HI TXI FA?

5, 6. Ku humelela txani ngaku hi txi fa?

⁵ Jehovha wa ti ziva ati ti humelelako ngako hi txi fa, ni ku ene a hi gete ti to ngako m’thu a txi fa, wutomi wakwe wo guma. Lifo ngu hambana ni wutomi. Se ngako m’thu a txi fa, matipfelo ni mialakanyo yakwe kha si yi masoni si txi hanya ka wukhalo wumwane.a Ngako hi txi fa kha hi koti kuwona, kuengisa nem kha hi na kukota pimisa txilo.

⁶ Mkoma Salomoni a wombile ti to “vafi kha va zivi txilo”. Vafi kha va na ku sikota kuranda mwendo kunyenya, se “ka wukhalo wa vafi ahale u yako kona kha ku nga ni mthumo hambi mapimo” (Lera Eklesiaste 9:5, 6, 10.) Ni ka Masalmu 146:4, Bhiblia yi hi gela ti to ngako m’thu a txi fa, “makungo akwe” ma fa.

NJI TXANI ATXI JESU A NGA TXI WOMBA MAYELANA NI LIFO

7. Nji txani atxi Jesu a nga txi womba mayelana ni lifo?

⁷ Mbimo yi mngana wakwe Lazaro a nga fa, Jesu a gete vagondiswa vakwe a txi khene: “Lazaro mngana wathu a otete.” Kambe Jesu a si wombi ti to Lazaro a humula. Jesu a tshumete a txi khene: “Lazaro a fite.” (Johane 11:11-14) Ngu toneto Jesu a fananisile lifo ni wukohe. Ene asi wombi ti to Lazaro a ti nzumani mwendo ni maxaka akwe ayale ma nga fa. Nem a si wombi ti to Lazaro o hya nzumani mwendo ku velekwa ka wukhalo wumwane na i di m’thu mwendo txihari. Ti ti fana ni ku a di ka wukohe wa hombe. Mibhalo yimwane yi fananisa lifo ni wukohe wa hombe. Bhiblia yi womba ti to mbimo yi Sitefane a nga dawa, “ene a to otela ka va kufa”. (Mithumo 7:60, Tradução do Novo Mundo) M’postoli Paulo a wombile ti to Makristu mamwane ma “otete ka va kufa.”—1 Vakorinto 15:6, NM.

8. Hi ti zivisa ku txani ti to Txizimu kha txi tsakeli lifo la vathu?

⁸ Ina Txizimu txi vangile Adhamu ni Evha ti to ve gwita ve fa? Nem! Jehovha a va vangite ti to ve tidila ngu wutomi ngu ha ku singako ni magwito va di ni dihanyo do hetiseka. Mbimo yi Jehovha a nga vanga vathu, ene a va mahile va di ni minavelo yo hanya ngu ha ku si gumiko. (Eklesiaste 3:11) Vaveleki kha va lavi ti to vanana vawe ve kumba ni kufa, se Jehovha nene a ti pfisa toneto kwathu. Se ngako Txizimu txi nga hi vanga ti to hi hanya ngu ha ku singako ni magwito, ngu ku txani hi txi fa?

NGU KU TXANI HI TXI FA?

9. Ngu ku txani txirumo txi txi nga ti ningilwe Adhamu ni Evha txi nga ti hehukile?

⁹ Jaradhi ka Edheni, Jehovha a gete Adhamu ni Evha ti to: “U nga si kota kudya mihando ya yotshe mindonga ya thembweni u di txhatxhekile. Aniko u nga dye mndonga wa ku ziva ta tinene ni ta kubiha nguko ka di tshiku dile u no wu dya kha ditshuri u na fa.” (Genesisi 2:9, 16, 17) Ti to junya ti to txirumo txiya txi si nemeli ku txi engisa, ni ti to Jehovha a ti ni lungelo yo sawulela Adhamu ni Evha ati i ku ta tinene ni ta kubiha. Ngu ku engisa Jehovha, vona va ndina va va di mkombisile ti to va xonipha wulawuli wakwe. Vona va ndina va va di kombisile nzila yi va m’bongako ngu yona awule a nga va mahela sotshe.

10, 11. a) Sathane a va jikisisile ku txani Adhamu ni Evha? b) Ngu ku txani ku singa ni divalelo ka ti ti nga mahwa ngu Adhamu ni Evha?

¹⁰ Ati ti pandako ngu ti to Adhamu ni Evha va sawute kwa mbi engisa Txizimu. Sathane a ti khene ka Evha: “Ina Txizimu txi wombile ti to mi nga dyeni muhando ni wa wumwewo ka yotshe mindonga yi, yi ku thembweni muwa kani?” Evha a xamute atxi khene: “Athu hi nga si kota kudya mihando ya mindonga ya thembweni. Aniko mihando ya mndonga wu, wu ku hagari ka thembwe, ‘Txizimu txi wombile ti to kha mi nambi wu dya hambi ni ku wu gwesa, kasiku mi si fi’.”—Genesisi 3:1-3.

¹¹ Se Sathane a to khene: “Lambi! kha mi nambi fa. Nguko Txizimu txa ti ziva ti to, ka ditshiku di mi na kudya, mi na tuleka maso, mi txi fana ni Txizimu, mi txi ziva ta tinene ni to biha.” (Genesisi 3:4-6) Sathane a ti lava ti to Evha e pimisa ti to a nga ti sawulela ati i ku ta tinene ni to biha. Ngu di dhawa dimwane, ene a hembile mayelana ni ti to ndino humelela ngako a si engisi Txizimu. Sathane a ti khene Evha kha na mbi fa, se Evha a dyite muhando se e gwita e ninga mwamna wakwe. Phela Adhamu ni Evha va ti ti ziva ti to Jehovha a ti va gete ti to va si dyi muhando. Mbimo yi va nga wu dya, vona va sawute kwa mbi engisa mlayo wo hehuka. Ngu kudya muhando, vona va kombisile ti to kha va xoniphi Tate wawe wa nzumani awu a ku ni lirando. Ka ti va nga ti maha, ku singa ni divalelo!

12. Ngu ku txani i di tingana aku Adhamu ni Evha va sa engisa Jehovha?

¹² Hi nga wona tingana ti vaveleki vathu vo khata va nga komba M’vangi wawe! U ndina ti pfisa ku txani i di ti to wa kulisa mwanana se e gwita e ku wukela se e lwisana ni nawe, e lamba ati awe u ti lavako? Ina ti nga mbi kuthola mbilu?

13. Jehovha a ti womba txani loko a txi khene “u lithule, kambe u na tshumela u txi maha lithule”?

¹³ Mbimo yi va nga mbi engisa, Adhamu ni Evha va luzile lungelo yo hanya ngu ha ku singako ni magwito. Adhamu a getwe tiya ngu Jehovha: “Awe u lithule, kambe u na tshumela u txi maha lithule”. (Lera Genesisi 3:19.) Atiya ti womba ti to Adhamu a ndina tshumela e maha lithule kambe. (Genesisi 2:7) Msana kova a di wonhile, ene a fite se kha nga va a di ho.

14. Ngu ku txani hi txi fa?

¹⁴ I di ti to Adhamu ni Evha va ti ko engisa Txizimu, ni ku va txi ngadi ve hanya. Kambe mbimo yi vona va nga mbi mu engisa, vona va to maha txiwonho, se ngu ku tsimbila ka mbimo va to fa. Txiwonho txi fana ni thomba yi hi nga siyelwa ngu vaveleki vathu vo khata. Hotshethu hi velekilwe hi ti ni txiwonho, ngu koneho ti hi mahako hi fa. (Varoma 5:12) Kambe txonetxo hi nga txona txikongomelo txa Txizimu. Txizimu kha txi lavi ti to vathu ve fa, aniko Bhiblia yi dhana lifo ku “mlala”.—1 Vakorinto 15:26.

DITSHURI DA HI KHULULA

15. Ditshuri mayelana ni lifo di hi khulula ngu nzila yihi?

¹⁵ Ditshuri mayelana ni lifo da hi khulula ka mawonelo o tala a makuhu. Bhiblia yi gondisa ti to vafi kha va pfi kupanda nem kha va henyi. Kha hi na kuwombawomba navo nem kha va na kuwombawomba ni nathu. Kha hi na kuvhuna vakufa, nem vona kha va na ku hi vhuna. Kha va na ku hi xanisa, se ngu toneto kha hi na ku va thava. Hambi keto, wukhongeli wa wungi wu womba ti to vafi va hanya ka wukhalo wumwane ni ku vona va nga hi vhuna ngako hi txi teka male hi ninga vapaxeli ava va tekwako i di vathu vo sawuleka. Kambe ngako hi txi ziva ditshuri mayelana ni vafi, kha hi pengiswi ngu makuhu oneyo.

16. Ngu yahi makuhu aya wungi wa wukhongeli wu ma gondisako mayelana ni lifo?

¹⁶ Sathane a thumisa wukhongeli wa makuhu ti to e hi hembela ni ku hi maha hi alakanya ti to vafi va hanya. Ngu txikombiso, wukhongeli wu gondisa ti to mbimo yi hi fako, ku ni txilo tximwane atxi txi salako txi txi hanya. Ina wukhongeli wako wu gondisa toneto, mwendo wu gondisa ati ti ku mu ka Bhiblia mayelana ni vafi? Sathane a ngadi a txi thumisa makuhu ti to e maha vathu ve va kule ni Jehovha.

17. Makuhu yo hya nzumani, ngu ruka Jehovha ngu nzila yihi?

¹⁷ Ati wukhongeli wa wungi wu ti gondisako ta thisa. Ngu txikombiso, vamwane va gondisa ti to vathu vo biha va na ya hya nzumani. Eto ngu ruka Jehovha. Ene kha na ku tumelela ti to vathu ve xaniswa ngu nzila yoneyo! (Lera 1 Johane 4:8.) U nga mu wonisa ku txani m’thu wu a tsayisako mwanana wakwe ngu kuteka diwoko da mwanana e di hisa ha txikho? U ndina pimisa ti to a bihile nguto. Khu na kumaha wungana nayo. Ngu toneto Sathane a lavako ti to hi maha hi wona Jehovha ngu diso do hala m’pawu!

18. Ngu ku txani hi si faneli kuthava vafi?

¹⁸ Wukhongeli wumwane wu gondisa ti to ngako vathu va txi fa, vo txitxa ve maha mimoya. Wukhongeli wonewo wu gondisa ti to hi fanete hi thava mimoya nguko yona yi nga hi vhikela mwendo ku hi dayisa. Vathu vo tala va ma kholwa makuhu oneyo. Vona va thava vafi, se ve va khozela ve leka ku khozela Jehovha. Khumbula ti to vakufa kha va pfi txilo mwendo kualakanya txilo, se kha hi na ku va thava. Jehovha i mvangi wathu. Ene i Txizimu txa ditshuri, se athu hi fanete kukhozela ene basi.—Mtuletelo 4:11.

19. Kuziva ditshuri mayelana ni vafi ti hi vhunisa ku txani?

¹⁹ Mbimo yi zivako ditshuri mayelana ni vafi, ha khululwa ka makuhu a wukhongeli. Se ditshuri diya di hi vhuna kupfisisa sithembiso so xamalisa asi Jehovha a nga si maha mayelana ni wutomi wathu ni wumangwana.

20. Hi na gonda txani ka ndima yi yi londiselako?

²⁰ Ka malembe ya kale, Jobe dilanda da Txizimu a wutisile: “Ina m’thu wo kari a txi fa a nga si kota kuhanya kambe kani?” (Jobe 14:14) Ina ngu ditshuri ta koteka ti to m’thu a txi fa e tshumela e hanya kambe? Ati Bhiblia yi ti wombako ta tsakisa ngutu. Hi na ti wona ka ndima yi yi londiselako.

1-3. Ngu yihi jele yi hotshethu hi ku ka yona, ni ku Jehovha a na hi hulukisa ku txani?

TI WONE u di khotetwe jele ngu kota ya mnandu wu u nga mbi wu maha. Kha ku nga ni nzila yo huluka. Ti woneka u singa ni themba, ni ku txi walo atxi u nga txi mahako. Ngako u nga gumelwa ngu themba, se u mana m’thu wu a ku ni mtamo wo ku hulukisa e kuthembisa ku ku lamulela! U ndi na tipfisa ku txani?

² Hotshethu hi khotetwe ka jele ya lifo. Hambi hi txo maha txani ni txani, kha hi na kuhuluka ka lona. Kambe Jehovha a ni mtamo wo hi hulukisa ka lifo. Ene a thembisile ti to “mlala wo gwitisa a fanelako kufuviswa, ngu lifo”.—1 Vakorinto 15:26.

³ Ti wone u di humute kukarateka ngu kuthava lifo! Kambe Jehovha kha na mbi thavisa lifo dwe. A na tshumela e wuyisa wutomi wa va se va nga fa. Alakanya ti to ti womba txani toneto kwako. Ene a thembisa ti to “avale va nga ti fite” va na tshumela ve hanya kambe. (Isaya 26:19) Atiya ngu ti Bhiblia yi ti wombako ngu wuka ka vakufa.

NGAKO KU TXI FA AWU HI M’DHUNDAKO

4. a) Nji txani txi txi nga hi thavelelako mbimo yi txiro txa mwaya mwendo mngana wathu a fako? b) Mba mani va i nga ti vangana va hombe va Jesu?

⁴ Mbimo yi txiro txa mwaya mwendo mngana wathu wa hombe a fako, ku pandiseka kwathu ni ku karateka ka kula. Hi tipfa hi singa ni m’vhuni. Txi walo txi hi nga txi mahako ti to ve tshumela ve hanya. Kambe Bhiblia ya hi ninga m’thavelelo wa ditshuri. (Lera 2 Vakorinto 1:3, 4.) He xolisise txikombiso atxi txi kombako nzila yi Jehovha ni Jesu va lavako kuwusa va hi vadhundako ve tshumela ve hanya. Mbimo yi Jesu a nga ti ha mafuni a ti tolovela kupfuxela Lazaro ni tindiyakwe, Marta ni Maria. Ngu wuraru wawe i ti vangana va hombe va Jesu. Bhiblia yi womba ti to: “Jesu a titi mu randa Maria ni mwanawe ni Lazaro.” Kambe ditshiku dimwane Lazaro a fite.—Johane 11:3-5.

5, 6. a) Nji txani txi Jesu a nga txi maha mbimo yi a nga wona maxaka ni vangana va Lazaro va di pandisekile? b) Ngu ku txani ti txi thavelela kuziva ti Jesu a nga ti pfisa tona mayelana ni vafi?

⁵ Jesu a yite ku ya thavelela Marta ni Maria. Mbimo yi Marta a nga pfa ti to Jesu a tile, ene a to huma didhoropani a txi mu hingeta. Ene a tsakile ngu kuwona Jesu, kambe a to m’gela tiya: “Idi ku awe u titi ho ahawa ndiyangu nga a sa fa.” Marta a alakanyile ti to Jesu a txhetwe ngutu. Mbimo yi Jesu a nga wona ndiya ya Lazaro, Maria a txi dila ni ku pandiseka kwakwe, se ene a to dila. (Johane 11:21, 33, 35) Ene a topfa kupanda ka hombe ku hi ku pfako mbimo yi hi felwako ngu wu hi mdhundako.

⁶ Kuziva nzila yi Jesu a ti pfako ngu yona mayelana ni vafi ta hi thavelela. Jesu a fana ni Tate wakwe. (Johane 14:9) Jehovha a ni mtamo wo gumisa lifo da magwito, se eto ngu tona a no ti maha i singa kale.

“LAZARO, HUMA HAHANZE!”

7, 8. Ngu ku txani Marta a nga si ti lavi ku thavisa dirigwi ka di sira da Lazaro, ni ku nji txani txi Jesu a nga txi maha?

⁷ Mbimo yi Jesu a nga hoka ha makhomboni a ha txirumbi txa Lazaro txi nga ti keletwe kona, ngu txitimwi ku ti vhatwe ngu dirigwi da hombe. Jesu a ti khene: “Thavisani dirigwi.” Kambe Marta a si ti lavi. Txirumbi txa Lazaro se txi ti ni “mune wa masiku” disirani. (Johane 11:39) Ene a si ti zivi ti to Jesu a lava kumaha txani ti to e vhuna ndiyakwe.

⁸ Jesu a gete Lazaro a txi khene: “Huma hahanze!” Ati Marta ni Maria va nga ti wona ngu msana ti ti xamalisa. “Se mufi a to huma na a di tombetetwe manza akwe ni mikondo ngu tinguwo.” (Johane 11:43, 43) Lazaro se a ti tshumete e mana wutomi! A tshumete e tshangana ni maxaka ni vangana vakwe. Vona va ndina m’gwesa, ve mñola ni kubhula nayo. Hi nga wona txixamaliso txiya! Jesu a ti wusile Lazaro ka vakufa.

“TXIHORANANA NI KHANI KWAKO, ‘WUKA!’”

9, 10. a) Imani a nga ninga mtamo Jesu wo wusa vafi? b) Ngu ku txani matimu a kuwuswa ka vafi i di a lisima kwathu?

⁹ Ina Jesu a wusile vathu ngu kuthumisa mtamo wakwe? Ahim-him. A si nze kuwusa Lazaro, Jesu a mahile mkombelo ka Jehovha, se ene a m’ngile mtamo wo wusa Lazaro. (Lera Johane 11:41, 42.) Lazaro i singa ene ekha a nga wuswa ka vakufa. Bhiblia yi wombawomba ngu dihorana da 12 wa malembe a ku velekwa di nga ti lwala ngutu. Tate wa dona, Jayiro, a ti pandisekile, se a to hingeta Jesu ti to e ta di hanyisa. Ene i ti mwanana wakwe mmweyo ekha. A txi ngadi a txi wombawomba ni Jesu, ku to bwaka vathu vo ta m’gela ti to: ‘Mwanana wako a fite; u karatela txani kambe Mgondisi?’ Kambe Jesu a to gela Jayiro a txi khene: “U nga thavi, tumela dwe, a na hanya.” Ene a to tsula ni Jayiro m’tini kwakwe. Se va di hafuhi ni ku hoka, Jesu a to wona ni kuengisa vathu va txi dila. Jesu a to va gela tiya “Kudila kuwa nga txani? Dihorana kha da fa di to otela.” Tate ni mame wa dona va to xamala ngutu ngu ti Jesu a nga ti womba. Jesu a to kombela votshe ti to ve huma se e teka tate ni mame wa dona ve wulela ka wukhalo wu di nga ti otelisilwe kona dihorana. Ngu nzila ya yinene Jesu a to di ñoleta ngu mawoko e di gela tiya: “Txihoranana ni khani kwako ‘wuka!’” Alakanya nzila yi vaveleki va nga tipfa ngu yona va txi wona mwanana wawe ngu txikuluveta a txi wuka e khata ku tsimbila tsimbila! Jesu se a ti wusile dihorana dawe. (Marku 5:22-24, 35-42; Luka 8:49-56) Ku khukhela ditshikudo, vona va txa nga di wona, ti nga maha va txi khumbula ti Jehovha a nga va mahela tona ngu ku thumisa Jesu.a

¹⁰ Ava va nga wuswa ngu Jesu va tshumete ve fa. Kambe ati hi ti gondako mayelana ni vathu vava nda lisima nguko ti hi ninga themba yo tsana. Jehovha a tsakela kuwusa vakufa, ni ku a na ti maha toneto.

ATI HI TI GONDAKO NGU MATIMU A KUWUSWA KA VAFI

11. Ngu tihi ti Eklesiaste 9:5 yi hi gondisako mayelana ni Lazaro?

¹¹ Bhiblia yi ti veka ha kubasani yi txi “avale va nga fa kha va zivi txilo.” Toneto i ti ditshuri ka Lazaro. (Eklesiaste 9:5) Nga ha Jesu a nga womba ngu kona, ti txi fana ni kuva Lazaro se a di otete. (Johane 11:11) Mbimo yi a nga ti disirani, Lazaro a ti si “zivi txilo”.

12. Hi ti zivisa ku txani ti to ku wuswa ka Lazaro ku humelete ngu ditshuri?

¹² Mbimo yi Jesu a nga wusa Lazaro, vathu vo tala va ti woni toneto. Hambi valala va Jesu va ti zivile ti to a mahile txixamaliso txoneto. Lazaro se a ti hanya, toneto ti ningete wufakazi wa ti to ku wuswa ka vafi ku na maheka. (Johane 11:47) Hambi keto, vathu va yite va txi ya pfuxela Lazaro, se wuyelo yeto, vathu vo tala va to khata ku kholwa ti to Jesu a rumetwe ngu Txizimu. Valala va Jesu kha va ti tsakela toneto, se va to luka makungo o daya Jesu ni Lazaro.—Johane 11:53; 12:9-11.

13. Ngu ku txani hi txi tsaniseka ti to Jehovha a na wusa vafi?

¹³ Jesu a wombile ti to “votshe avale va ku mayiva a txialakanyiso “ va na wuswa. (Johane 5:28, Tradução do Novo Mundo) Atiya ti womba ti to votshe avale va ku ka mialakanyo ya Jehovha va na tshumela ve hanya. Kambe ti to Jehovha e wusa m’thu, ti lava to ene e khumbula tximwane ni tximwane mayelana ni m’thu wa kona. Ina ngu ditshuri ti ene a nga ti maha? Ngu ditshuri, ku ni tibhiliyoni a tinyeleti nzumani. Bhiblia yi womba ti to Jehovha a ziva ditina da nyeleti yimwane ni yimwane. (Lera Isaya 40:26.) I di ti to a khumbula ditina da nyeleti yimwane ni yimwane, hi nga tsaniseka ti to ene a na khumbula totshe mayelana ni va a no tshumela a txi va ninga wutomi. Txa lisima ngutu ngu ti to Jehovha a vangile sotshe, ngu toneto athu ha ti ziva ti to a ni mtamo wo tshumela e ninga wutomi va va nga fa.

14, 15. Mhaka ya Jobe yi hi gondisa txani mayelana ni kuwuswa ka vafi?

¹⁴ Wamwamna wa likholo Jobe a ti themba ti to ku na va ho kuwuswa ka vafi. A wotisile: “Ina m’thu wo kari a txi fa a nga sikota kuhanya kambe kani?” E tshumela e gela Jehovha ti to: “Awe u ndina ni dhana, se ani ni ndina orovela, ngako u txi navela kuwona kambe mthumo wa manza ako.” Inna, Jobe a txi ti ziva ti to Jehovha a rinzela kuwona mbimo yi ene a no wusa vafi.—Jobe 14:13-15.

¹⁵ Themba ya ku wuswa ka va kufa yi ku maha u ti pfa ngu nzila yihi? Ti nga ku maha u karateka, ‘Ku wombwa txani ngu maxaka ni vangana vangu va se va nga fa, ina ni vona va na ta wuswa?’ Ta hi thavelela kuziva ti to Jehovha ngu ditshuri a lava kuwusa va va nga fa. He wone ati Bhiblia yi ti wombako mayelana ni mu va no ya hanya kona ni ti ku wuswa ku no mahisa tona.

VONA “VA NO ENGISA DIPSWI DAKWE SE VE WUKA”

16. Ava va no wuswa va na tidila ngu wutomi wo zumbisa ku txani?

¹⁶ Ka mbimo yoneyo, ava va nga wuswa va tshanganile ni maxaka ni vangana kona ha mafuni hawa. Toneto ti na maheka ka mbimo yi yitako, kambe toneto ti nava ngu nzila ya yinene ngutu. Ngu ku txani? Nguko ava va no wuswa ha mafuni va na va ni lungelo yo hanya ngu ha ku si gumiko va si fi kambe. Vona va na ta hanya ka mafu ya ma hambanako ngutu ni a nyamsi. Ku nambi swa ku va ni tiyimbi, wugevenga ni wulwati.

17. Mba mani ava va no wuswa ka vakufa?

¹⁷ Mba mani va no wuswa? Jesu a wombile ti to “votshe vale va ku mayivani va no engisa dipswi dakwe se ve wuka.” (Johane 5:28, 29) Ka Mtuletelo 20:13 yi hi gela ti to: “Linene li to tshumeta vathu va va nga ti ka lona. Lifo ni Hadhesi si to ningela vafi va va nga ti ka sona.” Ditshuri, tibhiliyoni ta vathu ti na tshumela ti hanya. Mpostoli Paulo nene a wombile ti to “vo lulama ni va kwa mbi lulama” va na wuka ka va kufa. (Lera Mithumo 24:15.) Ti womba txani toneto?

18. Mba mani va “vo lulama” va va no wuswa ka vakufa?

¹⁸ “Vo lulama” va pata malanda a Jehovha o thembeka ya ma nga hanya Jesu a si nze ku ta ha mafuni. Vathu vo fana ni Nowa, Abrahamu, Sara, Mosi, Rute ni Esteri va na wuselwa ku ta hanya kona ha mafuni hawa. U nga gonda mayelana ni vavamna ni vavasikati ka Vahebheru ndima 11. Ku wombwa txani ngu vathumeli va Jehovha ava va fako ka mbimo yathu? Ni vona “vo lulama,” va na wuswa.

19. Mba mani “va kwa mbi lulama”? Ngu yihi lungelo yi Jehovha a no va ninga yona?

¹⁹ “Va kwa mbi lulama” ku patwa tibhiliyoni ta vathu va va nga mbi va ni lungelo yo ziva Jehovha. Hambiku va nga fa, Jehovha kha va divala. Ene a ti emisete ku va wusa, ni ku va na va ni lungelo yo gonda ngu ngene ni ku mthumela.

20. Nji txani txi mahako ti to i singa votshe va no wuswa ka va kufa?

²⁰ Ina eto ti womba ti to votshe va va nga fa va na ta wuswa? Ahim-him. Jesu a wombile ti to vamwane va na mbi tshumela ve hanya. (Luka 12:5) I mani wu a no sunga ti to mba mani va va no wuswa ni va va no mbi wuswa? Jehovha ngene Mlamuli wa hombe kambe a tshumete e ninga Jesu wulawuli wa “kumaha mlamuli wa vo hanya ni vakufa”. (Mithumo 10:42) Wuhi ni wuhi wu a no lamulwa kota wo biha ni wu a si hundukiko kha na mbi wuswa ka vakufa.—Wona Titxhamuselo to gwitisa 19.

KU WUSWA KA VA VA NO YA HANYA NZUMANI

21, 22. a) Ti womba txani ku wuselwa ku ya hanya nzumani? b) I mani wo khata ku wuswa e ya hanya nzumani?

²¹ Bhiblia se yi wombile ti to vathu vamwane va na ya hanya nzumani. Mbimo yi m’thu wo kari a wuselwako ku ya hanya nzumani, kha wuki adi ni mmidi wa nyama. Ene a na wuswa kota m’thu wa moya nzumani.

²² Jesu ngene wo khata ku va ni lungelo yo wuswa ku ya hanya nzumani. (Johane 3:13) Msana ka masiku mararu a di fite, Jehovha a m’wusile. (Masalmu 16:10; Mithumo 13:34, 35) Jesu kha wuswa a di ni mmidi wa nyama. Mpostoli Paulo a txhamusete ti to Jesu “a fite ngu ka mmidi aniko a hanyisilwe ngu ka moya”. (1 Pedro 3:18) Jesu a wusilwe ka vakufa i di m’thu wa mtamo wa moya! (1 Vakorinto 15:3-6) Kambe Bhiblia yi womba ti to hi ngene ekha.

23, 24. Mba mani “mtxhambi wa wudothoanyana” va Jesu a nga wombawomba ngu vona, ni ku va ngahi?

²³ Ene a si nze kufa, Jesu a gete vagondiswa vakwe vo thembeka ti to: “Na tsula ku ya mi lulamisela wukhalo.” (Johane 14:2) Atiya ti womba ti to valondeteli vamwane vakwe va ndina wuswa ku ya hanya nayo nzumani. Va ngahi? Jesu a wombile ti to wu na va mtengo wa wudotho “mtxhambi wa wudothoanyana”. (Luka 12:32) Mpostoli Johane a wombile mtengo wa kona mbimo yi a nga wona Jesu a di “emile txitimwi [nzumani] ka Mmango wa Siyoni, kumweko ni va va 144.000.”—Mtuletelo 14:1.

²⁴ Ku wuswa ka va va 144.000 ku na khata mbimo yihi? Bhiblia yi womba ti ku na khata mbimo yi Kristu a no khata ku fuma a di nzumani. (1 Vakorinto 15:23) Athu se hi hanya ka mbimo yoneyo, aniko wungi wa va va 144.000 se va wusilwe va nzumani. Ava va ku ngadi ha mafuni hawa, va txi fa va tekela kuwuswa ve ya hanya nzumani. Kambe, wungi wa vathu va na ta wuswa ve hanya ka Paradhise kona ha mafuni hawa.

25. Hi na ta gonda mayelana ni txani ka ndima yi yi londiselako?

²⁵ I singa kale, Jehovha a lava ku txhatxhisa vathu votshe ka lifo ni ku a na fuvisa lifo da magwito! (Lera Isaya 25:8.) Kambe nji txani txi ku ya mahwa ngu va le va yako Nzumani? Bhiblia yi txhamusela ti to vona va tsakela mlayo wa Mfumo wa Wukoma wa Jesu. Hi na gonda ta tingi mayelana ni Wukoma wuwa ka ndima yi yi londiselako.