Kuvelekwa ka Jesu

Khezari Augusto, mkoma wa Roma, a wombile ti to votshe Vajudha va di fanete kutsula ka madhoropa aya va nga velekelwa ka ona kasiku ve ya ti bhalisa. Ngu toneto, Josefa ni Mariya va tsute Bhetlehema, i ku didhoropa a di Josefa a nga velekelwa ka dona. Ka mbimo yile, Mariya a ti hafuhi ni kuveleka.

Mbimo yi va nga hoka Bhetlehema, ku si nga ngadi ni wukhalo wo zumba ka wona, ku ti ko sala amu ku nga txi zumba sihari. Ngu kona hale Jesu a nga velekelwa kona. Se Mariya a to phutela txibhebhetana txile ngu tinguwo e gwita e txi veka ka wukhalo awu sihari si nga txi dyela ka wona.

Ka wukhalo wumwani wa hafuhi ni Bhetlehema, ku ti ni vadyisi ava va nga txi dyisa tinvuta tawe ni wusiku. Ku to humelela ngilozi hafuhi ni vadyisi vale, se kukhata kuwonekela ngutu. Vadyisi vale va to thava: ‘Kambe ngilozi yi ti khene: Mi nga thaveni, ani ni mi tisela mahungu o tsakisa. Nyamsi ku velekilwe Mesiya khe Bhetlehema.’ Se ku to humelela tingilozi tatingi nzumani, ti txi kha tona: ‘Txi na dhumiswi Txizimu nzumani, ni ku ku na ve ni kurula hamafuni.’ Msana ka tiya, tingilozi tile ti to nyamalala. Ngu tihi ti vadyisi vale va nga ti maha?

Vona va to gelana tiya: ‘Tsimbilani Bhetlehema konku.’ Vadyisi vale va tsute Bhetlehema ve ya mana Josefa, Mariya ni mwanana wawe va di ha ku nga txi zumba kona sihari.

Mbimo yi vadyisi va nga kontarela ati ngilozi yi nga va gela, votshe va to xamala. Mariya a txi zumbela kualakanyisisa ngu ti ngilozi yi nga di ti wombile, ni ku kha ti divala. Msana keto, vadyisi vale va tsute, va txi bonga Jehovha ngu totshe a ti va nga ti wona ni ku ti engisa.