Didungula da Johani M’bhabhatisi

Johani mwanana wa Zakariya ni Elizabheti, a kute ni ku a ve mprofeti. Jehovha a sawute Johani kasiku e gela vathu ti to Mesiya wa ta. Johani a si gondisi masinagogani mwendo mitini ya vathu, ene a txi gondisa kule ni madhoropani. Vathu va Jerusalema ni va Judheya va txi lavetela Johani kasiku e va gondisa. Ene a txi va gondisa ti to kasiku ve tsakisa Txizimu va ti fanete kuleka kumaha timhaka to biha. Se, vavangi va txi leka kumaha timhaka to biha niku va txi bhabhatiswa ngu Johani.

Johani a txi hanya wutomi wo hehuka. Ene a txi ambala simaha so mahwa ngu madhowo a makamelo, a txi dya tibhandala ni wulombe. Vathu vavangi va txi lava ku m’ziva. Hambi Vafarisi ni Vasadhusi ava va nga txi tigela ngutu va txi tsula veya womba-womba ni Johani. Kambe Johani a txi va gela tiya: ‘Anu mi nga pimiseni ti to Txizimu txa mi dhunda ngutu kupinda vamwani, anu mi fanete kutxitxa mi leka eto.’

Vathu vavangi va txi wotisa Johani ti to va nga maha txani kasiku ve tsakisa Txizimu. Se, Johani a txi va gela tiya: ‘Ngaku anu mi di ni mabhaji mambidi, tekani dimwedo mi ninga wu a singako nado.’ Wa tiziva to ngu kutxani Johani a nga txi womba eto? Ene a txi lava kugondisa ti to kasiku hi tsakisa Txizimu tilava hi dhunda vathu.

Ene a gete tiya majaha ya ma nga txi teketela mali yo hakhela resa: ‘Mi nga kanganyiseni vathu, tekani mali yi yi fanelekako.’ Johani a txi gela tiya masotxhwa: ‘Mi nga hembeni mwendo kuzama kuteka mali ya vamwani.’

Mbimo yi Vaprista ni Valevhi va nga txi wotisa Johani ti to ene i ti mani, ene a txi va gela tiya: ‘Ani ni wule a vhunako vathu ti to ve ziva Jehovha. Mprofeti Isaya a wombawombile ngu ngani.’

Vathu va txi ti dhunda ati Johani a nga txi va gondisa. Ngu mhaka ya toneto, vamwani va txi wotisa ti to ina i ti ene Mesiya kani. Kambe Johani a txi va gela tiya: ‘Wa ta m’thu wa lisima ngutu kupinda ani. Ani nem kha ni faneli ku m’thavisa masandaliya. Ani ni bhabhatisa ngu mati, kambe ene a na ta bhabhatisa ngu moya wo sawuleka.’