Jesu e sawula 12 wa vapostoli

Msana ka kuva Jesu a di txhumayete kudingana dilembe ni hafu, ene a ti fanete kumaha txisungo txa lisima ngutu. Ti txi lava e sawula ava a ndi no thuma navo ka mthumo wo txhumayela ni ku ve khatalela mabanza o khata. Jesu a txi tiziva ti to a txi lava txivhuno txa Jehovha kasi kumaha txisungo txonetxo. Ngu toneto, ene a tsute ekha mmangoni eya maha mkombelo wusiku wotshe. Mangwanani ka kona, Jesu a sengeletile vagondiswa vo kari, se e sawula ava va ndi no va 12 wa vapostoli. Ina wa ma khumbula matina awe? Vona i ti: ‘Pedro, Andreya, Jakobe, Johani, Filipi, Bhartolomewu, Tomasi, Matewu, Jakobe mwanana wa Alfewu, Tadhewu, Simoni ni Judhasi Iskariyoti.’

Majaha awa a 12 ma txi tsimbila-tsimbila ni Jesu. Msana ka kuva Jesu a di va trenarile, vona va tsute vokha ve ya txhumayela. Jehovha a tshumete e va ninga mtamo wo hinga madhimoni ni kuhanyisa vathu ka malwati.

Jesu a txi wona 12 wa vapostoli vale kota vangana vakwe, ni ku a txi va themba. Vapostoli va ve ni Jesu ka timbimo ta lisima ngutu ka wutomi wakwe, to fana ni mbimo yi a nga txi la kudawa ni msana ka kuva a di wusilwe. Vapostoli vamwani va ti txhadhile, ni ku kufana ni Jesu vavangi va txi ta ngu Galileya. Vafarisi va si va ningi lisima vapostoli vale va 12 nguku vona va sa gonda ka sikolwa sa tinduma. Kambe vapostoli vale va ti gondisilwe ngu Jesu kumaha kwati mthumo wule wo txhumayela.

Vapostoli va sa hetiseka. Se hi nga mbimo yotshe va nga txi maha ati i ku ta tinene. Mbimo yimwani va txi womba-womba va sa khata ngu kupimisa, va txi maha sisungo so biha ni ku va si nga ni pasiyensiya. Makhambi mamwani vona va txi lwa ngu kulava kuziva ti to i ti mani i nga ti wa lisima ngutu. Kambe vona i ti vathu va vanene niku va txi m’dhunda Jehovha. Vona va di na vhuneta ko maha dibanza da Wukristu msana ka kuva Jesu a di fite.