Dhixkursu ya Mmangoni

Msana kova Jesu a di sawute vapostoli vakwe va 12, ene a woni ti to ku ti ni vathu vavangi ava va nga ti m’emela. Vathu vale va txita ngu ka makhalo amangi o hambanelana, vamwani va txita ngu Galileya, Judheya, Tiro, Sidhoni ni Siriya. Ka vona vathu vale, vamwani va ti lwala se vamwani va ti ni madhimoni. Kambe Jesu ava hanyisile votshe, e gwita e khalahatsha e khata kumaha dhixkursu yakwe ayi nyamsi yi ziwako ngutu, i ku Dhixkursu ya Mmangoni. Ka dhixkursu yoneyo, Jesu a txhamusete ati hi fanelako ku ti maha kasiku hi va vangana va Txizimu. Ene a ti khene, hi fanete kupfisisa ti to nda lisima ngutu ku hi kongomiswa ngu Jehovha ka wutomi wathu hi tshumela hi gonda ku m’randa. Kambe, kha hi na kuwomba ti to ha randa Txizimu na hi si dhundi vathu. Jesu a wombile ti to mbimo yotshe hi fanete kumahela tatinene vamwani, hambi ni valala vathu.

Jesu ati khene: ‘Anu kha ma fanela kudhunda vanga vanu dwe. Kambe mi fanete kutshumela mi dhunda valala vanu, mi divalela votshe vathu. Ngaku m’thu a txi mi henyela mi fanete kuya womba-womba nayo mi kombela divalelo. Mahelani tatinene vamwani nga ti anu mi tsakelako ku ve mi mahela.’

Jesu a tshumete e ningela sialakanyiso sasinene mayelano ni male. Ene ati khene: ‘Nda lisima ngutu kuva mngana wa Jehovha kupinda kuva ni male yayingi. Phela dikhokhokho di nga pa male yako, kambe kha ngaho wu a nga pako wungana wako ni Jehovha. Lekani kukarateka ngu si mi no dya, asi mi no sela mwendo so ambala. Wonani sinyana, mbimo yotshe, Txizimu txa si ninga so dya. Kuzumbela kukarateka kha ti mahi ti to m’thu e hanya malembe amangi. Khumbulani ti to, Jehovha wa si ziva sotshe asi mi si lavako.’

Phela vathu vale va si khali kupfa m’thu a txi womba-womba kufana ni Jesu. Vathangeli va wukhongeli ava i nga ti vona va nga di fanete kugondisa vathu ngu Txizimu, va si khali kuva gondisa timhaka to fana ni tile. Kambe, ngu kutxani Jesu i nga ti mgondisi wamnene? Nguku ati Jesu a nga txi ti gondisa ti txita ngu ka Jehovha.