Jesu a gondisile vagondiswa vakwe kumaha mkombelo

Vafarisi va txi maha timhaka tatinene kasiku ve wonwa ngu vathu. Vona va txi dhunda kumaha mikombelo ka makhalo aya ku nga di tate ngu vathu, kasiku votshe ve va wona. Vafarisi va txi ziva mikombelo yo lapha ngu msungo ni ku va txi wuyeletela mikombelo yoneyo masinagogani ni tiruwani, kasiku votshe vathu ve va pfa. Kambe, Jesu a gondisile vagondiswa vakwe ti to ve maha mkombelo ngu nzila yo hambana ni ya Vafarisi. Jesu ati khene: ‘Mi nga maheni mkombelo nga ti vafarisi va mahisako tona. Vona va pimisa ti to Txizimu txa yi tsakela mikombelo yawe yo lapha, kambe Txizimu kha txi yi tsakeli. Ngaku u txi maha mkombelo, ndako ni Jehovha dwe. Mi nga thumeleni kuwombetela timhaka toneto ta timweto ka yotshe mikombelo. Jehovha a lava ti to mi m’gela totshe ati mi ti pfisako tona.’

Jesu a va gete tiya: ‘Anu mi fanete kumahisa tiya mkombelo: “Tate wathu u ku nzumani, ditina dako di na basiswe. Wu nate Mfumo wako. Ku na maheke kuranda kwako hamafuni nga nzumani.”’ Jesu a tshumete e gela vagondiswa ti to va di fanete kukombelela sakudya sa ditshiku ni ditshiku, ve kombela Txizimu ti to txi va divalela sionho sawe, ni kukombela tximwani ni tximwani atxi i ngadi txa lisima kwawe.

Jesu a tshumete a txi khene: ‘Mi nga lekeni kumaha mkombelo. Simamani mi kombela silo sasinene ka Jehovha, ene i Tate wanu. Anu ma tiziva ti to votshe vaveleki va lava kuninga silo sasinene vanana vawe. Se ngaku mwanana a txo kombela dipawa ka tate wakwe, ina tate wa kona a nga m’ninga dirigwi? Ngaku mwanana a txo kombela txihaka, ina tate wakwe a nga m’ninga mnyoka?’

Msana keto, Jesu a to txhamusela ati a nga txi lava kuva gondisa tona. A txi khene: ‘Aku vaveleki va tizivako kuninga silo sasinene vanana vawe, Jehovha nene a na mi ninga silo sasinene. Ene a na mi ninga moya wo sawuleka, to lava mi mkombela dwe.’ Ina awe u maha mkombelo nga ti Jesu a nga gondisisa tona? Ngu tihi ati u ti kombelako ka mikombelo yako?