Dipasi da Mmidi wu wu Fumako

“Mi fanete kuva mi di vagondisi.” (Vaheb. 5:12) Hi nga wona lungelo eyo! Jehovha i ku Mgondisi wa hombe ngutu ka wuako wotshe wa hi ramba kugondisa vamwani ngu ngene! Txienge tximwani ni tximwani txo gondisa ditshuri ngu Jehovha i nga va mwayani, dibanzani mwendo kutxhumayelani, i lungelo yo sawuleka ni ku mbutixamuleli wa hombe. Hi nga sikotisa kutxani ku va vagondisi va vanene?

Xamulo hi yi mana ka ti Paulo a nga gela Timoti a txi khene: “Ti ningetele amu ka kugonda dibhuko, amu ka kulaya, amu ka kugondisa.” Paulo a tshumete a txi khene: “Nguko ngako u txi maha toneto, u na ti hanyisa awe ni va va ku engisako.” (1 Tim. 4:13, 16) U gondisa didungula di di ningako wutomi. Ngu toneto, ti ni lisima kutshukwatisa wusikoti wako wo lera ni kugondisa. Dibroxura diya di mahetwe ku kuvhuna kumaha toneto. He wone ti di ku nato.

Atxiya txi kombisa m’bhalo awu i ku ditshina da Mlayo di di yelanako ni gondo yoneyo mwendo txikombiso txa mathumiselo a m’bhalo wonewo

Jehovha, ‘i mani a gondisako kufana nayo kani?’ (Jobe 36:22) Hambiku dibroxura diya di kuvhunako kutshukwatisa wusikoti wako kota mleri mwendo mgondisi, u nga divale ti to Jehovha ngene Txisima txa didungula di u gondisako ni ku ngene a ndindako vathu vakwe. (Joh. 6:44) Ti di ngeto, kombela moya wo sawuleka. Thumisa ngutu Bhiblia. Vhuna vaengiseli ve wona Jehovha i si nga kuwona awe. Zama kuvhuna vaengiseli vako ve va ni lirando lo tsana ngu Jehovha.

U mani lungelo yo gondisa didungula da lisima ngutu ha mafuni kotshe. Ha tsaniseka ti to u na vhunwa ngu mtamo ‘wa txiavelo txi u nga hiwa ngu Txizimu.’—1 Pedro 4:11.

Vagondisi kuloni,

Mmidi wu wu Fumako wa Tifakazi ta Jehovha