• Njitxani Mfumo wa Txizimu?
    Hanya wutomi wo tsakisa kala kupinduka!—Kursu ya Bhiblia
    • Gondo 31. Jesu Kristu a txi fuma nzumani msana ko ningwa wudhumo ngu Jehovha.

      GONDO 31

      Nji txani Mfumo wa Txizimu?

      Msungo wa mhaka wa hombe awu kuwomba-wombwako ngu wona amu ka Bhiblia i Mfumo wa Txizimu. Jehovha a na thumisa Mfumo wonewo ti to e txitxa mafu me va Paradhise. Se njitxani Mfumo wa Txizimu? Hi ti zivisa kutxani ti to se wa fuma? Ngu tihi ati Mfumo wonewo se wu nga ti maha? Ni ku nji txani atxi wu no txi maha ka mbimo ayi yi tako? Mana xamulo ya siwotiso siya ka gondo yiya ni ka tigondo timbidi ati ti londiselako.

      1. Nji txani Mfumo wa Txizimu? I mani Mkoma wa Mfumo wonewo?

      Mfumo wa Txizimu mbukoma awu wu nga simekwa nzumani ngu Jehovha. Mkoma wa kona i Jesu Kristu. Ene a na fuma a di nzumani. (Matewu 4:17; Johani 18:36) Bhiblia yi womba ti to Jesu “a na fuma yotshe mbimo.” (Luka 1:32, 33) Kota Mkoma wa Mfumo wa Txizimu Jesu a na fuma vathu votshe hamafuni.

      2. Mba mani ava va no fuma kumweko ni Jesu?

      Jesu kha na mba fuma a di ekha. “Vathu va totshe tihunzu, totshe tidimi, otshe matiko ni yotshe mifumo . . . va na fuma hamafuni” kumweko ni Jesu. (Mtuletelo 5:9, 10) Mbangahi ava va no fuma kumweko ni Kristu? Kukhukhela mbimo yi Jesu a nga ti hamafuni, vathu vo tala va vite Makristu. Ina eto ti lava kuwomba ti to otshe Makristu ma na fuma kumweko ni Kristu? Ahim-him. I 144.000 wa vathu dwe ava va no tsula nzumani ve ya fuma kumweko ni Jesu. (Lera Mtuletelo 14:1-4.) Kambe otshe Makristu aya mamwani ma na hanya hamafuni me fumwa ngu Mfumo wa Txizimu.—Masalmo 37:29.

      3. Ngu kutxani Mfumo wa Txizimu i di wa wunene kupinda yotshe mifumo ya vathu?

      Hambiku mifumo ya vathu yi zamako kumaha tatinene, kha yi si koti nguko kha yi na mtamo wo maha toneto. Ka hoka mbimo yo yi txitxwa, kufuma yimwani ayi mbimo yimwani yi si laviko kumaha tatinene ka vathu. Kambe Jesu Mkoma wa Mfumo wa Txizimu, kha na mbi thuka e vhaletwa. Txizimu txi na veka “mfumo wu wu no mbi dhuka wu khundumuswa.” (Dhaniyeli 2:44) Jesu a na fuma hamafuni kotshe, kha na mbi va ni txisawu-sawu ni ku ene a na fuma votshe ngu nzila yo fana. Jesu a ni lirando, wunene ni ku a lulamile. Se ene a na gondisa vathu ku ve hanyisana ngu nzila yoneyo ya lirando, wunene ni kululama.—Lera Isaya 11:9.

      ENGETELA WUZIVI WAKO

      Wona to ngu kutxani Mfumo wa Txizimu i di wa wunene kupinda mifumo ya vathu.

      Jesu Kristu a txi fuma ha mafuni a di ka txikhalo txakwe txa wukoma nzumani. Vafumi kulowe va di khalahatshile ngu madhawani. Kuphatima aku ku emelako txikhalo txa Jehovha ku di ngu msana.

      4. Mfumo wa Txizimu wu na fuma mafu otshe

      Mtamo awu Jesu a ku nawo wo fuma, mbwa hombe ngutu kupinda mifumo ayi yi nga khala kuvaho. Lera Matewu 28:18, mi gwita mi bhula ngu txiwotiso txiya:

      • Ngu kuhi kuhambana ka mtamo awu Jesu a ku nawo ni mtamo wa mifumo ya vathu?

      Mifumo ya vathu ya txitxa-txitxa vafumi ni ku mkoma mmwani ni mmwani a fuma ka ditiko do kari. Se kuwombwa txani ngu Mfumo wa Txizimu? Lera Dhaniyeli 7:14, mi gwita mi bhula ngu siwotiso siya:

      • Ngu kutxani i di ta lisima kuziva ti to Mfumo wa Txizimu kha wu na mbi “dhuka wu khundumuswa”?

      • Ngu kutxani i di ta tinene kuziva ti to Mfumo wa Txizimu wu na fuma mafu otshe?

      5. Mifumo ya vathu ti lava yi txitxwa

      Ngu kutxani Mfumo wa Txizimu wu txi lava kutxitxa mifumo ya vathu? Xalela VHIDHIYO, mi gwita mi bhula ngu txiwotiso atxi txi londiselako.

      VHIDHIYO: Nji txani Mfumo wa Txizimu?—Txienge (1:41)

      • Ngu sihi sikarato asi si tiswako ngu mifumo ya vathu?

      Lera Ekleziyaste 8:9, mi gwita mi bhula ngu siwotiso siya:

      • U pimisa to ta laveka ku Mfumo wa Txizimu wu txitxa mifumo ya vathu? Ngu kutxani?

      6. Mfumo wa Txizimu wu ni vafumi ava va hi pfisisako

      Aku Mkoma wathu Jesu a nga hanya hamafuni, ene wa “hi pfela wusiwana ka sionho.” (Vahebheru 4:15) I singa eto dwe, 144.000 wa vavamna ni vavasikati vo thembeka ava va no fuma nayo, va sawutwe ngu Jehovha ka “totshe tihunzu, totshe tidimi, otshe matiko ni yotshe mifumo.”—Mtuletelo 5:9.

      • U tipfisa kutxani ngu kuziva to Jesu ni va a no ya fuma navo va si pfisisa sikarato sathu? Ngu kutxani?

      Vavamna ni vavasikati ava i ku vasawuleki va timbimo ni midhawuko yo hambanelana.

      Jehovha a sawula vavamna ni vavasikati va midhawuko yotshe ti to ve ya fuma ni Jesu

      7. Milayo ya Mfumo wa Txizimu nja lisima ngutu kupinda milayo ya mfumo wa vathu

      Mifumo ya vathu yi maha milayo ayi yi vhunako vathu ni ku va vhikela. Mfumo wa Txizimu ni wona wu ni milayo. Lera 1 Vakorinto 6:9-11, mi gwita mi bhula ngu siwotiso siya:

      • U alakanya ti to mafu yawa ma ndi na zumbisa kutxani i di ku vathu votshe va txo engisa milayo ya Txizimu?a

      • U pimisa ti to Jehovha a ni fanelo yo lava ti to vathu ve engisa milayo ya mfumo wakwe? Ngu kutxani?

      • Nji txani txi kombisako ti to vathu ava va si engisiko milayo yoneyo ti nga maha ve txitxa?—Wona vhersikulo 11.

      Diphoyisa di txi emisa mmovha ti to wu si pindi. Vathu va titanga to hambana va txi tshawunyeta txitarato.

      Mifumo ya vathu yi maha milayo ayi yi vhunako vathu ni ku va vhikela. Mfumo wa Txizimu ni wona wu ni milayo ayi ti lavako yi londetwa

      NGAKO VAMWANI VA TXI WOTISA VA TXI: “Nji txani Mfumo wa Txizimu?”

      • U nga xamulisa kutxani?

      ATI HI NGA TI WONA

      Mfumo wa Txizimu mbukoma awu ngu ditshuri wu kuho nzumani awu wu no fuma mafu otshe.

      Ngu tihi ti u nga ti gonda

      • Mba mani ava va no fuma ka Mfumo wa Txizimu?

      • Ngu kutxani Mfumo wa Txizimu i di wa wunene kupinda mifumo ya vathu?

      • Ngu tihi ati Jehovha a ti emelako ka va va no lumba Mfumo wakwe?

      U nga maha tiya:

      XOTA TIMWANI

      Wona ati Jesu a nga ti gondisa mayelano ni to Mfumo wa Txizimu wu maneka hani.

      “Ina Mfumo wa Txizimu njilo txo kari atxi txi ku mndani ka mbilu ya m’thu?” (Msungo mhaka wu ku ka site)

      Ngu kutxani Tifakazi ta Jehovha ti txi sawula kuthembeka ka Mfumo wa Txizimu kupinda kuthembeka ka mfumo wa vathu?

      Vathu ava va nga tiningetela ka Mfumo wa Txizimu (1:43)

      Gonda ngu va 144.000 va nga sawulwa ngu Jehovha ti to ve ya fuma ni Jesu

      “Mbamani ava va noya nzumani?” (Msungo mhaka wu ku ka site)

      Nji txani txi nga kholwisa wamsikati awu a nga ti jele ti to ova Txizimu dwe txi nga tisako wululami hamafuni?

      “Kulavetela ditiko adi di ku ni wululami” (Khenjemuka! wa Novembro wa 2011)

      a Yimwani ya milayo ya kona hi na ta yi wona ka Txienge 3.

  • Mfumo wa Txizimu se wa fuma
    Hanya wutomi wo tsakisa kala kupinduka!—Kursu ya Bhiblia
    • Gondo 32. Jesu Kristu kota Mkoma wa nzumani a di ni ndonga ya wukoma a txi fuma hamafuni.

      GONDO 32

      Mfumo wa Txizimu se wa fuma!

      Mfumo wa Txizimu wu khatile kufuma nzumani ngu 1914. Ayawa ma vite makhato a masiku a magwito a kufuma ka vathu. Hi tizivisa kutxani toneto? Xolisisa wuprofeti wa Bhiblia ni ti ti mahekako nyamsi kupata ni ti vathu va hanyisako tona kukhukhela ngu 1914.

      1. Ngu tihi ati Bhiblia yi nga ti profeta?

      Dibhuku da Dhaniyeli di wombile ti to Mfumo wa Txizimu wu ndi na khata kufuma magwito ka mkama awu wu dhanwako “mtxhanu wa timbimo ni timbidi.” (Dhaniyeli 4:16, 17) Ku di pindile malembe o tala Jesu a womba-wombile ngu mbimo yoneyo a txi khene i “mbimo ya vamatiko” ni ku a gondisile valondeteli vakwe ti to mbimo yoneyo yi si se guma. (Luka 21:24) Ngu ha hi no tiwona ngu kona mtxhanu wa timbimo ni timbidi ti gumile ngu 1914.

      2. Ngu tihi ti mahekako kukhukhela 1914 ni ku ngu ahi mahanyelo a vathu?

      Vagondiswa va Jesu va m’wotisile ti to txi ndi nava txihi “txikombiso txa kuta kwako ni txa kuguma ka ditiko.” (Matewu 24:3) Se xamulo ya kona, Jesu a to va gela timhaka to tala ati ti ndi no maheka mbimo yi a ndi no khata kufuma nzumani kota Mkoma wa Mfumo wa Txizimu. Timwani ta tona ti pata tiyimbi, tinzala ni kuzinginikela ka mafu. (Lera Matewu 24:7.) Bhiblia yi tshumela yi womba to ati vathu va ndi no hanyisa tona “ka masiku a kugwitisa” ti ndi na maha wutomi wu “karata.” (2 Timoti 3:1-5) Totshe tiya, ti khatile kuwoneka ngutu kukhukhela ngu 1914.

      3. Ngu kutxani mafu ma txiya me biha ngutu kukhukhela mbimo yi Mfumo wa Txizimu wu nga khata kufuma?

      Neti Jesu a nga khata kufuma kota Mkoma wa Mfumo wa Txizimu a to lwa ni Sathani ni madhimoni akwe ani nzumani. Kambe Sathani a xutwe. Bhiblia yi womba to “a vinzilwe hamafuni, ene ni tingelozi takwe.” (Mtuletelo 12:9, 10, 12) Sathani a henyile ngutu nguko wa tiziva ti to ku si nga kale a na loviswa. Ngu toneto a mahako e dyiseta hamafuni. Se kha ti xamalisi aku mafu ma yako me biha ngutu! Hambi keto Mfumo wa Txizimu wu na heta sotshe sikarato.

      ENGETELA WUZIVI WAKO

      Wona to hi tizivisa kutxani ti to Mfumo wa Txizimu wu khatile kufuma ngu 1914 ni ku eto ti hi kuzeta ku hi maha txani?

      4. Wuprofeti wa Bhiblia wu kombisa ti to Mfumo wa Txizimu wu khatile kufuma ngu 1914

      Xalela VHIDHIYO.

      VHIDHIYO: Mfumo wa Txizimu wu khatile kufuma ngu 1914 (5:02)

      Txizimu txi mahile ti to Mkoma Nebhukodhonosori wa Bhabhilona e lora ngu ti ti ndi no maheka. Mloro wonewo ni txhamuselo ayi Dhaniyeli a nga yi womba si tiveka ha kubasani ti to wu tsimbitisana ni mfumo wa Nebhukodhonosori kumweko ni Mfumo wa Txizimu.—Lera Dhaniyeli 4:17.a

      Lera Dhaniyeli 4:20-26, mi gwita mi thumisa dikwadro adi di londiselako ti to mi xamula siwotiso siya:

      • (A) Nji txani atxi Nebhukodhonosori a nga txi wona ka mloro wakwe? —Wona vhersikulo 20 ni 21.

      • (B) Ku ndi na humelela txani ngu mndonga?—Wona vhersikulo 23.

      • (C) Ku ndi na maheka txani magwito ka “mtxhanu wa timbimo ni timbidi”? —Wona vhersikulo 26.

      Mloro wa ndonga wu tsimbitisanisa kutxani ni Mfumo wa Txizimu?

      WUPROFETI (Dhaniyeli 4:20-36)

      Wukoma

      (A) Mndonga wa hombe

      Mndonga wa hombe.

      Kukavanyetwa ka wukoma

      (B) “Gangani mndonga,” mi wu leka “kala kupinda mtxhanu wa timbimo ni timbidi”

      Txitsha txa mndonga txi di sungilwe ngu txhini.

      Wukoma wu tshumela wu fuma

      (C) “Mfumo wako wu na tshumelela kwako”

      Mndonga wa hombe.

      Kuhetiseka ko khata ka wuprofeti wuwa . . .

      • (D) Mndonga wu emela mani? —Wona vhersikulo 22.

      • (E) Nji txani txi nga maha to e ema kufuma? —Lera Dhaniyeli 4:29-33.

      • (F) Kumahekile txani ngu Nebhukodhonosori mbimo yi ku nga guma “mtxhanu wa timbimo ni timbidi”? —Lera Dhaniyeli 4:34-36.

      KUHETISEKA KO KHATA

      Wukoma

      D) Nebhukodhonosori, Mkoma wa Bhabhilona

      Mkoma Nebhukodhonosori a di emile a txi ti guleta.

      Kukavanyetwa ka wukoma

      E) Msana ka 606 A.E.C., Nebhukodhonosori a to xanga se a si si koti kufuma kala ku pinda 7 wa malembe

      Nebhukodhonosori a txi hanya txitingani a txidya mwasi kufana ni txihari.

      Wukoma wu tshumela wu fuma

      F) Nebhukodhonosori a wiyete mapimo se e khateta kufuma

      Mkoma Nebhukodhonosori a txi wona nzumani e guleta mawoko.

      Kuhetiseka ka wumbidi ka wuprofeti . . .

      • (G) Mndonga wu emela mani? —Lera 1 Makronika 29:23.

      • (H) Nji txani txi nga maheka ti to ve ema kufuma? Hi tizivisa kutxani ti to va ti ngadi emile kufuma mbimo yi Jesu a nga ta hamafuni? —Lera Luka 21:24.

      • (I) Mfumo wu wusetilwe mbimo muni? A hayi?

      KUHETISEKA KA WUMBIDI

      Wukoma

      G) Vakoma va Vaisrayeli ava va nga txi emela Wukoma wa Txizimu

      Vakoma va Vaisrayeli va nga khalahatsha ha situluni ka wukoma ngu kulondetelana ka vona. Liwoningo li txi txhika txitimwi kwawe.

      Kukavanyetwa ka wukoma

      H) Kuloviswa ka Jerusalema kukavanyeta mxaxamelo wa vakoma va Israyeli kudingana 2.520 wa malembe

      Mndilo wu txi lovisa didhoropa da Jerusalema ngu 607 A.E.C. Kugwita kupinda 2.520 wa malembe i di marumbi.

      Wukoma wu tshumela wu fuma

      I) Jesu a khatile kufuma nzumani kota Mkoma wa Mfumo wa Txizimu

      Jesu a txi fuma ha mafuni a di nzumani kukhukhela ngu 1914 E.C. Liwoningo li nga mu ranganyeta.

      Mtxhanu wa timbimo ni timbidi ti emela malembe mangahi?

      Mibhalo yimwani ya Bhiblia yi hi vhuna ku hi pfisisa yimwani mibhalo. Ngu txikombiso, dibhuku da Mtuletelo di womba to timbimo tiraru ni hafu ti dingana 1.260 wa masiku. (Mtuletelo 12:6, 14) Se mtxhanu wa timbimo ni timbidi ngu wiyeleta kumbidi mtengo wa 1.260, se wu maha 2.520 wa masiku. Mbimo yimwani Bhiblia yi thumisa ditshiku dimwedo kuemela dilembe dimwedo. (Ezekhiyele 4:6) Atiya ngu ti ti mahako ti to mtxhanu wa timbimo ni timbidi ati ti wombwako ka dibhuku da Dhaniyeli ti emela 2.520 wa malembe.

      5. Mafu ma txitxile kukhukhela 1914

      Xalela VHIDHIYO.

      VHIDHIYO: Mafu ma txitxile kukhukhela 1914 (1:10)

      Jesu a profetile ati mafu ma ndi no zumbisa tona mbimo yi a ndi no khata kufuma. Lera Luka 21:9-11, mi gwita mi bhula ngu txiwotiso txiya:

      • Ka ti Bhiblia yi nga ti womba, ngu tihi a ti u khalako kutipfa mwendo ku tiwona ti txi maheka?

      Mpostoli Paulo a txhamusete ati vathu va ndi no hanyisa tona ka masiku a magwito a kufuma ka vathu. Lera 2 Timoti 3:1-5, mi gwita mi bhula ngu txiwotiso txiya:

      • Ka ti hi nga ti lera hawa ngu yahi mahanyelo a vathu aya u ma wonako nyamsi?

      Mifota: Mifota ayi yi kombisako ati mafu ma ku ngu tona ka masiku a magwito. 1. Komandante wa masotxhwa a txi kwangula a di guletile mawoko. 2. Mapredhu ma nga gindimuka ngu kuzinginikela ka mafu. 3. Maganoni a masotxhwa. 4. Txitshungu txi txi tsimbila-tsimbila ni mamaskara. 5. Mapredhu a Nova York ma txi tura msana ko dhumelwa ngu sigevenga. 6. Wamwamna a txi thumisa timbangi. 7. Wamwana a txi fumbela sibakela msikati wakwe. 8. Timbangi wusuke ni simwani so juja mapimo. 9. Mahorana mambidi ma nga ambala siambalo so mbi xonipheka ma txi ti thavisa mfota. 10. DJ a txi sinyisa vathu. 11. Dijaha di txi vinza mndilo.

      6. Kombisa ti to wa kholwa to Mfumo wa Txizimu se wa fuma

      Lera Matewu 24:3, 14, mi gwita mi bhula ngu siwotiso siya:

      • Ngu wuhi mthumo wa lisima awu wu kombisako ti to Mfumo wa Txizimu se wu khatile kufuma?

      • Awe u nga vhuneta ngu nzila yihi?

      Mfumo wa Txizimu se wa fuma. Ditshiku do wu fuma mafu otshe di hafuhi. Lera Vahebheru 10:24, 25, mi gwita mi bhula ngu txiwotiso txiya:

      • Ngu txihi atxi mmwani ni mmwani wathu a fanelako ku txi maha aku hi “wonako ditshiku da Mkoma di txi tshuketela”?

      Mifota: 1. M’thu awu a gondako Bhiblia a di mitshanganoni. 2. M’thu ene wu wammweyo a txi txhumayela dixaka dakwe.

      U nga maha txani ngako u txo gonda tomaha ati u zivako to ti nga vhuna vamwani ni kuhulukisa wutomi wawe?

      NGAKO VAMWANI VA TXI WOTISA VA TXI: “Ngu kutxani Tifakazi ta Jehovha ti txi womba-womba ngutu ngu dilembe da 1914?”

      • U nga xamulisa kutxani?

      ATI HI NGA TI WONA

      Wuprofeti wa Bhiblia ni ti ti mahekako nyamsi ti kombisa ti to Mfumo wa Txizimu se wa fuma. Mbimo yi hi txhumayelako ni kuya mitshanganoni hi kombisa ti to ha ti kholwa toneto.

      Ngu tihi ti u nga ti gonda

      • Nji txani txi nga maheka mbimo yi ku nga guma mtxhanu wa timbimo ni timbidi ati ti nga wombwa ka dibhuku da Dhaniyeli?

      • Nji txani txi hi kholwisako ti to Mfumo wa Txizimu wu khatile kufuma ngu 1914?

      • U nga ti kombisisa kutxani ti to wa kholwa to Mfumo wa Txizimu se wu khatile kufuma?

      U nga maha tiya:

      XOTA TIMWANI

      Wona ati vazivi va ta matimu ni vamwani va ti wombako ngu kutxitxa ka mafu aku ku nga vaho kukhukhela 1914.

      “Mbimo yi mahanyelo a vathu ma nga khata kubiha ngutu” (Khenjemuka! wa Abril wa 2007)

      Wona nzila yi wuprofeti awu wu ku ka Matewu 24:14 wu nga txitxa ngu yona wutomi wa dijaha dimwani.

      “Ni txi dhunda beisebol kupinda sotshe!” (Muwoneleli No. 3 2017)

      Hi tizivisa kutxani ti to wuprofeti awu wu ku ka dibhuku da Dhaniyeli ndima 4 wu womba-womba ngu Mfumo wa Txizimu?

      “Mfumo wa Txizimu wu khatile ditshiku kufuma? (Parte 1)” (Muwoneleli wa 1 ka Outubro wa 2014)

      Nji txani txi kombisako ti to “mtxhanu wa timbimo ni timbidi” ati ti nga wombwa ka Dhaniyeli ndima 4 ti gumile ngu 1914?

      “Mfumo wa Txizimu wu khatile ditshiku kufuma? (Parte 2)” (Muwoneleli wa 1 ka Novembro wa 2014)

      a Wona misungo yimbidi ya timhaka ka txienge atxi txi ku: Xota timwani, txa gondo yiya.

  • Ngu tihi ati Mfumo wa Txizimu wu no timaha
    Hanya wutomi wo tsakisa kala kupinduka!—Kursu ya Bhiblia
    • Gondo 33. Vathu va di Paradhise.

      GONDO 33

      Ngu tihi ati Mfumo wa Txizimu wu no timaha?

      Mfumo wa Txizimu se wa fuma nzumani. I singa kale wu na ta maha kutxitxa ka hombe hamafuni. Wona timhaka timwani tatinene ati Mfumo wa Txizimu wu no ta timaha.

      1. Mfumo wa Txizimu wu na tisa kudikha ni wululami hamafuni ngu nzila yihi?

      Jesu Mkoma wa Mfumo wa Txizimu. Ene a na lovisa vathu vo biha kumweko ni mifumo ya vathu ka yimbi ya Armagedhoni. (Mtuletelo 16:14, 16) Mbimo yi ti no maheka toneto, ku na hetiseka txithembiso atxi txi ku mu ka Bhiblia atxi txi ku: “Ngu mbimoanyana ya yidotho, khu na mbi va wona kambe vabihi.” (Masalmo 37:10) Ngu kuthumisa Mfumo wa Txizimu Jesu a na tisa kudikha ni kululama hamafuni kotshe.—Lera Isaya 11:4.

      2. Wu nava njani wutomi mbimo yi kudhunda ka Jehovha ku no maheka hamafuni?

      Mbimo yi Mfumo wa Txizimu wu no khata kufuma hamafuni “vathu vo lulama va na dya thomba ya mafu, va na xayiseka ka ona yotshe mbimo.” (Masalmo 37:29) Hi nga alakanya u txi zumba ka ditiko adi vathu va kona votshe i ku vo lulama, va txi dhunda Jehovha ni kudhundana! Kha ngaho ni wammweyo a no lwala, ni ku votshe va na hanya kala kupinduka.

      3. Ngu tihi ati Mfumo wa Txizimu wu no timaha msana kova wu di lovisile votshe vabihi?

      Msana kova ku di fuvisilwe votshe vabihi, Jesu a na fuma kudingana 1.000 wa malembe. Ngu mbimo yoneyo, ava va 144.000 a no fuma navo va na vhuna vathu votshe ve va vo hetiseka. Msana ka 1.000 wa malembe, mafu ma nava i di paradhise yo tshura, ayi yi nga tala ngu vathu ava va nga tsaka nguku va engisako milayo ya Jehovha. Ngu magwito Jesu a na tshumetela wukoma ka Tate wakwe Jehovha. Ditina da Jehovha ‘di na sawulekiswa’ ngu nzila yo xamatisa ngutu. (Matewu 6:9, 10) Eto ti na kombisa ti to Jehovha Mfumi wa mnene awu a khatalako ngu vathu vakwe. Jehovha a na ta lovisa Sathani, madhimoni ni votshe ava va no wukela wukoma wakwe. (Mtuletelo 20:7-10) Ngu kuthumisa Mfumo wa Txizimu, wutomi wathu wu nava wo hetiseka ngu totshe tinzila ni ku hi na hanya kala kupinduka.

      ENGETELA WUZIVI WAKO

      Wona ti to ngu kutxani hi nga thembako ti to Txizimu txi na thumisa Mfumo wa txona kasi kuhetisisa sotshe sithembiso sa mbimo ayi yi tako asi si ku mu ka Bhiblia.

      4. Mfumo wa Txizimu wu na gumisa yotshe mifumo ya vathu

      Bhiblia yi womba ti to “m’thu a fuma txitimwi ka mmwani m’thu, kasi ku mxanisa.” (Ekleziyaste 8:9) Jehovha a na thumisa Mfumo wakwe ti to e lovisa wotshe wubihi.

      Lera Dhaniyeli 2:44 ni 2 Vatesalonika 1:6-8, mi gwita mi bhula ngu siwotiso siya:

      • Jehovha ni Jesu va na maha txani ngu mifumo ya vathu ni va va yi seketelako?

      • U txi pimisa ngu totshe ati u nga ti gonda ngu Jehovha ni Jesu ngu kutxani u txi themba ti to vona va na lamula ngu nzila yo lulama?

      Jesu a txi fuma mafu a di nzumani.

      5. Jesu Mkoma wo hetiseka

      Kota Mkoma wa Mfumo wa Txizimu, Jesu a na maha totshe ta tinene kasi kuvhuna vathu hamafuni. Xalela VHIDHIYO kasi ku u wona to Jesu a ti kombisile kutxani ti to a na sikota kuvhuna vathu ni ti to ene wa tilava ngutu ni ku Jehovha a mningile mtamo wo maha toneto.

      VHIDHIYO: Jesu a kombisile ati a no timaha (1:13)

      Totshe ati Jesu a nga timaha mbimo yi a nga ti hamafuni, njikombiso txa ti a no ta timaha mbimo kota Mkoma wa Mfumo wa Txizimu. Ka makatekwa aya ma nga xaxametelwa hahatshi hawa ngu yahi aya u tsakelako ku ma wona ngu txikuluveta? Lerani tindimana ta Bhiblia ati ti womba-wombako ngu makatekwa oneyo.

      MBIMO YI JESU A NGA TI HAMAFUNI . . . 

      A TXI NA FUMA MAFU A DI NZUMANI JESU A NA . . .

      • lulamisa sikarato sa mtumbuluko.—Isaya 35:1, 2.

      • fuvisa tinzala hamafuni kotshe.—Masalmo 72:16.

      • maha to vathu votshe ve va ni dihanyo da dinene.—Isaya 33:24.

      • wusa vafi e fuvisa lifo.—Mtuletelo 21:3, 4.

      6. Mfumo wa Txizimu wu na tisa wumangwana wo tsakisa

      Mfumo wa Txizimu wu na tisela vathu wutomi wo tsakisa i ku wu Jehovha a nga ti lavile ku hi ninga kukhukhela makhatoni. Vathu va na ta hanya ngu ha ku si gumiko ka mafu a paradhise. Xalela VHIDHIYO kasi kuwona ti to Jehovha a na ku hetisisa ngu nzila yihi kunavela kwakwe ahawa hamafuni ngu kuthumisa Jesu.

      VHIDHIYO: Txibaka txa ti Paradhise yi no ta zumbisa tona (4:38)

      Lera Masalmo 145:16, mi gwita mi bhula ngu txiwotiso txiya:

      • U tipfisa kutxani ngu kuziva to Jehovha a na ta enelisa kunavela ka sotshe si si hanyako?

      NGAKO VATHU VA TXI KHONA: “Ngako mmwani ni mmwani a txi maha txienge txakwe hi nga xula sikarato sa ditiko.”

      • Ngu sihi sikarato asi si no lulamiswa ngu Mfumo wa Txizimu asi si tandwako ngu mifumo ya vathu?

      ATI HI NGA TI WONA

      Mfumo wa Txizimu wu na ta maha totshe ati Txizimu txi ti lavako. Wu na ta maha mafu otshe me va paradhise, vathu votshe va na ta khozela Jehovha ngu ha ku si gumiko.

      Ngu tihi ti u nga ti gonda

      • Mfumo wa Txizimu wu na ta basisa ditina da Jehovha ngu nzila yihi?

      • Nji txani txi hi kholwisako ti to Mfumo wa Txizimu wu na hetisisa totshe ati Bhiblia yi ti thembisako?

      • Ka totshe ati Mfumo wa Txizimu wu no ti maha, ngu tihi ati u ti lavako ngutu ku ti maheka?

      U nga maha tiya:

      XOTA TIMWANI

      Ziva to njitxani Armagedhoni.

      “Nji txani yimbi ya Armagedhoni?” (Msungo mhaka wu ku ka site)

      Wona ati ti no maheka ngu mbimo ya “xanisa ya hombe” ayi yi nga wombwa ngu Jesu.—Matewu 24:21.

      “Njitxani Xanisa ya Hombe?” (Msungo mhaka wu ku ka site)

      Wona nzila yi timwaya ti nga alakanyisisako ngu yona ngu Paradhise.

      Tiwone u di Paradhise (1:50)

      Wona nzila yi wamwamna wo kari awu a nga ti wukela wukoma a nga mana ngu yona tixamulo ta siwotiso sakwe ka msungo mhaka awu wu ku: “Ni ti ni siwotiso so tala asi si nga ti ni karata.”

      “Bhiblia ya txitxa wutomi wa vathu” (Muwoneleli wa 1 ka Janeiro wa 2012)