GONDO 41
Bhiblia yi womba txani ngu timhaka ta mataho?
Vathu vavangi kha va ti dhundi kuwomba-womba ngu timhaka ta mataho. Hambiketo Bhiblia ya womba-womba ngu mhaka yiya ni ku yona yi womba-womba ngu nzila ya txixonipho. Ati yi ti wombako ta hi wuyelisa. Eto ta pfisiseka nguko aku Jehovha i ku M’vangi wathu wa ti ziva ati i ku tatinene kwathu. Ene wa hi gela ati hi fanelako kumaha ti to hi m’tsakisa ni ti ti no hi vhuna ku hi zumba hi di tsakile mbimo yotshe.
1. Ngu yahi mawonelo a Jehovha ngu timhaka ta mataho?
Timhaka ta mataho i ningo ayi yi tako ngu ka Jehovha. Jehovha a lava ti to timhaka ta mataho ti mahwa ngu wamsikati ni wamwamna ava va nga txhadha kumweko dwe. Ningo yiya kha ya mahelwa ti to ava va nga txhadha ve va ni vanana dwe, kambe yi maha ni ti to ava va nga txhadha ve kombisana lirando ali mmwani ni mmwani a ku nalo ngu mkwawe ngu nzila ya mtumbuluko ni yo tsakisa. Ngu toneto Dipswi da Txizimu di wombako tiya: “Tsakiswa ngu msikati wa wuphya wako.” (Mavingu 5:18, 19) Jehovha a lava ti to wamwamna ni wamsikati ve thembana, ngu toneto Mkristu kha fanela kumaha wugango.—Lera Vahebheru 13:4.
2. Ti womba txani kutiñola ngu nzila yo biha ngu ta mataho?
Bhiblia yi womba ti to ‘vagelezi . . . kha va na ku si kota kudya thomba ya mfumo wa Txizimu.’ (1 Vakorinto 6:9, 10) Bhiblia yi thumisa dipswi da Txigriki adi di ku por·neiʹa yi txi womba kutiñola ko biha ngu ta mataho. Dipswi diya di pata 1) ku vathu ava va nga mbi txhadha va txi maha ta matahoa, 2) kumaha ta mataho ni mwamna kuloni mwendo ni msikati kuloni ni 3) kuotela ni sihari. Ngako hi “txi tshuralela txionho txa wugango,” hi na wuyelwa ni ku hi na tsakisa Jehovha.—1 Vatesalonika 4:3.
ENGETELA WUZIVI WAKO
Wona nzila yi u nga vayilelako ngu yona kutiñola ko biha ngu ta mataho. Tshumela u wona nzila yi kuva ni mahanyelo a manene ti nga ku wuyelisako ngu yona.
3. Vayilela kutiñola ko biha ngu ta mataho
Josefa i nga ti wamwamna wo thembeka a lwite ti to eva ni mahanyelo a manene. Lera Genesisi 39:1-12, mi gwita mi bhula ngu siwotiso siya:
Ngu kutxani Josefa a di tutumile? —Wona vhersikulo 9.
U pimisa ti to Josefa a mahile txisungo txa txinene? Ngu kutxani?
Vaphya va nga txi etetelisa kutxani txikombiso txa txinene txa Josefa txo thava wugango? Xalela VHIDHIYO.
Jehovha a lava ti to hi vayilela wugango. Lera 1 Vakorinto 6:18, mi gwita mi bhula ngu siwotiso siya:
Ngu sihi siemo asi si nga mahako m’thu e wela ka txionho txa wugango?
U nga wu vayilelisa kutxani wugango?
4. Awe u nga si xula siduko
Nji txani txi nga mahako ti karata kulwa ni siduko ti to hi zumba hi di ni mahanyelo a manene? Xalela VHIDHIYO, mi gwita mi bhula ngu txiwotiso atxi txi londiselako.
Ngu tihi ati mwanathu awu hi nga m’wona ka vhidhiyo a nga ti maha mbimo yi a nga wona to simaho sakwe ni mipimiso yakwe si nga mmaha a si thembeki ka msikati wakwe?
Mbimo yimwani hambi Makristu aya ma nga thembeka ti nga lava me lwa ni mipimiso yo biha. Nji txani txi no kuvhuna ku u si zumbeli kupimisa ngu timhaka ta mataho? Lera Vafilipiya 4:8, mi gwita mi bhula ngu siwotiso siya:
Ngu tihi ati hi fanelako kuzumba hi txi ti pimisa?
Kugonda Bhiblia ni kuzumba hi di ñolekile ka mthumo wa Jehovha, ti nga hi vhunisa kutxani ku hi xula siduko?
5. Milayo ya Jehovha ya hi wuyelisa
Jehovha wa tiziva ati i ku tatinene kwathu. Ene wa hi gondisa nzila yo va ni mahanyelo a manene ni nzila ayi hi nga wuyelwako ngu yona. Lera Mavingu 7:7-27 mwendo kuxalela VHIDHIYO, mi gwita mi bhula ngu siwotiso asi si londiselako.
I ngu nzila yihi dijaha diya di nga ti beta ka txiduko?—Wowa Mavingu 7:8, 9.
Ngu kuya ngu Mavingu 7:23, 26, kutiñola ko biha ngu ta mataho ti nga hi tisela wuyelo yo panda. Se ngako hi txi tiñola ngu nzila ya yinene, hi si mahi wugango, ngu sihi sikarato asi hi nga si vayilelako?
Kuva ni mahanyelo a manene ti nga hi vhunisa kutxani ti to hi tidila ngu wutomi ngu ha ku si gumiko?
Vamwani va pimisa to ati Bhiblia yi ti wombako ngu kutekana ka wamwamna ni wamwamna kulowe, wamsikati ni wamsikati kulowe hi nga tatinene. Kambe Jehovha Txizimu txa lirando ene a lava ti to hi zumba hi di tsakile mbimo yotshe. Ti to toneto ti koteka ti lava hi hanya ngu kuya ngu ti a hi gondisako. Lera 1 Vakorinto 6:9-11, mi gwita mi bhula ngu txiwotiso txiya:
Ina kumaha ta mataho wamwamna ni wamwamna kulowe, wamsikati ni wamsikati kulowe ngu toneto dwe Jehovha a ti nyenyako?
Ti to hi tsakisa Txizimu, hotshethu ti lava hi maha kutxitxa ko kari ka wutomi. Ina mizamo yoneyo ya vhuna? Lera Masalmo 19:8, 11, mi gwita mi bhula ngu siwotiso siya:
U pimisa to milayo ya Jehovha ya mahanyelo ya vhuna? Ngu kutxani?
Jehovha a vhuni vathu vakwe ve engisa milayo yakwe ya mahanyelo, ene a nga kuvhuna nawe
NGAKO VATHU VA TXI KHONA: “Kumaha timhaka ta mataho ka vathu vambidi ava va randanako ngu tona to tsakisa ngutu ka totshe.”
U nga khawe txani?
ATI HI NGA TI WONA
Kumaha ta mataho ka mwamna ni msikati ava va nga txhadha i ningo ayi yi tako ngu ka Jehovha ayi yi va tiselako litsako.
Ngu tihi ti u nga ti gonda
Ti pata txani kutiñola ko biha ngu timhaka ta mataho?
Nji txani txi nga hi vhunako ku hi vayilela kumaha wugango?
Ngu yihi wuyelo yo engisa milayo ya Jehovha ya mahanyelo?
XOTA TIMWANI
Wona to ngu kutxani i di ta lisima ku wamwamna ni wamsikati ve zumba kumweko va di txhadhile.
Wona to hambiku Bhiblia yi wombako to kumaha timhaka ta mataho ni m’thu wa limbewu li li fanako ti bihile, ngu kutxani eto ti si wombi kunyenya ava va mahako toneto.
“Ina ti bihile ku vathu va limbewu limwelo ve maha ta mataho?” (Msungo mhaka wu ku ka site)
Wona nzila yi milayo ya Txizimu mayelano ni ta mataho yi hi vhikelako ngu yona.
“Ina ndinene kumaha ta mataho ngu txisofu?” (Msungo mhaka wu ku ka site)
Kasi kuwona ati ti nga txitxa wutomi wa m’thu awu a nga ti maha ta mataho ni m’thu wa limbewu li li fanako, e tsakisa Txizimu, lera experiyensia atxi txi ku: “Va ni ñote ngu nzila ya yinene.”
“Bhiblia ya txitxa wutomi wa vathu” (Muwoneleli wa 1 ka Abril wa 2011)
a Dipswi adi di ku por·neiʹa di pata ku maha ta mataho ngu tinzila to hambana-hambana to fana ni kumaha ngu txisofu, kumaha ngu msana mwendo kuñola-ñola siro sa limbewu sa m’thu mmwani.