Ina ngu ditshuri Jesu a fete ani?

AMU ka Bhiblia ku ni mapswi o kombisa matipfelo a vathu “va kuxaniseka [matipfelo, NM] kufana ni nathu.” (Jak. 5:17) Ngu txikombiso, hi nga tumelelana ni mapswi a Paulo ma ku ka Varoma 7:21-24: “Mbimo yi ni lavako kumaha ta tinene, wubihi wa humelela. . . . Dikhombo dangu!” Kufana ni Paulo, ngako nathu hi txi lwisana ni kutipfa hi si nga va txilo, hi nga thaveleleka kuziva to ni vamwani vo thembeka va tipfisile toneto.

Paulo kha sisa mamwani matipfelo akwe. Ka Vagalatiya 2:20, a wombile ati a nga ti tsaniseka ngu tona to Jesu “a ti [mu] randa, a txi ti ningela ngu [ngene]” Paulo! Ina eto ni tona ti kombisa to a ti ni ‘matipfelo o fana ni athu’? Ti nga maha i si nga mbimo yotshe.

Ngako hi txi lwisana ni ku tipfa mnando ngu sionho sathu sa kale, ti nga maha hi si kholwi hambi ka lirando ni divalelo ya Jehovha, ngu toneto ti nga karata ngutu kuwona digandelo da Jesu di di ni lisima kwathu. Ina Jesu a lava hi di wonisa toneto? Ti di ngeto, hi nga vhunwa ngu txani? He woni tixamulo ta kona.

NGU YAHI MAWONELO A JESU NGU MTIRULO?

Jesu a lava hi wona digandelo dakwe kota ningo yi a ningako m’thu apune. Nji txani txi hi tsanisekisako? Wona ti ti nga bhalwa ka dibhuku da Luka 23:39-43. Dijaha do kari di di nga ti hayekilwe ha phandeni hafuhi ni Jesu, di wombile to dona di ti mahile txionho. Ti woneka nga txionho txi a nga ti mahile i ti txa hombe nguko txitsayiso txile i si nga txa walo-walo. Dijaha diya ngu kupandiseka di kombete tiya ka Jesu: “Ni alakanye mbimo yi u no wulela Mfumoni kwako.”

Jesu a xamute txani? Alakanya mbimo yi a zamako kujikisa msungo wakwe a txi pfa kupanda kasi ku e rendekela dijaha dile. Hambiku a nga txi pfa kupanda, a zamile ku mu sekela ni ku mtsanisa a txi khene: “Kha ditshuri na kugela ti to: Nyamsi, u na va kumweko ni nani paradhiseni.” Kutilava Jesu a di mu khumbutisile dwe ku khene: ‘Mwanana wa M’thu . . . a tete kuta . . . ningela wutomi wakwe, kasi kutirula vavangi.’ (Mat. 20:28) Kambe wa ti wona to Jesu a junyatisile to mtirulo i ningo yi ene a ningako m’thu apune. Ngu kuthumisa mapswi ya ma ku ‘awe’ ni “nani” a kombisile wungana ka dijaha dile. A tshumete e kombisa to dijaha dile dipune di na va ni lungelo yo hanya ka paradhise ha mafuni.

Ti ha kubasani to Jesu a ti lava to dijaha dile di wona mtirulo wakwe kota ningo yi di ko ningwa dona dipune. Aku Jesu a nga tipfa ngu nzila yiya ngu m’thu wu i nga ti txigevenga, wa ku nem kha thumela Txizimu, ene a si na kutandeka ku tipfa ngu nzila yo fana ka m’thu wu a nga bhabhatiswa, awu a thumelako Txizimu. Se nji txani txi nga hi vhunako kuwona mtirulo i di ningo yathu hipune, hambi hi txi khala kumaha sionho?

NJI TXANI TXI NGA VHUNA PAULO?

Ku va Jesu a di ningile Paulo txiavelo txo txhumayela ti mu vhuni kuwona to Jesu ngu ditshuri a mu fete. Hi ti zivisa kutxani? A txhamusete a txi khene: “Na bonga ka wule a nga ni ninga mtamo, Kristu Jesu, Mkoma wathu, a nga ni wona ni di wo thembeka, a txi ni sawula kasiku ni mthumela, ani, kale ni nga ti mruketeli ni mxanisi ni m’thu wa tshofu.” (1 Tim. 1:12-14) Txiavelo txa Paulo txi mu tsanisile to Jesu a ni wuxinji ni nene, wa mu randa ni ku mthemba. Jesu a ningile mmweyo ni mmweyo wathu txiavelo txo txhumayela. (Mat. 28:19, 20) Ina txiavelo txonetxo txi hi maha hi tipfa kufana ni Paulo?

Mwanathu mmwani a dhanwaku ku i Albert, awu a nga ti thavisilwe dibanzani kudingana 34 wa malembe a khene: “Ni zumba ni txi pimisa ngu sionho sangu. Kambe, mbimo yi ni ku kutxhumayelani, ni tipfa kufana ni Paulo, i ku ti to nani Jesu a ni ningile txiavelo txo txhumayela. Eto ta ni aka ni ku ti ni maha ni va ni mawonelo a manene ngu ngani, wutomi wangu, ni wumangwana wangu.”—Mas. 51:3.

Allan, awu i ngadi txigevenga ni kudhunda mazunga mbimo yi a nga ti si se gonda ditshuri, a khene: “Ni zumbela kualakanya ngu wubihi wu ni nga mahela vathu. Mbimo yimwani ti ni maha ni karateka ngutu. Kambe na mbonga Jehovha nguko a nga tumelela txionhi txo fana ni nani txi txhumayela mahungu a manene ka vamwani. Ni txi wona vathu va txi tsakela ditshuri, ti ni kumbutisa wunene ni lirando la Jehovha. Ni tipfa ni txi thumiswa ngu Jehovha ti to ni vhuna ava va ku ka txiemo txo fana ni txi ni nga ti ka txona.”

Mthumo wathu wo txhumayela wu hi vhuna kuveka mapimo athu ka simaho sa sinene ni ka mialakanyo ya yinene. Wu tshumela wu hi vhuna kuwona to Jesu wa hi pfela wusiwana, wa hi randa ni ku hi themba.

TXIZIMU NJA HOMBE KUPINDA TIMBILU TATHU

Na ma si se pinda mafu a Sathani, timbilu tathu ti ngadi ti txi na hi konisela ngu mhaka ya sionho sathu sa kale. Hi nga ma xulisa kutxani matipfelo onewo?

Jean awu a tipfako mnando ngu sionho si a nga maha i di fakazi a khene wa ma dhunda mapswi ya ma ku: “Txizimu nja hombe kupinda timbilu tathu.” (1 Joh. 3:19, 20) Kufana ni Jean, hi tipfa hi txi thavelelwa kuziva to Jehovha ni Jesu va pfisisa to ha maha sionho. Khumbula to va mahile malulamiselo ya mtirulo i si nga ngu mhaka ya vathu vo hetiseka, kambe ngu mhaka ya vathu va sionho ava va ti solako.—1 Tim. 1:15.

Hi nga tsaniseka to mtirulo i ningo yi yi tako kwathu hipune, ngako hi txi alakanyisisa ngu nzila yi Jesu a nga ñola ngu yona vathu vo mbi hetiseka, ni kumaha ti hi nga ti kotako ka mthumo wo txhumayela awu ene a nga hi ninga. U txi maha toneto, u na fana ni Paulo a nga khene: Jesu a ‘ni randile, a txi ti ningela ngu ngani.’