Ngu ku teka wu nyaphandule

Hi kongomisa mtamo wathu ngu wutxhari hi txi ti vekela makungo ya moya. (1 Vak 9:26) Makungo ma nga hi vhuna ku londola kwati mbimo yi yi nga sala ku si se hoka magwito ya matsimbitiselo yawa ya silo. (Vaef 5:15, 16) Ka wukhozeli wa mwaya ngu kutxani mi si ti vekeli makungo a di lembe di ditako da mthumo? U nga tshumela u vhuneka ngu mkombelo ni ku alakayisisa ngu tigondo ti manekako ka txibhukwana txathu txa mitshangano.—Jak 1:5.

Ngu txikombiso, ngako mi txi seketelana ngu mwaya wotshe ina mi nga sawula mthu mweyo kasi ku e va nyaphandule wa mbimo yotshe? Nga ku u si tsaniseki to u nga eneta mawora ya ma lavekako, u nga bhulisana ni vanyaphandule a va va ku ni siemo si si fanako ni sako. (Mav 15:22) Mwendo u nga bhula ni nyaphandule mweyo ka wukhozeli wano wa mwaya. Maha txiemiso. I di ku u ti nga va nyaphandule ka mbimo yi yi nga pinda, wonisisa to siemo si nga ku tumelela ku va nyaphandule ka mbimo a yiya.

Ina mweyo ka mwaya a nga va nyaphandule mtxima wumwewo mwendo ku pinda? Nga ku dihanyo dako di si ku tumeleli, u nga va nyaphandule wo vhuneta, u txi heta mbimo ya yidotho masiku otshe u di ka mthumo wo txhumayela. Nga ku u di ni mbimo ya yidotho hagari ka divhiki ti to u ya ku txhumayelani ngu ku u thumako mwendo u txiya txikolwani, u nga sawula mtxima wu u ku ni maferiya mwendo a wu wu ku ni mtxhanu wa mavhiki. Ka kalendariyo yako, bhala mtxima wu u lavako ku va nyaphandule u tshumela u bhala ka txiemiso txako.—Mav 21:5.

XALELA VHIDHIYO YI YI KU VANANI NI TXIBINDI . . . VANYAPHANDULE, U GWITA U XAMULA TXIWOTISO TXIYA:

• Hi gonda txani ka experiyensia txa mwanathu Julia ngu nzila yi Jehovha a khatalelako ngu yona a va va mahako mizamo ti to ve va vanyaphandule?