Tixamulo Ta Siwotiso Sa Vagondi

Mapswi ya ma ku ka dibhuku da Levhi 19:16, a ya ma ku “u nga mangalele muakelani wako, eza e mana phango” ma lava kuwomba txani ni ku hi nga gonda txani ka ona?

Jehovha a kuzetile Vaisrayeli ti to ve va vathu ava va nga sawuleka. Ti to e va vhuna ku ve ti maha toneto a va gete tiya: “U nga phaye livengo hagari ka va ka kwanu; u nga mangalele muakelani wako, eza e mana phango. Ani ngani MKOMA!”—Levhi 19:2, 16.

Dipswi di di ku “u nga mangalele muakelani wako, eza e mana phango” ngu Txihebheru di womba ti to “u nga eme u wukela mnoha wa muakelani wako.” Ti womba txani toneto? Dibhuku dimwani di xolisisako ati ti nga bhalwa ka dibhuku da Levhi di womba tiya: “Vhersikulo yiya ya karata ku yi pfisisa ngu mhaka ya kwa mbi pfisisa txhamuselo ya ti ti lawako kuwombwa ngu Txihebheru. Ngu Txihebheru ti wombako ti to, ‘u nga wukele ngu hafuhi.’” Se eto ta karata ku ti pfisisa.

Sigondi simwani si yelanisa mapswi yawa ni ndimana ya 15 ayi yi ku khene: “Mi nga hambaniseni mhaka kulamulani kwanu; u nga wone khohe ya wule i ku txisiwana, kambe u nga khatalele nyatithombe; u fanete kulamula mkwanu ngu kululama!” (Levhi 19:15) Se txirumo txi txi ku ka vhersikulo 16 txa ti to khwa fanela kuwukela muakelani wako ti womba ti to, vathu va Txizimu kha va fanela kulamula vaakelani vawe ngu wubihi ka timhaka ati ti lavako wuxuxisi, ka ta mabhindu, mwendo ka ta mwaya. Hambi kukhanda makuhu kasi kukalavela vamwani. Athu kha ha fanela kumaha toneto, ku ni timwani a ti hi nga ti pfisisako ka ndimana yiya ya 16.

Wona to makhatoni ka vhersikulo yiya Jehovha a gete vathu vakwe ti to, va sa fanela kuva vanyamanzenze. Khumbula ti to, ku va nyamanzenze, kha ti wombi kulenganyana dwe, hambiku kulenga ti nga mahako sikarato. (Mav. 10:19; Ekl. 10:12-14; 1 Tim. 5:11-15; Jak. 3:6) M’thu wu a ku ni manzenze a tolovela kuwomba timhaka ti ti bhumisako phungo vamwani. M’thu wa manzenze a nga womba makuhu kontra mmwani hambi i di to eto ta veka haphangoni wutomi wa m’thu. Khumbula ti to, manzenze ma mahile ti to vavamna vo kari ve womba makuhu kontra Nabhote, a ti ti nga maha ti to e dawa a si na mnando. (1 Vafu. 21:8-13) Ina nyamanzenze a nga maneka a txi ema e wukela wutomi wa m’thu nga ha ti nga kombiswa ngu kona ka Levhi 19:16.

I singa eto dwe, m’thu a nga va ni manzenze ngu konaha ko a nyenyako mmwani. Ka 1 Johani 3:15 hi gonda tiya: “Votshe va va vengelako vanawe mbadayi va vathu; se ma ti ziva ti to kuwalo wu i ku m’dayi, awu wutomi wo mbi guma wu sikotako kuzumba kwakwe.” Wona ti to msana kova Jehovha e womba mapswi ya o gwita ma ku ka vhersikulo 16 a engetete tiya ka ndimana ayi yi londiselako “u nga vengele wa ka kwanu mbiluni kwako.”—Levhi 19:17.

Mapswi ya ma ku ka Levhi 19:16 ma hi siyela txialakanyiso txa lisima kota Makristu. Hi fanete kuvayilela mipimiso ya walo kumweko ni kupimisa makuhu ngu vamwani. I ku tiya, ngako hi txi “ema hi wukela vamwani” ngu kutumelela manyenyo ni livengo si hi maha ti to hi mu txhepeta ti nga kombisa ti to kha hi mu lavi. Se Makristu ma fanete kuvayilela moya wuwa.—Mat. 12:36, 37.