Ina u lungekile ku “ta dya thomba ya mafu”?
HOTSHETHU ha ma tekela hamsungo mapswi a Jesu aya ma ku: “Va katekile ava vo thutha nguko va na mana thomba ya mafu.” (Mat. 5:5) Vasawuleki va na ta dya thomba ya mafu mbimo yi va no fuma nzumani kota vakoma ni Jesu. (Mtu. 5:10; 20:6) Kutala ka Makristu a ditshuri nyamsi ma emela ku ta dya thomba ya mafu ni ku ta hanya ka ona kala kupinduka va di hetisekile, va di ni kudikha ni litsako. Kasi ku toneto ti maheka ti na lava ve ta maha mithumo yo tala. Wona yiraru: kuphindula mafu me va Paradhise, kukhatalela ni kugondisa ava va no ta wuswa. Lava tinzila to kombisa i di ngadi konku to u ti emisete ku ta maha toneto.
U LUNGEKILE KU TA PHINDULA MAFU ME VA PARADHISE?
Mbimo yi Jehovha a nga ruma vathu to va ti fanete ‘kutala hamafuni va txi va ma fuma’ a txi lava to mafu otshe me va Paradhise. (Gen. 1:28) Ava va lavako kuhanya kala kupinduka va fanete kuengisa txirumo txonetxo nguku kha va nambi ta mana Paradhise yi di lungile. Phela Jaradhi ya Edheni kha yi swi yi di ho. Msana ka Armagedhoni hi na ta va ni mthumo wo basisa mafu aya ma nga nyetiswa. Awuwa i nava mthumo wa hombe.
Atiya ti hi khumbutisa mbimo yi Vaisrayeli va nga wuya ngu Bhabhilona. Phela ditiko dawe di zumbile 70 wa malembe i di dirumbi. Kambe Isaya a profetile to ngu ku vhunwa ngu Jehovha va ndi na si kota ku di wuseta. Wuprofeti wu khene: “Siwula sa kona a na si maha si fana ni Edheni ni makhalo a kona a kuoma ma na fana ni jaradhi ya Jehovha.” (Isaya 51:3, NM) Jehovha a vhuni Vaisrayeli kumaha ditiko dawe di va wukhalo wo tshura. Ngu ha ku fanako, avale va no ta dya thomba ya mafu va na ta sikota ku ma phindula me va Paradhise. Awe u nga sikota kukombisa i di ngadi konku to u ti emisete ku ta pateka ka mthumo wonewo.
Yimweyo ya tinzila ngu maha to mtini kwako ku zumba ku di basile ni kuzumbiseka. U nga maha toneto hambi vavhizinyo vako va si ti mahi. U nga andisa mthumo wako ngu kuvhuneta ka ku basisa Tinyumba ta Mfumo ni tinyumba ati hi ñolako ka tona mitshangano ya hombe. Ngako txiemo txi txi ku tumelela u nga tatisa petisawu yo vhuneta ngako ku txi humelela tiphango. U txi maha toneto u kombisa to u ti emisete kuvhuneta ngako ku di ni txilaveko. Ti wotise tiya: Ku ni mithumo yo kari ni nga yi gondako ni no ta tshumela ni yi maha ngako ni txi ta bela ka Paradhise?
U LUNGEKILE KU TA KHATALELA AVA VA NO TA WUSWA?
Msana kova Jesu a di wusile mwanana wa Jayiro a wombile to va ti fanete ku m’ninga sakudya. (Marku 5:42, 43) Ti woneka ti sa va karatela kukhatalela mwanana wule wa 12 wa malembe. Kambe alakanyisisa ngu mthumo awu wu no ta vaho mbimo yi Jesu a no ta hetisisa txithembiso txakwe txa ti to “votshe vale va ku mayivani va na engisa dipswi dakwe” ve huma. (Joh. 5:28, 29) Hambiku Bhiblia yi si wombiko to tala hi nga alakanyisisa ngu ti to ava va no ta wuswa va na lava txivhuno txo ta mana sakudya, siambalo ni wukhalo wo zumba ka wona. U nga kombisa ngu nzila muni i di nga di konku to u ti emisete kuvhuna? Ndise siwotiso si u nga ti mahelako.
U nga maha txani konku kasi kukombisa to u lungekile ku ta dya thomba ya mafu?
Ngako dibanzani kwako ku txi ziviswa to mi na endelwa ngu muwoneleli wa txigava , wa ti ningeta ku m’ramba ku ta susula nayo? Ngako Bhetele yi txi rumela vanathu kasi ku ve ta thumela dibanzani kwanu mwendo mwanathu awu i nga ti muwoneleli wa txigava a emako mthumo wakwe, wa ti emisela ku va vhuna to ve mana wukhalo wo zumba? Ani ngako ku di mtshangano wo sawuleka ka wukhalo wano, u nga ti ningeta ku ya vhuneta na wu si se khata mtshangano ni loko wu di gumile mwendo ku ta amukela vanathu va va tako ngu ka matiko mamwani?
U LUNGEKILE KU TA GONDISA AVA VA NO TA WUSWA?
Ngu kuya ngu ti ti ku ka Mithumo 24:15, hi verela ku ku ta wuswa tibhiliyoni ta vathu. Kutala kwawe i nava vale va nga mbi va ni mkhanjo wo ziva Jehovha. Msana kova va di wusilwe va na ta wu mana mkhanjo wonewo.a Malanda a Jehovha o thembeka ma na ta patana ka m’thumo wonewo. (Isaya 11:9) Charlotte i ku mwanathu wu a nga txhumayela Europa, America do Sul ni Africa a ti verete tiya. A womba tiya ngu litsako: “Ni ti emete ngu o bhilivila ku ta gondisa ava va nova va di wusilwe. Mbimo yi ni lerako ngu matimu a wutomi wa m’thu a nga hanya ka timbimo ta kale ni pimisa tiya: ‘I tiku a zivile Jehovha, wutomi wakwe wu sa nga zumbisa tiya.’ Yo nga yo swela kuho mbimo yi ni no ta gela ava va no ta wuswa ati va nga ti luza.”
Hambi malanda o thembeka a Jehovha aya ma nga hanya na Jesu a sise ta ha mafuni ti na lava me ta gonda. Alakanyisisa ngu litsako li hi no ta li pfa hi txi txhamusela Dhaniyeli nzila yi wuprofeti awu a nga wu bhala wu nga hetiseka ngu yona. (Dhan. 12:8) Ani mbimo yi hi no ta vhuna Rute ni Nowemi kupfisisa to Mesiya a tile ngu ka liveleko la mwaya wawe? Ti na ta tsakisa nguto kugondisa vathu na hi si nga ni sikhulumeta mwendo sikarato si hi mananako naso ka mafu yawa a Sathani.
U nga maha txani konku kasi kukombisa to u ti emisete ku ta pateka ka ditima donedo? Ti hakubasani to yimweyo ya tinzila ngu ti karatela kutshukwatisa wusikoti wako wo gondisa ni kupateka ngu txitalo ka mthumo wo txhumayela. (Mat. 24:14) Hambi ngako tanga ni siemo simwani si txi ku tsivela kuthuma yimwani mithumo, kutikarata kwako ku na kombisa to u lungekile ku ta gondisa ava va no ta wuswa.
Tinene kualakanyisisa ngu txiwotiso txiya txa lisima: Ina ngu ditshuri u tiemisete ku ta dya thomba ya mafu? Wa tsaka ngu kuziva to u na ta phindula mafu me va Paradhise? U nga kombisa to u lungekile ngu kulondola yotshe mikhanjo yi u ku nayo yo pateka ka mithumo yo fana ni yi u no ta yi mana mbimo yi u no bela Paradhiseni.
a Wona gondo yi yi ku “Kukomba vathu nzila ya kululama” ka Muwoneleli wa Setembro wa 2022.