“U na tava kumweko ni nani Paradhiseni”

1. Na a si se fa, nji txani txi Jesu a nga gela txigevenga txile txi nga ti bethetwe kumweko nayo? (Luka 23:39-43)

JESU ni sigevenga sile sa simbidi a nga di bethetwe naso va pfite kupanda ngutu va si se fa. (Luka 23:32, 33) Sotshe sigevenga sile si txi ruketela Jesu se eto ti kombisa to i si nga valondeteli vakwe. (Mat. 27:44; Marku 15:32) Kambe msana ka mbimo, mmweyo wa sigevenga sile a ti sote. A ti khene: “Jesu, ni alakanye, mbimo yi u no wulela Mfumoni kwako.” Jesu a xamute a txi khene: “Kha ditshuri na ku gela nyamsi ti to: U na va kumweko ni nani Paradhiseni.” (Lera Luka 23:43, NM.) Kha txi ngaho txi kombisako ti to txigevenga txile txi di tumete didungula da ti to ‘Mfumo wa nzumani wu hokile’ mbimo yi Jesu a nga txi txhumayela. Ni ku Jesu kha nga womba to dijaha dile di di na pateka ka Mfumo wonewo. (Mat. 4:17) Jesu a txi womba-womba ngu Paradhise yi no vaho ha mafuni ka mbimo yi yi tako. Ngu kutxani hi txi womba toneto?

2. Nji txani txi kombisako to txigevenga txile txi nga ti sola ti nga maha i ti Mjudha?

² Ti nga maha txigevenga txile txi nga ti sola ni txona i ti Mjudha. Txona txi gete txigevenga txile tximwani txi txi: “ Khu xoniphi Txizimu, hambiku nawe u manekako u di kuabaniswani kumweko nayo, kani?” (Luka 23:40) Majudha ma txi khozela Txizimu txa tximwetxo kambe vathu vamatiko va txi kholwa ka sizimu so tala. (Eks. 20:2, 3; 1 Vak. 8:5, 6) I ti ku sigevenga sile i to kova vathu vamatiko nga txi di wotisile tiya: “Khu xoniphi sizimu?” I singeto basi, Jesu kha rumelwa ka vathu va matiko aniko a rumetwe “ka tinvuta ti ti nga mwalala ta nyumba ya Israyeli.” (Mat. 15:24) Ni ku Txizimu txi ti gete va Israyeli ti to txi na wusa va kufa. Txigevenga txile txi nga ti sola, kutilava txi txi ti ziva toneto ni ku mapswi a txona ma kombisa to, txi ti tumela to Jehovha a di na wusa Jesu kasi ku e fuma ka Mfumo wa Txizimu. Atiya ti komba to wamwamna wule a txi themba to Txizimu txi na m’wusa nene. Ngu toneto ti tikomba nga txigevenga txile i ti Mjudha.

3. Mbimo yi Jesu a nga womba-womba ngu Paradhise ti nga maha txigevenga txile txi nga ti sola txi di khotwe ka txani? Txhamusela. (Genesisi 2:15)

³ Kota Mjudha, txigevenga txile txi nga tisola ti nga maha txi di gondile mayelano ni Adhamu ni Evha kumweko ni Paradhise yi Jehovha a nga ti va vekile ka yona. Se ti nga maha txigevenga txile txi di khotwe to Paradhise yi Jesu a nga yi womba yi na va jaradhi yo tshura ha mafuni.—Lera Genesisi 2:15.

4. A ti Jesu a nga gela txigevenga txile ti hi maha hi alakanyisisa ngu txani?

⁴ Mapswi ya Jesu a nga gela txigevenga txile ma hi maha hi alakanyisisa ngu ti wutomi wu no ta zumbisa tona ka Paradhise. Mfumo wo dikha wa Solomoni wu nga hi gondisa to kari ngu Paradhise. Se hi nga verela to Mfumeli wa hombe kupinda Solomoni kumweko ni vafumi kulowe ve tisa wutomi wo tsakisa ha mafuni. (Mat. 12:42) Ngu toneto a va “va tinvuta timwani” va fanete kutiemisela kumaha totshe a ti ti lavekako kasi ku ve ta hanya ngu ha ku si gumiko ka Paradhise.—Joh. 10:16.

WU NATA VA NJANI WUTOMI PARADHISENI?

5. Ngu tihi ti u ti emelako ngu wutomi Paradhiseni?

⁵ U alakanya to wutomi wu na ta va njani Paradhiseni? Ti nga maha u txi ti wona u di ka wukhalo wo tshura wo fana ni jaradhi ya Edheni. (Gen. 2:7-9) Kutilava wa khumbula wuprofeti wa Mika mbimo yi a nga txi womba-womba ngu vathu va Txizimu a txi khene ‘Mmwani ni mmwani a na khalahatsha hahatshi ka m’vhinya wakwe ni hahatshi ka mkuwu wakwe.’ (Mika 4:3, 4) Se u nga alakanya ngu ti Bhiblia yi ti wombako to ku nava ni sakudya so tala. (Mas. 72:16; Isaya 65:21, 22) U nga ti wona u di ka jaradhi yo tshura u di khalahatshile ka meza yi nga tala ngu sakudya so tshamba. U alakanya u txi pekwa ngu moya wo tshamba wu nungelako mafilori a mindonga a yi yi ku randelako. Se u pfa maxaka, vangana kumweko ni vale va nga wuswa va txi sekelela nguku va ti dilako ngu litsako ni wumwewo. Totshe tiya hi nga mloro, ku si na kukanakana ti na maheka kona ha mafuni hawa. Wutomi Paradhiseni wu na pata kumaha mithumo yo tsakisa ngutu.

6. Hi na ta maha txani Paradhiseni?

⁶ Jehovha a hi vangile kasi ku hi mana litsako ngu mthumo wathu. (Ekl. 2:24) Hi na va ni mithumo yo tala ka Mfumo wa Kristu wa 1000 wa malembe. Avale va no huluka ka xanisa ya hombe ni vale va no wuswa ka va kufa ti na lava veva ni siambalo, sakudya ni wukhalo wo zumba ka wona. Kasi kuhetisisa silaveko soneso ti na lava hi thuma mithumo yiya yo tsakisa. Kufana ni Adhamu ni Evha va nga khatalela jaradhi, nathu hi nava ni lungelo yo ta dima Paradhiseni. Tshumela u alakanya ngu litsako li hi no ta li pfa mbimo yi hi no gondisa timiliyoni ta vathu va va no ta wuswa, ava va zivako ta tidotho ngu Jehovha ni txikongomelo txakwe ni kutshumela hi vhuna malanda a Jehovha o thembeka aya ma nga hanya na Jesu a si se ta ti to me gonda to tala.

7. Hi nga tsaniseka ka txani, ni ku ngu kutxani?

⁷ Hi nga tsaniseka to wutomi Paradhiseni wu na ta va wo dikha, hi nava ni sotshe si hi si lavako ni ku wu na va organizadho. Ngu kutxani? Nguku Jehovha wa hi ninga txikombiso txa ti wutomi u no ta va ngu tona hahatshi ka Mfumo wakwe. Mfumo wa mkoma Solomoni txikombiso txa toneto.

MFUMO WA SOLOMONI TXIKOMBISO TXA PARADHISE

8. Mapswi ya ma ku ka Masalmo 37:10, 11, 29 ma hetisekile ngu nzila muni msana ka kuva mkoma Dhavhidha a ti ma bhate? (Wona “Tixamulo ta siwotiso sa vagondi” ka direvhista diya.)

⁸ Mkoma Dhavhidha a bhate mayelano ni ti wutomi wu no ta zumbisa tona mbimo yi Mkoma wa wutxhari ni ku thembeka a no ta khalahatsha ka txikhalo txa wukoma. (Lera Masalmo 37:10, 11, 29.) Hi txi bhula ni vamwani mayelano ni Paradhiseni hi tolovela kugonda Masalmo 37:11. Hi ni txivangelo txo tsana txo maha tiya nguko Jesu a wombawombile ngu m’bhalo wuwa ka gondo yakwe ya mmangoni a txi kombekisa ti to wu na ta hetiseka ka mbimo yi yi tako. (Mat. 5:5) Ni ku mapswi a Dhavhidha ma txi tshumela me kombisa nzila yi wutomi wu ndi no ta zumbisa tona mbimo yi a ndi no fuma mkoma Solomoni. Mbimo yi Solomoni a nga txi fuma Israyeli vathu va Txizimu va di ni kudikha ni ku va di ni sotshe si va nga txi si lava ka ditiko di di nga txi “khulunga masi ni wulombe.” Txizimu txi di wombile tiya: “Ngako mi txi londeta sileleto sangu . . . , ni na mi ninga kudikha ditikoni se mi na otela mi di tsani, kha ku na mbi va ni wa ku mi dhukisa.” (Levhi 20:24; 26:3, 6) Sithembiso siya si hetisekile ngu mbimo ya mfumo wa Solomoni. (1 Mak. 22:9; 29:26-28) Ni ku Jehovha a thembisile ti to vabihi va matiko kha hi na mbi “swa hi va wona.” (Mas. 37:10) Se mapswi ya ma ku ka Masalmo 37:10, 11, 29 ma hetisekile ka timbimo tile ni ku ma na tshumela me hetiseka ka mbimo yi yi tako.

9. Mfumeli wa txisikati wa Sabha a wombile txani mayelano ni mfumo wa mkoma Solomoni?

⁹ Mfumeli wa txisikati wa Sabha a engisile mapswi a kudikha ni kukhaliseka aku Vaisrayeli va nga di nako mbimo yi a nga txi fuma Solomoni. Mfumeli wule wa ditiko da kule a tekile liendo la kuya Jerusalema kasi ku ya ti wona ngu maso akwe a tile a nga ti pfa. (1 Vafu. 10:1) Msana ko xolisisa mfumo wa Solomoni ene a wombile tiya: “Vona kha va siyeta ku ni gela ka kona. . . . Va katekile vavamna va u ku navo, va katekile vathumi vako avale yotshe mbimo va ku masoni kwako va pfisisako wutxhari wako.” (1 Vafu. 10:6-8) Kambe ati ti nga txi maheka ka mfumo wa Solomoni i ti kova txibaka txa ti Jehovha a no ta mahela vathu hahatshi ka mfumo wa mwanana wakwe Jesu.

10. Jesu mbwa hombe ka Solomoni ngu tinzila tihi?

¹⁰ Jesu mbwa hombe kupinda Solomoni ngu tinzila totshe. Solomoni i ti m’thu wo mbi hetiseka se a mahile tiphazamo ta hombe ka nzila yi a nga txi lamula ngu yona, eto ti nga mahako ti di tisete sikarato vathu va Txizimu. Kambe Jesu Mkoma wo hetiseka, kha mahi tiphazamo. (Luka 1:32; Vaheb. 4:14, 15) Jesu a tsanisete siduko so karata nguto si nga txi vangwa ngu ka Sathani. Mbimo yi a nga tsanisela Jesu a kombisile ti to kha na mbi thuka e onha mwendo kumaha to kari ati ti nga xanisako vathu va va ku hahatshi ka Mfumo wakwe. I lungelo ya hombe ngutu kuva ni Jesu kota Mfumeli wathu.

11. Mba mani va no ta fuma kumweko ni Jesu?

¹¹ Jesu a nava ni 144.000 wa vafumi kulowe ava va no thuma kumweko nayo kasi kukhatalela vathu ni kuhetisisa txikongomelo txa Jehovha ngu mafu. (Mtu. 14:1-3) Vafumi kulowe vonevo va Jesu va mananile ni sikarato kumweko ni siduko so tala mbimo yi va nga txi hanya ha mafuni, se mbimo yi va no fuma va na pfisisa ati vathu ha mafuni va tshanganako nato. Ngu wuhi mthumo wu vafumeli kulowe va Jesu va no ta wu maha?

NGU WUHI M’THUMO WU VASAWULEKI VA NO TA WU MAHA?

12. Ngu wuhi m’thumo wu Jehovha a no ta ninga ava va 144.000?

¹² Mthumo wu Jesu kumweko ni vafumi kulowe va nga ningwa mbwa hombe ngutu kupinda awu wu nga ti ningilwe Solomoni. Mkoma Solomoni a ti fanete kukhatalela timiliyoni ta vathu ka ditiko dimwedo basi. Kambe a vale va no fuma ka Mfumo wa Txizimu va na vhuna tibhiliyoni ta vathu ha mafuni kotshe. Hi nga wona lungelo ya hombe yi Jehovha a no ta ninga vasawuleki.

13. Ngu wuhi wutixamuleli wo sawuleka a wu vafumi kulowe va Jesu va no ta va nawo?

¹³ Kufana ni Jesu ava va 144.000 va na ta thuma kota vakoma ni vaphaxeli. (Mtu. 5:10) Mbimo yi Vaisrayeli va nga di hahatshi ka mlayo wa Mosi vaphaxeli va txi vhuna vathu ku ve va ni dihanyo da dinene ni kutshuketa hafuhi ka Jehovha. Mlayo i ti “txifananiso dwe, txa simaha sa sinene si si tako” se ta pfala kuwomba to vathumi kulowe va Jesu va na khatalela vathu va Txizimu ngu didhawa da nyama ni da moya. (Vaheb. 10:1) Ti na lava hi emela ku ta wona to vakoma ni vaphaxeli vava va na ta mahisa kutxani kasi kuhokisa mkongomiso wa Txizimu ka va va no va hahatshi ka Mfumo wa Txona ha mafuni. Kha hi ti zivi ati Jehovha a no ta mahisa tona, kambe ha tsaniseka ti to ka Paradhise avale va no ta va ha mafuni va na ta amukela wotshe mkongomiso awu wu lavekako.—Mtu. 21:3, 4.

AVA VA “TINVUTA TIMWANI” VA FANETE KUMAHA TXANI KASI KU VE FANELEKA KUTA HANYA PARADHISE?

14. Ngu wuhi wuxaka wu kuho ka tinvuta timwani ni vathumi kulowe va Kristu?

¹⁴ Jesu a dhani avale va no thuma kumweko nayo kota “mtxhambi wa wudothonyana.” (Luka 12:32) A tshumete e womba-womba ngu mtxawa wa wumbidi awu a nga wu dhana ku “tinvuta timwani.” Mitxawa yiya ya yimbidi yi ku ni wumwewo yi patilwe yi lumba mtxawa wumwewo basi. (Joh. 10:16) Mitxawa yiya ya yimbidi ya thumisana ni ku yi na simama yi thumisana kala kuza yi hoka Paradhise ha mafuni. Ngu mbimo yoneyo a vale va “mtxhambi wa wudothonyana” va nava va di nzumani, se a vale va “tinvuta timwani” va na va ni themba yo tidila ngu wutomi ha mafuni ngu ha ku si gumiko. Kambe ku ni to kari ati “tinvuta timwani” ti fanelako kumaha kasi kufaneleka kuhanya ka Paradhise.

15. a) Ava va “tinvuta timwani” va seketela vananda va Kristu ngu nzila muni? b) U nga etetelisa kutxani txikombiso txa mwanathu wule a ku txitolo? (Wona mfota.)

¹⁵ Txigevenga txile txi nga tisola txi fite txi si se mana mkhanjo wo kombisa kubonga a ti Jesu a nga txi mahela. Kuhambana ni txona, athu va tinvuta timwani hi ni mikhanjo ya yingi yo kombisa ti hi ti pfako ngu Jesu. Ngu txikombiso hi nga kombisa to ha mranda ngu nzila yi hi ñolako ngu yona vasawuleki. Jesu a wombile to a di na lamula tinvuta ngu nzila yi tona ti ñolako ngu yona vanakwe. (Mat. 25:31-40) Hi nga seketela vananda va Kristu ngu ku va vhuna kutxhumayela ngu kuhiseka ni kumaha vagondisi. (Mat. 28:18-20) Ngu toneto ti hi mahako hi thumisa txivhuno txi seketelwako amu ka Bhiblia txo fana ni dibhuku di di ku: Hanya wutomi wo tsakisa kala kupinduka! Ngako u si tsimbitisi gondo ka m’thu, u ti wonisa kutxani ku ti vekela makungo o ramba vathu va u nga va kotako ti to ve gonda Bhiblia?

16. Nji txani hi nga txi mahako kasi kulungekela ku ta hanya hahatshi ka Mfumo wa Txizimu?

¹⁶ Kha ha fanela kuverela kubela Paradhise kasi ku hi va vathu a va Jehovha a va tsakelako. Konku hi nga ti karatela kuva vathu vo thembeka ka mawomba-wombelo ni simaho sathu ni kutshumela hi dinganisela ka wutomi. Ni ku hi nga thembeka ka Jehovha, ka wu hi nga tekana nayo ni ka vanathu. Hi txi ti karatela kuhanya ngu matshina a milayo a Txizimu a ku hi ku nga di hi txi hanya ka ditiko diya do biha ti na ta hi hehukela kuhanya ngu ona ka Paradhise. Ni ku hi nga tshukwatisa wusikoti ni wuthu wathu kasi kukombisa to hi lungekete kuya hanya Paradhiseni. Wona msungo wu wu ku “Ina u lungekile ku ‘ta dya thomba ya mafu’?” ka direvhista diya.

17. Ina hi fanete kuzumbela ku tipfa mnando ngu sionho sathu sa kale? Txhamusela.

¹⁷ Hi fanete ku ti karatela kuleka kutipfa mnando ngu mhaka ya sionho si hi nga vako hi di si mahile kale. Ditshuri ti to kha hi lavi kuteka mterulo hi wu maha txivhikelo txo “onha khakwenye.” (Vaheb. 10:26-31) Kambe hi nga tsaniseka ti to ngako hi txi tisola ngu ditshuri ka txionho txo kari hinga maha, hi xola txivhuno txa Jehovha ni kutshumela hi txitxa mahanyelo athu, Jehovha a na hi komba wuxinji wakwe wa hombe. (Isaya 55:7; Mith. 3:19) Khumbula mapswi ya Jesu a nga gela Vafarisi a txi: “Nguko kha na tela ku ta dhana valulami, aniko ni tete vaonhi.” (Mat. 9:13) Digandelo da mterulo nda hombe nguto, se ta koteka ku di fenengeta sotshe sionho sathu.

U NGA HANYA KALA KUPINDUKA PARADHISE

18. Nji txani txi u navelako ku ta bhula ni txigevenga txile txi nga di bethetwe hafuhi ni Jesu?

¹⁸ Ina wa ti wona u di Paradhiseni u txi bhula ni txigevenga txile txi nga txi womba-womba ni Jesu. Ku si nga ni kukana-kana, ngu wumbidi wanu mi di na kombisa kubonga ku mi ku nako ngu digandelo da Jesu. Awe u nga m’kombela to e ku txhamusela kha kwati a ti ti nga humelela ka maora o gwita a wutomi wa Jesu ha mafuni ni ku a ti pfisile kutxani mbimo yi Jesu a nga xamula txikombelo txakwe. Se ene adi na ku wotisa to ti ve njani kuhanya ka masiku o gwita ka matsimbitiselo a Sathani. I na tava lungelo kugonda Bhiblia ni vathu vo fana ni wamwamna wule.—Vaef. 4:22-24.

19. Ngu kutxani wutomi Paradhiseni wu no mbi ta swira? (Wona mfota wa kapa.)

¹⁹ Wutomi Paradhiseni kha wu na mbi ta swira. Hi na ta ziva vathu vo tala ni ku hi nava ni mthumo wu ningako litsako. Txo tsakisa ngutu, ditshiku ni ditshiku hi nava ni lungelo yo ziva kwati Tate wathu wa nzumani ni kutidila ngu si a no ta hi ninga. Kha hi na mbi zumba hi si na to gonda ngu ngene ni ku hi na gonda to tala ka si a nga si vanga. Mbimo hi noya hi txi hanya Paradhiseni, lirando lathu ngu Jehovha li na ya li kula. Ha m’bonga ngutu Jehovha ni Jesu ngu ku hi ninga themba yo ta hanya kala kupinduka Paradhiseni.