Tixamulo ta siwotiso sa vagondi

M’bhali wa Masalmo Dhavhidha a txo pindisa mpimo mbimo yi a nga bhala to a ndi na embelela masalmo ka ditina da Txizimu ngu ha “ku si gwitiko” nga ha ti ku ngu kona ka Masalmo 61:8?

Ahim-him. Ati Dhavhidha a nga womba i ti ditshuri, a si ngo pindisa mpimo.

Wona ati a nga ti bhala ka ndimana yiya ni ka tindimana timwani ti fanako: “Ni na embelela masalmo ka ditina dako ngu ha ku si gwitiko kasi kutatisa sixambanyo sangu ditshiku ni ditshiku.” “Ni na kudhumisa, MKOMA, Txizimu txangu ngu yotshe mbilu yangu, ni na pfalisa ditina dako kala kupinduka.” “Ni na dhumisa ditina dako kupinduka ni kupinduka.”—Mas. 61:8; 86:12; 145:1, 2.

Mbimo yi Dhavhidha a nga bhala mapswi yawa a si njo pimisa to kha na mbi fa. A txi ti ziva to Jehovha a di wombile to aku vathu va nga onha txhatxhazelo i ndi nava lifo, ni ku Dhavhidha a txi tumela to i ti muonhi. (Gen. 3:3, 17-19; Mas. 51:4, 5) Phela a txi ti ziva to hambi vavamna va likholo vo fana ni Abrahamu, Isaake ni Jakobe va ti fite. Ni ku Dhavhidha a txi ti ziva to nene a ndi na fa. (Mas. 37:25; 39:4) Kambe mapswi ya ma ku ka Masalmo 61:8 ma txi kombisa minavelo ni kutiemisela kwakwe kudhumisa Txizimu ngu ha ku si gwitiko, i ku ti to a ndi na m’dhumisa ka wotshe wutomi wakwe.—2 Sam. 7:12.

Yimwani mikama Dhavhidha a txi bhala ati ti nga txi humelela ka wutomi wakwe, nga ha hi ti wonako ngu kona ka Masalmo 18, 51 ni 52. Ka Masalmo 23 Dhavhidha a womba to Jehovha i M’dyisi wu a m’ningako mkongomiso, a mu yisako ka mati o tenga ni ku m’vhikela. Dhavhidha i ti m’dyisi ni ku atxi lava kuthumela Txizimu ‘otshe masiku a kuhanya kwakwe.’—Mas. 23:6.

Khumbula to ati Dhavhidha a nga txi ti bhala ti txi ta ngu ka Jehovha, se ti txi pata wuprofeti wa ti ti no ta maheka ka mbimo yi yi tako. Ngu txikombiso, ka Masalmo 110 Dhavhidha a womba-wombile ngu mbimo yi nyamne wakwe a no “khalahatsha txineneni [ka Txizimu]” nzumani ni kuamukela mfumo. A khalatshela txani? Kasi kukhozisa valala va Txizimu ni ku “lamula mifumo” ya ha mafuni. Dhavhidha i ti kokwani wa Mesiya awu a ndi no fuma nzumani ni kuva “mphaxeli kala kupinduka.” (Mas. 110:1-6) Mbimo yi Jesu a nga ti ha mafuni a wombile to wuprofeti awu wu ku ka Masalmo 110 wu txi womba-womba ngu ngene ni ku wu na ta hetiseka ka mbimo yi yi tako.—Mat. 22:41-45.

Jehovha a kongomisile Dhavhidha kubhala ati ti nga txi maheka ka mbimo yakwe ni ti ti no ta maheka mbimo yi a no ta wuswa a txi dhumisa Jehovha kala kupinduka. Atiya ti hi vhuna kuwona to Masalmo 37:10, 11, 29 yi kombisa ati wutomi wu nga di ngu tona Israyeli wa kale ni ti wu no ta zumbisa tona mbimo yi Txizimu txi no ta hetisisa sotshe sithembiso sa txona.—Wona paragrafu 8 ya gondo ayi yi ku “U na tava kumweko ni nani Paradhiseni” ka direvhista diya.

Ngu toneto Masalmo 61:8 ni tindimana timwani ti fanako ti kombisa to Dhavhidha a txi lava kudhumisa Jehovha ka ditiko da Israyeli kala kuza e fa. Ti tshumela ti kombisa ati Dhavhidha a no ta ti maha mbimo yi Jehovha a no ta m’wusa ka vakufa.