Hi nga hanya kala kupinduka

1. Kualakanyisisa ngu txithembiso txa Jehovha txo ta hi ninga wutomi wo mbi na magwito ti na hi gwesisa kutxani?

JEHOVHA a thembisa kuninga “wutomi wo mbi na magwito” votshe va mu engisako. (Var. 6:23) Hi txi alakanyisisa ngu ti Jehovha a hi ningako, lirando lathu ngu ngene li na kula. Pimisa ngu tiya: Tate wathu wa nzumani wa hi randa nguto se kha na mbi tumela ti to hi hambaniswa nayo.

2. Themba yo ta hanya ngu ha ku si gumiko yi nga hi vhunisa kutxani?

² Txithembiso txa Txizimu txo ta hi ninga wutomi wo mbi guma txa hi vhuna kutsanisela sikarato nyamsi. Hambi nga ku valala vathu va txi womba to va na hi daya, athu kha hi leki kuthembeka ka Jehovha. Ngu kutxani? Tximwetxo txa sivangelo ngu ti to ha ti ziva to ngako hi txi fa hi di thembekile ka Jehovha ene a na ta hi wusa hi ti ni themba yo hi si fi kambe. (Joh. 5:28, 29; 1 Vak. 15:55-58; Vaheb. 2:15) Ngu kutxani hi txi tsaniseka to ti na koteka kuhanya ngu ha ku si gumiko? Wona sivangelo si si londiselako.

JEHOVHA MBWA KALA KUPINDUKA

3. Ngu kutxani hi nga tsanisekako to Jehovha a na hi ninga wutomi wo mbi guma? (Masalmo 102:12, 24, 27)

³ Ha ti ziva to Jehovha a na hi ninga wutomi wo mbi guma nguko ene Txisima txi txi ningako wutomi ni ku mbwa kala kupinduka. (Mas. 36:9) Wona tindimana ta Bhiblia ti kombisako to Jehovha mbwa kala kupinduka. Masalmo 90:2 yi womba to Jehovha mbwa “kukhukela kale, kala kupinduka.” Masalmo 102 yi womba ti ti fanako. (Lera Masalmo 102:12, 24, 27.) Mprofeti Habhakuki a bhate tiya mayelano ni Tate wathu wa nzumani: “Ina hi nga awe yotshe mbimo Jehovha, Txizimu txangu, ni Msawuleki wangu kani? Awe khu fi.”—Hab. 1: 12, NM.

4. Hi fanete kukarateka ngako ti txi hi karatela kupfisisa ti to Jehovha mbwa kala kupinduka? Txhamusela.

⁴ Ta ku karatela kupfisisa ti to Jehovha a ve ho “yotshe mbimo”? (Isaya 40:28) Matipfelo yawa ma tolovelekile. Elihu a wombile tiya mayelano ni Txizimu: “Nja hombe kupinda wuzivi wathu; kambe kha ku na kubalwa malembe a txona.” (Jobe 36:26) Ina ti lava kuwomba to kwa mbi pfisisa to kari, tona o va i singa ditshuri? Ngu txikombiso, ina a ku hi si pfisisiko ati liwoningo li thumisako tona ti lava kuwomba to lona kha li nga ho? Ni kudotho. Ngu ha ku fanako, ti nga maha hi si gwiteli ku ti pfisisa kha kwati to ti mahisa kutxani ku Jehovha a si na makhato ni ku kha na mbi va ni magwito. Kambe eto kha ti lavi kuwomba ti to Jehovha hi nga wa kala kupinduka. Mvangi wathu a gulekile nguto kupinda ti hi nga ti kotako ku ti pfisisa. (Var. 11:33-36) Ene a ve ho ku si se va ni txilo hambi liwoningo la ditambo. Ha tsaniseka to Jehovha “a mahile ditiko ni mafu ngu mtamo wakwe.” Ene a ve ho a si se “nawuluta nzuma.” (Jer. 51:15; Mith. 17:24) Ngu txihi tximwani txivangelo txi hi mahako hi tsaniseka to ti na koteka kuhanya ngu ha ku si gumiko?

HI VANGETWE KUHANYA NGU HA KU SI GUMIKO

5. Mpatwa wo khata wu mahilwe ngu txikongomelo txihi?

⁵ Ka sotshe si si hanyako Jehovha a si pimete mbimo yo kari ti to si hanya, kambe kha maha eto ka vathu. Jehovha a va mahile ngu txikongomelo txo va si fi. Kambe Jehovha a gete Adhamu atxi: “U nga dye mndonga wa kuziva ta tinene ni ta kubiha, nguko, ka ditshiku dile u no dya, kufa u na fa.” (Gen. 2:17) I ti ko Adhamu ni Evha va to engisa Jehovha va sa nga fa. Ta pfala kupimisa to i di ko va to ko engisa Jehovha a di va tumelete kudya “mndonga wa wutomi.” Se eto ti di na maha to vona ve “hanya kala kupinduka.”b—Gen. 3:22.

6-7. a) Nji txani kambe txi kombisako to vathu kha va mahwa ngu txikongomelo txo ve fa? b) Ngu tihi ati u tsakelako ku ta ti maha ka wumangwana wo mbi guma? (Wona mifota.)

⁶ Vaxolisisi vamwani va ta siyensia va womba to wongo wathu wu ni wusikoti wo veka timhaka ta tingi nguto kupinda ti hi ti vekako ka wutomi wotshe. Ngu 2010 dijornal do kari di wombile ti to wongo wathu wu ni wusikoti wo veka timhaka ta tingi nguto (2,5 wa timiliyoni ma gigabytes), ati ngako hi txo lava ku ti sistira hi nga hetako 300 wa malembe hi txi ti xalela. Mtengo wuwa ti nga maha i di wudotho nguto. Kambe wu kombisa to Jehovha a mahile wongo wathu kasi ku wu kota kuveka timhaka ta tingi nguto kupinda ti hi vekako ku dingana 70 mwendo 80 wa malembe.—Mas. 90:10.

⁷ Kuengetela keto Jehovha a hi mahile hi di ni minavelo yo simama hi txi hanya. Yi txi womba-womba ngu vathu Bhiblia yi kha yona Txizimu “txi vekile timbiluni kwawe kualakanya ka yotshe mbimo.” (Ekl. 3:11) A txiya ngu txona txivangelo txi hi mahako hi wona lifo kota mlala. (1 Vak. 15:26) Ngako hi txi lwala ina ho ti leka hi si ti khataleli kasi ku hi fa? Ni kudotho. Kuhambana ni to hi tolovela kutsula sibhejela hi tshumela hi sela mirende kasi ku hi kalamuka. Kuwomba ditshuri hi maha totshe ti hi nga ti kotako kasi kuvayilela lifo. Se ngako m’thu wu hi mrandako a txi fa na ti si nga ni mhaka ti to i mphya mwendo a kute ngu tanga ha pandiseka nguto kudingana mbimo yo lapha. (Joh. 11:32, 33) Phela Mvangi wathu a sa hi ninga minavelo ni wusikoti wo hanya kala kupinduka i di ti to etxo i si nga txikongomelo txakwe ku hi hanya ngu ha ku si gumiko. Hi ni sivangelo so tsana so kholwa ti to ti na koteka kuhanya ngu ha ku si gumiko. A hi woni ati Jehovha a nga maha kale ni ti a ti mahako konku ti kombisako to txikongomelo txakwe kha txa txitxa.

TXIKONGOMELO TXA JEHOVHA KHA TXA TXITXA

8. Ngu tihi ti Isaya 55:11 yi hi tsanisekisako mayelano ni txikongomelo txa Jehovha ngu ngathu?

⁸ Hambiku Adhamu ni Evha va nga onha ve tshapelisa lifo ka vanana vawe Jehovha kha txitxa txikongomelo txakwe. (Lera Isaya 55:11.) Ene a ngadi a txi lava kuninga ava va mu thumelako lungelo yo hanya ngu ha ku si gumiko. Atiya ta woneka mbimo yi hi xolisisako ati Jehovha a nga ti womba ni ku ti maha kasi kuhetisisa txikongomelo txonetxo.

9. Txizimu txi thembissile txani? (Dhaniyeli 12:2, 13)

⁹ Jehovha a thembisile to a na wusa vafi e tshumela e va ninga wutomi wo mbi guma. (Mith. 24:15; Tit. 1:1, 2) Jobe i nga ti wamwamna wa likholo a txi tsaniseka to Jehovha a di na wusa va ku fa. (Jobe 14:14, 15) Mprofeti Dhaniyeli nene a txi ti ziva ti to vathu va ti ni themba yo wuswa ve tshumela ve hanya ngu ha ku si gumiko. (Mas. 37:29; lera Dhaniyeli 12:2, 13.) Majudha a mbimo ya Jesu ni ona ma txi ti ziva to Jehovha a di na ninga vathu vo thembeka “wutomi wo mbi guma.” (Luka 10:25; 18:18) Jesu a womba-wombile ngu kuphinda-phinda mayelano ni txithembiso txiya ni ku ene apune a wusilwe ngu Tate wakwe.—Mat. 19:29; 22:31, 32; Luka 18:30; Joh. 11:25.

10. Kuwuswa ka vathu aku ku nga pinda ku kombisa txani? (Wona mfota.)

¹⁰ Jehovha ngene i ku Mningi wa wutomi ni ku a ni mtamo wo tshumela e ninga wutomi a vale va nga fa. Ene a ningile mtamo mprofeti Elija kasi ku e wusa mwanana wa noni ya Sarepita. (1 Vafu. 17:21-23) Ngu kutsimbila ka mbimo ngu vhunwa ngu Txizimu, mprofeti Elixa a wusile kufani mwanana wa wamsikati wule wa Msunami. (2 Vafu. 4:18-20, 34-37) Kuwuswa koneko ni kumwani ku kombisa ti to Jehovha a ni mtamo wo tshumela e ninga wutomi a vale va nga fa. Mbimo yi a nga ti ha mafuni Jesu a kombisile ti to Tate wakwe ati mningile mtamo wonewo. (Joh. 11:23-25, 43, 44) Konku Jesu a nzumani ni ku a amukete “mtamo wotshe, nzumani ni ha mafuni.” Ngu mhaka yeto a lungekile kuhetisisa txithembiso txi txi ku “votshe vale va ku mayivani” va na wuswa ni themba yo hanya ngu ha kusi gumiko.—Mat. 28:18; Joh. 5:25-29.

11. Ti mahisa kutxani ku ti koteka kuhanya kala kupinduka ngu kona ha ka mterulo?

¹¹ Ngu kutxani Jehovha a di tumelete to mwanana wakwe wo dhundeka e fa ngu nzila yo panda? Jesu a wombile txivangelo txa kona mbimo yi a nga khene: “Txizimu txi kombile lirando ka vathu, ahawa txi nga za txi ningela Mwanana wa txona wa Mmweyo ekha, kufela ku, votshe va va no kholwa kwakwe, va si lovi, aniko va mana wutomi wo mbi guma.” (Joh. 3:16) Mbimo yi Jehovha a nga ningela mwanana wakwe kota mterulo kasi kufenengeta sionho sathu a mahile to ti koteka ku hi mana wutomi wo mbi guma. (Mat. 20:28) Mpostoli Paulo a txhamusete txienge txiya txa lisima txa txikongomelo txa Txizimu mbimo yi a nga khene: “Nguko, kufana ni kuwa lifo li nga vangwa ngu m’thu mmweyo, ngu toneto kuwuka ka vafi ni kona ku vangilwe ngu m’thu mmweyo. Kha ditshuri, ngako votshe va fako ngu ka Adhamu, ngu toneto kambe votshe va na tshumela ve hanya ngu ka Kristu.”—1 Vak. 15:21, 22.

12. Mfumo wu na ta patekisa kutxani ko hetisisa txikongomelo txa Txizimu ngu ngathu?

¹² Jesu a gondisile valondeteli vakwe ti to ve khongela kasi ku Mfumo wa Txizimu wu ta, ni ku kuranda ka Txizimu kumaheka ha mafuni. (Mat. 6:9, 10) Tximwetxo txa sikongomelo sa Txizimu ngu vathu ve hanya ngu ha ku si gumiko ha mafuni. Kasi kuhetisisa txikongomelo txonetxo Jehovha a vekile Mwanana wakwe kota Mkoma wa Mfumo wa Mesiya. Ni ku Txizimu txa sengeleta 144.000 wa vathu ha mafuni kasi ku ve ta thuma kumweko ni Jesu ti to ve ta hetisisa txikongomelo txa txona.—Mtu. 5:9, 10.

13. Nji txani txi Jehovha a txi mahako konku? Awe u patekisa kutxani ka toneto?

¹³ Jehovha wa sengeleta “dibutho da hombe” da vathu ni ku va gondisa ku va hahatshi ka Mfumo wakwe. (Mtu. 7:9, 10; Jak. 2:8) Hambiku nyamsi va hanyako ka ditiko adi di nga abaniswa ngu mhaka ya kuthava ni tiyimbi avale va wumbako mtxawa wuwa va ti karatela kuxula lotshe livengo li nga mahwako ngu kona ha ka kuhambana ka matiko midhawuko mwendo mawonelo. Ngu nzila yo fanekisela vona va hundulusa matxhari awe me maha misuka. (Mika 4:3) Hahanze ko ve pateka ka tiyimbi ti ti dayelako vathu vo tala vona va vhuna vathu ti to ve mana “wutomi wa ditshuri” ngu ku va gondisa mayelano ni Txizimu txa ditshuri ni sikongomelo sa txona. (1 Tim. 6:19) Maxaka ma nga va wukela ni ku va nga xaniseka ngu kupwata mali ngu kona ha ka kuseketela Mfumo wa Txizimu kambe Jehovha wa va vhuna ti to ve mana asi va si lavako. (Mat. 6:25, 30-33; Luka 18:29, 30) Totshe timhaka tiya ti hi tsanisekisa to Mfumo wa Txizimu wu ho ngu ditshuri ni ku wu na simama wu hetisisa txikongomelo txa Jehovha.

WUMANGWANA WO TSHURA MASONI KWAKO

14-15. Txithembiso txa Jehovha txo fuvisa lifo da magwito txi na hetisekisa kutxani?

¹⁴ Jesu wa fuma konku nzumani se a na hetisisa sotshe sithembiso si Jehovha a nga si maha. (2 Vak. 1:20) Kukhukhela 1914, Jesu wa khozisa valala vakwe. (Mas. 110:1, 2) I si nga kale Jesu ni vafumi kulowe va na hetisisa kuxula koneko ni kulovisa vabihi ha mafuni kotshe.—Mtu. 6:2.

¹⁵ Mndani ka 1.000 wa malembe a kufuma ka Jesu vafi va na wuswa ni ku avale va no engisa va na hokela ka txiemo txo hetiseka. Msana ka txiduko txo gwita avale Jehovha a no va wona i di vo lulama “va na dya thomba ya mafu, vana xayiseka ka ona yotshe mbimo.” (Mas. 37:10, 11, 29) Ta tsakisa aku “mlala wo gwitisa i ku lifo,” a no “fuviswa.”—1 Vak. 15:26.

16. Txi fanete ku va txihi txivangelo txathu txo khata txo thumela Jehovha?

¹⁶ Nga ha hi nga ti wona ngu kona themba yathu yo hanya ngu ha ku si gumiko yi seketetwe yi tsana ka Dipswi da Txizimu. Se themba yoneyo yi nga hi vhuna kusimama hi di thembekile ka masiku yawa o karata a magwito. Kambe kasi ku hi tsakisa Jehovha kha ha fanela ku m’thumela ngu kulava kuhanya dwe. Txivangelo txo khata txo simama hi di thembekile ka Jehovha ni Jesu txi fanete kuva lirando ali hi ku nalo ngu vona. (2 Vak. 5:14, 15) Eto ti na hi susumetela ku va etetela ni kugela vamwani themba yi hi ku nayo ngu kuhiseka. (Var. 10:13-15) Mbimo yi hi yako hi gonda kuva vathu va lirando ni wuha hi hunduka hi va vathu va Jehovha a va lavako ku veva vangana vakwe ngu ha ku si gumiko.—Vaheb. 13:16.

17. Ngu wuhi wutixamuleli wu mmweyo ni mmweyo wathu a ku nawo? (Matewu 7:13, 14)

¹⁷ Ina hi na ta maneka ka vale va no ta mana wutomi wo mbi guma? Jehovha a tute mkhanjo wo eto ti koteka. Se ti salete mmweyo ni mmweyo wathu kusimama ka nzila ayi yi yisako wutomini. (Lera Matewu 7:13, 14.) Wu na ta va njani wutomi mbimo yi hi no ta hanya ngu ha ku si gumiko? Hi na ta wona xamulo ya txiwotiso txiya ka gondo ayi yi londiselako.