Ina u ni likholo?

Kasi ku hi kota kutsakisa Jehovha ti lava hi va ni likholo. Kambe Bhiblia yi womba ti to “hi nga votshe va ku ni likholo.” (2 Vat. 3:2) Mbimo yi Paulo a nga womba mapswi yawa atxi womba “vathu vo biha,” mwendo ku, vathu ava va nga txi m’xanisa. Kambe ati ene a nga ti womba mayelano ni likholo ta tshumela ti thuma ka vathu vamwani. Vamwani kha va ti lavi kukholwa ti to ku ni Txizimu txi nga maha sotshe so maha. (Var. 1:20) Vamwani va womba ti to va kholwa ka txo kari mwendo ka m’thu a ku ni mtamo ngutu. Kambe eto kha ta enela kasi kutsakisa Jehovha, nguku elo hi nga likholo la ditshuri.

Athu ti lava hi kholwa ti to Jehovha waho ni ku wa hakela avale va ku ni likholo lo tsana kwakwe. (Vaheb. 11:6) Likholo i fanelo ya mihando ya moya wo sawuleka. Kasi ku hi amukela moya wo sawuleka ti lava hi maha mkombelo ka Jehovha. (Luka 11:9, 10, 13) Nzila yimwani yo amukela moya wo sawuleka wa Txizimu ngu lera Bhiblia. Nda lisima kualakanyisisa ngu ti hi nga ti gonda ni kutshumela hi ti thumisa. Ngu nzila yoneyo, moya wo sawuleka wu nga kongomisa wutomi wathu, wu hi vhuna kuva ni likholo ali li tsakisako Jehovha.