GONDO 26
NDANDO 123 Tiveke hahatshi ka mkongomiso wa Txizimu
Tumela to hi nga totshe u ti zivako
“Kupfisisa awu wa Mtamo Wotshe kha hi nge kuhokeleli.” —JOBE 37:23, NM.
TXIKONGOMELO TXA GONDO
Ngu gonda kuwonisana ni sikarato ngu kuveka mapimo ka ti hi ti zivako ni ngu kuthemba Jehovha, hambi hi si zivi totshe ati ti no humelela.
1. Ngu wuhi wusikoti awu Jehovha a nga hi ninga, ni ku ngu kutxani a di hi ningile wusikoti wonewo?
JEHOVHA a hi vangile hi di ni wusikoti wo pimisa, wo gonda timhaka ta tiphya ni wo thumisa ati hi ti gondako. Jehovha a hi vangile ni wusikoti wonewo kasiku hi sikota “kuziva Txizimu mwendo kumana wuzivi wa txona” ni ku hi maha sisungu sa wutxhari mbimo yi hi txi thumelako.—Mav. 2:1-5; Var. 12:1.
2. a) Ngu tihi ati hi fanelako ku tipfisisa? (Jobe 37:23, 24) (Wona ni mfota.) b) Kuziva eto ti nga hi vhunisa kutxani?
2 Ditshuri ti to Jehovha a hi vangile ni wusikoti wo gonda to kari, kambe hi nga totshe ati hi ti zivako. (Lera Jobe 37:23, 24.) Pimisa ngu txikombiso txa Jobe. Jehovha a mmahile siwotiso sasingi a si singa txi kombisa ti to ku ni tatingi ati a nga si tizivi. Dibhulo donedo di vhuni Jobe ku eva m’thu wo tiveka hahatshi ni kululamisa mapimiselo akwe. (Jobe 42:3-6) Nda tinene ku hi va vathu vo tiveka hahatsi hi tumela ti to hi nga totshe hi ti zivako. Kutiveka hahatshi koneko, ku na hi vhuna kuthemba ti to mbimo yotshe Jehovha a na hi gela ati hi fanelako kutiziva kasiku hi maha sisungo sa sinene.—Mav. 2:6.
Kutumela to hi nga totshe ti hi ti zivako, nda tinene kwathu ngaha Jobe a nga maha ngu kona (Wona paragrafu 2)
3. Hi na bhula ngu txani ka gondo yiya?
3 Ka gondo yiya, hi na wona timhaka timwani ati hi si ti ziviko ni sikarato a si hinga thukako hi wonisana naso ngu kwambi ziva timhaka toneto. Hi na tshumela hi wona to ngu kutxani i di tatinene kwambi ziva totshe. Kugonda ngu mhaka yiya, ti na tsanisa themba yathu ya ti to Jehovha “wule wa wuzivi wo hetelela” wa hi gela a ti hi fanelako kutiziva.—Jobe 37:16.
KHA HI DI ZIVI DITSHIKU A DI MAGWITO MA NO HOKA NGU DONA
4. Ngu kuya ngu Matewu 24:36, ngu tihi ati hi si ti ziviko?
4 Lera Matewu 24:36. Athu kha hi di zivi ditshiku a di magwito ma no hoka ngu dona. Hambi Jesu mbimo yi a nga ti hamafuni a si di zivi “ditshiku donedo ni diora da kona.”a Ngu kutsimbila ka mbimo, Jesu a txhamusete vapostoli vakwe ti to timbimo ni tinguva “ti ziwa ngu Tate dwe.” (Mith. 1:6, 7) Jehovha se a vekile ditshiku a di magwito ma no hoka ngu dona, kambe athu kha hi nga ni wusikoti wo ziva ditshiku donedo.
5. Ngu tihi ati ti nga thukako ti maheka aku hi si di ziviko ditshiku adi magwito ma no hoka ngu dona?
5 Ngaha Jesu a nga womba ngu kona, athu kha hi ti zivi ti to ti na lava hi emela mbimo muni kala magwito me hoka. Ngu toneto, mbimo yimwani hi nga godhola, ngutu-ngutu i di ti to se i kale hi txi emela ditshiku da Jehovha. Ti nga tshumela ti hi karatela ngutu ngaku maxaka athu mwendo vathu vamwani va txi hi seka ngu ku magwito ma si se kuhoka. (2 Pedro 3:3, 4) Ti nga maha hi pimisa ti to ti ndi na hi hehukela kutimisela kusekwa ngaku i di ti to ha di ziva ditshiku adi magwito ma no hoka ngu dona.
6. Ngu kutxani i di tatinene aku hi si di ziviko ditshiku adi magwito ma no hoka ngu dona?
6 Ngu ditshuri, kuva Jehovha a sa hi gela ditshiku a di magwito ma no hoka ngu dona, o hi ninga mkhanjo wo kombisa ti to hi mthumela nguku hi mrandako ni ku hi mthembako. Athu kha hi lavi kuthumela Jehovha kala magwito me hoka dwe, kambe hi lava ku mthumela ngu ha ku si gwitiko. Hahanze ko veka mapimo ka mbimo yi “ditshiku da Jehovha” di no hoka ngu yona, hi lava kupimisa ngu timhaka ta tinene ati ti no ta maheka ka ditshiku donedo. Hi txi maha toneto, hi na ya hi tshuketa ka Jehovha, hi mthemba ni kumaha totshe ati hi nga ti kotako kasiku hi mtsakisa.—2 Pedro 3:11, 12.
7. Ngu tihi ati hi ti zivako?
7 Nda lisima kuveka mapimo ka ti hi ti zivako, i ku ti to masiku a magwito ma khatile ngu 1914. Ka Bhiblia, Jehovha a hi ningile wuprofeti awu wu kombisako ti to magwito ma ndi na khata ngu dilembe da 1914. A tshumete e hi gela ati txiemo txa mafu yawa txi ndi nova ngu tona msana ka dilembe donedo. Ngu toneto, ha tsaniseka ti to “ditshiku da Jehovha di hafuhi.” (Zef. 1:14) Ni ku ha wu ziva mthumo awu Jehovha a lavako ti to hi wu maha i ku “kutxhumayela mahungu a manene a Mfumo” ka vathu vo tala. (Mat. 24:14) Mahungu oneyo ma txhumayelwa konamu ka 240 wa matiko ni ngu konamu ka 1.000 wa tidimi. Phela kha ti lavi hi ziva “ditshiku ni diora” kasiku hi hiseka ka mthumo wo txhumayela.
KHA HI YI ZIVI NZILA AYI JEHOVHA A MAHAKO NGU YONA TO MAHA
8. Mapswi aya ma ku “mithumo ya Txizimu” ma womba txani? (Ekleziyaste 11:5)
8 Hi nga mbimo yotshe hi zivako “mithumo ya Txizimu.” (Lera Ekleziyaste 11:5.) Mapswi yawa ma kombetela ka ti Jehovha ati mahako ni ti ati tumelelako ku ti maheka kasi kuhetisisa txikongomelo txakwe. Athu kha hi si zivi sivangelo asi si mahako Jehovha a tumelela timhaka to kari ti maheka mwendo ati ahi mahelako. (Mas. 37:5) Bhiblia yi fananisa kwambi ziva “mithumo ya Txizimu” ni kwambi pfisisa nzila yi mwanana a kulako ngu yona mndani ka mwamwakwe. Hambi vasiyentixta kha va se ti pfisisa to eto ti mahekisa kutxani. Nguha kufanako, nathu kha hi yi pfisisi kwati nzila yi Jehovha a mahako ngu yona to maha.
9. Ngu sihi sikarato asi hi nga thukako hi manana naso aku hi si yi ziviko nzila yi Jehovha a no hi mahela ngu yona to maha?
9 Aku hi si yi ziviko nzila yi Jehovha a no hi mahela ngu yona to maha, mbimo yimwani hi nga thuka hi kanakana kumaha sisungo so kari. Ti nga maha hi thava kumaha to tala ka mthumo wa Jehovha, to fana ni kuhehukisa wutomi wathu mwendo kurura hi ya a mu ku ku ni txilaveko txa vatxhumayeli va Mfumo. Ti nga maha hi khata kupimisa ti to Jehovha kha hi katekisi nguku hi si ti kotiko kuhetisisa makungu athu, hi si woniko wuyelo ka mthumo wathu wo txhumayela mwendo hi txi wonisana ni sikarato ka mthumo wo kari awu hi wu mahako ka sengeletano ya Jehovha.
10. Ngu yi hi fanelo ya lisima ayi hi nga yi sakulelako aku hi si yi ziviko nzila ayi Jehovha a mahako ngu yona to maha?
10 Kwa mbi ziva nzila yi Jehovha a no hi mahela ngu yona to kari, ta hi vhuna ku hi va vathu vo tiveka hahatshi. Ha sikota kuwona to mbimo yotshe Jehovha a na hi mahela ati i ku tatinene. (Isaya 55:8, 9) Hi tshumela hi engetela themba yathu ngu Jehovha ni kupfisisa ti to ngene dwe awu a nga hi vhunako ku hi humelela ka wutomi. Ngaku hi txi humelela ka mthumo wo txhumayela mwendo ka mthumo wo kari awu hi wu mahako ka sengeletano yakwe, wotshe wudhumo hi wu yisa kwakwe. (Mas. 127:1; 1 Vak. 3:7) Se ngaku timhaka ti txi bhedha, hi fanete kukhumbula ti to Jehovha wa ti wona totshe ati ti mahekako. (Isaya 26:12) Athu hi maha totshe ati hi nga ti kotako hi txi themba to Jehovha a na hi vhuna. Ha tsaniseka ti to ene a na hi kongomisa hambi i si nga ngu nzila ya txidewukiso ngaha a nga maha ngu kona ka mbimo yi yi nga pinda.—Mith. 16:6-10.
11. Ngu tihi ati hi ti zivako mayelano ni Jehovha?
11 Ha tiziva ti to Jehovha a ni lirando, mbwo lulama ni ku a ni wutxhari. Timwani ti hi ti zivako ngu ti to ene wa ninga lisima totshe ati hi mmahelako ni ti hi mahelako vanathu. Se kha hi kanakani ti to mbimo yotshe Jehovha wa hakela avale va thembekako kwakwe.—Vaheb. 11:6.
KHA HI TI ZIVI ATI TI NO HUMELELA MANGWANA
12. Hi gonda txani ka Jakobe 4:13, 14?
12 Lera Jakobe 4:13, 14. Ditshuri ti to kha hi ti zivi ati ti no humelela mbimo yi yi tako. Ka mafu ya hi hanyako ka ona, ha wonisana ni siemo “so mbi si rinzela.” (Ekl. 9:11) Ngu mhaka ya toneto, kha hi ti zivi ti to makungu athu ma na pasa mwendo nem ni ku kha hi ti zivi to hi na hanya kala hi ma hetisisa.
13. Mbimo yimwani hi nga tipfisa kutxani aku hi si ti ziviko totshe ati ti no humelela mbimo yi tako?
13 Ti nga thuka ti hi karatela kutimisela ngu ku hi si ti ziviko ngu ditshuri ati ti no humelela mbimo yi yi tako. Wutomi wathu wu nga txitxa konaha ni konaha, se hi jujeka msungo. Ngaku to maha ti si tsimbili nga ha hi nga ti ti emete ngu kona, eto ti nga hi maha hi godhola hi gumelwa ngu litsako.—Mav. 13:12.
14. Litsako lathu li dhependerwa ngu txani? (Wona ni mifota.)
14 Mbimo yi hi mananako ni sikarato, mkhanjo wo kombisa to ti si nga ni mhaka ni ti ti no hi humelela, athu hi thumela Jehovha nguku hi mrandako i singa ngu kulava kuwiyelwa. Bhiblia yi kombisa to kha ha fanela ku emela ti to Jehovha e hi vhikela ka sotshe sikarato asi hi mananako naso, ni ku ene kha bhaletela ati ti no hi humelela ka wutomi wathu. Jehovha wa ti ziva to litsako lathu kha li dhependerwi ngu kuva hi txi ziva totshe ti ti no humelela mbimo yi yitako, kambe li dhependerwa ngu ku muengisa ni kulondisa mkongomiso wakwe. Ngaku hi txi lava txivhuno txa Jehovha kasiku hi maha sisungu sa sinene, eto ti na hi vhuna ku hi si karateki ngu kuzumbela kupimisa ngu ti ti nga thukako ti humelela. (Jer. 10:23) Ti na fana ni ku hi txo womba tiya: “Ngaku Mkoma atxi ti lava, hi na hanya se hi na thuma tiya mwendo tile.”—Jak. 4:15.
Ngaku hi txi lava mkongomiso wa Jehovha hi na vhikeleka (Wona paragrafu 14-15)b
15. Ngu tihi ati hi ti zivako mayelano ni mbimo yi yi tako?
15 Ditshuri ti to kha hi ti zivi totshe ati ti no maheka mbimo yi yi tako, kambe ha ti ziva ti to Jehovha a hi thembisile wutomi wo mbi guma. Vamwani va na ya ti dila ngu wutomi wonewo nzumani kasi vamwani hamafuni hawa. Ha ti ziva ti to Jehovha kha hembi ni ku txi walo atxi txi no mtsivela kuhetisisa sotshe sithembiso sakwe. (Tit. 1:2) Ngene dwe awu a nga sikotako ‘kuzivisa magwito kukhukhela makhatoni ni kukhukhela kale nguto atile ti sinziku kumaheka.’ Totshe ti Jehovha a nga ti ti thembisile mbimo yi nga pinda ti mahekile, se hi nga tsaniseka ti to sotshe sithembiso sakwe sa mbimo yi yi tako ni sona si na hetiseka. (Isaya 46:10) Athu ha tsaniseka ti to txi walo txi txi nga tsivelako Jehovha ku e hi randa. (Var. 8:35-39) Ti singa ni mhaka ni ti ti no hi humelela, ene a na hi ninga wuzivi, thavelelo ni mtamo wo hi tsanisela. Kha hi kanakani to Jehovha a na hi vhuna e tshumela e hi katekisa.—Jer. 17:7, 8.
HI NGE SIKOTI KUPFISISA NZILA YI JEHOVHA A HI ZIVAKO NGU YONA
16. Ngu tihi ati Jehovha ati zivako ngu ngathu? Ni ku hi tipfisa kutxani ngu toneto? (Masalmo 139:1-6)
16 Lera Masalmo 139:1-6. Mvangi wathu wa ziva totshe ngu ngathu. Ene wa tiziva ati hi ti pimisako, ati hi tipfisako tona ni ti ti ku mbiluni kwathu. Ene a tshumela e ziva totshe ati hi ti mahako, ni txivangelo txi txi hi mahako hi maha toneto. Mkoma Dhavhidha a wombile ti to mbimo yotshe Jehovha ati emisete ku hi vhuna. U ti pfisa kutxani kuziva ti to Txizimu txa Mtamo Wotshe ni Mvangi wa sotshe wa khatala ngutu ngu ngawe? Eto ta tsakisa ngu ditshuri! Nathu hi nga womba kufana ni Dhavhidha awu a nga khene: “Wuzivi wo nga eto, kwangu wa xamalisa ngutu; wuzivi wo guleka ngutu, kha ni sikoti ku wu pfisisa ngu mapimo angu.”—Mas. 139:6.
17. Ngu kutxani ti nga hi karatelako kutumela ti to Jehovha wa hi ziva kwati?
17 Phela ti nga karata kuwona Jehovha kota Tate wathu wa lirando awu a khatalako ngu ngathu ngu mhaka ya ti hi nga kulisa tona, amu hi nga kulela kona ni ti hi nga txi kholwa ka tona mbimo yi hi nga si se gonda ditshuri. Ti nga maha hi pimisa ti to sionho asi hi nga maha kale nza hombe ngutu aha ko ti nge koteki ku hi va vangana va Jehovha. Phela mbimo yimwani Dhavhidha a ti pfisile toneto. (Mas. 38:18, 21) Ti nga maha m’thu awu a mahako mizamo yo tsakisa Jehovha e ti wotisa tiya: ‘I di ti to Txizimu txa ni ziva, ngu kutxani txi txi lava ni leka mahanyelo angu ni hanya ngu nzila yi yi tsakisako txona dwe?’
18. Hi na wuyelwa ngu txani ngaku hi txi tumela ti to Jehovha wa hi ziva kwati kupinda ti athu hi ti zivisako tona? (Wona ni mifota.)
18 Nda lisima kuziva ti to Jehovha wa hi ziva kwati kupinda ati athu hi ti zivisako tona, ni ku wa ti wona timhaka ta tinene a ti hi ti mahako, ati hi si tikotiko ku ti wona hipune. Hambiku Jehovha a wonako sionho sathu, ene wa hi dhunda ni ku wa yi wona mizamo ayi hi yi mahako kasiku hi txitxa mahanyelo athu. (Var. 7:15) Ngaku hi txi pfisisa ti to Jehovha wa wu wona wusikoti wathu, eto ti na hi ninga mtamo wo mthumela hi di thembekite ni ngu litsako.
Mbimo yi hi wonisanako ni sikarato so mbi si rinzela, Jehovha wa hi vhuna kutsanisela ngu kutsanisa likholo lathu ka sithembiso sa mbimo yi yi tako (Wona paragrafu 18-19)c
19. Ngu tihi ati hi ti zivako mayelano ni Jehovha?
19 Athu kha hi kanakani ti to Jehovha lirando. (1 Joh. 4:8) Ha ti ziva ti to totshe ati Jehovha a hi kombelako, a hi kombela nguku a hi dhundako ni ku a hi navelela ta tinene. Ha tiziva kambe ti to ene a lava hi va ni wutomi wo mbi na magwito. Kambe kasiku eto ti koteka, ahi ningile mtirulo. Mtirulo wu hi tsanisekisa ti to ku singa ni mhaka ni kwambi hetiseka kwathu, hi nga sikota kutsakisa Jehovha. (Var. 7:24, 25) Athu ha ti ziva kambe ti to “Txizimu nja hombe kupinda timbilu tathu, ni ku txa ziva totshe.” (1 Joh. 3:19, 20) Jehovha wa ziva totshe ngu ngathu ni ku wa tsaniseka ti to hi na sikota kumaha totshe ati ahi kombelako.
20. Nji txani txi txi no hi vhuna kwambi zumbela kuvilela?
20 Jehovha ahi gela totshe ati hi fanelako ku tiziva. Ngaku hi txo va vo tiveka hahatshi hi tumela toneto, hi na mbi karateka ngutu ngu ti hi si ti ziviko. Hahanze keto, hi na veka mapimo ka ti i ku ta lisima. Hi txi maha toneto, hi na kombisa to ha tiveka hahatshi ni ku ha themba Jehovha “awule wo thembeka kuwombani kwakwe.” (Jobe 36:4) Ditshuri ti to hi nga totshe ati hi no ti pfisisa konku, kambe ha tiziva ti to Jehovha a na simama e hi gondisa. Eto nda tinene nguku hi na mbi ema kugonda timhaka ta tiphya mayelano ni Txizimu txathu Jehovha.—Ekl. 3:11.
NDANDO 104 Moya wo Sawuleka i ningo ya Txizimu
a Jesu ngene a no thangela yimbi ayi a no lwa ni ditiko diya da Sathani. Se ta pfala kuwomba to Jesu wa di ziva ditshiku adi Armagedhoni yi no hoka ngu dona ni mbimo yi ene ‘a no xula’ ngu yona.—Mtu. 6:2; 19:11-16.
b TITXHAMUSELO TA MIFOTA: Tate ni mwanana va txi lulamisela paxta ya emerjensia kasiku ve zumba va di lungekile ngaku ku txi humelela timhaka ta txitshuketi.
c TXHAMUSELO YA MFOTA: Mwanathu awu a wonisanako ni sikarato a alakanyisisa ngu litsako li a no ta li mana ka mafu a maphya.