Vhuna sigondo sako sa Bhiblia ti to si thumela Jehovha

1-2. a) Ngu kutxani sigondo simwani sa Bhiblia si txi kana-kana kuthumela Jehovha? b) Hi na bhula ngu txani ka gondo yiya?

INA ti ku karatete kuva Fakazi ya Jehovha? Ti nga maha u ti thava kuhenyelwa ngu vathumi kulothi, vangana, mwendo maxaka ngaku u txo va Fakazi ya Jehovha. Mwendo ti nga maha u di pimisile to ti na kukaratela kuengisa milayo ya Txizimu. Ngaku u di ti pfisile toneto, wa ti pfisisa ti to ngu kutxani mbimo yimwani sigondo sa Bhiblia ti nga si karatelako kumaha txisungo txo va Tifakazi ta Jehovha.

² Jesu a txi tiziva to kuthava koneko ku ndi na tsivela vamwani ti to ve thumela Jehovha. (Mat. 13:20-22) Kambe ene a zamile kuvhuna ava va nga ti thava ku m’londetela. Ene a mahile toneto, ngu kuvhuna vagondiswa vakwe ve ziva to ngu kutxani ti ndi no va karatela kusawula kuthumela Jehovha ni ku va vhuna ti to ve randa ngutu Jehovha. A tshumete e va vhuna ti to ve thangetisa Jehovha ka wutomi wawe ni kuva gondisa a ti va ndi no timaha ngaku vamwani va txi va wukela. Hi nga ti thumisisa kutxani ati Jesu a nga gela vagondiswa vakwe mbimo yi hi thumisako dibhuku di di ku Hanya wutomi wo tsakisa kala kupinduka! kasiku hi vhuna sigondo sathu sa Bhiblia ti to si thumela Jehovha?

VHUNA SIGONDO SAKO SI TUMBULA SIKARATO ASI SI NGA VA TSIVELAKO KUTHUMELA JEHOVHA

3. Nji txani txi nga ti tsivela Nikodhemo ku eva mlondeteli wa Jesu?

³ Nikodhemo i ti mthangeli wa Vajudha. Kambe ku ni ti ti nga mmaha ti mkaratela kulondetela Jesu. Nikodhemo a tumete ti to Jesu i ti muemeli wa Txizimu msana ka 6 wa mitxima Jesu a di khatile mthumo wakwe wo txhumayela. (Joh. 3:1, 2) Hambiketo, Nikodhemo a sawute kuya manana ni Jesu kusisalani “ngu kuthava Vajudha.” (Joh. 7:13; 12:42) Ti nga maha a txi thava ti to a ndi na luza so tala ngaku a txo va m’gondiswa wa Jesu.a

4. Jesu a m’vhunisile kutxani Nikodhemo kasiku e pfisisa a ti Txizimu txi nga ti tiemete kwakwe?

⁴ Nikodhemo a txi wuziva Mlayo wa Mosi kambe ti lavile e vhunwa kasiku pfisisa ati Jehovha a nga ti tiemete kwakwe. Se Jesu a mvhunisile kutxani? Ene a tsute eya bhula ni Nikodhemo ni wusiku. Jesu a gete Nikodhemo a ti a nga ti fanete ku timaha kasi kuva m’gondiswa wakwe, i ku kutisola ka sionho sakwe, e bhabhatiswa ni kukombisa likholo ka mwanana wa Txizimu.—Joh. 3:5, 14-21.

5. Hi nga mvhunisa kutxani m’thu wu hi m’gondelako kasiku e ziva ati ti nga mtsivelako ku e kula ngu didhawa da moya?

⁵ Hambi i di ti to m’thu wu m’gondelako a ni wuzivi wo kari wa Bhiblia, ti nga lava u mvhuna ku e ziva ati ti nga mtsivelako ku e kula ngu didhawa da moya. Ti nga maha mthumo wakwe wo tihanyisa wu txi m’dyela mbimo yo e thumela Jehovha mwendo ku mwaya wakwe wu si ti lavi to eva Fakazi ya Jehovha. Se, tihe mbimo yo vhuna txigondo txako. U nga txi ramba mtini kwako mi ta pekanyana txaya ni kutidila ngu mabhulo. Ka mikhanjo yoneyo, u nga sikota kuwona sikarato a si txigondo txako txi wonisanako naso. Kuzeta txigondo txako ti to txi maha kutxitxa ku kulavekako ti to txi tsakisa Jehovha i si nga kutsakisa awe.

6. Hi nga txi vhunisa kutxani txigondo kasiku txi va ni txibindi txo thumela Jehovha? (1 Vakorinto 16:13)

⁶ Ngaku txigondo txi txi themba ti to Jehovha a na txi vhuna kumaha ti i ku tatinene, eto ti na txi ninga mtamo wo txi thumisa ati txi tigondako. (Lera 1 Vakorinto 16:13.) Phela m’gondisi wa Bhiblia wa fana ni m’gondisi wa txikolwani. Pimisa ngu mbimo yi u nga txiya txikolwani, ngu wuhi m’gondisi wu u nga txi m’dhunda ngutu? Ti nga maha i di wu a nga ti kuvhuna ku u themba wusikoti wako. Nguha kufanako, m’gondisi wamnene wa Bhiblia kha gondisi basi ati Jehovha a lavako to txigondo txi ti maha, kambe a tshumela e txi tsanisekisa to txi na sikota kumaha kutxitxa aku kulavekako ka wutomi wa txona ngu kuvhunwa ngu Jehovha. Se u nga ti mahisa kutxani toneto?

VHUNA TXIGONDO TXAKO TI TO TXI RANDA NGUTU JEHOVHA

7. Jesu a va vhunisile kutxani va londeteli vakwe ti to ve kulisa lirando lawe ngu Jehovha?

⁷ Jesu a txi tiziva ti to lirando li vagondiswa vakwe va nga ti nalo ngu Jehovha, li ndi na va kuzeta ku ve thumisa ati va nga ti ti gondile. Ene a va gondisile timhaka to tala ati ti nga va vhuna ku ve kulisa lirando lawe ngu Tate wawe wa nzumani. Ngu txikombiso, Jesu a fananisile Jehovha ni tate wu a ningako silo sasinene vanana vakwe. (Mat. 7:9-11) Phela ti nga maha valondeteli vamwani va Jesu va sa kombiswa lirando ngu va tate vawe. Se hi nga pimisa nzila yi va nga tipfa ngu yona mbimo yi Jesu a nga va kontarela txidinganiso txa tate wa wumbilu, awu a nga amukela mwanana wakwe wu a nga ti khukhile m’tini eya maha timhaka to tala to biha. Jesu a vhuni vathu ve wona ti to Jehovha wa va dhunda ni ku wa tilava kuva vhuna.—Luka 15:20-24.

8. U nga txi vhunisa kutxani txigondo txako ku txi kulisa lirando la txona ngu Jehovha?

⁸ Nawe u nga vhuna txigondo txako ku txi kulisa lirando la txona ngu Jehovha ngu kujunyatisa tifanelo ta Txizimu mbimo yi u txi gondisako. Ka gondo yimwani ni yimwani, vhuna txi gondo txako txi pfisisa kuyelana ka ti txi tigondako ni lirando la Jehovha. Mbimo yi mi bhulako ngu mtirulo, junyatisa nzila yi wu thumako ngu yona kwakwe. (Var. 5:8; 1 Joh. 4:10) Mbimo yi txigondo txi pfisisako nzila yi Jehovha a txi randako ngu yona, e to ta txi vhuna ku mbimo yotshe txi simama txi m’randa.—Vag. 2:20.

9. Nji txani txi nga vhuna Michael to e maha kutxitxa ka wutomi wakwe?

⁹ Wona txikombiso txa Michael wa Indonésia. Ene a kulete ka mwaya wa Tifakazi ta Jehovha kambe kha bhabhatiswa. Mbimo yi a nga ti ni 18 wa malembe, a tsute e ya thuma ka ditiko dimwani kota mtsimbitisi wa mikamiyawu. Ngu kutsimbila ka mbimo a txhadhile, kambe a ti lavile e siya mwaya wakwe kasiku e simama e thuma ka ditiko dimwani. Ngu mbimo yoneyo, msikati wakwe ni mwanana wakwe wa dihorana va khatile kugonda Bhiblia ni ku va ti kula ngu didhawa da moya. Msana ko va mwamwakwe a di fite, Michael a tshumete mtini kasi kuya khatalela tate wakwe wu a nga ti kumbile. Ka mbimo yoneyo Michael a khatile kugonda Bhiblia. Mbimo yi va nga txi bhula nguha ku ku “Engetela wuzivi wako” ka gondo 27 ya dibhuku di di ku Hanya wutomi wo tsakisa kala kupinduka! Michael a gwesekile ngutu aha ko e dila, nguku alakanyisisa ngu nzila yi Jehovha a nga pandiseka ngu yona a txi wona mwanana wakwe a txi xaniseka. Mbimo yi a nga pfisisa ti Jehovha ni Jesu va nga ti maha, ene a kombisile kubonga ni ku a mahile kutxitxa ka wutomi wakwe e bhabhatiswa.

VHUNA TXIGONDO TXAKO TI TO TXI THANGETISA JEHOVHA KA WUTOMI WA TXONA

10. Jesu a va vhunisile kutxani vagondiswa vakwe to ve thangetisa Jehovha ka wutomi wawe? (Luka 5:5-11) (Wona ni mfota.)

¹⁰ Vagondiswa vo khata va txi tiziva ti to Jesu i ti ene Mesiya wu a nga thembiswa, kambe ti lavile ve vhunwa kasiku ve thangetisa Jehovha ka wutomi wawe. Pedro ni Andreya se i ti vagondiswa va Jesu mbimo yi a nga va ramba ti to veva valondeteli vakwe mbimo yotshe. (Mat. 4:18, 19) Phela vona va ti dhupete ka dibhindu do daya sihaka kumweko ni Jakobe ni Johane. (Marku 1:16-20) Mbimo yi Pedro ni Andreya “va nga siya tikoka tawe,” va mahile malulamiselo yo ve xayisa timwaya tawe va txi londetela Jesu. Nji txani txi nga va vhuna ku ve maha kutxitxa koneko? Matimu ya ma ku ka Luka ma hi gela ti to Jesu a mahile txidiwukiso txi txi nga tsanisa themba yawe ya ti to Jehovha a ndi na va khatalela.—Lera Luka 5:5-11.

11. Hi nga thumisa siperiensiya sathu ngu nzila muni kasiku hi tsanisa likholo la sigondo sathu?

¹¹ Athu kha hi na kusikota kumaha sidiwukiso kufana ni Jesu, kambe hi nga bhulela sigondo sathu siperiensiya sa nzila yi Jehovha a nga vhuna ngu yona vamwani ngu kuva va di mthangetisile ka wutomi wawe. Ngu txikombiso, wa khumbula nzila yi Jehovha a nga kuvhuna ngu yona mbimo yi u nga khata kuxalela mitshangano? Ti nga maha ti di lavile u ya bhula ni mlungu wako, u mtxhamusela ti to ngu kutxani u si na kusikota kuthuma ngu mbimo yo lapha ngaku eto ti txi tsulupetela mitshangano. Mbimo yi u bhulelako txigondo txako txiperiensiya txonetxo, txi txhamusele nzila yi likholo lako li nga tsaniswa ngu yona, ngu kuwona Jehovha a txi seketela txisungo txi u nga tximaha txo thangetisa mthumo wakwe ka wutomi wako.

12. a) Ngu kutxani i di tatinene kuramba vahuweleli vo hambana-hambana hi txiya tsimbitisa txigondo txa Bhiblia? b) Ngu kutxani i di ta lisima kuthumisa mavhidhiyo kasiku hi gondisa txigondo txathu? Ningela txikombiso.

¹² Txigondo txako txi nga tshumela txi wuyelwa ngu kupfa a ti Makristu mamwani ma nga timaha kasiku me thangetisa Jehovha ka wutomi wawe. Ngu toneto, ramba vahuweleli ava va ku ni ma experiyensia o hambana hambana kasi ku u ya tsimbitisa navo sigondo. Va kombele ti to ve txhamusela nzila yi va nga gonda ngu yona ditshuri ni ti va nga ti maha kasiku ve thangetisa Jehovha ka wutomi wawe. I singa eto dwe, mi nga xalela mavhidhiyo ya ma ku ka txienge txi txi ku “Engetela wuzivi wako” ni txi txi ku “Xota timwani” ka dibhuku di di ku Hanya wutomi wo tsakisa kala kupinduka! Ngu txikombiso, mbimo yi mi gondako ngu gondo 37, junyatisa matshina a milayo a ya ma ku ka vhidhiyo ayi yi ku Jehovha mbimo yotshe a na khatalela silaveko sathu.

VHUNA SIGONDO SAKO TI TO SI XULA SIKARATO

13. Jesu ava lulamisete ngu nzila muni vagondiswa vakwe kasiku ve xula sikarato?

¹³ Ngu kuwuyeletela, Jesu a gete valondeteli vakwe ti to va ndi na wukelwa ngu vamwani hambi ngu maxaka awe. (Mat. 5:11; 10:22, 36) Mbimo yi mthumo wakwe wu nga txiya kugumani, ene a gete vagondiswa vakwe ti to hambi kudawa va ndi na dawa. (Mat. 24:9; Joh. 15:20; 16:2) Ene a va gete ti to ve ti wonela va di kutxhumayelani. A tshumete eva gela ti to va si lwisani ni vale va nga txi va wukela ni ku ve txhariha kasiku ve sikota kusimama ve txhumayela.

14. Hi nga vhunisa kutxani txigondo kasiku txi wonisana ni kuwukelwa? (2 Timoti 3:12)

¹⁴ Kufana ni Jesu, nathu hi nga txhamusela txigondo txathu ati vakolega va mthumoni, vangana, hambi maxaka va nga ti wombako ngu mhaka ya ku se txi gondako Bhiblia. (Lera 2 Timoti 3:12.) Ti nga maha e poyilelwa ngu vakolega vakwe va mthumoni ngu ku se a hanyako ngu matshina a milayo ya Bhiblia, ni ku maxaka akwe ti nga maha ma si tumelelani ni ti a tigondako mu ka Bhiblia. Ngu toneto, nda lisima kugela sigondo sathu ti to mbimo yimwani si na thuka si wukelwa. Ngaku hi txi maha toneto, sigondo sathu si na mbi xamala ngaku si txi wukelwa ni ku si na tiziva ati si fanelako kuwomba ni ku timaha mbimo yi si wukelwako.

15. Nji txani txi nga vhunako txigondo txa Bhiblia ti to txi wonisana ni kuwukelwa hamwayani?

¹⁵ Ngaku txigondo txako txi txi wukelwa, txi vhune txi pfisisa ti to ngu kutxani maxaka a txona ma txi txi wukela. Ti nga maha ma txi pimisa ti to txona txo hembelwa mwendo ku Tifakazi ta Jehovha hi nga vathu va vanene. Hambi maxaka a Jesu ma txi pimisa ti to ene wa xanga ngu mhaka ti a nga ti timaha. (Marku 3:21; Joh. 7:5) Vhuna txigondo txako ti to txiva ni pasiyensiya ni kuwombawomba ngu nzila ya yinene ni maxaka a txona kumweko ni vamwani.

16. Hi nga vhunisa kutxani txigondo txathu ti to txi bhulela maxaka a txona ati txi ti kholwako ngu nzila ya yinene?

¹⁶ Ngaku maxaka a txigondo txhathu ma txi tsakela kuziva to engeteleka mayelano ni Tifakazi ta Jehovha, txona txi fanete kutxhariha txi si txhamuseli totshe ati txi ti zivako ngu mbimo yimweyo. Ngu kutxani? Nguku txi nga tata msungo wa maxaka a txona se me swireka. Se vhuna txigondo txako ti to txi txhamusela ati txi tikholwako ngu nzila yo hehuka. Se eto ti na vhuna maxaka a txona ku me navela kutshumela me bhula natxo. (Vakl. 4:6) Txi nga tshumela txi va gela ti to ve bhela ka site ya jw.org, eto ti na maha ti to vona vapune ve ziva kwati Tifakazi ta Jehovha.

17. Hi nga txi trenarisa kutxani txigondo txathu ti to txi sikota kuxamula siwotiso a si vamwani va nga txi wotisako mayelano ni Tifakazi ta Jehovha? (Wona ni mfota.)

¹⁷ U nga thumisa mxaxamelo wu ku ka jw.org awu wu ku “Perguntas frequentes” ti to u vhuna txigondo txako kasiku txi lulamisela tixamulo to hehuka ati maxaka a txona mwendo vakolega va mthumoni va nga thukako ve wotisa. (2 Tim. 2:24, 25) Magwito ka gondo yimwani ni yimwani, bhulani ngu txienge txi txi ku “Ngaku vathu va txi khona” ka dibhuku a di di ku Hanya wutomi wo tsakisa kala kupinduka! Kuzeta txigondo txako ti to txi txhamusela a ti txi ti kholwako ngu kuthumisa mapswi ya txona. Ngaku ti txi laveka txi vhune txi txhamusela ngu nzila ya yinene ati txi ti kholwako. Ngaku u txi tiha mbimo yo txi vhuna, txi na sikota kutxhamusela vamwani ti to ngu kutxani txi txi kholwa ka to kari.

18. U nga kuzetisa kutxani txigondo txako ti to txi bhulela vamwani ngu likholo la txona ka mthumo wo txhumayela? (Matewu 10:27)

¹⁸ Jesu a gete vagondiswa vakwe ti to ve txhumayela mahungu a manene ka vathu. (Lera Matewu 10:27.) Ngaku txigondo txi txi khata kutxhumayela ni dibanza, txona txi na wona nzila yi Jehovha a txi vhunako ngu yona, ni ku txi na gonda kuya masoni txi mthemba. U nga txi vhunisa kutxani kasiku txi hokelela dikungu diya? Mbimo yi dibanzani kuziviswako to kunava ni ditima do txhumayela mahungu a manene, gela txigondo txako ati txi fanelako ku ti maha kasiku txi va m’huweleli. Txi txhamusele ti to ngu kutxani vavangi ti di va hehukete kukhata kutxhumayela ngu mbimo ya ditima. Tximwani txi txi nga mvhunako ngu riya kwati nzeve ka sienge si si mahwako ka mitshangano ya hagari ka divhiki. Eto ti nga mvhuna ku e sikota kutxhamusela a ti a tikholwako ngu kutsaniseka.

THEMBA TXIGONDO TXAKO

19. Jesu a kombisile ti to wa themba vagondiswa vakwe ngu nzila muni ni ku hi nga mu etetelisa kutxani?

¹⁹ Asi se tsula nzumani, Jesu a gete vagondiswa vakwe ti to ditshiku dimwani a ndi na tshumela eva kumweko navo. Kambe vona khava tekela ku tipfisisa to Jesu ati womba-womba ngu ti to vona va naya nzumani. Hambiku vagondiswa va Jesu va nga si tipfisisi totshe ati a nga txi tiwomba, ene ati tsaniseka to vona va ti lava kutsakisa Jehovha. (Joh. 14:1-5, 8) Jesu atxi tiziva to ti ndi na lava mbimo kasiku ve pfisisa timhaka timwani to fana ni themba yo ya nzumani. (Joh. 16:12) Kufana ni Jesu, nathu hi fanete kukomba sigondo sathu ti to ha tiziva to sona sa ti lava kutsakisa Jehovha.

20. Chifundo ati kombisile ngu nzila muni to wa themba txigondo txakwe?

²⁰ Themba ti to sigondo sako sa ti lava kumaha tatinene. Wona txikombiso txa mwanathu wa txisikati Chifundo wa Malawi. Ene a khatile kugonda Bhiblia ngu kuthumisa dibhuku di di ku Hanya wutomi wo tsakisa kala kupinduka! ni dihorana da mkatolika di dhanwako ku i Alinafe. Mbimo yi va nga heta kugonda gondo 14, Chifundo a wotisile Alinafe to ngu yahi mawonelo akwe mayelano ni kuthumisa sifananiso ka wukhozeli. Alinafe a henyile e womba tiya: “Etxo txisungo txango, ani ni nga ti sawulela kuthumisa sifananiso ka wukhozeli ngako ni txi ti lava.” Mwanathu Chifundo a pimisile to Alinafe a na tsukula kugonda Bhiblia. Kambe gondo yi simamile ni ku mwanathu Chifundo a ti themba ti to ngu kutsimbila ka mbimo Alinafe a na tipfisia to ti bihile kuthumisa sifananiso ka wukhozeli. Ku di pindile mitximanyana, Chifundo a wotisile Alinafe txiwotiso atxi txi manekako ka gondo 34 txi ku: “Ati u ti gondako amu ka Bhiblia ni ngu Jehovha, ti kuvhunisile kutxani kala nyamsi?” Chifundo atxi txhamusela xamulo ya Alinafe a khene, “Ene a wombawombile ngu timhaka tatingi tatinene, yimweyo ya kona nja ti to Tifakazi ta Jehovha ta vayilela ati Bhiblia yi tsimbisako.” Ti sa swela, Alinafe a emile kuthumisa sifananiso ni ku a bhabhatisilwe.

21. Hi nga txi vhunisa kutxani txigondo txathu ti to txi maha txisungo txo thumela Jehovha?

²¹ Hambiku hi ti zivako to i Jehovha a “si kulisako,” nathu hi nga vhuna sigondo sathu ku si kula ngu didhawa da moya. (1 Vak. 3:7) Kha hi lavi kugondisa txigondo txathu ati Txizimu txi lavako to txona txi ti maha basi, kambe hi lava kutshumela hi txi vhuna ku txi sakulela kuranda Jehovha. I singa eto dwe, hi lava kutshumela hi txi kuzeta kukombisa lirando la txona ngu kuthangetisa Jehovha ka wutomi wa txona ni ku txi gondisa kuthemba Jehovha mbimo yi txi wonisanako ni sikarato. Ngaku hi txi kombisa ku txi themba, hi na txi vhuna ku txi sawula kuthumela Jehovha.