Ina wa lwela kululamisa mazunga, se u maha kurula ni vanathu?

JEHOVHA a lava ti to vakhozeli vakwe ve dhunda kurula. Ene a lava ti to hi hanya ngu kurula ni vamwane. Ngu kumaha eto hi na va hi txi sakulela kurula mndani ka dibanza. Kurula koneko kugwesa vathu vo tala ti to ve thumela Jehovha.

Ngu txikombiso, dijaha dimwane di i nga ti ñanga da ditiko da Madagascar di woni wumwewo wu Tifakazi ta Jehovha ti ku nawo. Dona di pimsile tiya: ‘Ni txo thuka ni va m’khongeli, ni lava ku va Fakazi ya Jehovha.’ Ngu kutsimbila ka mbimo dona di lekile ku va ñanga, di txhadha ti to di engisa ni kuthumela Jehovha, Txizimu txa kudikha.

Kufana ni dijaha diya, timiliyoni ta vathu dilembe ni dilembe va bela ka dibanza da wukristu ni ku va mana kurula a ku va nga txi kulava. Kambe ka Bhiblia hi gonda ti to “wukhuxu ni mibhando” mndani ka dibanza si nga khulumeta wungana wathu ni ku vanga mazunga. (Jakobe 3:14-16) Bhiblia yi hi ninga mlayo wa nzila yi hi nga vayilelako ngu yona mazunga ni ku tsanisa kurula kwathu ni vanathu. He woneni a ti mlayo wonewo wu nga thumisa tona ka ti nga humelela vanathu vamwane.

SIKARATO NI NZILA YO SI LULAMISA

“Ni ti ni txikarato ni mwanathu wu ni nga ti thuma nayo. Ditshiku dimwane hi to khata kubhongelana, se vathu vambidi va tile ve ta mana to ho gixekana ngu mapswi.”—CHRIS.

“Mbimo yotshe ni ti langana ni mwanathu wo kari ti to hi tsula kutxhumayelani ni kukhata sigondo. Ngu txitshuketi a ni gete ti to kha ngadi e lava kutsula ni nani thembweni. Kukhukhela koneho a emile kuwombawomba ni nani. Kambe ni si ti pfisisi.”—JANET.

“Ni tiwombawomba ni vanathu vambidi ka fone. Mmweyo wawe a to ni satisa, se ani ni ti pimisa ti to a timile fone. Koneho ni to khata ku m’lenga ni wu ni nga sala ni bhula nayo. Ku ve ene a sa tima fone yakwe.”—MICHAEL.

“Ka dibanza dathu, vanyaphandule vambidi va khatile ku va ni mazunga. Mmweyo wawe a to lwisa awu mmwane. Mazunga oneyo ma ti godholisa vanathu vamwane.”—GARYK.

Mazunga oneyo ma nga woneka nga hi nga a txilo, kambe ti nga maheka ma di onhile wumoya ni mialakanyo ya vanathu ava va nga pateka ka ona. Kambe a ti ti tsakisako ngu ti to vona va londisete mkongomiso wa mu ka Bhiblia ni ku va tshumete ve va ni kurula. Ngu wuhi mkongomiso wa kona?

“Mi nga henyisaneni ni nzila!” (Genesisi 45:24) Josefa a ningete mlayo wuwa ka vakoma vakwe mbimo yi va nga ti tshumela m’tini ve ya teka tate wawe. Ngako m’thu a si tikoti kulawula matipfelo akwe e kuluveta kuhenya, eto ta nyenyeza vamwane. Chris a woni ti txi mu karatela ngutu kutiveka hahatshi ni kulondisela sileleto. Kambe a ti lava kutxitxa, ngu toneto a kombete divalelo ka mwanathu wu a nga ti phazamisanile nayo e tshumela e lwela kuxula moya wa txihenyisani. Mbimo yi mwanathu a nga wona mizamo ya Chris, nene a mahile mizamo ti to e txitxa. Ngu wumbidi wawe, va simama ve thumela Jehovha ngu kurula.

“Ahawa ku ku singa ni wusungukati, makungo a m’thu ma hangalaka.” (Mavingwa 15:22, Tradução do Novo Mundo.) Mbimo yi mngana wa Janet a nga ema kuwombawomba nayo, ene a ti pfisisile ti to a ti fanete e thumisa mlayo wuwa. Ene a woni i di tshuko kubhulisana nayo. Ngu wunene, Janet a wotisile mwanathu wule ti to mwendo ku ni ti a nga timaha a ti ti nga mu henyisa. Makhatoni dibhulo di si tsakisi, kambe ngu magwito va bhulisanile ngu nzila yo rula. Mwanathu wule a ti woni ti to a sa nga yi pfisisa kwati mhaka yoneyo ni ku Janet a si beli wukhalo ka mhaka yoneyo. Ene a kombete divalelo, konkuwa vangana va hombe ni ku va thumela Jehovha va di kumweko.

“Ngu toneto, ngako u txi phaxa mhamba yako ha txiluveloni, se u txi khumbuka konaho ti to mkwanu a na ni mhaka ni nawe, yi leke konaho mhamba yako txitimwi ka txiluvelo, u thanga ngu kuya khongotelana ni mkwanu.” (Matewu 5:23, 24) Jesu a ningete mlayo wuwa ka M’wombawombo wakwe wa Mmangoni. Mbimo yi Michael a nga pfisisa ti to a ti phazamisanile ni mwanathu, kha ta m’tsakisa. A woni i di tshuko kumaha mizamo ti to e lulamisa mhaka. Ngu kutiveka hahatshi a ti ya kombela divalelo. Ku ve ni wuyelo yihi? Michael a khene: “Mwanathu a ni divalete ngu ditshuri.” Va tshumete ve va vangana va hombe.

“Mi txi timiselana ni kudivalelana mmwane ni mmwane ngako m’thu a di ni txisolo ka mmwane, kota nga ti mkoma a nga mi divalela, nananu mahisani toneto.” (Vakolosa 3:12-14) Wa va khumbula vanyaphandule vale va vambidi va nga ti henyisanile? Ngu lirando didhota dimwane di va vhuni ti to ve alakanyisisa ngu siwotiso siya: Ina nda tinene ti to vanathu ve karateka ngu mhaka ya mazunga athu? Ina ku ni txivangelo txo pfala txo za ni tandeka ku “timiselana ni mmwane” ni ku hi si simami hi thumela Jehovha ngu kurula? Kambe vona va thumisile mlayo wu va nga gelwa ngu didhota dile, se konkuwa va txhumayela va di votshe.

Mlayo wu wu kuka Vakolosa 3:12-14 wu nga kuvhuna ti to u tiveka hahatshi, u divalela awu a nga kuhenyisa u tshumela u divala ngu mhaka yoneyo. Kambe ina u ta nga duketa kumaha eto se u gwita u tandeka? Ditshina da mlayo di di ku ka Matewu 18:15 di nga hi vhuna. Hambiku Jesu a nga wombawomba ngu siwonho sa hombe, kambe hi nga tshumela hi wu thumisa loko hi txi thuka hi phazamisana ni vanathu. Ngu wunene ni ngu txithavo hi nga bhula ni wu a nga hi wonhela ti to hi lulamisa txikarato.

Ka Bhiblia ku ni milayo yi yi vhunako. Kambe yona yi pata kuthemba moya wo sawuleka wa Txizimu ti hi kota kukombisa “mihando ya moya”, i ku: “Lirando, litsako, kudikha, kutimisela, wunene, kutshambisa, kuthembeka, kuthutha, ku ti pimela.” (Vagalatiya 5:22, 23) Alakanya ngu tiya. Ti to motori wu kota kuthuma kwati wu lava kuthelwa mafura. Nanathu ti to hi kota kululamisa mazunga athu ti lava hi va ni mihando ya moya.

KUHAMBANA KA MAZUMBELO KU NGA THUKI KU VA TXIKARATO

Hotshethu hi ni mazumbelo, tifanelo, ni mawonelo o hambana. Kuhambana koneko kumaha wungana wathu wu tsakisa, kambe ku nga tshumela kumaha ti to hi si pfani. Didhota dimwane di wombile tiya: “M’thu wo malala ti nga maha asi tsaki ngu ku va hafuhi ni m’thu wu a ku ni wungana, awu a dhundako kusakana. Ka m’thu wo ngeto ku txo wombwa mhakanyana ya yidotho, kwakwe yi nga va txikarato txa hombe.” Ti nga maha u txi khawe vathu va va ku ni mazumbelo o hambana kha va nge gwiti va di pfani. He wone txikombiso txa Johane ni Pedro. U pimisa txani ngu Pedro? Ti nga maha u txi, i ti nyawombe ni ku a ti ni magwava. A ni Johane? Ku ti lava u nga khawe i ti m’thu wa lirando ni ku a si se womba mwendo kumaha to kari, a ti khata ngu kupimisa. Totshe eto ti kombisa ti to hambiku va nga ti ni mazumbelo o hambana, kambe va thumile kumweko (Mithumo 8:14; Vagalatiya 2:9) Atiya ti nga thuka ti hi humelela nathu. Hambiku hi ku ni mazumbelo o hambana hi nga ti kota kuthumisana kwati.

U nga maha txani ngako mmwane a txo maha mwendo kuwomba mapswi ya ma nga kuhenyisa? Nda lisima kukhumbula ti to Jesu a fite ngu mhaka yakwe ni ku u fanete u dhunda votshe vanathu. (Johane 13:34, 35; Varoma 5:6-8) Hahanze ko wila wuxaka ni mwanathu eneyo, ti wotise tiya: ‘Ina a ti a timahako ti lwisana ni Bhiblia? Ina o duketa ku ni henyisa khakwenye? Mwendo i mhaka ya ku hi ku ni mazumbelo o hambana? Ina a ni tifanelo a ti nani ni nga txi tsakela ku va nato?

Ngu txikombiso, i di ti to ene wa wombawomba ngutu kambe awe u malate, u ta nga pimisa ngu nzila yi ti nga mu hehukelako ngu yona kutxhumayela vathu? Ti ngo txani mi langana kutsula motshe thembweni? Phela u nga gonda ta tingi kwakwe. Ti nga maha m’thu wa kona a ti ni wuha, a txi dhunda kuvhuna ava va ku ni sikarato. Ti ngo txani u tekelela txikombiso txakwe? Mhaka ya lisima ngu yiya: Hambi mi di ni mazumbelo o hambana, mi nga sikota kuthumisana kwati loko mi txi ti vekisela ka tifanelo a ti mmwane a ku nato. Hambiku wungana wanu wu no mbi pala wa votshe, kambe mi na va ni wuxaka wa hafuhi. Eto ti na mi vhuna ku mi va ni kurula dibanzani.

Ka dilembe dizana do khata ku ti ni vavasikati vambidi ava va nga tidhanwa ku i Evódia ni Síntique. Ni vona va ti ni mazumbelo o hambana, kambe Paulo ava kuzetile “ti to ve engisana ka Mkoma”. (Vafilipiya 4:2) Nathu hi lava kukhozela Jehovha kumweko ni vanathu ni ku va ni kurula dibanzani.

LULAMISA MAZUNGA

Ngu ku txani hi di fanete kukuluveta hi thavisa matipfelo o biha a ya hi nga vako nawo ngu vamwane? Matipfelo eyo hi nga ma fananisa ni mwasi wu wu kulako hagari ka Jaradhi yo tshura ngutu. Loko wu txo lekwa wu si thaviswi wu nga wonha jaradhi. Nathu hi txo tumelela matipfelo onewo me kula timbiluni kwathu, ma nga wonha dotshe dibanza. Kambe hi txi dhunda Jehovha ni vanathu, hi na maha totshe ti hi nga tikotako ti to hi vhikela kurula dibanzani.

Ngako hi txi duketa kumaha kurula ni vamwane, hi nga xamala ngu kuwona wuyelo ya kona. Mwanathu mmwane a txhamusela a ti ti nga mu humelela, a khene: “Phela ku ti ni mwanathu wu a nga ti ni ñola nga no va mwanana, a ti ni henyisa ha ko za ni myenya. Ni ti gete tiya: ‘Ene kha ni xoniphi, se nani ni nge m’xoniphi.’”

Ngu kutsimbila ka mbimo mwanathu wule a alakanyisisile ngu ti a nga txi timaha. A ti khene: “Ni khatile kuwonisisa simaho sangu, se ni karatekile nokha. Ni woni ti to ni fanete kutxitxa simaho sango. Msana kova ni di khongete ka Jehovha ngu mhaka yiya, ni m’xavete ningo ni tshumela ni bhala txipasiyana txo kombela divalelo ya ti ni nga timaha. Ene a to ni bharasara e tshumela e divala ngu mhaka yoneyo. Konkuwa se ha pfana ngutu.”

Hotshethu ha ku lava kurula. Kambe matipfelo o biha ni kutiguleta singa khulumeta kurula. Eto ti tolovelekile ka mafu awa hi ku ka ona, kambe Jehovha kha ti lavi eto ka vakhozeli vakwe. Hagari ka Tifakazi ta Jehovha ku ni kurula. Jehovha a gete Paulo e bhalela makristu a ti to ‘me tsimbila ngu nzila’ yi ma nga dhaneelwa yona. Ene a tshumete e va kuzeta ti to ve maha toneto ngu “kotshe kutiveka-hahatshi ni kudikha ni kuhunisela, mi txi tsetselelana ngu lirando, mi txi ti karata ngu kuveketa mpatano wa Moya, ngu kupfana ko dikha”. (Vaefesu 4:1-3) “Kupfana ko dikha” aku vathu va Jehovha va ku nako nga lisima ngutu. Ngu toneto a hi maheni totshe ti hi nga ti kotako ti to hi tsanisa kurula, hi zama kululamisa mazunga ni vanathu votshe.