Themba Jehovha u na hanya!

1. Ngu kutxani hotshethu hi txi lava kuthavelelwa?

HOTSHETHU ha ti lava kuthavelelwa. Ti nga maha kuhanyani kwathu i txi manana ni sikarato sa wutomi, kuvilela, mwendo kukarateka. Ti nga maha hi txi xaniseka ngu mhaka ya malwati, kukumba, mwendo kufelwa ngu wu hi m’dhundako. Wungi wathu ha ñolwa ngu nzila ya tshofu. Kuengetela koneho, vathu nyamsi va ya masoni va txi va vo biha ngutu. Ngu toneto, “timbimo tiya to karata” ti kombisa ti to hi hanya ka “masiku a kugwitisa” ni ku ditshiku ni ditshiku di txako hi tshuketela ka mafu a maphya. (2 Timoti 3:1) Hambi keto, ti nga maha hi di emete mbimo yo lapha kuhetiseka ka sithembiso sa Jehovha, se ti nga maha hi txi manana ni sikarato sa hombe. Se ti di ngeto, i mani wu a nga hi thavelelako?

2, 3. a) Bhiblia yi womba txani ngu Habhakuki? b) Ngu kutxani hi xolisisa dibhuku da Habhakuki?

² He xolisiseni dibhuku da Habhakuki ti to hi xamula txiwotiso txonetxo. Bhiblia kha yi txhamuseli to tala mayelano ni wutomi wa Habhakuki, hambi keto, dona di nga hi tsanisa ngutu. Ditina da Habhakuki ti nga maha di txi womba “Kusingarela ngu lirando.” Eto ti kombetela ka nzila yi Jehovha a thavelelako ngu yona vakhozeli vakwe. Ti nga tshumela ti kombetela ka nzila yi vona va tiyako ngu yona kwakwe. Habhakuki a womba-wombile ni Txizimu ni ku txi wotisa siwotiso. Jehovha a mu xamute e tshumela e mu thumisa ti to e bhala mabhulo oneyo mu ka Bhiblia, nguko Ene a ti ti ziva ti to eto ti ndi na hi vhuna.​—Habhakuki 2:2.

³ Mabhulo aya Jehovha a nga va nawo ni mprofeti wu a nga ti xaniseka, ngu tona dwe a ti Bhiblia yi ti wombako ngu Habhakuki. Phela dibhuku diya njienge txa timhaka “totshe ti ti nga bhalwa kale” mu ka Dipswi da Txizimu, tona, “ti bhaletwe ku ti txi hi gondisa; kasiku hi mana txithembo ngu kuhonisela ni thavelelo yi hi yi manako a mu ka Mibhalo.” (Varoma 15:4) Dibhuku da Habhakuki, di nga hi vhunisa kutxani? Di nga hi vhuna kuwona ti to ti womba txani kuthemba Jehovha. Wuprofeti wa Habhakuki wu hi vhuna kuwona ti to hi nga sikota ku va ni kupepa timbiluni kwathu hambi hi txi manana ni sikarato.

MAHA MKOMBELO KA JEHOVHA

4. Ngu kutxani Habhakuki a nga ti karateka?

⁴ Lera Habhakuki 1:2, 3. Habhakuki a hanyile ka timbimo to karata ngutu. Vathu vo tala ka mbimo yoneyo i ti vo biha ngutu ni kudhunda mazunga, eto ti mu mahile e pandiseka ngutu. Ova ha a nga ti kona, ene a ti wona Vaisrayeli va txi ñolana ngu nzila ya tshofu ni ku kanganyisana. Habhakuki a ti wotisile: ‘Ina wubihi wuwa wu na guma? Ngu kutxani Jehovha a txi swela kugumisa wubihi wuwa?’ A ti gumetwe ngu themba. Ngu toneto a kombete Jehovha ti to e maha txo kari. Ti nga maha Habhakuki a di pimisile ti to Jehovha kha swi a txi khatalela kambe vathu vakwe mwendo kupimisa ti to Ene a si na kumaha txo kari. Ina u khala kutipfisa toneto?

5. Hi gonda txani ka dibhuku da Habhakuki? (Wona mfota wu wu ku makhatoni.)

⁵ Ina Habhakuki a mahile siwotiso soneso nguku a nga si thembi Jehovha ni sithembiso sakwe? Ahim-him! Ene a txo kombela txivhuno ka Jehovha ka sikarato si a nga ti naso, a ti ti wombako ti to ene a ti ngadi a txi themba Jehovha. Habhakuki a txo karateka ni kuxamala. A si tipfisisi ti to ngu txani Jehovha a nga si mahi txo kari ni ku ngu kutxani a txi tumelela ti to e xaniseka. Ku va Jehovha a di thumisile Habhakuki ti to e bhala sikarato sakwe ti hi gondisa txani? Hi gonda ti to kha ha fanela kuthava kugela Jehovha sikarato sathu. Kuwomba ditshuri, ngu wunene wa hi ramba kuwomba-womba nayo hi m’gela totshe ti hi ti pfako. (Masalmo 50:15; 62:8) Mavingu 3:5 yi hi kuzeta yi txi: “Themba ka MKOMA ngu yotshe mbilu yako, kambe u nga thembe mapimo ako upune.” Habhakuki a mahile a toneto.

6. Ngu kutxani i di ta lisima kumaha mkombelo?

⁶ Habhakuki a thembile Jehovha, Mngana ni Tate wakwe, ni ku a tekile dizambo do mu tshuketela. Hahanze ko karateka e zama kululamisa timhaka apune, a mahile mkombelo ka Jehovha e mu gela ti ti nga txi mu karata. Ene njikombiso txa txinene kwathu. Jehovha ngene Muengisi wa mikombelo, se wa hi ramba ti to hi mthemba ngu kumaha mkombelo hi m’gela sikarato sathu. (Masalmo 65:2) Mbimo yi hi mahako toneto, hi na wona nzila yi Jehovha a xamulako ngu yona mikombelo yathu. Hi na tipfa hi txi singarelwa mbimo yi ene a hi khatalelako ni ku hi kongomisa. (Masalmo 73:23, 24) Ene a na hi vhuna hi pfisisa nzila yi a wonako ngu yona sikarato sathu, ti si nga ni mhaka ni siduko si hi mananako naso. Kumaha mkombelo ka Jehovha i nzila yimwani ya lisima ngutu yi hi kombako ngu yona ti to a mthemba.

ENGISA JEHOVHA

7. Jehovha a mahile txani mbimo yi Habhakuki a nga mu txhamusela sikarato sakwe?

⁷ Lera Habhakuki 1:5-7. Mbimo yi Habhakuki a nga gela Jehovha sikarato sakwe, ti nga maha a di ti wotisile ti to Jehovha a ndi maha txani. Kota Tate wu a ku ni lirando, Jehovha a txi pfisisa matipfelo a Habhakuki. A ti zivile ti to Habhakuki wa karateka ni ku a txi lava txivhuno. Ngu toneto, Jehovha kha nga thuka a di m’bhongete, kambe a m’gete a ti a ndi no mahela Majudha ya ma si mu engisiko. Phela, ti nga maha Habhakuki i ti wo khata kugelwa ti to i si nga kale Jehovha a ndi na lamula vabihi.

8. Ngu kutxani Habhakuki a nga ti sa yi emela nzila yi Jehovha a nga xamula ngu yona mikombelo yakwe?

⁸ Jehovha a txhamusete Habhakuki ti to a di ti emisete kumaha txo kari. Ene a ndi na lamula Vajudha va tihanyi ni wubihi. Mbimo yi Jehovha a nga womba ti to “ka masiku anu,” Jehovha a kombisile ti to wulamuli wonewo wu ndi nata Habhakuki mwendo Vaisrayeli va mbimo yakwe va txi nga di ve hanya. Kambe eyo hi nga yona xamulo yi Habhakuki a nga ti yi emete. Vathu va Bhabhilona ni Kalidheya va ti ni tshofu. Ngu wubihi humula, va txi pala ni Vaisrayeli ava va nga txi khona va txi ziva Txizimu. Se ngu kutxani Jehovha a di thumisile vathu vo biha va wukhongeli wa makuhu ti to e tsayisa vathu vakwe? Nguko eto ti ndi na pfisa ngutu kupanda vathu va Judha.a (Wona txhamuselo ya hahatshi.) I ti ku awe wo va Habhakuki, u di tipfisile kutxani?

9. Ngu sihi simwani siwotiso asi Habhakuki a nga si maha?

⁹ Lera Habhakuki 1:12-14, 17. Hambiko, Habhakuki a nga ti ti pfisisa ti to Jehovha a ndi na thumisa va Bhabhilona to e tsayisa vabihi va nga ti hagari kwakwe, ene a ti nga ti ni kuxamala. Kambe ene a ti vekile hahatshi ni ku a simamile e themba Jehovha. Phela, ene a ti khene Jehovha a simamile e va “Dirigwi” dakwe. (Dhewuteronome 32:4; Isaya 26:4) Habhakuki a ti ni themba ti to Jehovha a ni lirando ni wunene, se ene kha thava kumaha siwotiso so fana ni siya: Ngu kutxani Jehovha a di tumelete wubihi Judha wu txi kula ni ku vathu vakwe ve xaniseka kupinda mpimo? Ngu kutxani ene a sa maha txilo? Ngu kutxani Nyamitamo a “txi malala” ni kutumelela wubihi? Phela, Jehovha mbwo “Sawuleka,” ni ku ene a “ni maso a manene aya ma si dinganiko kuwona to biha.”

10. Ngu kutxani mbimo yimwani hi nga tipfako kufana ni Habhakuki?

¹⁰ Mbimo yimwani hi nga tipfa kufana Habhakuki. Ha engisa Jehovha. Ha mthemba ni ku ha lera ni kugonda Bhiblia, ayi yi tsanisako themba yathu. Hi tshumela hi pfa ngu sithembiso sakwe mbimo hi riyako nzeve ka ti sengeletano yakwe yi hi gondisako. Kambe, hi nga thuka hi ti wotisa tiya, ‘Ina hi na xaniseka kala ditshiku?’ Hi nga gonda ka ti Habhakuki a nga maha.

RINZELA JEHOVHA A NA KUVHUNA

11. Ngu ti hi ti Habhakuki a nga ti tiemisete kumaha?

¹¹ Lera Habhakuki 2:1. Mabhulo ya Habhakuki a nga va nawo ni Jehovha ma mningile kudikha mbiluni. Ma m’vhunile kusimama e rinzela kuvhunwa ngu Jehovha. Habhakuki a ti khene: “Na humula ani ka ditshiku do pandiseka.” (Habhakuki 3:16) Mamwani malanda o thembeka a Txizimu ma rinzete Jehovha ti to e maha txo kari. Sikombiso sawe si nga hi tsanisa, nguko si kombisa ti to nathu hi nga maha ti ti fanako.​—Mika 7:7; Jakobe 5:7, 8.

12. Hi nga gonda txani ka Habhakuki?

¹² Hi gonda txani ka kutiemisela ka Habhakuki? Txo khata, hi fanete hi khongela ka Jehovha mbimo yotshe ti si nga ni mhaka ni sikarato sathu. Txa wumbidi, ti lava hi riya nzeve ka ti Jehovha a hi gelako ngu kuthumisa Bhiblia ni sengeletano yakwe. Txa wuraru, ti lava hi emela Jehovha e hi vhuna ni kuthemba ti to ene a na lulamisa sikarato sathu ngu mbimo yakwe yinene. Ngako hi txi tekelela txikombiso txa Habhakuki hi na va ni kurula mbiluni ni ku va ni mtamo wo tsanisela. Themba yathu yi na hi vhuna kutimisela ni ku va ni litsako ti si nga ni mhaka ni sikarato sathu. Ha tsaniseka ti to Tate wathu wa nzumani a na hi vhuna.​—Varoma 12:12.

13. Jehovha a mu thavelelisile kutxani Habhakuki?

¹³ Lera Habhakuki 2:3. Hi nga tsaniseka ti to Jehovha a tsakile ngu ku va Habhakuki a di ti emisete kurinzela. Nyamitamo a txi ti ziva a ti Habhakuki a nga txi tipfa, se ene a mu khatalete ni ku mu tsanisekisa ti to a ndi na xamula siwotiso sakwe. Ngu txikuluveta Habhakuki a ndi na humula ka sikarato sakwe. Ti txi fana ni ku Jehovha a di mu gete tiya: “U nda thutha u veka themba yako kwangu. Ani ni na xamula mkombelo wako hambi ti txi woneka nga ta swela.” Jehovha a gete Habhakuki ti to se a ti mahile makungu o hetisisa sithembiso Sakwe. Jehovha a tsanisile Habhakuki ti to e simama e rinzela. Eto ti mahile ti to Habhakuki a si gumi mtamo.

14. Ngako hi txi manana ni sikarato hi fanete kumaha txani?

¹⁴ Nathu ti lava hi rinzela Jehovha e maha to kari. Ti lava hi engisela kwati ati ene a hi gelako. Eto ti na hi vhuna ku hi mthemba ni ku va ni kudikha mbiluni ti si nga ni mhaka ni sikarato sathu. Jesu a hi kuzetile ku hi si veki mialakanyo ka “sikhati mwendo timbimo” nguko Jehovha kha hi gela. (Mithumo 1:7) Ti lava hi themba to Jehovha wa yi ziva mbimo ya yinene yo lulamisa timhaka. Sekoko, hi fanete hi timisela hi si gumi mtamo, hi tiveka hahatshi ni ku va ni likholo ka Txizimu. Mbimo yi hi rinzelako Jehovha, he thumiseni ngu wutxhari mbimo yi hi ku nayo ti to hi thumela Jehovha ngu wotshe mtamo wathu.​—Marku 13:35-37; Vagalatiya 6:9.

JEHOVHA A NA HANYISA AVA VA MTHEMBAKO

15, 16. a) Ngu sihi sithembiso a si hi nga si manako ka dibhuku da Habhakuki? b) Sithembiso soneso si hi gondisa txani?

¹⁵ Jehovha a thembisile tiya: “Mlulami a na hanya ngu likholo lakwe,” ni ku “mafu ma na tala ngu kuziva kudhumisa MKOMA.” (Habhakuki 2:4, 14) Ngu ditshuri, Jehovha a thembisile kuninga wutomi wo mbi guma ka vale va timiselako ni ku mthemba.

¹⁶ Txithembiso txi txi ku ka Habhakuki 2:4 njithembiso txa lisima ngutu a txi mpostoli Paulo a nga womba-womba ngu txona makhambi mararu ka mapapilo akwe! (Varoma 1:17; Vagalatiya 3:11; Vahebheru 10:38) Hi nga tsaniseka ti to hambi hi txo manana ni sikarato sa hombe ngutu, ngako hi txi themba Jehovha hi na wona sithembiso sakwe si txi hetiseka. Jehovha a lava ku hi zumba hi txi ti vekisela ka themba yathu ya wumangwana wa wunene.

17. Jehovha a thembisa ku hi mahela txani ngako hi txi mthemba?

¹⁷ Kota ku hi hanyako ka masiku o gwitisa tingi ti hi nga ti gondako ka dibhuku da Habhakuki. Jehovha a thembisa wutomi wo mbi guma ka votshe vale vo lulama ava va mthembako. Se, ti lava hi tsanisa themba yathu ka Txizimu, ti si nga ni mhaka ni sikarato mwendo kuvilela kwathu. Ati Jehovha a nga gela Habhakuki ti hi ninga themba ya ti to ene a na hi vhuna ni ku hi ponisa. Ngu lirando wa hi kombela to hi mthemba ni ku va ni kutimisela hi rinzela mbimo yi a nga yi veka ti to e tisa Mfumo wakwe wu ta fuma ha mafuni. Ngu mbimo yoneyo, mafu ma na tala ngu vathu vo dikha ni vo tsaka ava va khozelako Jehovha.​—Matewu 5:5; Vahebheru 10:36-39.

THEMBA JEHOVHA U NA VA NI LITSAKO

18. Mapswi ya Jehovha a gela Habhakuki ma mu khumbisile kutxani?

¹⁸ Lera Habhakuki 3:16-19. Ati Jehovha a nga gela Habhakuki ti mkhumbile ngutu. Habhakuki a alakanyisisile ngu ti Jehovha a nga mahela vathu Vakwe masiku msana. Se, likholo lakwe ka Jehovha li to kula. A ti ni themba ya ti ti to Jehovha a ndi na maha txo kari i si nga kale. Toneto ti mahile to Habhakuki e mana thavelelo hambiku a nga ti ti ziva ti to a ndi na xanisekanyana ngu mbimo yo kari. Habhakuki a si kana-kani. Hahanze keto, ene a ti themba ti to Jehovha a ndi na mu ponisa. Phela, mapswi aya a nga bhala ka ndimana 18, ti nga maha i di mapswi ya ma kombako kuthemba ngutu, ka mapswi mamwani aya hi nga ma manako mu ka Bhiblia. Vagondi vamwani va kholwa ti to eto ti womba ku: “Ni na ndaka-ndaka ngu litsako ka Mkoma; na sinya ni txi tsakela Txizimu.” Hi nga wona gondo ya lisima ayi hotshethu hi yi manako! Phela, Jehovha kha hi thembisi wumangwana wa wunene dwe, kambe a hi thembisa ti to i si nga kale a na hetisisa sithembiso soneso.

19. Kufana ni Habhakuki, Jehovha a nga hi thavelelisa kutxani?

¹⁹ Hi gonda mhaka ya lisima ngutu ka dibhuku da Habhakuki i ku kuthemba Jehovha. (Habhakuki 2:4) Ti to hi simama hi themba Jehovha ti lava hi tsanisa wuxaka wathu ni nene. Se, hi fanete ku (1) Khongela mbimo yotshe, hi gela Jehovha sikarato sathu ni kuvilela kwathu. (2) Engisela kwati ati Jehovha a ku gelako ngu kuthumisa Bhiblia ni kutumela kukongomiswa ngu sengeletano yakwe. (3) Va na ni likholo ni kutimisela hi txi rinzela Jehovha e hetisisa sithembiso sakwe. Habhakuki a mahile toneto. Hambiko, ene a nga ti karatekile, mbimo yi a nga va ni mabhulo ni Jehovha a gwitile e tsaniswa ni ku va ni litsako! Ngako hi txi tekelela txikombiso txa Habhakuki, nathu hi nga mana kuthavelelwa ngu kukhutarelwa ngu lirando la Jehovha Tate wathu wa nzumani. A walo wu a nga hi thavelelako ka mafu yawa o sina.