2 Cronicas
16 Sa ikakatloag-unom ka tuig sa paghari ni Asa, si Baasa+ nga hari sa Israel mitungas batok sa Juda ug nagtukod sa Rama,+ aron walay bisan kinsa nga makagula o makasulod ngadto kang Asa nga hari sa Juda.+ 2 Si Asa karon nagpagawas ug plata ug bulawan gikan sa mga bahandi sa balay ni Jehova+ ug sa balay sa hari+ ug gipadala ngadto kang Ben-hadad+ nga hari sa Sirya,+ nga nagpuyo sa Damasco,+ nga nag-ingon: 3 “Adunay pakigsaad tali kanako ug kanimo ug tali sa akong amahan ug sa imong amahan. Ania, ako nagapadala kanimo ug plata ug bulawan. Lakaw, bungkaga ang imong pakigsaad uban kang Baasa+ nga hari sa Israel, aron siya mosibog gikan kanako.”+
4 Busa si Ben-hadad namati kang Haring Asa ug gipadala ang mga pangulo sa iyang mga kasundalohan batok sa mga siyudad sa Israel, sa ingon ilang gihampak ang Ijon+ ug ang Dan+ ug ang Abel-maim+ ug ang tanang dapit nga tipiganan+ sa mga siyudad sa Neptali.+ 5 Ug nahitabo nga sa pagkadungog gayod ni Baasa bahin niini, iya dayong giundangan pagtukod ang Rama ug gihunong ang iyang buhat.+ 6 Kon bahin kang Asa nga hari, iyang gikuha ang tibuok Juda,+ ug ilang gidala ang mga bato sa Rama+ ug ang mga kahoy niini nga gigamit ni Baasa sa pagtukod,+ ug iyang gigamit kini sa pagtukod sa Geba+ ug Mizpa.+
7 Ug nianang panahona si Hanani+ nga tigpatin-aw sa panan-awon miadto kang Asa nga hari sa Juda ug unya miingon kaniya: “Tungod kay ikaw misalig sa hari sa Sirya+ ug wala mosalig kang Jehova nga imong Diyos,+ tungod niana ang kasundalohan sa hari sa Sirya nakaikyas gikan sa imong kamot. 8 Dili ba ang mga Etiopianhon+ ug ang mga Libyanhon+ usa man ka dako kaayong panon sa kasundalohan, sa mga karo ug sa mga mangangabayo;+ ug tungod sa imong pagsalig kang Jehova dili ba iya mang gitugyan sila nganha sa imong kamot?+ 9 Kay, kon mahitungod kang Jehova, ang iyang mga mata+ nagalibotlibot sa tibuok nga yuta+ aron ipakita ang iyang kusog alang niadtong kansang kasingkasing+ maoy bug-os alang kaniya. Labot niini ikaw milihok nga binuang,+ kay sukad karon aduna unyay mga gubat batok kanimo.”+
10 Apan, nasuko si Asa sa tigpatin-aw sa panan-awon ug siya gibutang didto sa balay sa sepohan,+ tungod kay siya naaligutgot kaniya gumikan niini.+ Ug gidaogdaog+ ni Asa ang pipila sa katawhan sa maong panahon. 11 Ug, tan-awa! ang mga kalihokan ni Asa, ang una ug ang kataposan, anaa sila nahisulat sa mga Basahon+ sa mga Hari sa Juda ug sa Israel.
12 Ug si Asa sa ikakatloag-siyam ka tuig sa iyang paghari nasakit sa tiil hangtod nga siya masakiton na kaayo;+ ug bisan sa iyang pagkasakit siya wala mangita kang Jehova+ kondili sa mga mananambal.+ 13 Sa kataposan si Asa natulog uban sa iyang mga katigulangan+ ug namatay sa ikakap-atag-usa ka tuig sa iyang paghari. 14 Busa sila naglubong kaniya sa iyang halangdong lubnganan+ nga iyang gikalot alang sa iyang kaugalingon didto sa Siyudad ni David;+ ug ilang gipahiluna siya sa higdaanan nga napuno sa lana sa balsamo+ ug lainlaing matang sa pahumot+ nga gisagol sa usa ka pahumot nga espesyal nga pagkahimo.+ Dugang pa, ilang gihimo ang dako kaayong pagsunog+ sa paglubong alang kaniya.