Awit ni Solomon
6 “Diin ba paingon ang imong minahal, Oh labing matahom taliwala sa kababayen-an?+ Diin ba padulong ang imong minahal, aron nga kami mangita kaniya uban kanimo?”
2 “Ang akong minahal milugsong ngadto sa iyang tanaman,+ ngadto sa mga tanaman sa mga yerbang-paalimyon,+ aron sa pagbantay sa kahayopan+ sa taliwala sa mga tanaman, ug aron sa pagkuhag mga lirio. 3 Ako iya sa akong minahal, ug ang akong minahal akoa.+ Siya nagabantay sa kahayopan+ sa taliwala sa mga lirio.”
4 “Ikaw maanyag, Oh akong hinigugma,+ sama sa Maanindot nga Siyudad,+ matahom sama sa Jerusalem,+ makalilisang sama sa mga tropa+ nga nagpundok libot sa mga bandila.+ 5 Ilingiw ang imong mga mata+ gikan sa akong atubangan, kay kini sila nakapakulba kanako. Ang imong buhok sama sa panon sa mga kanding nga nanglugsong gikan sa Gilead.+ 6 Ang imong mga ngipon sama sa panon sa mga bayeng karnero nga mihaw-as gikan sa pagkaligo, nga ang tanan nanganak ug kaluha, nga walay usa kanila nga nawad-an sa iyang mga nati.+ 7 Sama sa lusok sa granada ang imong mga tampihak luyo sa imong pandong.+ 8 Mahimong adunay kan-uman ka rayna ug kawaloan ka puyopuyo ug dili maihap nga kadalagahan.+ 9 Usa lamang ang akong salampati,+ ang akong walay-ikasaway.+ Usa lamang siya nga iya sa iyang inahan. Siya ang usa nga putli sa nanganak kaniya. Ang mga anak nga babaye nakakita kaniya, ug sila nagpahayag kaniya nga malipayon; mga rayna ug mga puyopuyo, ug sila nagdayeg kaniya,+ 10 ‘Kinsa man kining babaye+ nga nagadungaw sama sa kaadlawon,+ matahom sama sa takdol nga bulan,+ putli sama sa nagadan-ag nga adlaw,+ makalilisang sama sa mga tropa nga nagpundok libot sa mga bandila?’”+
11 “Ngadto sa tanaman+ sa mga kahoyng nuwes ako milugsong, aron tan-awon ang mga salingsing diha sa bul-oganang walog,+ aron tan-awon kon ang mga paras namutot na ba, kon ang mga kahoyng granada namulak na ba.+ 12 Sa wala ko pa hibaloi, ang akong kalag nagpahiluna na kanako diha sa mga karo sa akong katawhan nga andam moalagad.”
13 “Balik, balik, Oh Sulamita! Balik, balik, aron kami makakita kanimo!”+
“Unsay inyong nakita sa Sulamita?”+
“Ingon sa sayaw sa duha ka kampo!”