Jeremias
41 Sa ikapitong bulan, si Ismael+ nga anak ni Netanias nga anak ni Elisama, nga kaliwat sa hari* ug usa sa mga kadagkoan sa hari, miabot kang Gedalias nga anak ni Ahikam sa Mizpa,+ uban ang 10 ka lalaki. Samtang sila nagdungan ug pangaon didto sa Mizpa, 2 si Ismael nga anak ni Netanias ug ang 10 niya ka kauban mitindog ug gipatay si Gedalias nga anak ni Ahikam nga anak ni Sapan pinaagig espada. Busa iyang gipatay ang gitudlo sa hari sa Babilonya nga magdumala sa yuta. 3 Gipatay usab ni Ismael ang tanang Hudiyo nga kauban ni Gedalias sa Mizpa, ingon man ang Caldeanhong mga sundalo nga atua didto.
4 Sa ikaduhang adlaw human patya si Gedalias, sa wala pay nahibalo niini, 5 dihay nangabot nga 80 ka lalaki gikan sa Sekem,+ Shilo,+ ug Samaria.+ Binalbasan ang ilang mga bungot, ginisi ang ilang mga besti, ug sinamadsamaran ang ilang kaugalingon,+ ug nagdala silag halad nga lugas ug kamangyan+ alang sa balay ni Jehova. 6 Busa si Ismael nga anak ni Netanias migula gikan sa Mizpa aron sugaton sila, nga naghilak samtang naglakaw. Sa nagkasugat na sila, iya silang giingnan: “Pangadto mo kang Gedalias nga anak ni Ahikam.” 7 Apan pag-abot nila sa siyudad, gipatay sila ni Ismael nga anak ni Netanias ug sa iyang mga tawo, ug ilang gitambog sila sa gahong nga pondohanag tubig.
8 Apan dihay 10 kanila nga miingon kang Ismael: “Ayaw mig patya, kay duna miy mga tinagoang trigo, sebada, lana, ug dugos didto sa uma.” Busa wala niya sila patya uban sa ilang mga igsoon. 9 Karon gihulog ni Ismael sa dakong gahong nga pondohanag tubig ang tanang patayng lawas sa mga tawo nga iyang gipamatay, kadtong gahong nga gibuhat ni Haring Asa tungod kang Haring Baasa sa Israel.+ Kini ang gahong nga gipuno ni Ismael nga anak ni Netanias sa iyang mga pinatay.
10 Gibihag ni Ismael ang tanang uban pa sa katawhan sa Mizpa,+ lakip ang mga anak nga babaye sa hari ug ang tanang katawhan nga nahibilin sa Mizpa, nga gipadumala ni Nebuzaradan nga pangulo sa mga bantay kang Gedalias+ nga anak ni Ahikam. Gibihag sila ni Ismael nga anak ni Netanias ug miadto sa mga Ammonhanon.+
11 Dihang nabalitaan ni Johanan+ nga anak ni Karea ug sa tanang pangulo sa kasundalohan nga uban kaniya ang tanang daotang gibuhat ni Ismael nga anak ni Netanias, 12 ilang gidala ang tanang lalaki ug nangadto sa pagpakig-away kang Ismael nga anak ni Netanias, ug nakaplagan nila siya sa daplin sa dakong katubigan* sa Gabaon.
13 Ang katawhan nga gidalang binihag ni Ismael nalipay pag-ayo pagkakita nila kang Johanan nga anak ni Karea ug sa tanang pangulo sa kasundalohan nga uban niya. 14 Unya ang tanang katawhan nga gibihag ni Ismael gikan sa Mizpa+ mibalik ug mikuyog kang Johanan nga anak ni Karea. 15 Apan si Ismael nga anak ni Netanias ug ang walo sa iyang mga tawo miikyas gikan kang Johanan ug miadto sa mga Ammonhanon.
16 Gikuyog ni Johanan nga anak ni Karea ug sa tanang pangulo sa kasundalohan nga uban niya ang tanang nahibilin sa katawhan nga gikan sa Mizpa, nga ilang giluwas gikan kang Ismael nga anak ni Netanias human patya niini si Gedalias+ nga anak ni Ahikam. Gikan sa Gabaon, gidala nila ang mga lalaki, mga sundalo, mga babaye, mga bata, ug ang mga opisyal sa palasyo. 17 Busa sila migikan ug miestar sa balay-abtanan ni Kimham nga duol sa Betlehem,+ kay gusto nilang moadto sa Ehipto+ 18 tungod sa mga Caldeanhon. Kay sila nahadlok kanila, sanglit gipatay ni Ismael nga anak ni Netanias si Gedalias nga anak ni Ahikam, nga gitudlo sa hari sa Babilonya nga magdumala sa yuta.+