Deuteronomio
20 “Kon makiggubat mo sa inyong mga kaaway ug makita ninyo nga mas daghan silag kabayo, karo nga panggubat, ug sundalo, ayawg kahadlok nila kay si Jehova nga inyong Diyos nga nagpagawas ninyo sa Ehipto nagauban kaninyo.+ 2 Sa dili pa mo makiggubat, ang saserdote moduol ug mosulti sa katawhan.+ 3 Iyang ingnon sila, ‘Paminaw, Oh Israel, hapit na mong makiggubat sa mga kaaway. Ayaw mog kaluya. Ayaw mog kahadlok o kalisang o pangurog tungod nila, 4 kay si Jehova nga inyong Diyos nagauban kaninyo aron makig-away para ninyo batok sa inyong mga kaaway ug aron luwason mo.’+
5 “Ang mga opisyal sab angayng mosulti sa katawhan, ‘Kinsa ninyo ang nagtukod ug bag-ong balay ug wala pa makainagurar niini? Papaulia siya sa iyang balay kay basig mamatay siya sa gubat ug laing tawo ang moinagurar niini. 6 Ug kinsa ninyo ang nagtanom ug ubasan ug wala pa makapahimulos niini? Papaulia siya sa iyang balay kay basig mamatay siya sa gubat ug laing tawo ang makapahimulos niini. 7 Ug kinsa ninyo ang kaslonon? Papaulia siya sa iyang balay+ kay basig mamatay siya sa gubat ug laing lalaki ang makigminyo sa iyang pangasaw-onon.’ 8 Pangutan-on sab sa mga opisyal ang katawhan, ‘Kinsa ninyo ang nahadlok ug kulag kaisog?+ Papaulia siya sa iyang balay aron dili niya mapaluya ang uban parehas niya.’+ 9 Kon ang mga opisyal mahuman nag sulti sa katawhan, kinahanglang magtudlo silag mga pangulo nga manguna sa katawhan.
10 “Kon mosulong mo sa usa ka siyudad, ipahibalo sab ang inyong mga kondisyon sa pakigdait.+ 11 Kon mosugot sila sa inyong mga kondisyon ug ablihan nila ang ilang mga ganghaan, ang tanang tawo sa siyudad mainyo para sa pinugos nga pagtrabaho, ug sila mag-alagad kaninyo.+ 12 Apan kon dili sila makigdait ninyo ug makiggubat hinuon, likosi ang siyudad 13 ug kini itugyan kaninyo ni Jehova nga inyong Diyos, ug patya ang tanang lalaki sa siyudad pinaagig espada. 14 Pero ang mga babaye, mga bata, mga hayop, ug ang tanang naa sa siyudad, ang tanang inilog, puwede ninyong kuhaon para sa inyong kaugalingon,+ ug puwede ninyong gamiton ang tanang butang sa inyong mga kaaway, nga gihatag kaninyo ni Jehova nga inyong Diyos.+
15 “Kana ang inyong buhaton sa tanang siyudad nga layo kaayo sa inyo, walay labot ang mga siyudad niining mga nasod nga duol ninyo. 16 Apan sa mga siyudad niini nga katawhan, nga ihatag kaninyo ni Jehova nga inyong Diyos ingong panulondon, wala moy ibiling buhi.+ 17 Laglagon ninyo silang tanan, ang mga Hitihanon, Amorihanon, Canaanhon, Perizihanon, Hivihanon, ug Jebusihanon,+ sumala sa gisugo ni Jehova nga inyong Diyos; 18 aron dili mo nila matudloan sa pagbuhat sa tanang dulumtanang butang nga ilang ginahimo para sa ilang mga diyos, ug makasala mo kang Jehova nga inyong Diyos.+
19 “Kon likosan ninyo ang usa ka siyudad aron bihagon kini ug daghang adlaw na mong nakig-away niini, ayaw ninyog daota ang mga kahoy pinaagig atsa. Puwede mong mokaon sa mga bunga niini pero ayaw kinig putla.+ Kay inyo bang likosan ang kahoy sama sa inyong paglikos sa tawo? 20 Ang kahoy lang nga nahibaloan ninyo nga dili makaon ang bunga ang puwede ninyong daoton. Mahimo kining putlon ug gamiton sa paglikos sa siyudad nga nakiggubat ninyo hangtod mapildi kini.