Deuteronomio

9 “Pamati, Oh Israel, motabokay na mo karon sa Jordan+ aron mosulod ug papahawaon ang mga nasod nga mas dagko ug mas gamhanan kay kaninyo,+ mga siyudad nga dagko ug pinarilan sangko sa langit,+ 2 mga tawong dagko ug tag-as, ang mga Anakim,+ nga bahin kanila kamo nahibalo ug nakadungog sa giingon, ‘Kinsay makabarog batok sa mga Anakim?’ 3 Busa kinahanglan mong mahibalo karon nga si Jehova nga inyong Diyos maoy manguna ninyo sa pagtabok.+ Siya maoy nagalaglag nga kalayo,+ ug iyang laglagon sila. Pildihon niya sila sa inyong atubangan aron dali ninyo silang mapapahawa* ug malaglag, sumala sa gisaad ni Jehova kaninyo.+

4 “Dihang abogon sila ni Jehova nga inyong Diyos gikan sa inyong atubangan, ayaw pag-ingon, ‘Gidala ko ni Jehova dinhi aron panag-iyahon ning yutaa kay matarong ko.’+ Apan tungod sa pagkadaotan niining mga nasora+ maong giabog sila ni Jehova sa inyong atubangan. 5 Dili tungod kay matarong mo o tul-id mog kasingkasing mao nga makasulod mo aron panag-iyahon ang ilang yuta. Hinuon, tungod kini kay daotan kining mga nasora mao nga papahawaon sila ni Jehova nga inyong Diyos sa inyong atubangan,+ ug aron tumanon ang gipanumpa ni Jehova sa inyong mga katigulangan, kang Abraham,+ Isaac,+ ug Jacob.+ 6 Busa angay mong mahibalo nga dili tungod kay matarong mo nga ihatag kaninyo ni Jehova nga inyong Diyos kining maayong yuta aron mapanag-iya, kay gahi mog ulo* nga katawhan.+

7 “Hinumdomi ug ayaw gyod kalimti kon giunsa ninyo pagpasuko si Jehova nga inyong Diyos didto sa kamingawan.+ Sukad sa adlaw nga migawas mo sa Ehipto hangtod nga nakaabot mo dinhi, mirebelde mo kang Jehova.+ 8 Bisan didto sa Horeb gipasuko ninyo si Jehova mao nga nasuko pag-ayo si Jehova ninyo ug hapit mo niya laglaga.+ 9 Dihang mitungas ko sa bukid aron dawaton ang mga papan nga bato,+ ang mga papan sa pakigsaad ni Jehova kaninyo,+ nagpabilin ko didto sulod sa 40 ka adlaw ug 40 ka gabii,+ wala ko mokaon ug moinom. 10 Unya gihatag ni Jehova kanako ang duha ka papan nga bato nga gisulatan sa tudlo sa Diyos, ug nasulat niana ang tanang pulong nga gisulti ni Jehova kaninyo gikan sa kalayo didto sa bukid dihang nagtigom mo.+ 11 Pagkahuman sa 40 ka adlaw ug 40 ka gabii, gihatag ni Jehova kanako ang duha ka papan nga bato, ang mga papan sa pakigsaad, 12 ug giingnan ko ni Jehova, ‘Lakaw, lugsong dayon, kay ang katawhan nga imong gipagawas sa Ehipto naghimog daotan.+ Dali ra kaayo silang mitipas sa dalan nga akong gipasubay nila. Naghimo silag metal nga imahen* para sa ilang kaugalingon.’+ 13 Unya giingnan ko ni Jehova, ‘Nakita nako ni nga katawhan, ug tan-awa! gahi silag ulo.*+ 14 Pasagdi kong laglagon sila ug papason ang ilang mga ngalan gikan sa yuta,* ug himoon ti ka nga dakong nasod nga mas gamhanan ug mas daghag molupyo kay kanila.’+

15 “Dayon milugsong ko gikan sa bukid samtang nagdilaab kini,+ ug ang duha ka papan sa pakigsaad naa sa akong duha ka kamot.+ 16 Unya akong nakita nga nakasala mo batok kang Jehova nga inyong Diyos! Naghimo mog metal* nga nating baka para sa inyong kaugalingon. Dali ra kaayo mong mitipas sa dalan nga gipasubay ni Jehova kaninyo.+ 17 Busa akong gibusdak ang duha ka papan ug napusgay kini sa inyong atubangan.+ 18 Unya, parehas sa una, mihapa ko sa atubangan ni Jehova sulod sa 40 ka adlaw ug 40 ka gabii. Wala sab ko mokaon ug moinom+ tungod sa tanang sala nga inyong gibuhat dihang mihimo mog daotan sa atubangan ni Jehova ug gipasuko siya. 19 Kay nahadlok ko sa grabeng kasuko ni Jehova kaninyo,+ nga tungod niana hapit mo niya laglaga. Apan namati na sab si Jehova nako niadtong higayona.+

20 “Nasuko pod kaayo si Jehova kang Aaron ug laglagon na unta niya siya,+ pero mihangyo sab ko para kang Aaron niadtong higayona. 21 Unya akong gikuha ang nating baka nga inyong gihimo,+ nga maoy hinungdan nga nakasala mo, ug gisunog kini. Gidugmok nako kini ug gipulpog hangtod nga napino kini parehas sa abog. Ug akong gilabay ang abog didto sa sapa nga nag-agos gikan sa bukid.+

22 “Gipasuko pod ninyo si Jehova didto sa Tabera,+ Masah,+ ug Kibrot-hataava.+ 23 Dihang gipalakaw mo ni Jehova gikan sa Kades-barnea+ ug giingnan, ‘Tungas ug panag-iyaha ang yuta nga ihatag gyod nako kaninyo!’ misupak na sab mo sa sugo ni Jehova nga inyong Diyos,+ ug wala mo magpakitag pagtuo+ niya ug wala ninyo siya tumana. 24 Masinupakon mo kang Jehova sukad nga nailhan ta mo.

25 “Busa mihapa ko sa atubangan ni Jehova sulod sa 40 ka adlaw ug 40 ka gabii.+ Gibuhat nako ni kay miingon si Jehova nga iya mong laglagon. 26 Mihangyo ko kang Jehova ug miingon, ‘Oh Soberanong Ginoong Jehova, ayaw laglaga ang imong katawhan. Ikaw ang tag-iya nila*+ ug gitubos nimo sila pinaagi sa imong dakong gahom ug gipagawas sila sa Ehipto pinaagi sa imong gamhanang kamot.+ 27 Hinumdomi ang imong mga alagad nga si Abraham, Isaac, ug Jacob.+ Ayaw intawon tagda ang kagahig ulo niini nga katawhan, ang ilang pagkadaotan, ug ang ilang sala.+ 28 Kay basig moingon ang katawhan sa yuta diin imo ming gipagawas: “Si Jehova wala makahimo sa pagdala nila sa yuta nga iyang gisaad kanila, ug kay nagdumot siya nila, iyang gipagawas sila aron pamatyon sa kamingawan.”+ 29 Kay katawhan nimo sila ug ikaw ang tag-iya nila,*+ ug gipagawas nimo sila pinaagi sa imong dako kaayong gahom.’+