Job
4 Unya si Elipaz+ nga Temanhon mitubag:
2 “Kon may makigsulti nimo, kapoyan ba kang maminaw?
Kay kinsa bay makaako nga magpakahilom na lang?
3 Tinuod, daghan kag gitul-id,
Ug gipabaskog nimo kaniadto ang luya nga mga kamot.
4 Ang imong mga pulong makabangon niadtong nangapandol,
Ug imong gipalig-on kadtong huyang ug mga tuhod.
6 Wala ba diay makahatag nimog pagsalig ang imong kahadlok sa Diyos?
Wala ba diay makahatag nimog paglaom ang imong paglakaw diha sa integridad?+
7 Palihog hinumdomi: Kinsa bang tawhana ang gilaglag nga inosente?
Kanus-a ba nga ang tawong matarong gipapha?
8 Nakita nako nga kadtong nagdaro* ug pagkadaotan
Ug kadtong nagpugas ug kasamok managsama ug anihon.
9 Pinaagi sa gininhawa sa Diyos sila mangalaglag,
Ug pinaagi sa silaob sa iyang kasuko sila mangaut-ot.
10 Ang leyon mongulob, ingon man ang batang leyon,
Apan bisan ang mga ngipon sa kusgang mga leyon* mangahingo.
11 Ang leyon mamatay kon walay tukbonon,
Ug ang mga nati sa leyon magkatibulaag.
12 Karon dihay pulong nga gisulti kanako sa tago,
Ug gihunghong kini sa akong dalunggan.
13 Sa kagabhion, dihang ang mga tawo nahinanok sa pagkatulog,
Nakadawat kog mga panan-awon nga nakapatugaw sa akong hunahuna.
14 Ug nahadlok ko pag-ayo,
Ang tanan nakong kabukogan nangurog.
15 Dihay espiritu nga milabay sa akong atubangan;
Ang akong mga balhibo nanglimbawot.
16 Dayon kini mihunong,
Apan wala nako mailhi ang dagway niini.
Dihay anino atubangan sa akong mga mata;
Dihay kahilom, ug dayon nakadungog kog tingog:
17 ‘Duna bay tawo nga mas matarong pa kay sa Diyos?
Duna bay tawo nga mas hinlo pa kay sa iyang Magbubuhat?’
19 Labaw na gyod kadtong nagpuyo sa mga balay nga yutang kulonon,
Nga ang pundasyon anaa sa abog,+
Kinsa dali rang pigsaton sama sa usa ka nagapangutkot nga insekto!
20 Sa buntag, sila buhi pa ug pagkagabii patay na;
Sila mangahanaw hangtod sa hangtod, ug walay usa nga magtagad.
21 Dili ba sama sila sa tolda nga nahapla kay gikuhaag pisi?
Sila mangamatay nga walay kaalam.