Deuteronomio
18 “Ang mga saserdote nga Levihanon ug ang tibuok tribo ni Levi wala hatagig bahin o panulondon sa Israel. Mokaon sila gikan sa mga halad nga ginasunog para kang Jehova, nga iyang panulondon.+ 2 Busa sila walay panulondon taliwala sa ilang mga igsoon. Si Jehova ang ilang panulondon, sumala sa iyang gisulti kanila.
3 “Kini ang angayng madawat sa mga saserdote gikan sa katawhan: Bisan kinsa nga maghalad ug torong baka o karnero, angay niyang ihatag sa saserdote ang abaga, apapangig, ug tiyan niini. 4 Ihatag ninyo kaniya ang mga unang bunga sa inyong lugas, sa inyong bag-ong bino, sa inyong lana, ug ang unang mga balhibo nga gitupi gikan sa inyong mga karnero.+ 5 Siya ug ang iyang mga anak nga lalaki ang gipili ni Jehova nga inyong Diyos gikan sa tanan ninyong tribo aron mag-alagad kanunay sa ngalan ni Jehova.+
6 “Apan kon may Levihanon nga mobiya sa usa sa inyong mga siyudad sa Israel diin siya nagpuyo+ ug gusto siya* nga moadto sa dapit nga gipili ni Jehova,*+ 7 puwede siyang mag-alagad didto sa ngalan ni Jehova nga iyang Diyos parehas sa tanan niyang igsoon nga Levihanon nga nag-alagad didto kang Jehova.+ 8 Ang iyang bahin nga pagkaon parehas ra sa ilang bahin,+ gawas pa sa halin nga iyang madawat sa pagbaligya sa kabtangan nga iyang napanunod.
9 “Dihang makasulod na mo sa yuta nga ihatag kaninyo ni Jehova nga inyong Diyos, ayawg sundoga ang dulumtanang mga buhat sa maong mga nasod.+ 10 Kinahanglang walay bisan kinsa ninyo nga magsunog* sa iyang anak nga lalaki o babaye,+ manag-an,+ maghimog salamangka,+ mangitag mga tilimad-on,+ mamarang,+ 11 manglamat, mangonsultag espiritista+ o mananag-an,+ o magpakisayod sa mga patay.+ 12 Kay gidumtan ni Jehova kadtong nagabuhat niining mga butanga, kay tungod niining dulumtanang mga butang nga giabog sila ni Jehova nga inyong Diyos sa inyong atubangan. 13 Kinahanglang walay ikasaway kaninyo si Jehova nga inyong Diyos.+
14 “Kay kining mga nasora nga inyong papahawaon naminaw sa mga salamangkero+ ug mga mananag-an,+ apan si Jehova nga inyong Diyos dili motugot nga inyo kining sundogon. 15 Gikan sa inyong mga igsoon, si Jehova nga inyong Diyos magtudlo alang kaninyo ug propeta nga sama kanako. Kinahanglan mong mamati niya.+ 16 Tubag kini sa inyong gihangyo kang Jehova nga inyong Diyos dihang nagtigom mo sa Horeb.+ Miingon mo, ‘Ayaw na mig padungga sa tingog ni Jehova nga among Diyos o pakit-a niining dakong kalayo aron dili mi mamatay.’+ 17 Unya giingnan ko ni Jehova, ‘Maayo ang ilang gisulti. 18 Magpadala kog propeta nga sama nimo gikan sa ilang mga igsoon,+ ug isulti nako kaniya kon unsay iyang isulti,+ ug iyang isulti kanila ang tanan nakong gisugo kaniya.+ 19 Manubag kadtong dili mamati sa akong mga pulong nga iyang isulti pinaagi sa akong ngalan.+
20 “‘Kon may propeta nga mangahas sa pagsultig butang nga wala nako isugo kaniya gamit ang akong ngalan o mosulti gamit ang ngalan sa ubang mga diyos, kana nga propeta angayng patyon.+ 21 Apan basin maghunahuna mo: “Unsaon namo pagkahibalo nga dili gikan kang Jehova ang iyang gisulti?” 22 Kon ang propeta misulti pinaagi sa ngalan ni Jehova ug wala kini mahitabo o matuman, nan dili gikan kang Jehova ang iyang gisulti. Ang propeta nangahas sa pagsulti niana. Ayaw mog kahadlok niya.’